Wapotoꞌwa wanhipai u rowaihuꞌu petse ꞌwa. Damama nhimidzawi petse na, te waꞌmadöꞌö dzaꞌra. Höimanaꞌuꞌö te te wapoto dzaꞌra õ di ꞌre wahöimana dzaꞌra mono da õhõ ãna. (Jeremias 10:23) Aiꞌuté wi tsô ĩrowaptöꞌö ne ĩmama nhimiroti dzô, Höimanaꞌuꞌö nhimiroti dzô te wawi tsô tirowaptöꞌö dzaꞌra. (Lucas 11:28) Bíblia nhimiroti hã Höimanaꞌuꞌö nhibdzari.—Tsõré na 2 Timóteo 3:16.

Jeová nhimiroti te dapawapto danhipai u ĩwẽ na ꞌre dahöimana dzaꞌra mono da oto duré te watsuꞌu dzaꞌra e niha te dza dama titsõ marĩ wẽ ĩtsiꞌutõrĩꞌõ aptoꞌoré hã. Höimanaꞌuꞌö Wapotoꞌwai wa, ĩtsimiroti wa dza wa te ꞌre wapari dzaꞌra.—Tsõré na Romanos 15:4; Apocalipse 4:11.

Bíblia nhimirowahutu nhimidzaprõni rowahudu ĩꞌuptabi te te ꞌre ĩdapawapto mono da te datsima ꞌre pitsutu dzaꞌra mono da. Taha waꞌrãmi, roti te tinha tsõꞌawi marĩ da te ĩꞌmanharĩ da hã. (Atos 15:29) Taha wa, wa te ĩrotsaꞌrata petse dzaꞌra da tsi wa te ꞌre tsadawa dzamarĩ dzaꞌra mono da rowahutu nhimidzaprõni wa te ꞌre ĩꞌmanharĩ dzaꞌra mono dzém na. (Hebreus 5:14) Ãma ĩtsimiré, Bíblia hã te watsuꞌu dahöimanadzé Höimanaꞌuꞌö nhibdzari na hã. Ã hã rowahudu ĩwapu te dza wadzaprõni dzaꞌra romhuri na, ꞌri na, duré ꞌre watsiꞌtsaréi mono wamhã. Te dza wama roti dzaꞌra wa te ãma ꞌre pibui petse dzaꞌra mono da uburé na.—Tsõré na Atos 17:28.

Jesus ma tô watsuꞌu maparane na rowahudu danhipai u ĩpire uptabi dzahuré na. Ĩmorĩꞌrada hã te ãma rowatsuꞌu e marĩ da dahöimanadzé hã: Höimanaꞌuꞌö waihuꞌudzéb da hã, tsawidzéb da hã duré tãma romhuridzéb da hã danhimidzadzei petse na. Ãma ꞌre ĩwapoꞌre puꞌu dzaꞌra mono da tsi ã hã rowahutu na wanhimipitsutu dzaꞌra mono bö. (Tiago 1:5) Te te ĩwadzé petse dzaꞌra norĩ hã ã hã rowahudu hã Höimanaꞌuꞌö tsiwaihuꞌu dzaꞌra hã dza duré te dza ꞌre höimana uꞌötsi dzaꞌra robdzei uptabi na.—Tsõré na Mateus 22:36-38.

Maparane ãma hã romharé na datsiré dahöimanadzéb da. (1 Coríntios 13:4-7) Dahöimana da ta hã dzarina daꞌãma ĩrotsaꞌrata da tsi Höimanaꞌuꞌö ne.—Tsõré na Mateus 7:12; 22:39, 40.

Bíblia nhimirowahudu hã te dama waihuꞌu ꞌre datsitsawi petse dzaꞌra mono da família ꞌre. (Colossenses 3:12-14) Bíblia ꞌre duré ĩré aimawi rowahudu família te te ꞌre ꞌmadöꞌö mono da hã: datsina damro tsiꞌutõrĩ tõ da.—Tsõré na Gênesis 2:24.

Bíblia nhimirowahudu hã te duré dapawapto marĩ na aimawi. Ãma ĩtsimiré, õhõ uꞌö, apito norĩ ma danhipai u ĩwẽ romhuriꞌwa norĩ te te ꞌre ĩtsadawa dzamarĩ dzaꞌra mono Bíblia nhimirowahudu hã romhuri nhimiꞌẽ na duré ĩbö dzarina. Ãne, Bíblia nhimirowahudu hã te dapawapto romhuri na. (Colossenses 3:22; Hebreus 13:18) Te duré dapawapto dapẽꞌẽ wẽ na duré danhimirotsaꞌrata wẽ na ꞌre danomro mono da. Te wama rowahutu dzaꞌra wa te watsima ꞌre robdze dzaꞌra mono da wa te marĩ norĩ na tsi duré ꞌre wahötöꞌö dzaꞌra mono da Höimanaꞌuꞌö tsiwaihuꞌudzém na robꞌuipradzém nhipai u.—Tsõré na Mateus 6:24, 25, 33; 1 Timóteo 6:8-10.

Dahöimanadzé Bíblia nhimirowahutu dzarina duré dahöiba ma wẽ di. (Provérbios 14:30; 22:24, 25) Wa te ꞌre tsadawa dzamarĩ dzaꞌra mono wamhã Bíblia nhimirowahudu hã ödzé höꞌrẽne uꞌötsi ãna, wa dza watsiꞌmadöꞌö dzaꞌra ni dahödzé wi duré marĩ watsété norĩ wi. (Romanos 13:13) Höimanaꞌuꞌö te te dawi tsawi õ di ödzé, tane nherẽ, da te ãma ꞌre tsipa dzaꞌra mono tõ da ödzé hötsi na. (1 Timóteo 5:23; 1 Coríntios 6:10) Jeová nhimirowahudu wapawaptobdzé te te wama waihuꞌu dzaꞌra wa wa te ãma ꞌre pibui petse dzaꞌra mono da wa te ꞌre ĩꞌmanharĩ dzaꞌra mono dzém na duré wanhimirotsaꞌrata dzaꞌra na. (2 Timóteo 3:15, 16) Tane nherẽ, cristão ĩꞌuptabi norĩ hã e taré te wadzéb dzaꞌra Höimanaꞌuꞌö nhimiroti te te tsima rowẽ dzaꞌra da tsi. Mare di. Jeová ãma ꞌre wata dzaꞌra mono da.—Tsõré na Mateus 5:14-16.