Provébiu 26:1-28
26 Robꞌré siwaprã rowahâzé pĩni uꞌẽne ꞌre itaꞌa mono ne, duré niha wamhã, roptehâri siwaprã tã ꞌre itaꞌa mono ne, niꞌwa hã ihâimana nhimizaꞌreseꞌõ ãma ꞌre iwata mono zé hã te te rowazari õ di, sadai õ wa.
2 Buruꞌõtõre wara wairébé ãna ꞌre isisaꞌrei mono ne, iwẽ ma, ropipa da te ãma ꞌre ipisutu zaꞌra mono zém na hã da te ãma ꞌre waibui waihuꞌu mono õ di.
3 Awaru ahârizéb da, te ihâ nhorõ hã sada ꞌre hâimana zaꞌra. Duré awaru poꞌre pore da, te isiꞌuwazi nhiꞌodo iwata wazizé hã sada ꞌre hâimana zaꞌra. Tane te wedehu waré hã, hâimana nhimizaꞌrese ãna ꞌre ihâimana zaꞌra mono norĩ ba ãma iꞌahârizéb da hã, sada ꞌre hâimana zaꞌra.
4 Ihâimana nhimizaꞌreseꞌõ nhinharĩzém na, aiwam na a hã ãma sadaꞌâbâ wamhã, te za õhõ sine tawamhã oto ꞌre aihâimana mo.
5 Ihâimana nhimizaꞌreseꞌõ nhimirobzanhamri waꞌrãmip si ãma sadaꞌâbâ, tiꞌrãi waihuꞌu pese na te te sina rosaꞌrata upa tõ da.
6 Niꞌwa tipara te te isizâri ne, niha wamhã, duré marĩ isé te te izâꞌrẽne ne, te ꞌre hâimana, ihâimana nhimizaꞌreseꞌõ romreme ré, da te ꞌre satõrĩ zaꞌra mono wamhã.
7 Imorĩꞌõ hi hã taré ꞌre isiwaiwẽrẽ zaꞌra mono ne, te rowaihuꞌu wẽ na ihâimana nhimizaꞌreseꞌõ nhimirobzanhamrizé hã taré pese ꞌre hâimana.
8 Isimizaꞌreseꞌõ ãma ꞌre idawata zaꞌra mono zé hã aiwa powawẽ hâ ꞌmanharĩ, ẽtẽ ré da te ꞌre iwasisi zaꞌra mono ne hã.
9 ꞌWabzéré pa nhipti iꞌrãsiwamnarĩ norĩ nhibꞌrata ꞌre ihâimana mono ne, te rowaihuꞌu wẽ na ihâimana nhimizaꞌreseꞌõ norĩ nhimirobzanhamrizé hã taré pese ꞌre hâimana zaꞌra.
10 Roptedeꞌwa siwaꞌru simizaꞌrese ãna ꞌre ihâimana zaꞌra mono, te te tãma ꞌre romhuri zaꞌra mono da, te te ꞌre waibui mono wamhã, te za uburé tãma iromhuriꞌwa norĩ wi hã te te tiwi ꞌre rowamnarĩ zaꞌra, romhâ pese ꞌwa tiꞌi na siwaꞌru te te ꞌre idaꞌaꞌuꞌa mono ne.
11 Wapsã tinhoꞌo te te ꞌre huri mono da, apâ sô ꞌre isiꞌãsi zaꞌra mono ne, te za isimizaꞌreseꞌõ, tinhimizaꞌrese õ zarina marĩ hã te te ꞌre abꞌmanharĩ zahu.
12 E aima waihuꞌu pese di, niꞌwa hã tiꞌrãiwaihuꞌu wẽ na ꞌrâwi ꞌre isiꞌmadâꞌâ zei mono hã. Taha ma hã rowẽ õ di za. Isimizaꞌreseꞌõ ma si, tãma rowẽ di za, õhõ nhipai u iwaꞌrãmi.
Iwaꞌa wasuꞌu
13 Iwaꞌa hã te za tinha ãne: “Huꞌu zérépa te bâdâdi wamhã nhamra. Te te ĩꞌâri wamhã, bété.”
14 ꞌRidawa tétézé taré ꞌridawa ré nasi isipizari ne, te za iwaꞌa hã taré nasi aipiza, tinhimiwaptâ wamhã.
15 Sima iwaꞌa, tizadawa u tisa hã te te sima ꞌre zai waihuꞌu mono õ di, waꞌa uptabi wa.
16 Iwaꞌa hã te duré siꞌãma ꞌrâwi te te ꞌre rosaꞌrata, 7 na aibâ norĩ iꞌuwaibaba na si ꞌre isimizadaꞌâbâ zaꞌra mono nhipai u marĩ tãma iwaihuꞌu pese na hã.
Rowaihuꞌu wẽ hâiba amoi wasuꞌu
17 Niꞌwa damreme na dasiꞌwapé tẽme itei õ nherẽ, õne haré isébré hã, aiwa wapsã rowẽ na te te roꞌrazâri ré ipoꞌre na da te ꞌre iwaibui mono ne hã.
18 26:18-19 Niꞌwa tisiré ma isadawa nhipe, te za taré mreme to na te te inharĩ na hã tãma siwasuꞌu. Ta hã te iꞌrãsiwamnarĩ ti iꞌrãꞌwa roꞌo ré siwaꞌru te te ꞌre iꞌanhamra mono ne hã ꞌre hâimana.
19 ꞌMadâꞌâ 26:18
20 Mimi õ wamhã, uzâ hã te za dârâ. Tane robâsi zei ꞌwa hâimana õ wamhã, te za duré damreme na dasiꞌahâri hã aiꞌutõ.
21 Wedepro hawimhã te préꞌa hã ꞌre hâimana. Duré mimi hawimhã te uzâ hã ꞌre hâimana. Tane te duré isiꞌwapé zei hawimhã dasiꞌwapé hã ꞌre sãnaꞌrata.
22 Dabâsi zeiꞌwa norĩ mreme hã aiwa dasai waꞌõtõre ise, dapẽꞌẽ u ꞌre isisisi mono ne hã te ꞌre hâimana.
23 Damreme hã iwẽ newa te romana wawimhã ꞌre hâimana, dapẽꞌẽ ꞌremhã wasété uptabi nherẽ, zéꞌa na ubꞌrẽ hã waipo da, da te ꞌre iꞌmaꞌwamarĩ mono ne.
24 Ihâimana siꞌamoi pese na ꞌre ihâimana mono hã te te ꞌre daꞌruiwapari ahâ zaꞌra mono nherẽ, te timreme wẽ na hã te te ꞌre suwa zaꞌra, sadawa nhipese na.
25 Ta hã dama ꞌre mreme wẽ mono nherẽ, te te inharĩzém na hã ãma ꞌre sazei mono õ di za. E marĩ wa. Ipẽꞌẽ ꞌremhã isimirosaꞌrada hã wasété uptabi wa.
26 Daꞌruiwapari na simaꞌuri sina dawi ꞌre hâimana mono da nherẽ, te za uburé dasiwi da te ꞌre upsibi nhamra, tiwasédé te te ꞌre iꞌmanharĩ mono zém na hã.
27 Niꞌwa hã abꞌre ꞌrehâ iwa ꞌre darereꞌe mono da, te te dama abꞌre nherẽ, te za sisaꞌrese ãna iwa waptãrã. Duré niꞌwa ẽtẽ tõmo wawẽ, te te dazô pizari mono nherẽ, te za ẽne hã apâ sô tõmo siwairĩ, te te wĩrĩ da hã.
28 Niꞌwa isadawa nhipe, te te ꞌre idaꞌaꞌruiwapari mono zarina, te za te te ãma ꞌre daꞌaꞌuꞌa, niha na hã. Imreme nhipe hã te za duré tinhimirobꞌrãmi na ropipa hã te te dazô ꞌre azani.
