1 Pedru 2:1-25
2 Tahawa, maꞌãpé uburé marĩ iwasédé hã rẽme pese zaꞌra waꞌaba, dama robꞌrãmi hã duré dahâimana nhipese na dahâimana hã duré marĩ na danhoꞌru hã duré uburé daꞌãma iwasété zama.
2 Aiꞌuté ipoto tém ne, ꞌre aihâimana zaꞌra waꞌaba mono, tina hâiwaꞌu zô si ꞌre isõpré mono ne, ãma ꞌre hâimana zaꞌra mono da hã. Tane te za Wanhibꞌapito nhimiroti zahi zô si ꞌre asõpré waꞌaba mo, ãma ꞌre aihâimana zaꞌra waꞌaba mono wa, ꞌre aiprédub zaꞌra waꞌaba mono da, duré asõꞌreptuzé hã asina ꞌre uwaimrami zaꞌra waꞌaba mono da.
3 E marĩ wa. Ãhã na hã ma tô oto ipibu zaꞌra waꞌwa, asiꞌuihâ na zaꞌra waꞌaba, Uburé Danhibꞌapito iwẽ uptabi na hã.
Ẽne idâꞌâ õ na Cristuhu ãma te te isimiréꞌézé, duré ꞌRe ihâimana uꞌâsi mono nhibꞌaꞌuwẽ norĩ hã
4 Maꞌãpé, ꞌrâwi itẽme asina rotété pese zaꞌra waꞌaba, Wanhibꞌapito Zezusihi u. Ta hã Ẽne ihâiba ré nherẽ, ma tô dasiwi wẽꞌõ ni, tiꞌai ãma ꞌre idahâimana zaꞌra mono hã. Tane nherẽ, ꞌRe ihâimana uꞌâsi mono hã ma tô ta hã pisutu, tãma wẽ uptabi wa, ẽtẽ waipo dama iwaꞌâbâ zaꞌẽtẽ uptabi ne.
5 Tane duré a norĩ waꞌwa hã, ẽne ihâiba ré ne, te ꞌRe ihâimana uꞌâsi mono hã aiwa ꞌri zaꞌra waꞌwa, isõrõwa na aipẽꞌẽ ꞌwa hã tãma ꞌre hâimana zaꞌra mono da, sasedoti iwẽ uptabi na tãma ꞌre romhuri zaꞌra waꞌaba mono da, aimawi. Ãne wa, Zezu Cristuhu uꞌâbâ, te za aipẽꞌẽ na tãma ꞌre iꞌasisõmri zaꞌra waꞌaba mono na tãma ꞌre asõprub zaꞌra waꞌaba mo, ꞌRe ihâimana uꞌâsi mono ma, te te ꞌre irowẽ mono zéb zarina.
6 Ãne ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, nomro wa:“Maꞌãpé, ꞌmadâꞌâ zaꞌra waꞌaba. Wa tô pisutu, Siã na ꞌri nhoꞌõmo nhisi ãma, ẽne dama isab da hã. Ta hã wa tô pisutu duré ta hã wẽ uptabi di.Tahawa, niꞌwam norĩ te te isaze zaꞌra norĩ wi hã, niwa tiwi irowazéb zaꞌra da hã, mare di.”
7 Tahawa, isaze zaꞌra waꞌaba norĩ ma hã, ã hã ẽne hã waꞌâbâ zaꞌẽtẽ uptabi di. Tanei õ di, te te isaze zaꞌra õ norĩ hã. Ta norĩ hã ma tô sina uwaimrami zaꞌra, Ibaihâ iwazé pese na robꞌuiꞌéré inomro hã, ãne: “Ẽne, ꞌriꞌwa norĩ te te siwi iwẽꞌõ hã, ta hã danhipai u pire uptabi na te oto ꞌre hâimana.”
8 Duré ihâiba amoi ãma Ibaihâ iwazé pese na robꞌuiꞌéré inomro hã, ãne:“Ã hã ẽtẽ na, te za duré ꞌre dasiꞌmõrõpãrĩ zaꞌra. Ã hã ẽtẽ tobꞌrã hã te za duré te te ꞌre daꞌmõrõpãrĩ zaꞌra.”
Rowasuꞌuwẽ hã da te wapari zaꞌra õ wa, te tô ꞌre dasiꞌmõrõpãrĩ zaꞌra, ꞌRe ihâimana uꞌâsi mono te te dama ipisutuzéb zarina.
9 Tanei õ di, a norĩ waꞌwa hã. ꞌRe ihâimana uꞌâsi mono hã ma tô sima aipisutu siromo zaꞌra waꞌwa, sasedoti na ꞌre aihâimana zaꞌra waꞌaba mono da, aiwẽ uptabi na aimawi tãma ꞌre aihâimana zaꞌra waꞌaba mono da, ꞌRe ihâimana uꞌâsi mono nhibꞌaꞌuwẽ na si. Ta hã robra hawi rowaꞌa iwẽ uptabi u te te iꞌasani zaꞌra waꞌwa hã ma tô sima aipisutu zaꞌra waꞌwa, isimiromhuri iwẽ uptabi hã dama ꞌre ꞌmahârâ zaꞌra waꞌaba mono da.
10 Duréihã, a norĩ waꞌwa hã aré ꞌRe ihâimana uꞌâsi mono nhibꞌaꞌuwẽ õ di. Tane nherẽ, ãhã na hã te oto isibꞌaꞌuwẽ ꞌre anomro aba mo. Duréihã aima waihuꞌu zaꞌra waꞌaba õ di aré, ꞌRe ihâimana uꞌâsi mono daꞌãma ꞌre isiba mono zé hã. Tane nherẽ, ãhã na hã ma tô oto asima iwaibui waꞌwa.
Isazeiꞌwa norĩ hâimanazé
11 Ĩsiwaihuꞌu norĩ, ĩma iꞌasawi pese zaꞌra waꞌaba norĩ, ãma aipoꞌre puꞌu zaꞌra waꞌaba, a norĩ waꞌwa hã taré ãme dasiré aꞌuwẽ õ na ꞌre iꞌaihâimana zaꞌra waꞌaba mono na hã, tiꞌai ãma. Tahawa, maꞌãpé marĩ iwasété zô asima ꞌre iꞌasõpré waꞌaba mono zé hã asiwi ꞌre wẽꞌõ pese zaꞌra waꞌaba mono. Ta hã te wahâiba uptabi hã te te ꞌre ꞌwapéi uꞌâsi zaꞌra.
12 Duré maꞌãpé isazeiꞌõꞌwa norĩ wazari ꞌre aihâimana wẽ zaꞌra waꞌaba mono, niwamhã aiwasédé hã te te aiꞌãma ꞌre saꞌra waꞌaba mono nherẽ, aihâimana wẽ na ꞌre iꞌaihâimana zaꞌra waꞌaba mono zé hã te te ꞌre ꞌmadâꞌâ zaꞌra mono da, taha na ꞌRe ihâimana uꞌâsi mono ãma ꞌre wata zaꞌra mono da, Cristu hã za apâ we imorĩzé bâtâ ãma hã.
13 Wanhibꞌapito nhibꞌaꞌuwẽ ꞌre anomro aba mono uꞌâbâ, maꞌãpé, tiꞌai ãma dama ipire norĩ hã ꞌre wapari pese zaꞌra waꞌaba mono, Roma te apito hã danhipai u pire uptabi na dama ꞌre ihâimana mono hã tiꞌai ãma,
14 duré tiꞌai waꞌõtõ ꞌre, daꞌmadâꞌâꞌwa norĩ hã, apito nhimipisutu wa, te te ꞌre robꞌmanharĩ zaꞌra mono da, marĩ te te ꞌre iꞌmanharĩ wasété zaꞌra mono norĩ ma hã, te te duré ꞌre wẽsãmri zaꞌra mono da, marĩ iwẽ te te ꞌre iꞌmanharĩ zaꞌra mono norĩ hã.
15 E marĩ wa. ꞌRe ihâimana uꞌâsi mono ma iwẽ hã, marĩ iwẽ si ꞌre iꞌmanharĩ zaꞌra waꞌaba mono da hã, isimizaꞌreseꞌõ norĩ hã ꞌre sadawa nhitob zaꞌra waꞌaba mono da.
16 Aiwasété wi asima iwẽ na romhâ na ꞌre aihâimana zaꞌra waꞌaba mono. Tane nherẽ, asima iwẽ na ꞌre aihâimana zaꞌra waꞌaba mono wẽ te, ꞌre aihâimana zaꞌra waꞌaba mono tõ, marĩ iwasédé ꞌre iꞌmanharĩ zaꞌra waꞌaba mono zé hã ꞌre upsibi zaꞌra waꞌaba mono da. ꞌRe ihâimana uꞌâsi mono ma aiwadaꞌuri zarina romhuriꞌwa na si ꞌre aihâimana zaꞌra waꞌaba mono.
17 ꞌRe dawazé pese zaꞌra waꞌaba mono. Duré asisãnawã norĩ isazeiꞌwa norĩ hã ꞌre sawi pese zaꞌra waꞌaba mono. ꞌRe ihâimana uꞌâsi mono si ipipa na ꞌre wazé pese zaꞌra waꞌaba mono. Duré Roma te apito hã ꞌre wazéb zaꞌra waꞌaba mono.
Cristu hã robzépata na isisanhozé
18 A norĩ waꞌwa aiwadaꞌuri zaꞌra atedeꞌwai ma romhuriꞌwa norĩ, asibꞌihâꞌa norĩ hã ꞌre wapari pese zaꞌra waꞌaba mono, duré ꞌre wazé pese zaꞌra waꞌaba mono. Mare di, ihâimana wẽ si hã duré isimizawi pese si hã.
19 Iꞌuwaibaba õ nherẽ, da te aima ꞌre irobꞌmanharĩ wasété zaꞌra waꞌaba mono zé hã ꞌre ꞌwapé zaꞌra waꞌaba mono wamhã, ã hã ꞌRe ihâimana uꞌâsi mono te te sima ꞌre iwẽ mono na waihuꞌu sina, tawamhã ãne uꞌâbâ te za iwẽ hã te te aima ꞌre apisutu ꞌwa.
20 Tazahã oto, marĩ iwasédé hã ꞌre ꞌmanharĩ zaꞌra waꞌaba mono wa, da te aima ꞌre irobꞌmanharĩ wasété zaꞌra waꞌaba mono zé hã asimiꞌẽ sina ꞌre ꞌwapé zaꞌra waꞌaba mono nherẽ, e niha te za aiꞌuzezé hã aima ꞌre hâimana zaꞌra waꞌwa. Tazahã, asimiꞌẽ sina marĩ iwẽ ꞌre ꞌmanharĩ zaꞌra waꞌaba mono wa, ꞌre ꞌwapé zaꞌra waꞌaba mono wamhã, ꞌRe ihâimana uꞌâsi mono hã te za iwẽ hã te te aima ꞌre apisutu ꞌwa, taha uꞌâbâ.
21 Taha da, ma tô apisutu zaꞌra waꞌwa.
E marĩ wa. Cristu hã ma tô robzépata, asada zaꞌra waꞌaba. Ma tô ãma aima asanho zaꞌra waꞌwa, isirã zarina ꞌre anomro aba mono da.
22 Ta hã marĩ na tiwasédé hã te te ꞌmanharĩ õ di. Duré niwa sadawa nhipese õ di.
23 Da te ãma ꞌre wasété zaꞌra mono wamhã, asa hã te te daꞌãma ꞌre awasété mono õ di. Te te robzépata wamhã, asa hã te te amhâzépa õ di. Tazahã, ꞌRe ihâimana uꞌâsi mono nhibꞌratap si ma tô sisõ, iꞌuwaibaba na daꞌãma rowairébéꞌwa nhibꞌratap si.
24 Wawasété zaꞌra hã tihâiba na ma tô tidu, wedepoꞌo nhonhiꞌrãmi na, wawasédé hã wama ꞌre dâꞌâ zaꞌra mono da, dahâimanazé iꞌuwaibaba na si oto ꞌre wahâimana zaꞌra mono da. Tawamhã iꞌuꞌazém na, ma tô aipese zaꞌra waꞌwa.
25 Poneꞌẽrebâ siwaꞌru ꞌre inomro mono ne, te aré ꞌre aihâimana zaꞌra waꞌaba mo. Tane nherẽ, ãhã na hã apâ ma asina isiri zaꞌra waꞌwa, Poneꞌẽrebâ ꞌMadâꞌâꞌwai u, duré Aiꞌwawi ꞌre isimapa zaꞌra waꞌaba mono ꞌwai u.
