ROMNHIHÖDÖ 14
E Marĩ Da Höimanaꞌuꞌö Tinhibꞌaꞌuwẽ Ĩré hã Ã hã Bötö Mono na hã.
1. E marĩ da Höimanaꞌuꞌö ma pitsutu israelita norĩ duréihã tinhibꞌaꞌuwẽ na.
Höimanaꞌuꞌö ma tô tsima pitsutu Abraão nhihudu norĩ tinhibꞌaꞌuwẽ na duré ma tãma tsõmri dzaꞌra roti ubumro. Ma tinhibꞌaꞌuwẽ hã tsitsi Israel na duré ma tãma ꞌru dzaꞌra te te ꞌre ꞌmadöꞌö uꞌötsi dzaꞌra mono da timreme hã duré ãma dawata uptabi dzé. (Romanos 3:2) Ta norĩ uꞌöbö, dapoto mono bö te aré da te ãma datsima ꞌre rowẽ dzaꞌra mono marĩ ĩwẽ na.—Tsõré na Gênesis 22:18.
Höimanaꞌuꞌö ma pitsutu israelita norĩ ĩwatsuꞌu dzaꞌra ꞌwa da hã. Ĩwatsuꞌu dzaꞌra hã te watsuꞌu da te ꞌre wapari petse dzaꞌra mono wamhã Höimanaꞌuꞌö, dza da te datsima ꞌre ĩrowẽ dzaꞌra mono na. (Romanos 15:4) Ãne, israelita norĩ hã da te ꞌmadöꞌö dzaꞌra wa, Höimanaꞌuꞌö ĩꞌuptabi te aré da te ꞌre waihuꞌu dzaꞌra mono. —Tsõré na Mateus 5:16.
2. E marĩ da Höimanaꞌuꞌö ma tsima pitsutu cristão ĩꞌuptabi norĩ tinhibꞌaꞌuwẽ na.
Israelita norĩ te te tsima wẽ dzaꞌra õ di oto Jeová te te ꞌre wapari dzaꞌra mono da. Taha wa, Jeová ma tô wẽꞌõ dzaꞌra duré ma ãma tsaprĩ dzaꞌra cristão norĩ na. (Mateus 21:43; 23:37, 38) Ã hã bötö na hã, cristão ĩꞌuptabi norĩ Jeová Watsuꞌuꞌwa norĩ te ꞌre höimana dzaꞌra.—Tsõré na Atos 15:14, 17.
Jesus ma tô rãꞌõtõ duré ma tô roti tidzadawa dzamarĩꞌwa norĩ ma te te dama ꞌre rowatsuꞌu dzaꞌra mono da ĩtsadawa dzamarĩꞌwa dzaꞌra da duré. (Mateus 10:7, 11; 24:14; 28:19, 20) Ã hã romhuri te dza romhutu na aiꞌutõ, robꞌrãtsutu wamhã, niwamhã rowatsété ꞌrãtsutu wamhã. Ã hã bötö mono na hã, ĩmorĩꞌrata na, Jeová ma tô daꞌubumro daꞌahö uptabi na dapoto mono bö ãma ĩꞌuptabi na ꞌre dawata dzaꞌra mono da. (Apocalipse 7:9, 10) Cristão ĩꞌuptabi ubumro norĩ hã te tsina ꞌre tsitsiptete dzaꞌra duré te ꞌre tsipawaptob dzaꞌra. Ropö te tãma tihöimana dzaꞌra romnhorédzé mono aiwaptsi.—Tsõré na Hebreus 10:24, 25.
3. E niha Jeová Watsuꞌuꞌwa norĩ ma ãma tsãnaꞌrata dzaꞌra tinhimiromhuri hã.
Bíblia na romnhoréꞌwa norĩ, wahum na 1870 ꞌre, ma tô waihuꞌu dzaꞌra Bíblia nhimirowahutu uptabi norĩ hã ãma ĩdapoꞌretsiꞌöri dzaꞌra aré duréihã. Tãma waihuꞌu petse dzaꞌra di aré Jesus te te ĩꞌru hã ĩtsiré ꞌre ĩnomro mono norĩ ma te te dama ꞌre rowatsuꞌu dzaꞌra mono da. Ãne ma ãma tsãnaꞌrata dzaꞌra dama rowahutu na daro mono bö damreme poꞌo mono bö Höimanaꞌuꞌö Nhimiꞌmadöꞌö na. Wahum na 1931 na, ma tsitsitsi dzaꞌra Jeová Watsuꞌuꞌwa norĩ hã. —Tsõré na Atos 1:8; 2:1-5, 10,11; 5:42.
4. E niha Jeová Watsuꞌuꞌwa norĩ nhimiromhuri hã.
Jesus döꞌö parimhã, aibö norĩ ubumro ma tô te te ꞌre pawaptob dzaꞌra cristão ĩꞌuptabi norĩ Tiꞌai mono bö duré te te ꞌre wapari dzaꞌra Jesus cristão norĩ Nhibꞌapito na. (Atos 16:4, 5) Ã hã bötö na hã, Rowairébéꞌwai Ubumro aibö ĩprédu norĩ na te te ꞌre pawaptob dzaꞌra Jeová Watsuꞌuꞌwa norĩ hã Tiꞌai mono bö. Te te ꞌre robꞌmadöꞌö dzaꞌra Jeová Watsuꞌuꞌwa norĩ nhimiromhuridzém hawi, romhuri ãma ĩtsaprĩdzém na duré dama ãma ropédzém na Bíblia na romnhorédzém norĩ 600 nhipai u damreme na. Ãne, Rowairébéꞌwai Ubumro te te ꞌre pawaptob dzaꞌra 100 mil nhipai u cristão ubumro norĩ Tiꞌai mono bö.Cristão norĩ ubumro ꞌremhã, aibö ĩtsimidzaꞌretse norĩ pitsudu te te ꞌre romhuri dzaꞌra daꞌmadöꞌöꞌwa na tinhimidzawi petse na te te ꞌre ꞌmadöꞌö dzaꞌra mono tsina Höimanaꞌuꞌö nhibꞌaꞌuwẽ norĩ hã.—Tsõré na 1 Pedro 5:2, 3.
Apóstolo norĩ ne, Jeová Watsuꞌuꞌwa norĩ te te dama ꞌre rowatsuꞌu dzaꞌra ꞌri nhidöpötsi, Jeová ma da te ꞌre romhuri dzaꞌra mono da. (Atos 20:19-21) Tãma wẽ dzaꞌra di duré dama rowahudu Bíblia na, Höimanaꞌuꞌö Mreme da te ꞌre ĩtsawi dzaꞌra mono norĩ ma. Tane nherẽ, Jeová Watsuꞌuꞌwa norĩ hã taré daꞌubumroi õ di. Õ norĩ hã, tsitsãnawã tsi hã ꞌre ĩtsitsawi petse dzaꞌra mono. Jeová hã Ĩmama dzaꞌra ĩtsimidzawipe.Tsitsãnawã dzaꞌra wa, te tsina ꞌre hötöꞌö uꞌötsi dzaꞌra. (2 Tessalonicenses 1:3) Jeová ma romhuri dzaꞌra ꞌwai wa, tãma rowẽ uptabi dzaꞌra di danhipai u petse Tiꞌai ãma. —Tsõré na 1 Pedro 2:9; Atos 20:35.
