Zuã 19:1-42
19 Tawamhã Pilatu hã ma tô tiꞌru, Zezusi te te siwi ꞌre préꞌé mono da, powawẽ hâi waré ꞌmanharĩ na.
2 Taha pari, dasiꞌwapéi ꞌmanharĩꞌwa norĩ hã ma tô danhoprezé sada ꞌmaꞌmanharĩ zaꞌra, ꞌwabzéré na. Taha na ma tô ãma siwi sõpre. Ma tô duré siwi uza, daꞌuza ihâpa ihâpré na.
3 Duré ꞌrâwi nasi itẽme simasa wamhã, te ãne nasi tãma nharĩ zaꞌra, ãma waꞌẽ sina:
— Zudeu norĩ nhibꞌapito, rowẽ na aihâimana!
Te duré nasi siwi ꞌrãiwabzu, sisaꞌu.
4 Tawamhã Pilatu hã ma tô duré apâ datẽme watobro, daꞌahâ uptabi na idahâimana zaꞌra u hã. Ãne te dama tinha:
— Ĩwapari zaꞌra waꞌaba! Ãhãta, wa asõꞌre sãrĩ zaꞌra waꞌwa, waihuꞌu zaꞌra waꞌaba da, marĩ iꞌupa hã te ãma isõpẽtẽ õ na, ãhã aibâ ãma hã.
5 Tawamhã Zezusi hã rob u ma tô datẽme watobro, ꞌwabzéré na sõpre ré, daꞌuza ihâpa ihâpré na uza ré zama.
Tahawa, Pilatu hã ma tô dama ꞌmahâ, ãne:
— ꞌMadâꞌâ zaꞌra waꞌaba! Ãhãta, aibâ hã!
6 Tawamhã sacedoti ipire norĩ hã duré ꞌRe ihâimana uꞌâsi mono nhorõwa ꞌri ꞌrãihâ ꞌmadâꞌâꞌwa norĩ zama, te te ꞌmadâꞌâ zaꞌra wamhã, ma tô hârâ ꞌrãihâ na ꞌmahârâ zaꞌra, ãne:
— Wedepoꞌo nhonhiꞌrãmi na sasõmri! Wedepoꞌo nhonhiꞌrãmi na sasõmri!
Tane nherẽ, Pilatu hã ma tô ãne sadaꞌâbâ zaꞌra:
— Ãma asiwi saprõni aba, asiꞌuihâ na asiwi sasõmri aba da, wedepoꞌo nhonhiꞌrãmi na. Tazahã, wa hã, marĩ iꞌupa hã te ãma sõpẽtẽ õ di, te ãma iroti da hã.
7 Tawamhã Zudeu norĩ hã ma tô sadawa zaꞌréi ãna tãma nharĩ zaꞌra, ãne:
— Wate zaꞌra roti zahi iré hã. Taha zarina, idâꞌâ da si, ꞌRe ihâimana uꞌâsi mono ꞌra na siwasuꞌu wa.
8 Tawamhã Pilatu ãne hã damreme te te wapari wamhã, ma tô oto tipahi pese.
9 Tahawa, ma tô duré ãzé apâ, ꞌri ꞌrãihâ u hã. Apâ ma tô duré Zezusi sadanha, ãne:
— E ma hawi te we bété aimo.
Tane nherẽ, Zezusi hã te te oto sadaꞌâbâ õ di.
10 Tahawa Pilatu hã ma tô ãne tãma tinha:
— E niha bâ, ĩma asiwasuꞌu õ di. E aima ĩwaihuꞌu õ di, ĩnhimiroti pire na hã, niꞌwai ma, te irobꞌru da hã morĩ da, niwamhã duré te dama iꞌru na, niꞌwa wedepoꞌo nhonhiꞌrãmi na da te dasiwi sasõmri da hã.
11 Tawamhã Zezusi hã ma sadaꞌâ, ãne:
— ꞌRe ihâimana uꞌâsi mono, ĩꞌãma asimiroti pire hã te te aima sõmri õ ꞌwaꞌâhã, ĩꞌãma irotizé hã aré aima hâimana õ di. Tahawa aima ĩhâiba nhomriꞌwa hã, tiwasédé hã asipai u ma ꞌmanha, saꞌẽtẽ uptabi na.
12 Ãne hã te te tãma nharĩ parimhã, Pilatu hã ma tô aré sima wẽ, Zezusihi ma te te robꞌru da, morĩ da. Tane nherẽ, daꞌahâ uptabi na idahâimana zaꞌra hã ma tô dasiwi ꞌmahârâ ni, ãne:
— Ãhã aibâ hã morĩ da, tãma rowairébé wamhã, tawamhã a hã apito Cézaha siwaihuꞌu õ di za. E marĩ wa. Niꞌwa hã apito na ꞌre siwasuꞌu mono wamhã, apito Cézaha nhitobꞌru na te za ꞌre hâimana.
13 Pilatu hã ãne damreme te te sina wapari wamhã, Zezusi ma tô waze, rob u. Tawamhã ma tô nhamra daꞌãma rowairébéꞌwa nhamrazém na, “Ẽtẽ hâpâ na Waptâ” na da te ꞌre isisi zaꞌra mono ãma. (Ebreu norĩ mreme na, “Gabata” na isisi hã.)
14 Tawamhã abzuma waꞌwa sexta-feira na romhuri iꞌrãsutuzém na Pascoa na dato nhisi ihâimanazém na hã, Pilatu hã ma tô tinha Zudeu norĩ ma, ãne:
— Ãhãta asibꞌapito zaꞌra waꞌwa!
15 Tane nherẽ, ma tô dahârâ ꞌrãihâ na tahãsi ni, ãne:
— Wĩrĩ! Wĩrĩ! Wedepoꞌo nhonhiꞌrãmi na sasõmri!
Tahawa Pilatu hã ma sadaꞌâbâ zaꞌra, ãne:
— E asibꞌapito zaꞌra waꞌwa hã wa za tiꞌru, wedepoꞌo nhonhiꞌrãmi na da te sasõmri da hã.
Tawamhã sasedoti ipire norĩ hã ma tô ãne Pilatuhu ma nharĩ zaꞌra:
— Niꞌwa hã wanhibꞌapito hâimana õ di, apito Cézaha nhipai u hã.
16 Tahawa, Pilatu hã ma tô oto tiꞌru, dasiꞌwapéi ꞌmanharĩꞌwa norĩ hã Zezusi te te siwi sasõmri da, wedepoꞌo nhonhiꞌrãmi na.
Zezusi hã wedepoꞌo nhonhiꞌrãmi na da te dasiwi isasõmrizé
17 Tawamhã Zezusi hã siꞌuihâ na ma tô wedepoꞌo nhonhiꞌrãmi hã sisada tiꞌâ, Daꞌrãihi na romnhisi u. (Ebreu norĩ mreme na, “Gougota” na romnhisi hã.)
18 Tame ma tô siwi sasõ,* wedepoꞌo nhonhiꞌrãmi na. Isiré hã ma tô duré aibâ norĩ hã sasõmri zahuré ni, Zezusihi aꞌre siꞌuiwa na.
19 Tawamhã Pilatu hã ma tô tiꞌru, wedepoꞌo hâpâ waꞌõtõ na da te ãma robꞌuiꞌéré da, ãne: “Ã hã Zezusi Nazaré ãma iprédu, Zudeu norĩ nhibꞌapito.” Taha pari ma tô tiꞌru, iꞌrã nhisiwi da te dasiwi sasõmri da, wedepoꞌo nhonhiꞌrãmi na.
20 Tawamhã Zudeu norĩ hã ahâ na ma tô sõré zaꞌra ãma robꞌuiꞌéré hã, ro hã Zezusi da te isasõmrizé hã ꞌri waꞌõtõ ꞌrata wa. Ãma robꞌuiꞌéré hã, Ebreu norĩ mreme na, duré latim na romanu na dawamri norĩ mreme na duré gregu norĩ mreme na zama.
21 Tawamhã sasedoti ipire norĩ hã ma tô Pilatuhu ma nharĩ zaꞌra, ãne:
— Ãma robꞌuiꞌéré tõ, ãne hã: “Ã hã Zudeu norĩ nhibꞌapito”. Ãne ãma robꞌuiꞌéré: “Ã hã aibâ hã te ꞌre siwasuꞌu, ãne: Wa hã Zudeu norĩ nhibꞌapito.”
22 Tawamhã Pilatu hã ma sadaꞌâbâ zaꞌra, ãne:
— Mare di. Te ãma irobꞌuiꞌérézém na hã, wa tô ãma robꞌuiꞌéré pa.
23 Tawamhã dasiꞌwapéi ꞌmanharĩꞌwa norĩ hã, Zezusi te te siwi sasõmri parimhã, iꞌuza hã ma tô te te siwi waꞌõtõ. Maparane siꞌuiwa na iwaꞌõno hã, hâiba mono bâ ma tô misisi te te sima waꞌõtõ. Tane nherẽ, daꞌuza ihâpa ihâpré hã hâibabarĩ õ di. Õne haré misi haré ihâ hã, hâimo hawi piꞌreba.
24 Tahawa ma tô ãne sima nharĩ zaꞌra:
— Wa te wasiwi hâiwazui õ di za, daꞌuza ihâpa hã. Ẽtẽre na wanhisi uiꞌéré hã wa za wasima me zaꞌra ni, niꞌwa nhisi watobro wamhã, te te âri da.
Ãne hã ma tô tiromhâiba, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré inomro hã te te sina uwaimrami da, ã hã:
“Ĩꞌuza hã ma tô te te sima waꞌõtõ. Duré ẽtẽre hã ma tô siwi time tinhisi zaꞌra ré hã, niꞌwa nhisi hã watobro da, ĩꞌuza hã ihâpa ihâpré hã te te âri da.”
Tahawa ãne zarina, ma tô dasiꞌwapéi ꞌmanharĩꞌwa norĩ hã ꞌmanharĩ zaꞌra.
25 Tawamhã wedepoꞌo nhonhiꞌrãmi ꞌratamhã, te za Zezusihi na hã, duré ina wapté duré Maria Clopasihi mro hã, duré Maria Madalena.
26 Zezusi hã tina te te ꞌmadâꞌâ wamhã, duré isiré ꞌre imorĩ te te ꞌre isawi pese mono iꞌrata isam na te te ꞌmadâꞌâ wamhã, ma tô ãne tina ma tinha:
— Tahata aiꞌra hã.
27 Taha pari te te ꞌre isawi pese mono ma, ma tô duré tinha, ãne:
— Tahata ana.
Tawamhã isiré ꞌre imorĩ te te ꞌre isawi pese mono hã ma tô tina hã saprõ tinhorõwa u, ta hawim haré iꞌrata ꞌre sãmra mono da.
Zezusi hã idâꞌâzé
28 Tawamhã Zezusi hã ma tô oto waihuꞌu, uburé te te iꞌrãsutu wẽ na hã. ꞌRe ihâimana uꞌâsi mono mreme na Ibaihâ iwazé pese na robꞌuiꞌéré ãma inomro siro hã te te sina uwaimrami da, ma tô ãne tinha:
— ꞌRubu di.
29 Tamemhã pizaꞌa ꞌre nhoꞌa hã te ipapara za, uva ꞌrãi waꞌu isé prãi ré hã. Tawamhã dasiꞌwapéi ꞌmanharĩꞌwa norĩ hã ma tô isopo na wede nhisi waré hã siwi ꞌrãꞌubu, piza upsõzém na. Ta hã uva ꞌrãi waꞌu isé prã na ma tô siwi diꞌi, pizaꞌa ꞌre nhoꞌa wa isam na. Ta hã ma tô Zezusihi ma siwi wẽ, isadawa u.
30 Te te upsõmri parip si, ma tô ãne oto tinha:
— Uburé wa tô ꞌrãsutu.
Taha pari, ma tô ꞌrãiwaptãrã. Tawamhã siꞌuihâ na ma tô oto pẽꞌẽhaiꞌutõ.
Dasiꞌwapéi ꞌmanharĩꞌwa hã, Zezusi te te iꞌaꞌre zapuꞌuzé
31 Tawamhã Zudeu norĩ ma rotiꞌwa norĩ hã, Pilatuhu wi ma tô waptẽrẽ zaꞌra, te te ꞌru zaꞌra da, wedepoꞌo nhonhiꞌrãmi na da te isasõmri zaꞌra hã da te hinhiꞌẽ zaꞌra da, duré taha pari te te ꞌru da, ihâiba hâ hã da te sizari zaꞌra da, wedepoꞌo nhonhiꞌrãmi hawimhã. Romhuri zahârizé sexta-feira wa, ma tô ãne hã tiwi waptẽrẽ zaꞌra, duré te te sima wẽ zaꞌra õ wa, awẽm na sabadu na ihâiba hâ hã simnhatã uꞌâsi tõ da, wedepoꞌo nhonhiꞌrãmi na. E marĩ wa. Tô taha sabadu hã iwazéb zahi pese na ꞌre hâimana mono wa.
32 Tawamhã dasiꞌwapéi ꞌmanharĩꞌwa norĩ hã ma tô sô aiꞌabaꞌré. Aibâ imorĩꞌrata na Zezusihi siré da te isasõmri hã ma tô siwi hiꞌẽ. Taha parimhã, ma tô duré ihâiba amo hã siwi hiꞌẽ.
33 Tane nherẽ, Zezusihi zô siꞌré zaꞌra wamhã, ma tô siwi ꞌmadâ, idâꞌâ na hã. Tahawa te te siwi hiꞌẽi õ di.
34 Tane nherẽ, nimahã misi dasiꞌwapéi ꞌmanharĩꞌwa hã ma tô Zezusi aꞌre zapuꞌu, siꞌuwazi ꞌrãꞌwa na. Tawamhã awaꞌawi pesere ma tô iwapru hã tiwi puru, duré â zama.
35 Ãne na iꞌmadâꞌâꞌwa hã ma tô aima wasuꞌu zaꞌra waꞌwa, a norĩ waꞌaba zama saze zaꞌra waꞌaba da. Te te irowasuꞌuzé hã tô sena. Duré tãma waihuꞌu pese di, tô sena te te irowasuꞌu na hã.
36 Ãne hã ma tô tiromhâiba, te te sina uwaimrami da, ꞌRe ihâimana uꞌâsi mono mreme na Ibaihâ iwazé pese na ãma robꞌuiꞌéré inomro hã, ãne: “Ihi hã da te tiwi ꞌmaiwẽꞌẽi õ di za.”
37 Ãne duré ꞌRe ihâimana uꞌâsi mono mreme na Ibaihâ iwazé pese na robꞌuiꞌéré amo hã: “Siꞌuwazi ꞌrãꞌwa na iꞌaꞌre zapuꞌuzé hã te za siwi ꞌmadâ.”
Zezusi hã dâꞌâ pari, abꞌre ꞌre, da te isẽrẽzé
38 Taha parimhã, Zuzé Arimatéia na ꞌri nhoꞌõmo nhisi hawimhã, ma tô Pilatuhu wi waptẽ, Zezusihi hâiba hã. (Zuzé hã Zezusihi zazeiꞌwa. Tane nherẽ, piꞌuriwi ma tô ꞌre hâimana isazeiꞌwa na hã, Zudeu norĩ pipa te.) Tawamhã Pilatu hã te te tãma rowairébé wa, ma tô siꞌra, Zezusihi hâiba hã.
39 Isiré hã Nicodemosi, Zezusihi u barana imorĩ. Ta hã ma tô sada tiꞌâ, 35 kilu na ipire pibuzé hã wede nhinhihã zum ne hã, duré ré nhanaꞌré ne hã iwazarimhã.
40 Tawamhã Zezusihi hâiba hã ma tô âri zahuré. Zazahâ ihâirã na ma tô ubu zahuré, wedewaꞌu zadaze na te te iwazari zahuré na. Ãne ma tô Zudeu norĩ hã te te sima ꞌre ꞌmanharĩ zaꞌra, te te siꞌãma ꞌre tiꞌa zaꞌra mono wamhã.
41 Tawamhã Zezusi hã da te isasõmrizéb ãma te robꞌre hã ꞌre hâimana. Robꞌre ꞌre ihâimana mono ãma te tihâiba, da te dasiwi iꞌabꞌre té hã, niꞌwa zahadu da te iwa isẽrẽ õ hã.
42 Tawamhã tame ma tô Zezusihi hâiba hã sẽrẽ zahuré, abꞌre hã isaꞌozéb ꞌrata hâimana wa, duré sabadu Zudeu norĩ te te ꞌre iwazé pese zaꞌra mono hã sãnaꞌrata wa, za oto.
Ĩwaꞌõtõ piꞌreba watsuꞌu mono
^ 19:18 “sasõ” hã, Zezusi hã prégu na da te sibꞌrata tété pari, duré da te para tété pari, da te isasõmri na hã te wasuꞌu
