Zuã 17:1-26
17 Tawamhã Zezusi hã te te tãma rowasuꞌu zaꞌra pari, ma tô hâimo robꞌmadâ. Ãne te Timama wi rowaptẽ:
— Ĩmama, bâdâ hã ma tô oto iwa waptãrã. Maꞌãpé hâiꞌré na, Aiꞌra ãma aiwẽ uptabi na ꞌre iꞌaihâimana mono zé hã, Aiꞌra hã te te duré hâiꞌré da, aiwẽ uptabi na ꞌre iꞌaihâimana mono zé hã.
2 A hã ma tô Aiꞌra ma ipisu, asadawa para simiroti pire uptabi na ꞌre hâimana mono da, tiꞌai ãma uburé ꞌre idahâimana zaꞌra mono norĩ ma, dahâimanazé isiꞌutõrĩꞌõ hã te te duré ꞌre apisutu mono da, tãma ꞌre iꞌapisutu mono norĩ ma hã.
3 Ã hã dahâimanazé isiꞌutõrĩꞌõ: Da te aiwaihuꞌu zaꞌra da, aiwétési sena na ꞌRe ihâimana uꞌâsi mono na, duré Zezu Cristu, da te waihuꞌu zaꞌra da, tiꞌai u we isatõrĩ hã.
4 Aiwaihuꞌu pese uptabi na ꞌre iꞌaihâimana mono zé hã wa tô dama hâiꞌré, tiꞌai ãma hã. Tawamhã romhuri te ꞌmanharĩ da, ĩma ipisudu hã wa tô ꞌrãsutu.
5 Tahawa Ĩmama, maꞌãpé ãhã na hã apâ ĩma sõmri, tame ꞌre iꞌaihâimana mono zéb ãma, aiwẽ uptabi na ꞌre iꞌaihâimana mono zé hã, romnaꞌrata hawi uburé marĩ hã ꞌre hâimana zaꞌra mono wana ré, asiré ꞌre ĩhâimana mono ré, ĩma ꞌre ihâimana mono ne hã.
6 — Tiꞌai ãma dawazari ꞌre ihâimana zaꞌra mono norĩ, ĩma ipisutu zaꞌra norĩ ma, wa tô tãma aihâiꞌré zaꞌra. Ta norĩ hã ate hã. Ate nherẽ, ma tô ĩma isõmri zaꞌra. Ta norĩ hã te asimiroti te te ꞌre ꞌmadâꞌâ pese zaꞌra.
7 Ãhã na hã ma tô ta norĩ hã oto waihuꞌu pese zaꞌra, uburé marĩ ĩma isõmri zaꞌra hã, aihawim na hã.
8 E marĩ wa. Asimiroti ĩma ꞌre iꞌawaihuꞌu mono zéb zarina si, te tãma ꞌre rowasuꞌu zaꞌra mono wa, duré taha zarina te te saze zaꞌra wa. Aihawi we ĩmorĩ na ma tô duré sena na waihuꞌu zaꞌra. Ma tô duré asaze zaꞌra, a hã we ĩzatõrĩ na hã.
9 — Ta norĩ ãma wa ãma aima mre. Tiꞌai ãma ꞌre idahâimana zaꞌra mono ĩzazeiꞌõꞌwa norĩ ãma, te ãma aiwi rowaptẽrẽ õ di. Ĩma ipisutu zaꞌra norĩ ãma si, wa mre, ta norĩ hã ate wa.
10 Uburé marĩ ĩte, ate hã. Tane duré uburé marĩ ate, ĩte hã. Duré ĩma ipisutu zaꞌra norĩ ãma hã, ĩwẽ uptabi na ꞌre ĩhâimana mono zé hã te ꞌre sihâiꞌré.
11 Ãhã na hã wa za oto ãma atẽme mo. Ĩzazeiꞌwa norĩ hã te za aꞌâ tiꞌai ãma tihâimana zaꞌra, dawazari. Tazahã, wa hã ãme ĩhâimana õ di za oto. Ĩmama, aiwazé pese na ꞌre iꞌaihâimana mono, maꞌãpé asisi waihuꞌu pese na ꞌre iꞌaihâimana mono zém na, ta norĩ hã ꞌre abꞌmadâꞌâ pese mono, asisi ĩma ipisutu na hã, misi ihâiba ne siré ꞌre hâimana zaꞌra mono da, misi wahâiba ne wasiré ꞌre iwahâimana mono ne.
12 Iꞌrata ꞌre ĩnhamra zaꞌra mono ré, asisi waihuꞌu pese uptabi na ꞌre ihâimana mono zém na, wa tô uburé te ꞌre abꞌmadâꞌâ pese, asisi ĩma ipisutu na. Tahawa siꞌmanhimini õ di. Sisimini da, tãma ipisutu siromo si ma tô sisimini, Aimreme na Ibaihâ iwazé pese na robꞌuiꞌéré inomro hã te te sina uwaimrami da.
13 Ãhã na hã wa za oto ãma atẽme mo. Tane nherẽ, tiꞌai ãma zahadu ĩhâimana ré, wa ãne hã tãma rowasuꞌu zaꞌra, ĩte rowẽ hã wahuré tãma hâimana zaꞌra da, ipẽꞌẽ ꞌre.
14 Wa tô te tãma ꞌre asadawa wasuꞌu zaꞌra. Tane nherẽ, tiꞌai ãma ꞌre idahâimana zaꞌra mono hã ma tô da te ꞌre ꞌruiwapari zaꞌra, tiꞌai ãma ꞌre idahâimana zaꞌra mono ĩzazeiꞌõꞌwa norĩ siré oto ꞌre hâimana zaꞌra mono õ wa, wa hã duré dasiré ꞌre ĩhâimana mono õ ne.
15 Tiꞌai hawi sani zaꞌra da, te ãma aiwi waptẽrẽ õ di. Waꞌuburé wi ꞌre abꞌmadâꞌâ pese mono da si, wa ãma aiwi rowaptẽ.
16 Wa hã tiꞌai ãma ꞌre idahâimana mono norĩ siré ꞌre ĩhâimana mono õ ne, te duré ꞌre hâimana zaꞌra, ĩzazeiꞌwa norĩ hã.
17 Maꞌãpé, tô sena asimiroti na aimawi ꞌre hâimana zaꞌra mono da, tãma ꞌre apisutu mono. Asimiroti hã tô sena uptabi tô.
18 Tiꞌai ãma ꞌre idahâimana zaꞌra mono ĩzazeiꞌõꞌwa norĩ u we ĩzatõrĩ ne, tane wa duré ĩzazeiꞌwa norĩ hã satõrĩ zaꞌra, tiꞌai ãma ĩzazeiꞌõꞌwa norĩ wazari ꞌre hâimana zaꞌra mono da.
19 Ta norĩ uꞌâbâ, wa ĩhâiba hã te sawi ãna, ãma aima tisõ. Õ norĩ zama, tihâiba te te ꞌre sawi zaꞌra mono ãna te te duré aima ꞌre sõmri zaꞌra mono da, wa tô ãne hã ꞌmanha.
20 — Ãhã na ta norĩ ãma si, te ãma aiwi rowaptẽrẽ õ di. Tazahã, za duré te te ꞌre ĩzaze zaꞌra mono norĩ ãma zama, ãhã na te te ĩzaze zaꞌra norĩ nhimirowasuꞌu zarina, za te te ĩzaze zaꞌra norĩ ãma,
21 ahâ nherẽ, misi ihâiba ne siré ꞌre hâimana zaꞌra mono da. Ĩmama, wa duré ãma aima mre, wasiré ꞌre hâimana uꞌâsi zaꞌra mono da, asiré ꞌre ĩhâimana mono ne, duré A hã ĩsiré ꞌre iꞌaihâimana mono ne, iwẽ hã siré misi ihâiba ne ꞌre ihâimana zaꞌra mono da si, tiꞌai ãma ꞌre idahâimana zaꞌra mono hã A hã we ĩzatõrĩ na da te asaze zaꞌra da.
22 Ĩwẽ uptabi na ꞌre ĩhâimana mono zé ĩma isõmri hã, wa tô te tãma poꞌo, misi ihâiba ne siré ꞌre hâimana zaꞌra mono da, wasiré misi wahâiba ne, ꞌre iwahâimana mono ne.
23 Isiré wa ꞌre ĩhâimana zaꞌra. A hã te duré ĩsiré ꞌre aihâimana mo, ta norĩ hã siré uptabi ꞌre hâimana zaꞌra mono da. Tawamhã tiꞌai ãma ꞌre idahâimana zaꞌra mono hã te za waihuꞌu zaꞌra ni, we ĩzatõrĩ na hã, duré ꞌre iꞌazawi pese mono na hã, ꞌre ĩzawi pese mono ne.
24 — Ĩmama, wa ĩsima wẽ, ĩma ipisutu zaꞌra norĩ hã ĩsiré ꞌre siꞌubumroi mono da, ꞌre ĩnhamra mono zéb ãma, ĩwẽ uptabi na ꞌre ĩhâimana mono zé hã te te ꞌmadâꞌâ zaꞌra da, marĩ õ uptabi ré, ꞌre ĩzawi pese mono wa.
25 Ĩmama, iꞌuwaibaba na si ꞌre iꞌaihâimana mono, tiꞌai ãma ꞌre idahâimana zaꞌra mono hã te te aiwaihuꞌu zaꞌra õ di. Tanei õ di, wa hã. Ĩma aiwaihuꞌu pese di. Duré te te ĩzaze zaꞌra norĩ hã te te aiwaihuꞌu pese zaꞌra di, A hã we ĩzatõrĩ na hã.
26 Te te aiwaihuꞌu zaꞌra da hã wa tô tãma aihâiꞌré zaꞌra. Ãne hã wa za te tãma ꞌre abꞌmanharĩ uꞌâsi, ꞌre ĩzawi pese mono ne, ꞌre azawi pese mono da. Tawamhã wa za isiré ꞌre ĩhâimana uꞌâsi zaꞌra.
