2 Corĩtu 1:1-24
1 Wa hã Paulu, wa ãma aima robꞌuiꞌéré zaꞌra waꞌwa, Corĩtu ãma, iwasuꞌuwẽ u ꞌre asiꞌrãꞌõtõ aba mono norĩ ma, asiré. Uburé Acaia na danhiptiꞌa nhoꞌõmo nhisi ãma, ꞌRe ihâimana uꞌâsi mono nhibꞌaꞌuwẽ ꞌre aihâimana zaꞌra waꞌaba mono norĩ ma zama, wa ãma aima robꞌuiꞌéré zaꞌra waꞌwa. ꞌRe ihâimana uꞌâsi mono hã ma tô ĩpisutu, Cristu Zezusihi zadawa wasuꞌuꞌwa na isadawa para dama ꞌre ĩhâimana mono da, daro mono bâ, te te sima ĩwẽzéb uwaibaba.
Wano hã te duré ãma ĩzadawa wapto, uburé te aima ãma irowasuꞌu zaꞌra waꞌaba zém na hã, Timotiu na wano nhisi hã.
2 Wamama ꞌRe ihâimana uꞌâsi mono nhimizawi pese zé hã duré ihawi rowẽ uꞌâsi zé, Wanhibꞌapito Zezu Cristuhu ma zama ꞌre ihâimana mono, aiꞌãma ꞌre ihâimana uꞌâsi zaꞌra waꞌaba mono da si.
Paulu hã, ꞌRe ihâimana uꞌâsi mono ãma iwatazé wasuꞌu
3 ꞌRe ihâimana uꞌâsi mono ãma si, ꞌre wawata zaꞌra waꞌaba mono za, Wanhibꞌapito Zezu Cristuhu mama ãma. Ta hã te waꞌãma ꞌre siwamri uꞌâsi. Te duré te te ꞌre waꞌapawaptob uꞌâsi, wapẽ hã iꞌre wama ꞌre simiꞌwara uꞌâsi mono da.
4 Wa norĩ hã, Timotiuhu me, uburé marĩ ipire wa te ꞌre sépata mono wamhã, te za tô te te ꞌre wapawapto, wapẽ iꞌre wama ꞌre saꞌwari mono da hã. Tahawa, wama waihuꞌu pese di oto duré, isarina, wa te ꞌre idapawapto mono zéb da hã, wasine ꞌre dapẽꞌẽ nhimiꞌwara mono da, marĩ ipire hã da te ꞌre sépata zaꞌra mono wamhã. ꞌRe ihâimana uꞌâsi mono te te ꞌre iwapawapto mono ne, wa za tô wa norĩ zama wa te ꞌre dapawaptob zaꞌra, dapẽ hã iꞌre dama ꞌre simiꞌwara mono da apâ.
5 Wa norĩ hã Cristuhu zazeiꞌwa ꞌre wahâimana mono wa, wa wa te ꞌre robzépata tô, tiꞌab ré Cristu hã te te ꞌre irobzépata mono ne. Isine, wa te ꞌre robzépata mono nherẽ, ta hã te za te te ꞌre wapawaptob uꞌâsi, wapẽ iꞌre wama ꞌre saꞌwari mono da, wato sina duré ꞌre wahâimana uꞌâsi mono da.
6 Wa norĩ hã, Cristu, wa te dama ꞌre sadawa wasuꞌu mono wa, te da te wama ꞌre robꞌmanharĩ wasété uꞌâsi. Taha zarina, wa te ꞌre robzépata mono nherẽ, tô wama ꞌre rowẽ mono di. E marĩ wa. Wanhimiromhuri zarina ꞌre isaze zaꞌra waꞌaba mono zéb zarina, ꞌRe ihâimana uꞌâsi mono te te ꞌre asõꞌreptu zaꞌra waꞌaba mono wa, duré isimipawaptobzéb zarina, aipẽ hã iꞌre aima ꞌre simiꞌwara aba mono wa. Wa norĩ hã wa te ꞌre robzépata mono wamhã, te tô ꞌRe ihâimana uꞌâsi mono hã te te ꞌre wapawapto, wapẽ iꞌre wama ꞌre saꞌwari uꞌâsi mono da. Ãne hã aima waihuꞌu pese zaꞌra waꞌaba wa, te za ꞌrâwi asima ꞌre inharĩ zaꞌra waꞌaba mo, ãne: “Paulu norĩ hã te te ꞌre robzépata zahuré mono nherẽ, ꞌRe ihâimana uꞌâsi mono te te ꞌre ipawaptob uꞌâsi zahuré mono ne, te za duré te te ꞌre waꞌapawapto, wapẽ iꞌre wama ꞌre simiꞌwara uꞌâsi mono da.” Ãne te za ꞌrâwi asima ꞌre inharĩ zaꞌra waꞌaba mo. Tahawa, wasine ꞌre robzépata zaꞌra waꞌaba mono wamhã, te za asiptete sina ãma ꞌre anomro aba mo, ꞌRe ihâimana uꞌâsi mono ãma. Tawamhã te te ꞌre iwapawapto mono ne, te za tô ꞌRe ihâimana uꞌâsi mono hã te te ꞌre aipawaptob zaꞌra waꞌwa, aipẽ iꞌre aima ꞌre simiꞌwara aba mono da.
7 Ãne na, wa tô wa te aiꞌãma ꞌre rosaꞌrata uꞌâsi zaꞌra waꞌwa, ꞌre robzépata zaꞌra waꞌaba mono nherẽ, ꞌRe ihâimana uꞌâsi mono za ꞌre irẽme zaꞌra waꞌaba mono õ na hã. Tahawa, wasine ꞌre robzépata zaꞌra waꞌaba mono wamhã, tô sena te za duré ꞌRe ihâimana uꞌâsi mono hã te te ꞌre aipawaptob zaꞌra waꞌwa, te te ꞌre iwapawaptob uꞌâsi mono ne, apâ ꞌre aipẽꞌẽ nhimiꞌwara uꞌâsi aba mono da.
8 Wasisãnawã norĩ, wa duré wasima wẽ ni, wa te ãma aipoꞌre puꞌu zaꞌra waꞌaba da, Azia na danhiptiꞌa nhoꞌõmo nhisi ãma wahâimana ré, rowasédé hã wazada ihâimanazém na hã. Tame, wa te robzépata zaꞌẽtẽ uptabi wa, wa tô aré wasina rosaꞌrata ni, za wadâꞌâ da newa oto.
9 Ãne, wa tô wasina rosaꞌrata ni aré: “Tô sena, wa za wadâꞌâ ni, romhutu na.” Tawamhã e marĩ da, ma tô ãne hã bété wazada hã tiromhâiba. ꞌRâwi wawaihuꞌu pese na ꞌre wasiꞌmadâꞌâ tõ mono da, ꞌRe ihâimana uꞌâsi mono si, wa te ꞌre umnhasi pese mono da si, ma tô ãne hã wazada tiromhâiba. ꞌRe ihâimana uꞌâsi mono si waihuꞌu pese di, te te ꞌre idaꞌahâiwaꞌutu mono da hã. Duré tãma hã waihuꞌu pese di, te te ꞌre idaꞌaꞌmadâꞌâ mono da hã, rowasédé dazada ꞌre hâimana mono wamhã.
10 Ta hã ma tô wanhoꞌreptu tô, wadâꞌâzém hawi, wa te wasina romnhimimnhasi uptabi nherẽ. Taha zarina, te za te te ꞌre wanhoꞌreptu duré, wazada ꞌre iromhâimana wasété mono zém hawimhã. Tahawa, wama umnhasi uptabi di, ꞌRe ihâimana uꞌâsi mono hã te te ꞌre iwanhoꞌreptui mono da hã.
11 A norĩ waꞌwa hã waꞌãma ꞌre aimreme zusi aba mono zém na ꞌre wapawaptob zaꞌra waꞌaba mono wamhã, ꞌRe ihâimana uꞌâsi mono hã te za te te ꞌre aiwapari zaꞌra waꞌwa, te te ꞌre wanhoꞌreptui uꞌâsi mono da. Ãne wamhã, iwẽ na si te za tô wama ꞌre sõprub uꞌâsi. Taha zarina, te za tô daꞌahâ na ãma ꞌre dawata zaꞌra, ꞌRe ihâimana uꞌâsi mono ãma hã, iwẽ na si wama ꞌre sõprub uꞌâsi mono wa.
Paulu hã datẽme morĩ tõ da, te te ãma isaprĩzé wasuꞌu
12 Niꞌwam norĩ hã asiré ꞌre hâimana zaꞌra waꞌaba mono nherẽ, ma tô wahâimana nhipese na hã waꞌãma siwi tihi. Tane nherẽ, senai õ di ta hã. Wa norĩ hã ꞌrâwi wapẽꞌẽ na ꞌre wasiwẽꞌõ mono õ di. E marĩ wa. Marĩ hã wa te aiꞌãma ꞌre ꞌmanharĩ zaꞌra waꞌaba mono õ wa, ꞌre iwahâimana wẽ uꞌâsi mono zarina. Piꞌuriwi aiwi ꞌre wahâimana zaꞌra waꞌaba mono õ di. Marĩ iwẽ si, wa tô wa te aima ꞌre ꞌmanharĩ zaꞌra waꞌwa. Tiꞌai ãma isazeiꞌõꞌwa norĩ nhimirowaihuꞌu pese zarina, ꞌre wahâimana mono õ di. ꞌRe ihâimana uꞌâsi mono nhimizawi pese zéb zarina si, wa ãne na hã ꞌre wahâimana oto.
13 1:13-14 Wa te ãma aima irobꞌuiꞌéré zaꞌra waꞌaba zé hã e pire di, ꞌre sõré zaꞌra waꞌaba mono wamhã, duré ãma iwaihuꞌu zaꞌra waꞌaba da hã. Mare di. Aima wapu zaꞌra waꞌaba di. E marĩ wa. Wazadawa nhipese na, marĩ na wa te ãma aima robꞌuiꞌéré zaꞌra waꞌaba õ wa, aimawi na wa te ãma aima ꞌre roti zaꞌra waꞌaba mono õ wa duré. Ãne na hã sena na ꞌre iwahâimana mono zé hã aima waihuꞌu pese zaꞌra waꞌaba õ di. Tane nherẽ, wa tô wa te wasima ꞌre aiwẽ zaꞌra waꞌwa, nimahã na asiwi wawaihuꞌu pese zaꞌra waꞌaba da, wazadawa nhipese õ na ꞌre iwahâimana mono na hã. Tawapsi te za Wanhibꞌapito Zezusi hã nimahã bâtâ na apâ we imorĩzéb ãma, waꞌãma atobꞌuzu zaꞌra waꞌwa, wa norĩ hã za duré aiꞌãma iwatobꞌuzu zaꞌra waꞌaba ne, tô taha bâtâ na hã.
14 ꞌMadâꞌâ 1:13
15 1:15-16 ꞌRe ĩhâimana mono zém na, ĩwẽsãmri zaꞌra waꞌaba newa, wa tô aré ĩsima rowẽ, ã hawi Masédonia na danhiptiꞌa nhoꞌõmo nhisi hawi, apâ ĩmorĩ wamhã, ãma atẽme ĩmorĩ aba na, te sahu da duré. Masédonia u we ĩmorĩ ꞌrata wa, ãma atẽme ĩmorĩ aba ne, duré ãma atẽme ĩwisi aba da, te asabu na sahu zaꞌra waꞌaba da, wa tô ĩsima rowẽ aré. Ãhã wamhã, te aré asiwi ĩpawapto waꞌwa, Zudéa u ĩmorĩzéb da hã. Ãhã ꞌwaꞌâhã, te aré tô oto maparane ĩnhimipawapto wẽ zé hã tihâiba aima zaꞌra waꞌaba, ĩnhimiromhuri na hã.
16 ꞌMadâꞌâ 1:15
17 Tane nherẽ, ãma atẽme ĩmorĩ aba zém na, te sahu õ di, Masédonia hawi apâ ĩmorĩ ré, ãma atẽme ĩsipai waihuꞌu zaꞌra waꞌaba õ wa. Marĩ hã ĩma hâimana wa, wa tô ĩnhimirosaꞌrata na ãma saprĩ, ãma atẽme ĩmorĩ aba tõ da aꞌâ. Ãne wa, niꞌwam norĩ hã asiré ꞌre ihâimana zaꞌra waꞌaba mono norĩ hã ma tô ĩꞌãma rosaꞌrata wasété zaꞌra, ĩzadawa nhipese na hã, ĩmreme hã tô senai õ newa. E ĩnhimirosaꞌrata na ꞌrâwi te ĩsiwi roꞌwaꞌrutu wa, wa tô ãne hã ĩsima pisutu, ãma atẽme ĩmorĩ aba tõ da hã. Mare di. E isazeiꞌõꞌwa norĩ hã sima si ꞌrâwi te te ꞌre irosaꞌrata zaꞌra mono ne, wa tô ãne hã ĩsima pisutu. Mare di. Ãne wab õ di. Isazeiꞌõꞌwa norĩ hã marĩ na te te dama ꞌre ropisutu zaꞌra mono wamhã, awaꞌawi te za te te dawi ãma ꞌre saprĩ zaꞌra, simirosaꞌrata na saprĩ pese wa, ta norĩ hã. Isimiropisutu na ropsiꞌâri õ nherẽ, te za te te dama ꞌre nharĩ zaꞌra, siwaꞌrãmi. E ãne, ꞌre ĩhâimana mono zé hã, wa hã. Mare di. Ãnei õ di.
18 ꞌRe ihâimana uꞌâsi mono hã, dama umnhasi uptabi di. Niwamhã dama sadawa nhipese õ di. Ta hã ma tô ĩpisutu, te dama ꞌre sadawa wasuꞌu mono da, sena na. Tahawa, wa hã nimahã na hã aima ĩzadawa nhipese zaꞌra waꞌaba õ di. Te aima ꞌre irowasuꞌu zaꞌra waꞌaba mono zé hã, taréi õ di. Ĩnhimirosaꞌrata waptu na hã te duré ãma ꞌre saprĩ mono õ di.
19 Zezu Cristu hã bété, ꞌRe ihâimana uꞌâsi mono ꞌra hã. Ta hã tinhimiroti ahâ na te te ãma ꞌre azaprĩ mono õ di. Tô õhõ si isimiroti hã te tãma ꞌre hâimana. Tane duré, wa norĩ hã isadawa wasuꞌuꞌwa norĩ hã, Sila norĩ me duré Timotiu, tô iꞌuwaibaba si, wa tô wa te aima ꞌre wasuꞌu zaꞌra waꞌwa. Ta norĩ me hã, wa tô wa te aima ꞌre sadawa wasuꞌu zaꞌra waꞌwa, Cristu hã.
20 ꞌRe ihâimana uꞌâsi mono, iwẽ na te te dama ꞌre iꞌaropisutu mono zé hã ahâ uptabi nherẽ, ma tô Zezu Cristu hã pisutu, uburé te te dama ãma ꞌre iꞌaꞌuwaimrami mono da hã. Tahawa, Zezusi hã wama umnhasi di oto, uburé te te wama ãma ꞌre iꞌaꞌuwaimrami mono zém na hã. Wa norĩ hã wasiré isazeiꞌwa norĩ hã wasiré ꞌre wasiꞌrãꞌõtõ mono wamhã, ꞌRe ihâimana uꞌâsi mono ãma ꞌre wawata zaꞌra mono wamhã, wa ꞌre wamreme zusi, ãne: “Tane tô.” E marĩ te wasuꞌu, ã hã. Cristu, tô sena uburé marĩ na te te wama ꞌre iꞌaꞌuwaimrami mono zé, te wasuꞌu. Tane duré, wa norĩ hã isadawa wasuꞌuꞌwa norĩ sena na, wa wa te aima ꞌre rowasuꞌu zaꞌra waꞌwa, iwasuꞌuwẽ wasuꞌu na hã.
21 ꞌRe ihâimana uꞌâsi mono hã ma tô te te ꞌre wapawaptob uꞌâsi zaꞌra, wanhiptete sina Cristuhu ãma ꞌre wahâimana zaꞌra mono da. A norĩ waꞌaba zama, te duré te te ꞌre aipawaptob uꞌâsi zaꞌra waꞌwa, asiptete sina ãma ꞌre anomro uꞌâsi aba mono da. ꞌRe ihâimana uꞌâsi mono hã ma tô wapisutu zaꞌra, iwasuꞌuwẽ na, wa te tãma ꞌre romhuri zaꞌra mono da.
22 Tipẽꞌẽzani hã ma tô duré te te wama ꞌre anhomri, wapẽꞌẽ ꞌre, wama ꞌre ihâimana zaꞌra mono da hã. E marĩ te tawamhã wama wasuꞌu zaꞌra, Ipẽꞌẽzani hã wapẽꞌẽ ꞌre, ꞌre ihâimana mono zé hã. ꞌRe ihâimana uꞌâsi mono nhibꞌaꞌuwẽ ꞌre iwahâimana zaꞌra mono zé, te wama wasuꞌu zaꞌra. Duré, Ipẽꞌẽzani hã wapẽꞌẽ ꞌre, oto ꞌre sãmra mono wa, wa za wa te ꞌre waihuꞌu pese zaꞌra, ꞌRe ihâimana uꞌâsi mono, sena na za te te wama ãma ꞌre iꞌaꞌuwaimrami mono zém na hã, uburé te te wama ꞌre iꞌaropisutu mono zéb zarina.
23 Wa hã apâ ĩmorĩ wamhã, ãma atẽme ĩsipa zaꞌra waꞌaba õ di tô, Corĩtu u hã. E marĩ wa. Marĩ hã ꞌmanharĩ wasété zaꞌra waꞌaba wa, te aihâ zaꞌra waꞌaba tõ da, ãma atẽme ĩwisi aba õ di tô, apâ hã. Tô sena, wa ãne hã aima ĩsiwasuꞌu zaꞌra waꞌwa, ꞌRe ihâimana uꞌâsi mono nhoꞌa. Tahawa, ĩzadawa nhipese wamhã, ꞌRe ihâimana uꞌâsi mono te za tô ĩꞌazâ pé niha hã wamhã.
24 E wa norĩ hã asibꞌapito aima ꞌre wahâimana zaꞌra waꞌaba mono bâ, te za bété wanhimiroti hã ꞌre isaze zaꞌra waꞌaba mo. Mare di. Asibꞌapito hã aima ꞌre wahâimana zaꞌra waꞌaba mono õ di. A norĩ waꞌwa hã te asiptete sina ãma ꞌre anomro aba mo, Cristuhu ãma, ꞌre sazei utõrĩ zaꞌra waꞌaba mono ãna. Taré, wa wasiré wa te tãma ꞌre romhuri zaꞌra, ato sina ãma ꞌre iꞌaihâimana zaꞌra waꞌaba mono zéb da hã.
