Provébiu 17:1-28
17 Iꞌuꞌẽtẽ wapu wẽꞌẽi ꞌré si, da te ꞌre huri mono nherẽ, dapẽꞌẽ ꞌre dama ꞌre irowẽ zaꞌra mono si, wẽ uptabi di. ꞌRi ꞌre dasa isaꞌẽtẽ na ꞌre dasaihuri uꞌâsi mono nherẽ, ãma ꞌre idasihâ zaꞌra mono hã, taha si wẽꞌõ di.
2 Pawaꞌâbâ ãna dama romhuriꞌwa iꞌrãiwaihuꞌu pe hã te za tiꞌmadâꞌâꞌwai ꞌra hã sipa, tinhimiwadaꞌuri na, timama ma, te te sina irowazém hiri hã. Taha zarina te za duré imama nhimarĩ zama isisãnawã norĩ siré sima ꞌmaiꞌâ, iꞌuirĩ na hã.
3 Ẽtẽ waipo pré oru hã, ẽtẽ waipo prã prata me, te za unhama na da te ꞌre pibu zaꞌra, iꞌuptabi zô. Tane te Uburé Danhibꞌapito hã sena na niha na dapẽꞌẽ ꞌre danhimirosaꞌrata na ꞌre idahâimana zaꞌra mono zé hã te te ꞌre apibu.
4 Iwasété norĩ hã te za tihâiba amoi mreme wasédé hã te te ꞌre wapari pese zaꞌra. Duré isadawa nhipese norĩ hã te za senaiꞌõ na rowasuꞌu hã te te ꞌre wapari ze zaꞌra.
5 Niꞌwa hã isimarĩꞌõ ãma ꞌre waꞌẽi mono wamhã, taha uꞌâbâ te duré ꞌRe ihâimana uꞌâsi mono ipotoꞌwai ãma hã te te ꞌre wasété. Duré ropipa hã dazô watobro wa, te te daꞌãma sima irowẽ hã, tãma robꞌmanharĩ wasété ãna ihâimana da hã, mare di za.
6 Danhihudu hã te za da te ꞌre ꞌmadâꞌâ ze zaꞌra, da te ꞌre iwẽsãmri zaꞌra mono zéb zarina. Tane te za duré daꞌra norĩ hã timama hâimanazé hã te te ꞌre ꞌmadâꞌâ ze zaꞌra, te te ꞌre iwẽsãmri zaꞌra mono zéb zarina.
7 Isimizaꞌreseꞌõ, damreme iwẽ na te te inharĩzéb da hã te te wazari õ di, niwa ãma hâimana õ wa. Duré dama iwazém norĩ hã dazadawa nhipese na rowasuꞌu hã te te wazari õ di.
8 Niꞌwam norĩ hã robꞌuiprazém na piꞌuriwi ãma daꞌuiprazém na te te ꞌre rosaꞌrata zaꞌra, niha na iwaꞌrãmi da te tãma ꞌre rowairébé zaꞌra mono da hã, wapu pese na ãma ꞌre isibro pese zaꞌra mono zéb da hã.
9 Niꞌwa hã dawasédé da te tãma ꞌre iꞌmanharĩ mono zé te te daꞌãma ꞌre ꞌmadâꞌâ mono õ wamhã, isimizawizé tãma ꞌre ihâimana mono zém na hã te za dama sihâiꞌré. Tane nherẽ, duré niꞌwa dawasété na te te ꞌre rosaꞌrata uꞌâsi mono wamhã, te za sina ꞌre siwãnhizari zahuré.
10 Niꞌwa iꞌrãi waihuꞌu wẽ ma, da te pẽtẽ wamhã, te za tihâimana pese zé hã sina uze, te te waihuꞌu wẽ wa. Tane nherẽ, isimizaꞌreseꞌõ hã 100 na da te ꞌre préꞌé mono nherẽ, siwaihuꞌu suꞌu õ di, tiwasété na hã.
11 Aibâ iwasédé hã te za romhâimanazé iwasété si õne uꞌâ te te ꞌre apoto. Tahawa, dasiꞌwapéi ꞌmanharĩꞌwa daꞌãma isiwamriꞌõ te za itẽme hã satõrĩ ni, te te ãma roꞌwaꞌrutu da hã.
12 Robzahi ursu wi, iꞌra da te tiwi ꞌre iwaibui mono, da te ꞌre sõpẽtẽ zaꞌra mono wamhã, pipa di. Tane nherẽ, isimizaꞌreseꞌõ tihâimana nhimizaꞌreseꞌõ zarina marĩ te te ꞌre ꞌmanharĩ mono ré, da te ãma ꞌre sõpẽtẽ mono wamhã, taha si ipipa uptabi hã.
13 Niꞌwa, marĩ iwẽ da te tãma ꞌre ꞌmanharĩ mono nherẽ, aiwétési iwasédé te te dama ꞌre abꞌmanharĩ mono wamhã, rowasédé hã isõrõwa hawimhã tãma isiꞌré da hã mare di za.
14 Damreme na dasiꞌahâri, ꞌre isãnaꞌrata mono zé hã, aiwa â nhowadazé ꞌre isipoꞌo naꞌrata mono ne hã te ꞌre hâimana. Tahawa iwẽ hã ropsiwamnarĩ prãi ré, da te ãma ꞌre irosahâri zaꞌra mono da si.
15 Uburé Danhibꞌapito ma hã maparane tãma iwẽꞌõ pe hã te ꞌre hâimana zahuré: Iwẽ norĩ ãma iwasédé hã, da te ãma ꞌre isaꞌra mono hã wẽ nherẽ, duré iwasété norĩ marĩ na te te ꞌre upa zaꞌra mono nherẽ, wẽ na da te ꞌre iwasuꞌu zaꞌra mono, marĩ ꞌmanharĩꞌõꞌwa na.
16 Isimizaꞌreseꞌõ norĩ rowaihuꞌu wẽ tãma ꞌre hâimana zaꞌra mono da, robꞌuiprazé te te ãma ꞌre iꞌuprosi zaꞌra mono hã marĩ dai õ di. E marĩ wa. Ta norĩ hã tô te te waihuꞌu zaꞌra dai õ wa.
17 Niꞌwa hã te za tisiwaihu te te ꞌre sawi uꞌâsi. Ropipa hã sô watobro wamhã, te za isisãnawã ne hã tãma ꞌre hâimana.
18 Isimizaꞌreseꞌõ norĩ si te iwaptoma ꞌre ihâimana zaꞌra mono norĩ hâiba waptoꞌwa na ꞌre hâimana zaꞌra mono da hã te te sima ꞌre wẽ zaꞌra.
19 Niꞌwa damreme na dasiꞌwapé te te sima ꞌre isawi mono hã, te tiwasété si te te sima ꞌre sawi. Duré ꞌre isiꞌmadâꞌâ ze zaꞌra mono norĩ hã te ꞌrâwi timorĩ nhiptõzé hã te te sina ꞌre uwaimrami zaꞌra.
20 Niꞌwa ipẽꞌẽ ꞌre wasété na ꞌre ihâimana mono hã marĩ iwẽ zô ꞌre isimipari mono da hã mare di. Duré isadawa nhipe hã te za ropipa si te te sina ꞌre aꞌuwaimrami.
21 Daꞌra isimizaꞌreseꞌõ te za timama ma, robzeiꞌõzép si, duré robzépatazép si te te ꞌre sõmri.
22 Dapẽꞌẽ ꞌre rowẽzé hã te wedenhi iwẽ uptabi ne hã dama ꞌre hâimana. Tane nherẽ, õne uꞌâ dapẽꞌẽ ꞌre robzei ãna ꞌre idahâimana zaꞌra mono zé hã te za atãma na te te ꞌre danhibꞌuwa zani zaꞌra.
23 Daꞌãma ꞌre irowairébé zaꞌra mono ꞌwa, sena na ꞌre ihâimana zaꞌra mono õ norĩ hã te za robꞌuiprazém na dama ꞌre siwede zaꞌra. Tahawa robꞌuwaibaba na hã te te dama ꞌre rowairébé mono õ di za.
24 Isimizaꞌrese wẽ, te za tiꞌrãi waihuꞌu wẽ zô si sima ꞌre sõpré. Tane nherẽ, isimizaꞌreseꞌõ te za titõmo na marĩ te te sima ꞌre wẽ ahâ zaꞌra, misi haré te te sima ꞌre pisutu zaꞌra mono ãna.
25 Daꞌra isimizaꞌreseꞌõ te za timama ma robzeiꞌõ hã te te sina tãma ꞌre sõmri. Duré tina ma, te za rosaꞌratazé hã te te sina tãma ꞌre sani.
26 Wẽꞌõ di, iwẽ hã te te dama irowaꞌâbâ da hã daꞌupana, õ hãi õ nherẽ. Duré iꞌuwaibaba õ di, dama iꞌrãnhoꞌu sena na ꞌre ihâimana zaꞌra mono, da te ꞌre ipréꞌé mono da hã.
27 Isimirowaihuꞌu wẽ hã mreme wadi õ di. Duré atãma na te ꞌre hâimana.
28 Isimizaꞌreseꞌõ na zama te za ꞌrãi waihuꞌu wẽ newa da te ãma ꞌre rosaꞌrata zaꞌra, ariꞌiwi ꞌre siꞌubumroi mono wa, mreme ãna.
