2 Corĩtu 9:1-15
9 E wa hã wa za ãne na aima ãma roti na sahu zaꞌra waꞌwa, ĩnhimiꞌuiꞌéré na hã, Zudéa na danhiptiꞌa nhoꞌõmo nhisi ãma ꞌRe ihâimana uꞌâsi mono nhibꞌaꞌuwẽ norĩ ma, asõprub zaꞌra waꞌaba da, dame. Mare di. Ãne na, te aima ãma roti na sahu zaꞌra waꞌaba õ di za, ãhã na hã.
2 E marĩ wa. Zudéa ãma isazeiꞌwa norĩ hã asiwi pawaptob zaꞌra waꞌaba da, asiꞌuihâ na ato sina, ãma asima rosaꞌrata zaꞌra waꞌaba wa. Ãne na, wa tô wa hã ãma aiwaihuꞌu zaꞌra waꞌwa, tô sena na. Ãme Masédonia ãma isazeiꞌwa norĩ ꞌre ihâimana zaꞌra mono norĩ ma, wa tô aiwasuꞌu wẽ zaꞌra waꞌwa. Ãne, wa tô ta norĩ ma hã tãma aiwasuꞌu wẽ zaꞌra waꞌwa: “Acaia ãma isazeiꞌwa norĩ hã ma tô robꞌuiprazé ubumro na sãnaꞌrata zaꞌra, wahub ꞌrata na hã.” Ãne na, wa tô tãma aiwasuꞌu wẽ zaꞌra waꞌwa. Robꞌuiprazé hã ato sina, asiwi iꞌubumro siromo zaꞌra waꞌaba zéb zarina, ma tô ta norĩ zama sima ãma rosaꞌrata zaꞌra, to sina, aiwa asine waꞌaba, te te siwi ꞌmanharĩ wẽ da, aiwab da.
3 Ãne na, wa tô dama aiwasuꞌu wẽ zaꞌra waꞌwa. Tane nherẽ, wa za ĩsisõwa ãma atẽme satõrĩ zaꞌra waꞌwa, wasisãnawã norĩ hã, robꞌuiprazé ubumro na te te aipawaptob zaꞌra waꞌaba da, ĩwana ré asiwi ꞌrãꞌõtõ pari aba da, te dama aiwasuꞌu wẽ zaꞌra waꞌaba zéb zarina. Duré te dama aiwasuꞌu wẽ zaꞌra waꞌaba zém na, taré te aiꞌumnhasi baba zaꞌra waꞌaba tõ da, wa za tô ãne hã ꞌmanha.
4 Ãté Masédonia hawimhã, wasisãnawã norĩ hã te za ãma ĩsiré aiꞌabaꞌré, atẽme zaꞌra waꞌaba. Tawamhã ãma atẽme wasihutu aba wamhã, robꞌuiprazé hã asiwi ꞌrãꞌõtõ pari aba õ wamhã, ãté wa aré aima aséb zaꞌra waꞌaba ni, taré wa te aiꞌumnhasi baba zaꞌra waꞌaba wa. A norĩ waꞌwa hã bété. Te aré tô aséb zaꞌra waꞌwa, tô sena iꞌubumro na, ãma uwaimrami zaꞌra waꞌaba õ wa.
5 Tahawa, wa tô ãne rosaꞌrata ĩsima, wasisãnawã norĩ hã ĩsisõwa te ãma atẽme satõrĩ zaꞌra waꞌaba da, robꞌuiprazé ubumro na te te aipawaptob zaꞌra waꞌaba da, asiwi ꞌrãꞌõtõ pari aba hâ ĩzô, ĩma iropisutu zaꞌra waꞌaba zéb zarina. Tawamhã ãma atẽme ĩwisi zaꞌra waꞌaba wamhã, õne haré wa za tiꞌâ, asiꞌuihâ na ato sina, dama asõprub zaꞌra waꞌaba zém na, da te dasiwi aiwaihuꞌu zaꞌra waꞌaba da.
6 Ãne na, wa za duré ãma aipoꞌre puꞌu zaꞌra waꞌwa, ãma rosaꞌrata zaꞌra waꞌaba da. Amnho hã suru na da te ꞌre izuri mono zéb zarina, te za suru na da te ꞌre ubumro zaꞌra, dama ꞌre ꞌrã zaꞌra mono wamhã. Saꞌẽtẽ na, da te ꞌre zuri mono wapsi, te za oto saꞌẽtẽ na da te ꞌre ubumro zaꞌra. Tane duré, dasima ꞌre idanhoprub zaꞌra mono zéb zarina, te za ꞌRe ihâimana uꞌâsi mono hã dama ꞌre sõpru, iwaꞌrãmi.
7 ꞌRâwi aipẽꞌẽ ꞌre, asima iwaihuꞌu zaꞌra waꞌaba zéb zarina si, te za aihâiba mono bâ dama asõprub zaꞌra waꞌwa, ãté saꞌẽtẽ na, ãté suru na. Robzeiꞌõ nherẽ, dama asõprub zaꞌra waꞌaba õ di za. Duré taré da te aima iꞌru zaꞌra waꞌaba zéb zarina, dama asõprub zaꞌra waꞌaba õ di za. Mare di. Asiꞌuihâ na si te za asima iwẽ zaꞌra waꞌaba zéb zarina, dama asõprub zaꞌra waꞌwa, ato sina. Ãne si iwẽ uptabi hã, ꞌRe ihâimana uꞌâsi mono ma hã, dato sina dasima ꞌre idanhoprub zaꞌra mono zé hã.
8 ꞌRe ihâimana uꞌâsi mono hã waihuꞌu pese uptabi di, uburé marĩ iwẽ hã te te aima ꞌre iꞌanhomri aba mono da hã, marĩ zô aiwi ꞌre rowaptâꞌâ zaꞌra waꞌaba mono tõ da, ãma ꞌre aihâimana zaꞌra waꞌaba mono zéb da hã, duré ãma ꞌre idapawaptob zaꞌra waꞌaba mono zéb da hã.
9 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Isibrobꞌõ norĩ ma, te ꞌre sõprub uꞌâsi, saꞌẽtẽ na. Isimizawi pese zé hã dawi ꞌre siꞌutõrĩ waihuꞌu zaꞌra mono õ di za. Te za dama ꞌre hâimana uꞌâsi zaꞌra.”
10 E ꞌwa hã te robzâ hã robzuriꞌwa norĩ ma, te te ꞌre anhomri. E ꞌwa hã, te dasazé hã te te dama ꞌre anhomri. Ta hã, ꞌRe ihâimana uꞌâsi mono. Tane te za duré isõprubzé hã aima ꞌre saꞌẽtẽ zaꞌra waꞌwa, dama ꞌre asõprub zaꞌra waꞌaba mono zé waꞌrãmi, saꞌẽtẽ uptabi na oto dama ãma ꞌre asõprub zaꞌra waꞌaba mono da, nimahã na hã.
11 Saꞌẽtẽ na te za tô iwẽ hã te te aima ꞌre sõmri uꞌâsi zaꞌra waꞌwa, taha zarina, oto a norĩ waꞌwa hã saꞌẽtẽ na ãma ꞌre dapawaptob uꞌâsi zaꞌra waꞌaba mono da, aiwab da. Tahawa, daꞌahâ na te za oto ꞌRe ihâimana uꞌâsi mono ãma tawata zaꞌra ni, asõprub zaꞌra waꞌaba zé hã za wa te datẽme ãwisi zaꞌra wẽ te.
12 Iwẽ hã te za tô iꞌmanharĩ zaꞌra waꞌwa, ãne na dapawaptob zaꞌra waꞌaba wamhã. E marĩ wa. Ta norĩ wi hã, marĩ zô tiwi ꞌre rowaptâꞌâ zaꞌra mono õ di za oto, ꞌRe ihâimana uꞌâsi mono nhibꞌaꞌuwẽ norĩ wi hã, Zudéa ãma ꞌre ihâimana zaꞌra mono norĩ wi hã. Taha zarina, te za duré ahâ na oto ãma ꞌre wata zaꞌra, ꞌRe ihâimana uꞌâsi mono ãma hã.
13 A norĩ waꞌwa hã tãma asõprub zaꞌra waꞌaba zém na, pawaptob zaꞌra waꞌaba wa, te za tãma ãma iꞌuwaimrami zaꞌra waꞌwa, ꞌRe ihâimana uꞌâsi mono ma hã. Tahawa, ahâ na te za tô ꞌRe ihâimana uꞌâsi mono ãma tiwata zara, Cristuhu wasuꞌuwẽ zarina ꞌre anomro wẽ waꞌaba mono na, duré asõprub uptabi na pawaptob zaꞌra waꞌaba wa, ta norĩ hã, duré darob amoi ãma ꞌre ihâimana zaꞌra mono norĩ hã, pawaptob zaꞌra waꞌaba wa.
14 Ta norĩ hã te te ꞌre asawi pese zaꞌra waꞌaba mono wa, te za aiꞌãma ꞌre mreme zusi uꞌâsi ꞌwa, ꞌRe ihâimana uꞌâsi mono ma, ta hã tinhimizawi pese zéb zarina, te te aipisutu zaꞌra waꞌaba wa, asimarĩ na tãma asõprub zaꞌra waꞌaba da, isimarĩꞌõ norĩ ma hã.
15 ꞌRe ihâimana uꞌâsi mono ãma si, wa za ꞌre wawata uꞌâsi zaꞌra, tiꞌra na wama isõprub zaꞌra zé waꞌrãmi. Isõprubzé hã wẽ uptabi nherẽ, damreme na iꞌuwaibaba na, da te dasima ãma ꞌre irowasuꞌu zaꞌra mono zé hã, da te dasima ãma ꞌre uwaimrami waihuꞌu zaꞌra mono õ di.
