2 Corĩtu 12:1-21
12 Marĩ dai õ nherẽ, wa za duré ãne na aima ãma ĩsiwasuꞌu zaꞌra waꞌwa, Zezusihi zadawa wasuꞌuꞌwa, sena ꞌre ĩhâimana mono zéb zarina ĩnhimiromhuri wẽ na, ãma asiwi ĩwaihuꞌu zaꞌra waꞌaba da. Zezusihi zadawa wasuꞌuꞌwa newa, tô senaiꞌõ na te te aima ꞌre iroti zaꞌra waꞌaba mono norĩ hã te sina ꞌre wata zaꞌra, sõtõ ꞌrowim ne, marĩ hã ta norĩ si te te ꞌre ꞌmadâꞌâ zaꞌra mono newa. Tane nherẽ, wa tô duré ĩzama marĩ iwaihuꞌuꞌõ hã te ꞌre aꞌmadâꞌâ, ĩnhotõ ꞌrowim ne, Wanhibꞌapito te te ĩma ꞌre iꞌawaihuꞌu mono zéb zarina si.
2 Duréihã ꞌRe ihâimana uꞌâsi mono, ma tô ĩzaprõ, hâiwa u, ꞌre isãmra mono zéb u. Wa hã Cristuhu zazeiꞌwa. Ĩnhotõ ꞌrowim ne, hâiwa u ĩmorĩzém na hã 14 na ma tô ĩꞌãma tiwahu oto. Ãté ĩhâiba uꞌâsi na, wa tô wi. Ãté ĩpẽꞌẽzani na si. Wa hã ĩsiwaihuꞌu õ di. ꞌRe ihâimana uꞌâsi mono ma si, waihuꞌu pese di, ãne hã.
3 12:3-4 Ãne na hã ãma ĩsiwaihuꞌu õ di, wa hã. Ãté ĩpẽꞌẽzani na si, wa wi, tô. Ãté ĩhâiba wahuré. ꞌRe ihâimana uꞌâsi mono ma si, ãne hã tãma waihuꞌu pese di. Ãne si, wa tô wa hã ĩsiwaihuꞌu, rowẽ uptabi u ĩwisi na hã tô. Tame rowasuꞌu iwẽ uptabi hã wa tô te awapari, ĩsiꞌuihâ na. Rowasuꞌu wẽ uptabi wa, damreme na iꞌuwaibaba da te dasima ãma ꞌre irowasuꞌu zaꞌra mono zéb da hã, da te dasima ãma ꞌre uwaimrami waihuꞌu zaꞌra mono õ di.
4 ꞌMadâꞌâ 12:3
5 Ãne na ĩma romhâimana wamhã, ãté ibâre, wa aré aima ĩsiwasuꞌu zaꞌra waꞌwa, ꞌRe ihâimana uꞌâsi mono te te ĩwẽsãmrizém na hã. Tane nherẽ, taha na aima ĩsiwasuꞌu zaꞌra waꞌaba õ di za. Ĩsiꞌuihâ na marĩ da, ĩnhibꞌuware na ꞌre ĩhâimana mono zém na si, wa za aima ĩsiwasuꞌu zaꞌra waꞌwa, asiwi ãma ĩwaihuꞌu zaꞌra waꞌaba da hã.
6 Ãne na ĩma iromhâimanazém na aima ĩsiwasuꞌu zaꞌra waꞌaba da, te ĩsina rosaꞌrata ꞌwaꞌâhã, e ĩnhimizaꞌreseꞌõre zarina, wa aré aima ĩsiwasuꞌu zaꞌra waꞌwa. Mare di. E marĩ wa. Tô sena, ãne na hã aré aima ĩsiwasuꞌu zaꞌra waꞌaba wa. Tane nherẽ, taha na aima ĩsiwasuꞌu zaꞌra waꞌaba õ di za. Ĩnhimiromhuri hã ꞌre iꞌmadâꞌâ zaꞌra waꞌaba mono zéb zarina si, duré ĩnhimiroti hã aipoꞌre na ꞌre iwapari zaꞌra waꞌaba mono zéb zarina si, te za ĩhâimanazém na ĩꞌãma ꞌre irosaꞌrata zaꞌra waꞌaba mo, asima.
7 Danhotõ ꞌrowi, da te ꞌre irosawẽrẽ zaꞌra mono ne, wa tô marĩ iwẽ uptabi hã te aꞌmadâꞌâ tô, ĩnhotõ nem na te iꞌawaihuꞌu ne. Tahawa, danhipai u dama ĩpire newa, ꞌrâwi ãma ꞌre ĩsiꞌmadâꞌâ zei mono tõ da, ma tô ꞌRe ihâimana uꞌâsi mono hã ĩma pisutu, ĩhâiba na te tô ꞌre robzépata mono da, roꞌwa hã te te ꞌre danhiptâꞌâ zaꞌra mono wa, dawa ꞌre siꞌẽ zaꞌra mono wa, daꞌãma ꞌre isépuꞌu siroptub zaꞌra mono ne. Taha zarina, te tô Satanasi hã te te ꞌre ĩpibui uꞌâsi, te ãma ꞌre irobzépata uꞌâsi mono da hã. Tane nherẽ, ꞌRe ihâimana uꞌâsi mono hã te te tiwi ꞌre ĩzawi mono õ di, ãne na te te ꞌre ĩpibu tõ mono da hã. E marĩ wa. Dama ĩpire newa, ꞌrâwi te ĩsina ꞌre rosaꞌrata tõ mono da.
8 Tahawa, wa tô siꞌubdatõ Wanhibꞌapito wi hã ĩsiꞌãma rowaptẽ, tô õhõ na te ꞌre irobzépata mono zém na hã ta hã simisaré te te ĩꞌãma sizâri da, te ãma ꞌre robzépata zahu tõ mono da.
9 Tane nherẽ, ãne si ma tô nasi ĩma waihuꞌu asa, te tiwi rowaptẽrẽ wamhã: “Te aiꞌãma sizâri õ di za. Ĩnhimizawi pese zéb zarina si, te za ꞌre aihâimana mo. Asiꞌuihâ na marĩ da hã, asibꞌuware na ꞌre aihâimana mono nherẽ, te za asiptete sina ĩꞌãma ꞌre aihâimana mo, ĩnhimipawaptobzéb zarina.” Ãne si, ma tô nasi ĩma waihuꞌu na waꞌrã asa, Wanhibꞌapito hã. Tahawa, ĩsiꞌuihâ na marĩ da hã, ĩnhibꞌuware na ꞌre ĩhâimana mono zém na si, wa za tô ĩto sina aima ĩsiwasuꞌu zaꞌra waꞌwa, taha waꞌrãmi Cristuhu nhiptetezéb ré si, ꞌre ĩhâimana uꞌâsi mono da.
10 Ĩsiꞌuihâ na marĩ da hã, ĩnhibꞌuware na ꞌre ĩhâimana mono nherẽ, duré Cristuhu ma, te ꞌre romhuri mono wa, da te ĩꞌãma ꞌre wasété zaꞌra mono nherẽ, duré ĩma ropire na ꞌre ĩhâimana mono nherẽ, duré da te ĩma ꞌre robꞌmanharĩ wasété zaꞌra mono nherẽ, duré marĩ na te ꞌre robzépata mono nherẽ, wa ĩto sina ꞌre ĩhâimana uꞌâsi. E marĩ wa. Ĩsiꞌuihâ na marĩ da hã, ĩnhibꞌuware na ꞌre ĩhâimana mono nherẽ, wa za taha waꞌrãmi, ĩnhiptete sina ꞌre ĩhâimana, Cristuhu nhimipawaptobzém na si.
Corĩtu ãma isazeiꞌwa norĩ ãma, Paulu hã ihâtâꞌâ zaꞌra zé wasuꞌu
11 Cristuhu zadawa wasuꞌuꞌwa na, asiwi ĩwaihuꞌu zaꞌra waꞌaba õ wa, wa tô ĩnhimiromhuri wẽ na si aima ĩsiwasuꞌu zaꞌra waꞌwa, ãne hã te ĩsima wẽ õ nherẽ. Ãté ĩnhimizaꞌreseꞌõ ne, wa tô ãne na aima ĩsiwasuꞌu zaꞌra waꞌwa, a norĩ waꞌwa hã dama ꞌre ĩwasuꞌu wẽ zaꞌra waꞌaba mono õ ꞌru te. ꞌRe ihâimana uꞌâsi mono te te ꞌre ĩpawapto mono õ ꞌwaꞌâhã, aré marĩ dai õ di, ꞌre ĩhâimana mono zé hã tô. Tane nherẽ, Zezusihi zadawa wasuꞌuꞌwa newa, senaiꞌõ na te te aima ꞌre iroti zaꞌra waꞌaba mono norĩ ma, ĩwapu na tãma ꞌre ĩhâimana zaꞌra mono õ di.
12 Aiꞌrata ĩnhamra aba ré, wa tô ĩnhimiꞌẽ na marĩ dama iꞌmanharĩ waihuꞌuꞌõ hã aima ꞌmanharĩ zaꞌra waꞌwa, Zezusihi zadawa wasuꞌuꞌwa norĩ nhimiromhuri na. Ãne zarina, te za sena na Zezusihi zadawa wasuꞌuꞌwa na asiwi ĩwaihuꞌu zaꞌra waꞌwa.
13 E tawamhã aiꞌupana zaꞌra waꞌaba si, wa tô darob amoi ãma isazeiꞌwa norĩ ꞌre ihâimana zaꞌra mono norĩ hã te ꞌre apawapto pese, ta norĩ si ĩma sawi pese zaꞌra wa. Mare di. E marĩ na, wa tô bété a norĩ waꞌwa hã aiꞌmararé zaꞌra waꞌwa, sena na Zezusihi zadawa wasuꞌuꞌõꞌwa na asiwi ĩwaihuꞌu zaꞌra waꞌaba zéb da hã. Ãté asimarĩ aba zô, te ꞌre aiwasutu zaꞌra waꞌaba mono õ zém na si, wa tô aiꞌmararé zaꞌra waꞌwa, aiꞌrata ĩnhamra aba ré hã. Maꞌãpé, ãne na tô ĩwasédé hã te aima ꞌmanharĩ zaꞌra waꞌaba ze te bâ, ĩma pari zaꞌra waꞌaba.
14 Siꞌubdatõ ãma, wa za oto ãma atẽme ĩmorĩ ꞌwa, te duré asabu na sahu zaꞌra waꞌaba da. Tawamhã ãma atẽme ĩmorĩ aba wamhã, asiwi ĩpawaꞌâbâ aba da, te aiwi rowaptẽrẽ zaꞌra waꞌaba õ di za, asimarĩ zaꞌra waꞌaba zô, ãma atẽme ĩmorĩ aba õ wa za. Taré Cristuhu wasuꞌuwẽ na te aipawaptob zaꞌra waꞌaba da si, wa za tô ãma atẽme ĩmorĩ ꞌwa. E damama norĩ ma, te za daꞌra norĩ hã te te ꞌre ubumroi pese zaꞌra, dasazé hã. Mare di. Damama norĩ si, te za te te ꞌre robꞌubumroi pese zaꞌra, tiꞌra sazéb da hã. Tane duré wa hã, aimama zaꞌra waꞌaba ne, aima ꞌre ĩhâimana zaꞌra waꞌaba mono wa, te ꞌre aipawaptob zaꞌra waꞌaba mono da si, wa tô te aiꞌãma ꞌre rosaꞌrata uꞌâsi zaꞌra waꞌwa, ĩsima. Tahawa, asiwi ĩpawaꞌâbâ aba õ di za.
15 Tawamhã ãma atẽme ĩmorĩ zaꞌra waꞌaba wamhã, ĩto sina, wa za uburé ĩnhimarĩ hã uprosi, te ãma aipawaptob zaꞌra waꞌaba da, te ãma iꞌâri hã za. Taha da, wa za duré aima romhuri pese zaꞌra waꞌwa, ĩwasutu uptabi nherẽ. Ãne na hã ĩma asawi pese zaꞌra waꞌaba nherẽ, e te za ãne waꞌrãmi ĩzawi zaꞌra waꞌaba ãna da hã ĩwi asisawi zaꞌra waꞌwa.
16 Asiwi ĩpawaꞌâbâ zaꞌra waꞌaba da, te aiwi irowaptẽrẽ zaꞌra waꞌaba õ na, ma tô asina ĩwaihuꞌu zaꞌra waꞌwa tô. Tane nherẽ, ma tô niꞌwam norĩ hã rosaꞌrata na ĩꞌãma upa zaꞌra, robꞌuiprazé hã ĩzadawa nhipese na te aiwi iꞌubumro zaꞌra waꞌaba na hã. E ãne hã iꞌuwaibaba. Mare di. Iꞌuwaibaba õ di.
17 Wasisãnawã norĩ hã, ĩzadawa para ãma atẽme siꞌabaꞌréi waꞌaba da, te ãma isatõrĩ zaꞌra hã e ma tô aima sadawa hapese zaꞌra waꞌwa, robꞌuiprazém na. Mare di. Ãne na hã aima sadawa nhipese zaꞌra waꞌaba õ di, ta norĩ hã.
18 Titu hã bété. Ta hã wa tô duré ãma atẽme satõrĩ zaꞌra waꞌwa, ãma atẽme aba morĩ da hã. Wasisãnawã hâiba amo hã wa tô duré ãma isiré satõ. E Titu hã ma tô ãhã wamhã aima sadawa hapese ꞌwa, asimarĩ zaꞌra waꞌaba zô hã. Mare di. Tane duré, wa hã ꞌre ĩhâimana mono zé hã. Aiwa tô ãne na ꞌre iwahâimana mono zé hã, robꞌuiprazém na aiwi ꞌre iwanhimisaihuri zaꞌra waꞌaba mono õ na hã.
19 E taré waꞌãma ꞌre rosaꞌrata wẽ zaꞌra waꞌaba mono da, wa ãne na aima wasiwasuꞌu zaꞌra waꞌaba ni. Mare di. Cristuhu zazeiꞌwa oto ꞌre wahâimana mono wa, wa ãne na aima wasiwasuꞌu zaꞌra waꞌaba ni, ꞌRe ihâimana uꞌâsi mono nhoꞌa. Wasisãnawã norĩ, wama asawi pese zaꞌra waꞌaba norĩ hã, wa te ꞌre aipawaptob zaꞌra waꞌaba mono da si, wa tô uburé marĩ hã wa te ꞌre abꞌmanharĩ, asiptete sina Cristuhu ãma si ꞌre anomro aba mono da oto.
20 Aiꞌãma ꞌre ĩhâtâꞌâ zaꞌra waꞌaba mono sina, wa tô aiꞌãma te ꞌre rosaꞌrata uꞌâsi zaꞌra waꞌwa, za ãma atẽme ĩmorĩ aba na dâꞌâsina, duré ꞌre aihâimana zaꞌra waꞌaba mono zém na, za te aiwẽsãmri zaꞌra waꞌaba õ na dâꞌâsina. Ãté a norĩ waꞌwa hã te za duré asiwi ĩwẽꞌõ zaꞌra waꞌwa, za ãma atẽme ĩmorĩ zaꞌra waꞌaba wamhã. Ãté ãhã na hã te ꞌre asisadaꞌâbâ uꞌâsi zaꞌra waꞌaba mo ꞌrâwi. Ãté te duré marĩ na ꞌre asiꞌruiwapari zaꞌra waꞌaba mo. Ãté te duré asisada ꞌre asitiꞌru zaꞌra waꞌaba mo. Ãté asiꞌãma si te duré ꞌre irosaꞌrata zaꞌra waꞌaba mo. Ãté te duré asiꞌãma ꞌre iwasété zaꞌra waꞌaba mo. Ãté te duré asima ꞌre idabâsi wasété zaꞌra waꞌaba mo. Ãté dama aipire newa, te duré ꞌrâwi ꞌre asiꞌmadâꞌâ ze zaꞌra waꞌaba mo. Ãté siwaꞌru te duré ꞌre aihâimana zaꞌra waꞌaba mo. Ãne na ꞌre aihâimana zaꞌra waꞌaba mono õꞌumnhasite, wa aiꞌãma te ꞌre romnhimimnhasi uꞌâsi zaꞌra waꞌwa, wa hã.
21 Ãma atẽme ĩwisi aba wamhã, ãté ĩpẽꞌẽzé te, wa za aiwaꞌõ, aiꞌãma ĩpẽꞌẽzé uptabi zaꞌra waꞌaba wa. Duréihã aiꞌahâ na ma tô aiwasédé hã ꞌre iꞌmanharĩ zaꞌra waꞌaba mo aré. Ma tô duré asina ꞌre asimisaihuri zaꞌra waꞌaba mo, piꞌõ na, aibâ na zama. Asiséb ãna, ma tô duré marĩ iwasétére zô si asima ꞌre asõpré waꞌaba mo. Ãne na aiwasédé hã ꞌre ꞌmanharĩ zaꞌra waꞌaba mono nherẽ, aiwasété wi ꞌre aipizari zaꞌra waꞌaba mono õ wa, ãté te za ĩwi tirobzeiꞌõ pese. Tahawa, ãté ĩnhiséb di za, Ĩnhibꞌapito ma hã, duré ꞌRe ihâimana uꞌâsi mono ma hã, aiꞌuꞌâbâ zaꞌra waꞌaba hã.
