Zozué 3:1-17
3 Tawamhã Zozué duré uburé Izaraéu nhihudu norĩ me ma tô robzaꞌrã ré wairé, Sitĩ hawimhã siꞌabaꞌré da, Zodã pa u. Tawamhã pa nhoꞌõmo na te te saprĩ zaꞌra wana ré, ma tô tame aꞌâ sima ꞌri nhoré zaꞌra.
2 Tawamhã siꞌubdatõ bâtâ pari dama iꞌrãnhoꞌõmo norĩ hã romhâ ꞌmanharĩ na ꞌri isisõré mono waꞌwaibaba te te ropéi mono wamhã,
3 ma tô ãne aꞌuwẽ norĩ ma hã te te tãma waihuꞌu zaꞌra:
— Levita sasedoti norĩ hã Uburé Danhibꞌapito, wate ꞌRe ihâimana uꞌâsi mono nhimiroti ré wedehâꞌre ꞌmanharĩ te te siwi âri ré ꞌmadâꞌâ zaꞌra waꞌaba wamhã, te za asimarĩ hã asima iꞌubumro zaꞌra waꞌwa, isarina aiꞌabaꞌréi waꞌaba da.
4 Ãne te za nimomo aiꞌabaꞌréi waꞌaba zéb da hã iwaihuꞌu zaꞌra waꞌwa, ã hã bâdâdi na niwamhã ãma ꞌre anomro aba mono õ wa. Tane nherẽ, wedehâꞌre ꞌmanharĩ hã asina tété zaꞌra waꞌaba õ di za. Misi tiꞌai pibuzém na te za romhâ prã na asiwi ipibu zaꞌra waꞌaba mo za.
5 Tawamhã Zozué te dama tinha, ãne:
— Maꞌãpé aipẽꞌẽ ꞌremhã asipese zaꞌra waꞌaba. E marĩ wa. Uburé Danhibꞌapito te za awẽmhã aima zaꞌra waꞌaba marĩ isaꞌẽne hã ꞌmanha.
6 Taha pari, te sasedoti norĩ ma nharĩ zaꞌra, ãne:
— Maꞌãpé, danhowa aiꞌabaꞌréi waꞌaba da, ꞌRe ihâimana uꞌâsi mono te, wedehâꞌre hã asiwi âri aba.
Tawamhã Zozué te te tãma iꞌru zaꞌra zéb zarina ma tô siwi mreme ꞌmanha.
7 Tawamhã Uburé Danhibꞌapito, te Zozuéhé ma tinha, ãne:
— Ã bâtâ na za marĩ te iꞌmanharĩzéb zarina, uburé Izaraéu nhihudu norĩ hã te za siwi aiwaihuꞌu, aibâ dama iꞌasaꞌẽtẽ na hã. Te za tawamhã duré siwi ĩwaihuꞌu, Mozésihi siré ꞌre ĩhâimana mono ne, duré asiré zama ꞌre ĩhâimana mono na hã.
8 Maꞌãpé duré ãne tãma waihuꞌu zaꞌra na, sasedoti norĩ ĩnhimiroti ré wedehâꞌre te te siwi iꞌâri norĩ ma: “Pa nhoꞌõmo u aihutu aba wamhã, asimizahâri zaꞌra waꞌaba za aꞌâ, â ꞌremhã pazaihâ ꞌrata.”
9 Tawamhã Zozué hã te dama tinha, ãne:
— We ãwa aiꞌabaꞌréi waꞌaba, Uburé Danhibꞌapito, wate ꞌRe ihâimana uꞌâsi mono te te inharĩzé hã wapari zaꞌra waꞌaba da.
10 Ãne wamhã, ꞌRe ihâimana uꞌâsi mono idâꞌâꞌõ asiré ihâimana zaꞌra waꞌaba na te za iwaihuꞌu zaꞌra waꞌwa, sena na cananeu norĩ hã, hitita norĩ hã, heveu norĩ hã, perizeu norĩ hã, gigazeu norĩ hã, amoreu norĩ hã, duré zebuzeu norĩ hã za te te isani zaꞌra na zama.
11 Tahawa maꞌãpé ꞌmadâꞌâ zaꞌra waꞌaba. Uburé Danhibꞌapito nhimiroti te, wedehâꞌre ꞌmanharĩ hã te za asõwab zaꞌra waꞌaba saprĩ, pa nhoꞌu Zodã pa â na hã.
12 Maꞌãpé ãhã na pisutu zaꞌra waꞌaba, Izaraéu nhihudu norĩ hã iwamri mono bâ 12 na ihâiba hã.
13 Tawamhã sasedoti norĩ, Uburé Danhibꞌapito te, wedehâꞌre ꞌmanharĩ te te siwi âri ré, â wa tipara hã te te sõré wamhã, te za Zodã pa â ipraba hã mazazâ. Tawamhã â hã sãrã u hã te za taré tiꞌâ ꞌmasisi.
14 3:14-15 Roptehârizé aꞌamo na ma tô ãne hã tiromhâiba, â hã pa nhoꞌõmo na pazaihâ hã te te upsibi mono ré hã. Ãhã ré, ma tô romhâ ꞌmanharĩ na ꞌri hawimhã aꞌuwẽ norĩ hã wairé, Zodã pa â na te te saprĩ zaꞌra da. Tawamhã sasedoti norĩ danhowamhã te aiꞌabaꞌré, ꞌRe ihâimana uꞌâsi mono te, wedehâꞌre ꞌmanharĩ hã te te siwi âri sina. Duré oto â zaihâi u sihutu wamhã, â wa tipara hã te te sõré wi,
15 ꞌMadâꞌâ 3:14
16 ma tô â praba hã mazazâ. Tawamhã ma tô taré sãrã u tiꞌâtâ, Sartã na ꞌri nhoꞌõmo nhisi niwĩ ꞌri nhoꞌu Adã na isisi tẽmemhã. Tawamhã piꞌreba ma tô â hã õne haré tiꞌré pese, Â Warĩrĩ na puꞌu nhisi u. Tahawa ma tô oto aꞌuwẽ norĩ hã saprĩ zaꞌra, Zerico ꞌrata tiꞌai u hã.
17 Izaraéu nhihudu norĩ hã tiꞌai ꞌré te te iwatiꞌi zaꞌra na ma tô saprĩ zaꞌra. Taha ré, ma tô sasedoti norĩ ꞌRe ihâimana uꞌâsi mono nhimiroti ré wedehâꞌre ꞌmanharĩ te te siwi iꞌâri hã robꞌré wa iré mazahâri zaꞌra Zodã pa â waꞌwamhã. Tahawa, ma tô aꞌâ tamem haré aimasa, uburé da te ãma isaprĩ zaꞌra zéb u.
