Provébiu 27:1-27
27 Asiꞌmadâꞌâ ze zéb zarina, za awẽb da, asima irowaꞌõtõzé hã dama wasuꞌu tõ. E marĩ wa. Aima waihuꞌu õ wa, awẽm na za marĩ asô iwatobrozé hã.
2 Asiꞌuihâ na ꞌrâwi hã asina ꞌre aiwata mono õ di za, aimawi norĩ si aiꞌãma ꞌre wata pibui pese zaꞌra mono da.
3 Ẽtẽ norĩ, supara me hã pire uptabi zahuré di. Tane nherẽ, isimizaꞌreseꞌõ norĩ nhimirobꞌmanharĩ wasété zarina roꞌwaꞌrutuzé hã pire uptabi di, isipai u zahuré.
4 Danhitiꞌru hã, daꞌãma dasibaꞌõzé, te ꞌre hâimana. Dahâimana wẽ uprosiꞌwa, te duré ꞌre hâimana. Tane nherẽ, marĩ na da te ꞌre idaꞌruiwapari zaꞌra mono zé hã wasété uptabi di, isipai u.
5 Wẽ di, niꞌwai ma, isawi zarina sõꞌawi da te tãma ꞌre ipriꞌi zaꞌra mono zé hã. Da te ꞌre dazawi zaꞌra mono nherẽ, da te dama ꞌre ipriꞌi zaꞌra mono õ zép si hã wẽ õ di.
6 Niꞌwa wasiwaihu te te wama ipẽtẽ zarina, te te waꞌuꞌa nherẽ, wama hã umnhasi uꞌâsi di. Tane nherẽ, asiꞌru tinhoꞌutu te te aiꞌâri wamhã, te za asiꞌmadâꞌâ pe.
7 Niꞌwa, te te ꞌmahâiwĩrĩ wamhã, ropĩ hã te za tô wẽꞌõ. Tane nherẽ, niꞌwai ma, mrab uptabi wamhã, te za dasa hã sé nherẽ, ise na hã tãma tihâiba.
8 Niꞌwa, tinhorõwa nhiti romhâ na ꞌre ihâimana mono hã, aiwa sire tizasi nhiti sina ꞌre ipahâ zaꞌra mono ne hã te ꞌre hâimana.
9 Dasisadazezém na ꞌre dasiꞌmawamarĩ zaꞌra mono wa, te te dama ꞌre irowẽ zani zaꞌra mono ne, te sena na ꞌre idasisawi zaꞌra mono zé hã te te dama ꞌre rowẽ zani zaꞌra.
10 Asiwaihu hã aimama siwaihuꞌu me hã, rẽme zahuré tõ. Tôꞌã! Duré ropire na aihâimana wamhã, asisãnawã te te aipawaptob da hã tiwi rowaptẽrẽ tõ. E marĩ wa. Asisãnawã romhâ na ꞌre ihâimana mono nhipai u, ꞌrâwi aiwaptoma ꞌre ihâimana mono hã saꞌẽtẽ dâꞌâsina aima hã.
11 Ĩꞌra, aiꞌrãi waihuꞌu wẽ na hã ꞌre aihâimana mono. Tawamhã ĩma ꞌre rowẽ mono di za. Duré ãhã wamhã, ĩma waihuꞌu pese di, ĩma ipẽtẽꞌwa norĩ ma, niha na iwẽ na te ãma ꞌre iꞌazadaꞌâbâ mono da hã.
12 Isimizaꞌrese wẽ, marĩ isimimnha te te ꞌmadâꞌâ wamhã, te za tãma aiꞌré, ãma wati na ré. Tane nherẽ, isimirosaꞌrata prã hã te za õne haré itẽme mo. Ãhã wamhã, te za robzépada hã sitẽme ꞌwani.
13 Niꞌwa, dasiré aꞌuwẽꞌõ hâiba waptoꞌwa na marĩ waꞌâbâꞌwa da, dama ꞌre hâimana mono da, te te sima wẽ wamhã, te za tiꞌuza hã sena na te te ãma ꞌre idapawaꞌâbâ mono zé te te roptete da hã dama tisõ.
14 Niꞌwa robzaꞌrã ré iwaptoma ꞌre ihâimana mono hã hârâ ꞌrãihâ na te te sawi wamhã, tame te za hârâ ꞌrãihâ na te te isawizém na hã marĩ iwasété da ne, ãma rosaꞌrata.
15 Damro piꞌõ timreme na isimiwati pe hã aiwa tã ꞌre pĩni nhimizahâri mono õ wa, tãꞌaꞌa ꞌre itoptõrĩ nhimizahâri zaꞌra mono õ ne hã te ꞌre hâimana.
16 E ariꞌiwi ꞌre ihâimana mono da hã tãma ꞌmanharĩ waihuꞌu pese di. Mare di, waihuꞌu õ di, rowaꞌu simizazâri da, da te tãma iꞌmanharĩ waihuꞌu õ ne, duré wedewaꞌu to danhibꞌrata na da te iꞌâri waihuꞌu õ ne.
17 Isiꞌuwazi tete na roꞌwa, ꞌre isiꞌwa siꞌuiwa zaꞌra mono ne, te dasiré norĩ me hã rosaꞌrata wẽ na ꞌre dasipawaptob siꞌuiwa zaꞌra.
18 Niꞌwa, robꞌrã figu wede te te ꞌre ꞌmadâꞌâ wẽ mono wamhã, te za iꞌrã hã te te ꞌre ꞌmasi. Duré niꞌwa tinhibꞌihâꞌa te te ꞌre ꞌmadâꞌâ wẽ mono wamhã, te za isimiꞌmadâꞌâ wẽ zé hã da te ãma ꞌre wazéb zaꞌra.
19 Â na ꞌre idasiꞌubu ꞌmadâꞌâ waihuꞌu pese zaꞌra mono ne, te za dapẽꞌẽ ꞌre danhimirosaꞌrada hã te te dama ꞌre ahâiꞌré, dawẽ na, duré dawasété na ꞌre idahâimana zaꞌra mono zé hã.
20 Niha hã dasihawim na marĩ da te ꞌre iꞌruiwapari zaꞌra mono zé hã sitõ waihuꞌu õ di, adâ ꞌre ihâimana zaꞌra mono zéb u, ꞌre idanhisisi ꞌrãsutu waihuꞌu mono õ ne hã.
21 Ẽtẽ waipo pré oru hã, ẽtẽ waipo prã prata me, te za unhama na da te ꞌre pibu zaꞌra, iꞌuptabi zô. Tane te za duré iwẽ norĩ hã sena zô da te ꞌre pibu zaꞌra.
22 Trigu ꞌrã hã waꞌĩni na da te ꞌre isu pese zaꞌra mono ne, isimizaꞌreseꞌõ, a hã ꞌre wati mono nherẽ, te za õ hã iwana ꞌre ihâimana mono zém ne tinhimizaꞌrese õ na hã te te ãma ꞌre uzusi uꞌâsi.
23 Ate poneꞌẽrebâ norĩ hã, duré powawẽ norĩ hã niha na aima ihâimana zaꞌra zô ꞌre awaihuꞌu mono da hã sada ꞌre asiptete mono.
24 E marĩ wa. Danhimarĩ zaꞌẽne hã duré apito siꞌuirĩ na tiꞌra ma, daꞌmadâꞌâzép te tinhoprezé nhomrizé hã õne uꞌâ dama ꞌre hâimana zaꞌra mono õ na dâꞌâsina.
25 Imorĩꞌrata na te za danhimizama sazé hã ꞌre iꞌanhihâri mo. Tawamhã ta hã apâ iꞌwanhipré zô ꞌre robꞌmadâꞌâ mono ré, te za duré saꞌa na du hã ꞌre iꞌanhihâri mo.
26 Tawamhã te za poneꞌẽrebâ zéré mapure na daꞌuzazé hã ãma ꞌre iꞌabꞌmanharĩ mo. Te za duré poneꞌẽrebâ zéré uzé waꞌâbâ na hã tiꞌa ꞌre iꞌmaiꞌuipra mo.
27 Tawamhã te za poneꞌẽrebâ hâiwaꞌu ꞌmanharĩ uꞌẽne hã ꞌre isi mono da hã saꞌẽtẽ na aima ꞌre hâimana, aiꞌra norĩ ma zama, duré aima romhuriꞌwa norĩ sipiꞌõ siꞌuparizéb da zama.
