ROMNHORÉ 17

E niha Jesus höimanadzé.

RURUꞌU

Wa te waihuꞌu dzaꞌra wamhã Jesus te te ĩnharĩdzé duré te te ĩꞌmanharĩdzé Tiꞌab ré, wa tsadaihuꞌu dzaꞌra ni ĩhöimanadzé. Tahã te warétsi dzaꞌra ãma watsiwaihuꞌu dzaꞌra da duré Ĩmama ãma, Jeová ãma. E ma norĩ marĩ ĩwẽ Jesus höimanadzéb ꞌremhã. Duré, e niha wa dza tsidzutsi dzaꞌra ni Jesus.

1. E niha na Jesus Timama ne te ꞌre höimana.

Bötö ahö uptabi ré hã, Jesus ma tô ꞌre höimana Ĩmama nhimidzawi petse tsiré hã höiwa ãma. Taha ré, marĩ ahö na ma tô ĩhawi waihuꞌu. Taha wa, Jesus te rotsaꞌrata duré te ꞌre höimana Jeová ne. (Tsõré na João 5:19.) Jesus Ĩmama höimanadzé te te tsidzutsi wẽ wa, te tsina tinha: ‘Niꞌwa hã te te ĩ̱ꞌmadöꞌö wamhã, Ĩ̱mama dzama te duré.’ (João 14:9) Jesus höimanadzé hã ꞌre waihuꞌu mono tsidöpötsi, te dza ĩwaihuꞌu pe Jeová na. Ãma ĩtsimiré, ꞌmadöꞌö wamhã Jesus daꞌãma ĩpẽꞌẽdzé na hã, te dza ĩwaihu Jeová dzama aiꞌãma ĩpẽꞌẽdzé na hã.

2. E niha Jesus ma tô höiꞌré Jeová te te ꞌre ĩtsawi petse mono na hã.

Jesus te tinha: ‘da te ĩwaihuꞌu dzaꞌra da tsi, Ĩ̱mama hã ĩ̱ma ĩtsawi uptabi na hã. Tahawa wa dza ꞌmanha, uburé te te ĩ̱ma ĩꞌruzé hã.’ (João 14:31) Tiꞌab ré, Jesus Timama te te ꞌre wapari petse mono wa uburé na, tãma pire nherẽ, ma tô höiꞌré tô tsena te te ꞌre ĩtsawi petse mono na hã. Taha nhipai u, Jesus Ĩmama dzawi te, te natsi dama ãma robdzanha duré te natsi dapawapto Ropotoꞌwa tsiwaihuꞌu da. — João 14:23.

3. E niha Jesus ma tô höiꞌré te te ꞌre ĩdadzawi petse mono na hã.

Ropotoꞌwai mreme te tinha Jesus, ‘te te tãma ꞌre ĩꞌarowẽ dzani mono na, aꞌuwẽ norĩ na.’ (Provérbios 8:31) Jesus tsimidzawi petse di duré dawi tsitsawi õ di. Taha nhipai u, Jesus te te ꞌre dapẽꞌẽ hiri duré tsimipawaptob dze ti. Marĩ dama ĩꞌmanharĩ waihuꞌuꞌõ te te ĩꞌmanharĩdzém na hã, Jesus ma tô höiꞌré tinhimiwaihuꞌu pe duré daꞌãma ĩpẽꞌẽdzédzé hã. (Marcos 1:40-42) Timreme na, Jesus ma tô te te ꞌre danhiptete duré danhimiparidzé ma tô titsõ ĩwapari dzei ꞌwa norĩ ma hã. Dadzawi te, Jesus ma tô daꞌupana robdzépata duré ma tô dörö. Tãma tsawi di aihĩni norĩ, tadzahã ĩtsadawa dzamarĩꞌwa norĩ hã tãma tsawi di danhipai u. — Tsõré na João 15:13, 14.

WAIHUꞌU DURÉ

Te dza ĩwaihuꞌu pe Jesus höimanadzém na hã. Te dza ĩꞌmadö duré e niha te dza ĩtsine ĩhöiꞌré atsimidzawidzé duré atsõprubdzé.

4. Jesus ma tsawi di Ĩmama

Jesus tsitsanhodzé te wama waihuꞌu dzaꞌra e niha wa dza höiꞌré dzaꞌra ni Ropotoꞌwa wa te ꞌre ĩtsawi petse dzaꞌra mono na hã. Atsiré tsõré aba Lucas 6:12 duré João 15:10; 17:26. Ãhã romnhihötö norĩ mono bö tsõré aba parimhã, atsima robdzanhamri aba ãhã dadzadanharĩ ãma piꞌrebamhã:

Jesus ne, e niha wa dza höiꞌré dzaꞌra ni Jeová wa te ꞌre ĩtsawi petse dzaꞌra mono na hã.

Jesus ma tô te te ꞌre tsawi Jeová duré ma tô te te tiwi ꞌre rowaptẽrẽ uꞌötsi

5. Jesus pẽꞌẽdzé di ĩpawaptobdzéb dzô tsô ĩrobaba dzaꞌra norĩ ãma

Jesus te tsitsipai u daꞌãma rotsaꞌrata. Tinhibötö na duré tinhiptetedzém na te natsi dapawapto watsutu nherẽ. Atsiré tsõré aba Marcos 6:30-44. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

E niha Jesus ma tô höiꞌré daꞌãma ĩpẽꞌẽdzé na hã. — ꞌMadöꞌö aba ĩtsihötö ꞌrare 31, 34, 41 duré 42.
E marĩ wa Jesus ma tô dapawapto. — ꞌMadöꞌö aba ĩtsihötö ꞌrare 34.
Jesus te te ꞌre tsidzutsi Ĩmama höimanadzé. E marĩ tahã te wama waihuꞌu dzaꞌra Jeová ãma.
E niha Jesus ne wa dza daꞌãma wapẽꞌẽdzé dzaꞌra ni.

6. Jesus tsõprub di

Jesus tsimarĩ ahöꞌõ nherẽ, ma tô tinhimarĩ norĩ na dapawapto. Te duré wama nharĩ dzaꞌra ãne wa te ꞌmanharĩ dzaꞌra da. Atsiré tsõré aba Atos 20:35. Taha parimhã, atsima robdzanhamri aba ãhã dadzadanharĩ ãma piꞌrebamhã:

Jesus te te ĩnharĩdzéb dzarina, e marĩ te dza wama rowẽ dzani dzaꞌra.

ꞌMadöꞌö aba ĨROPODO. Taha parimhã, atsima robdzanhamri aba ãhã dadzadanharĩ ãma piꞌrebamhã:

ĨROPODO: ‘Dama marĩ nhomriꞌwai ma, rowẽ uptabi di, dawi marĩ öriꞌwai ma, ĩrowẽ nhipai u.’ — Ĩwaꞌõno (4:00)

Wanhimarĩꞌõ nherẽ, e niha wa dza dama wanhoprub dzaꞌra ni.

E ma tô ĩwaihu.

Ropotoꞌwai mreme te wama rowahutu dzaꞌra Jeová wi wa te rowaptẽrẽ dzaꞌra da Jesus nhitsi na. (Tsõré na João 16:23, 24.) Ãne wa te ꞌmanharĩ dzaꞌra wamhã, wa dza höiꞌré dzaꞌra ni wama ĩpire na hã Jesus te te ĩꞌabꞌmanharĩdzé Jeová ãma watsiwaihuꞌu dzaꞌra da.

NIꞌWAM NORĨ TE NHARĨ DZAꞌRA ÃNE: “Ropotoꞌwa te wama tsõmri dzaꞌra robdzépada te te wapibu dzaꞌra da.”

Jesus te te ꞌre tsidzutsi Ĩmama höimanadzé. E niha Jesus te te ꞌre ĩꞌmanharĩ mono dzé te höiꞌré Jeová robdzépada te te wama ĩtsõmri dzaꞌra õ na hã.

ĨWAIHUꞌUDZÉ HÃ

Jesus ma tsawi di Jeová duré tãma dadzawi di. Jesus te te ꞌre tsidzutsi Ĩmama, taha wa, Jesus ꞌre waihuꞌu mono tsidöpötsi te dza ĩwaihuꞌu pe Jeová na.