Provébiu 9:1-18
9 Rowaihu iwẽ hã ma tô sima ꞌri hã ꞌmanha. Ma tô duré 7 na ꞌri uparizéb da hã te te sõré.
2 Ma tô danhimizama hã te te simro, datoi u dasazéb da hã. Uva ꞌrãi waꞌu isé, da te iwazari da hã, ma tô duré siwi waꞌu. Duré ma tô siwi sõré, dasaihurizéb da hã.
3 Tawamhã tite romhuriꞌwai ma hã ma tô duré ꞌru zaꞌra, ꞌri nhoꞌõmo ꞌre, isisi hawi, hârâ ꞌrãihâ na dazô hârâ zaꞌra da hã, ãne:
4 “Asimirosaꞌrata prãire norĩ, we asisisi aba!” Tawamhã aꞌuwẽ isimizaꞌreseꞌõ norĩ ma, te duré tãma nharĩ zaꞌra, ãne:
5 “We aiꞌabaꞌréi waꞌaba, ĩte dasa hã huri aba da, duré uva ꞌrãi waꞌu isé te dama iꞌmanharĩ hã âhuri aba da.
6 Maꞌãpé, rẽme pese zaꞌra waꞌaba, isimizaꞌreseꞌõ norĩ hã, rowẽ na ꞌre iꞌaihâimana zaꞌra waꞌaba mono zé hã asina uwaimrami zaꞌra waꞌaba da. Daꞌrãi waihuꞌu wẽ na ꞌre idanomro mono zém na bâdâdi na si ꞌre anomro aba mono.”
7 Niꞌwa hã daꞌãma ꞌre iwaꞌẽi mono ma, te te pẽtẽ wamhã, te za ꞌrâwi sitẽme ꞌwani, siꞌãma iwasétézé hã. Duré niꞌwa hã aibâ iwasété ma, te te pẽtẽ wamhã, te za tinhisi wazébꞌõ hã sitẽme ꞌwani.
8 Niwamhã daꞌãma ꞌre iwaꞌẽi mono ma hã ꞌre pẽtẽ mono tõ. Ãnei õ wamhã, te za asada hã ꞌre sahi. Tane nherẽ, niꞌwa iꞌrãi waihuꞌu wẽ ma, ꞌre pẽtẽ mono wamhã, te za te te ꞌre aiwazé.
9 Niꞌwa iꞌrãi waihuꞌu wẽ ma, marĩ na ãma tãma ꞌre roti mono wamhã, te za tiꞌrãi waihuꞌu wẽ hã te te ãma sima ꞌre saꞌẽtẽ. Duré iꞌuwaibaba si ꞌre imorĩ ma, marĩ na ãma tãma ꞌre rowaihuꞌu mono wamhã, te za tiꞌrã nhimizaꞌre hã te te sima ꞌre saꞌẽtẽ.
10 Rowaihu iwẽ hã da te ꞌre waihuꞌu zaꞌra mono da wamhã, te za Uburé Danhibꞌapito hã da te dasiwi ꞌre wazéb zaꞌra. Duré ꞌRe ihâimana uꞌâsi mono, marĩ iwasédé, ãma ꞌre ihâimana mono õ, da te ꞌre waihuꞌu zaꞌra mono wamhã, te za daꞌrã nhimizaꞌre iwẽ hã dama ꞌre hâimana zaꞌra.
11 Rowaihu iwẽ hã aima ꞌre ihâimana mono zéb zarina, te za ꞌre iꞌaihâimana hâ mono zéb da, bâdâ hã aima ꞌre siꞌapraba.
12 Aiꞌrãi waihuꞌu wẽ na ꞌre aihâimana mono wamhã, te za iwẽ hã asima ꞌre isaꞌẽtẽ mo, ate da hã. Duré daꞌãma ꞌre aiwaꞌẽi mono wamhã, te za taha zarina ꞌre irobzépata mono na hã ꞌre aihâimana mo.
13 Danhimizaꞌrese ãna ꞌre idanomro mono zé hã, aiwa piꞌõ isimirosaꞌrata prãire, tãma rowazéb ãna mreme sihâimo na te te ꞌre inharĩ mono ne hã.
14 Ta hã tinhibꞌridawa ãma, niha wamhã, duré ꞌri nhoꞌõmo ãma dasimasisizé iꞌrãihâ na ꞌre simasisi mono ré,
15 te tite na te te ꞌre iroꞌrahâri zaꞌra mono hã te te ꞌre abꞌmahârâ, ãne:
16 “Asimirosaꞌrata prãire norĩ, we asisi aba!” Ãne te duré isimizaꞌreseꞌõ norĩ ma, te te ꞌre anharĩ:
17 “Â da te ꞌre isimiꞌuri zaꞌra mono hã sei uptabi di. Duré iꞌuꞌẽtẽ wapu piꞌuriwi dasimaꞌuri sina da te ꞌre ihuri mono sei uptabi di.”
18 Tane nherẽ, piꞌõ te te iꞌmahârâ zaꞌra norĩ hã te te waihuꞌu zaꞌra õ di, isõrõwa ꞌre, adâꞌâ norĩ pẽꞌẽzani ꞌre ihâimana zaꞌra mono na hã. Tawamhã niꞌwam norĩ hã piꞌõ te te ãma ꞌre saze zaꞌra mono wamhã, te za ꞌre idadâꞌâ zaꞌra mono zéb u hã ꞌre sisisi.
