Zuã 20:1-31
20 Tawamhã dumigu mararé uptabi, zahadu robra ré, Maria Madalena hã ma tô mo, abꞌre u. Tamomo wisi wamhã, ẽne abꞌre nhitobzé hã ma tô ꞌmadâ, niꞌwa te te isaꞌré na hã.
2 Tahawa, ma tô wara Simau Pedru isãmrazéb u, duré ihâiba amo isiré ꞌre imorĩ, Zezusi te te ꞌre isawi pese mono u zama. Ãne ma tô tãma rowasuꞌu zahuré:
— Wanhibꞌapito hã ma tô dasiwi wazere ni, abꞌre hawi. Duré waihuꞌu õ di nimame, da te dasiwi ihirizé hã.
3 Tawamhã Pedru duré isiré ꞌre imorĩ Zezusi te te ꞌre isawi pese mono me, ma tô awaꞌawi tipusi zahuré. Abꞌre u ma tô asamro.
4 Siré sisamroi wamhã, ihâiba amo hã ma tô Pedruhu ãma sisaꞌu. Tahawa ma tô ta hã imorĩꞌrata na wi, abꞌre u.
5 Wisi wamhã, abꞌre u ma tô aiwẽꞌẽ, te te robꞌmadâꞌâ da. Tawamhã abꞌre ꞌremhã ma tô ꞌmadâ zaꞌra, zazahâ ihâirã iꞌubuzé isimiꞌwara hã. Tane nherẽ, abꞌre u hã sébré õ di.
6 Tawamhã Simau Pedru isaꞌu iwi hã ma tô õne haré ãzé, abꞌre ꞌre. Ta hã ma tô duré ꞌmadâ, zazahâ ihâirã iꞌubuzé isimiꞌwara hã,
7 duré zazahâ ihâirã, Zezusihi ꞌrã ubuzéb zama. Ihâiba ubuzém nhiti, te nomro, hâ nhinhai wẽ na.
8 Tawamhã isiré ꞌre imorĩ Pedruhu wana iwi hã ma tô duré ãzé oto, abꞌre ꞌre. Ma tô sabu. Tahawa ma tô saze.
9 (Ta norĩ hã, zahadu te te sadaihuꞌu zahuré õ di, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré inomro hã, tô iꞌru zahi zarina, Zezusi apâ ihâiwaꞌutu da hã.)
10 Taha pari abꞌre hawi, ma tô apâ tineb zahuré, ꞌri u.
Zezusi hã Maria Madalenahã ma isihâiꞌrézé
11 Tane nherẽ, Maria Madalenahã si ma tô isaꞌu zahuré aiwaꞌõ, abꞌre dawa. Siwaꞌõi ré, ma tô aiwẽꞌẽ, abꞌre u te te robꞌmadâꞌâ da.
12 Tawamhã maparane hâiwa hawi romhuriꞌwa iꞌuza ihâirã uptabi zahuré hã ma tô ꞌmadâꞌâ zahuré, Zezusihi hâiba inomrozéb ãma simasisi ré. Ihâiba amo hã iꞌrãi ãma te nhamra. Duré ihâiba amo hã ipara ãma te nhamra.
13 Tawamhã hâiwa hawi romhuriꞌwa norĩ hã te Maria Madalena sadanharĩ zahuré, ãne:
— Piꞌõ, e marĩ wa, te aiwaꞌõ.
— Ĩnhibꞌapito hã, da te dasiwi wazere wa, duré nimame da te ihirizé hã te waihuꞌu õ wa. — Ãne ma tô Maria Madalena hã ãma sadaꞌâbâ zahuré.
14 Ãne te te tãma nharĩ zahuré pari, ma tô aipiꞌra, Maria Madalena hã. Tame ma tô ꞌmadâ Zezusi hã, hâiwi isam na. Tane nherẽ, te te waihuꞌu õ di.
15 Tawamhã Zezusi hã ma tô sadanha, ãne:
— Piꞌõ, e marĩ wa, te aiwaꞌõ. E ꞌwa sô, te airĩ.
Tawamhã Maria hã ma tô ãma rosaꞌrata, isadanharĩꞌwa hã robꞌrere ꞌmadâꞌâꞌwa newa. Tahawa ma tô ãne tãma tinha:
— A hã ã hawi wazere wamhã, maꞌãpé ihirizé hã ĩma wasuꞌu na, te waihuꞌu da, ihirizéb u sô ĩmorĩ da, apâ te wei âri da.
16 Tawamhã Zezusi hã ma tô ꞌmahâ, ãne:
— Maria!
Maria hã tinhisi te te wapari wa, ma tô itẽme aipiꞌra. Ma tô sadaꞌâ Ebreu norĩ mreme na, ãne:
— Raboni. (Ã hã damreme ãma isaprĩ hã “Rowahutuꞌwa”.)
17 Tawamhã Zezusi hã te tãma tinha, ãne:
— Ĩtété tõ, zahadu apâ ĩmorĩ õ wa, Ĩmama u hã. Tahawa mo oto aimorĩ, ĩsisãnawã norĩ u, tãma ĩzadawa wasuꞌu zaꞌra da, ãne: “Apâ wa za oto mo Ĩmama u, duré Aimama zaꞌra waꞌaba u, ĩte ꞌRe ihâimana uꞌâsi mono u, duré ate zaꞌra waꞌwa ꞌRe ihâimana uꞌâsi mono u hã.”
18 Tawamhã Maria Madalena hã ma tô itẽme timorĩ zaꞌra. Ãne ma tô tãma rowasuꞌu zaꞌra, Zezusihi siré ꞌre inomro mono norĩ ma:
— Wanhibꞌapito hã wa tô ꞌmadâ.
Tawamhã ma tô duré tãma wasuꞌu zaꞌra, Wanhibꞌapito te te tãma inharĩzé hã.
Zezusi hã isiré ꞌre inomro mono norĩ ma isihâiꞌrézé
19 Tawamhã dumigu na maꞌrã wi, isiré ꞌre inomro mono norĩ hã ma tô siꞌrãꞌõtõ. Zudeu norĩ ma, pahi zaꞌra wa, ma tô ꞌridawa hã siré tété zaꞌra. Tawamhã Zezusi hã ma tô iwaꞌwab zaꞌra sihâiꞌré. Ãne ma tô tãma nharĩ zaꞌra:
— Rowẽ hã asiré ꞌre hâimana zaꞌra waꞌaba mono!
20 Ãne te te tãma nharĩ zaꞌra parimhã, tinhibꞌrada hã ma tô tãma hâiꞌré zaꞌra, duré tiꞌaꞌre zama. Tawamhã isiré ꞌre inomro mono norĩ hã Wanhibꞌapito te te siwi ꞌmadâꞌâ wamhã, ma tô ꞌre to zaꞌra, rowẽ te.
21 Tawamhã Zezusi hã te duré tãma nharĩ zaꞌra, ãne:
— Rowẽ hã asiré ꞌre hâimana zaꞌra waꞌaba mono! Ĩmama hã we te te ĩzatõrĩ ne, wa duré a norĩ waꞌwa hã asatõrĩ zaꞌra waꞌwa.
22 Ãne te te tãma nharĩ zaꞌra pari, ma tô tizadawa waꞌuꞌu na saꞌuri zaꞌra. Ãne te tãma nharĩ zaꞌra:
— Ĩmama Pẽꞌẽzani hã, waibui waꞌaba.
23 Niꞌwa hã tiwasédé te te ꞌre iꞌabꞌmanharĩ mono zé hã ãma ꞌre ꞌmadâꞌâ zaꞌra waꞌaba mono õ wamhã, taha zarina ꞌRe ihâimana uꞌâsi mono zama te te duré ãma ꞌre ꞌmadâꞌâ mono õ di za. Tazahã, ãma ꞌre ꞌmadâꞌâ uꞌâsi zaꞌra waꞌaba mono wamhã, taha zarina te za duré ꞌRe ihâimana uꞌâsi mono zama te te ãma ꞌre ꞌmadâꞌâ uꞌâsi.
Zezusi hã Tomehẽ ma isihâiꞌrézé
24 Tawamhã Zezusi hã isiré ꞌre inomro mono norĩ ma sihâiꞌré wamhã, Tome (Didimo na isisi amo hã) sãmra õ di, tisiré norĩ siré hã.
25 Tahawa, isiré norĩ hã ma tô ãne tãma rowasuꞌu zaꞌra:
— Wanhibꞌapito hã, wa wasiwi ꞌmadâꞌâ ni.
Tawamhã Tome hã ma sadaꞌâbâ zaꞌra, ãne:
— Isiꞌuwazi prégu na da te isibꞌrata zapuꞌuzé hã te ꞌmadâꞌâ õ wamhã, duré ĩnhiptõmo hi isibꞌrata zapuꞌu ꞌremhã te sẽrẽ õ wamhã, duré da te iꞌaꞌre zapuꞌuzéb ãma ĩnhibꞌrada hã te sẽrẽ õ wamhã, ãma ĩnhimizazei õ di za.
26 Tawamhã romhuri misi siꞌutõrĩ parimhã, Zezusihi siré ꞌre inomro mono norĩ hã ma tô duré siꞌrãꞌõtõ, ꞌridawa tété haré. Tome hã te oto isiré tinhamra zaꞌra. Tawamhã Zezusi hã ma tô oto iwaꞌwab zaꞌra tãma sihâiꞌré zaꞌra. Ãne te tãma nharĩ zaꞌra:
— Rowẽ hã asiré ꞌre hâimana zaꞌra waꞌaba mono.
27 Taha pari Zezusi hã te Tomehẽ ma tinha, ãne:
— Maꞌãpé ĩnhibꞌrada hã ꞌmadâꞌâ zahuré na. Maꞌãpé duré asipto hã ĩnhibꞌrata zapuꞌu norĩ ãma sẽrẽ. Maꞌãpé duré asibꞌrada hã wei wẽ na. Sẽrẽ, ĩꞌaꞌre wi, da te ĩwaꞌrézéb ãma. Asimiwawã hã sazâri. Maꞌãpé ĩzaze na.
28 Tawamhã Tome hã ma tô ãne sadaꞌâ:
— Ĩnhibꞌapito, duré ĩte ꞌRe ihâimana uꞌâsi mono.
29 Tahawa ma tô Zezusi hã ãne tãma tinha:
— E ĩꞌmadâꞌâ wapsi, ma ĩzaze. Te te ꞌre ĩꞌmadâꞌâ zaꞌra mono õ nherẽ, te te ꞌre ĩzaze zaꞌra mono norĩ ma si, ꞌre rowẽ uptabi zaꞌra mono di.
Rowasuꞌu ꞌrãsudu
30 Zezusi hã ahâ uptabi na ma tô aimawi marĩ dama iꞌmanharĩ waihuꞌuꞌõ hã te te ꞌre abꞌmanharĩ, isiré ꞌre inomro mono norĩ nhoꞌa, ã hã ibaihâ na nima norĩ na ãma irobꞌuiꞌéré õ hã.
31 Tane nherẽ, ã norĩ ãma robꞌuiꞌéré ihâimana zaꞌra hã, saze zaꞌra waꞌaba da, Zezusi hã danhoꞌreptuiꞌwa na, ꞌRe ihâimana uꞌâsi mono ꞌra hã, ꞌre saze zaꞌra waꞌaba mono wa, aihâimanazé isiꞌutõrĩꞌõ hã ãma aima ꞌre hâimana zaꞌra waꞌaba mono da.
