E MARĨ NA tô tsena. Dadzadanharĩ danhipai u ĩpire ꞌre ĩhöimana dzaꞌra mono na. Ãma ĩtsimiré, ãté ma tô atsitsadanha:

• E Höimanaꞌuꞌö te waꞌãma rotsaꞌrata dzaꞌra.

• E datsiꞌwapé hã duré robdzépada hã te dza aiꞌutõrĩ dzahuré nimahã bötö na hã.

• E marĩ te dza tihöiba dadöꞌö parimhã.

• E adöꞌö norĩ hã apö te dza ꞌre höimana dzaꞌra.

• E marĩ wa dza ꞌmanha Höimanaꞌuꞌö ĩnhimirowaptẽrẽ te te wapari da hã.

• E niha robdze hã wa dza tsõpẽtẽ.

E mame te dza ĩtsadaꞌöbödzé ĩtsõpẽ. Ĩhöiwarobo ubumrodzém ãma hã ĩhöiwarobö ahö di te te tsina ĩnharĩ dzaꞌra ĩtsadaꞌöbödzé ĩré dzaꞌra na. Tane nherẽ, ĩhöiwarobo mono aimawi na te rowahutu. Nima norĩ nhimirowahudu hã nimahã bötö ré ĩꞌuptabi nherẽ, apö da te ãma tsaprĩ waihuꞌu petse dzaꞌra di.

Tane nherẽ te tihöiba ĩhöiwarobo ĩtsadaꞌöbödzé uptabi ré hã. Uburé ĩwa ĩhöimana ĩꞌuptabi. Jesus Cristo ma tô Höimanaꞌuꞌö hawi rowaptẽ ãne: ‘Atsimiroti tô tsena uptabi.’ (João 17:17) Ĩtsimiroti hã Bíblia na te tihöiba. Ãhãna, ꞌmadöꞌö ĩtsadaꞌöbödzé ĩwapu duré ĩꞌuptabi Bíblia ꞌremhã ĩhöimana dzaꞌra dadzadanharĩ norĩ da hã höimo.

E MARĨ WA Ã HÃ DADZADANHARĨ:

Tiꞌai ãma marĩ watsétéꞌahö di. Danhimidzadze ahö na te te ꞌre rowahutu dzaꞌra wa te ꞌre ĩrobdzépata dzaꞌra mono na Höimanaꞌuꞌö te te tsima wẽ wa.

E NIHA BÍBLIA NHIMIROWAHUDU:

Höimanaꞌuꞌö marĩ watsédé niwa te te ꞌmanharĩ õ di, Tiago 1:13 te te ĩnharĩdzéb dzarina. Höimanaꞌuꞌö te te dama ĩropitsudu hã wẽ uptabi di. Taha wa Jesus ma wama rowahutu dzaꞌra rowaptẽrẽ hã ãne: ‘Wamama, höiwa ãma ꞌre atsãmra mono hã, atsitsi wẽ na uburé da te ꞌre aiwaihuꞌu dzaꞌra mono da, wa aima daꞌãma ꞌre ĩ̱mreme . . . Höiwa ãma aima romhuriꞌwa norĩ hã, atsima ꞌre ĩwẽ mono dzéb dzarina tsi, te te ꞌre ĩꞌaiwapari petse dzaꞌra mono ne, tiꞌai ãma uburé da te duré ꞌre aiwapari petse dzaꞌra mono da, wa daꞌãma ꞌre ĩ̱mreme.’ (Mateus 6:9, 10) Höimanaꞌuꞌö ma wadzawi petse dzaꞌra di, taha wa te dza uburé ꞌmanha tinhimiropitsudu hã te te ãma uwaimrami da. — Romanos 5:21.

Tsõré na duré Gênesis 1:26-28; Jó 34:10 duré 1 Pedro 5:6, 7.

E MARĨ WA Ã HÃ DADZADANHARĨ:

Daꞌahö na te natsi tadöꞌö dzaꞌra ni datsiꞌwapéi ãma hã duré wa norĩ hã uburé wa tô marĩ na robdzépata dzaꞌra ni.

E NIHA BÍBLIA NHIMIROWAHUDU:

Höimanaꞌuꞌö te tinha aptoꞌoré hã dza te te ĩꞌãwitsi na hã romharé Tiꞌai u wahuré. Ĩtsimiꞌmadöꞌö ãma hã, roti höiwa ãma, “da te ꞌre waihuꞌu dzaꞌra mono õ di dza datsiꞌwapé hã”. (Isaías 2:4, Tradução do Novo Mundo) Höimanaꞌuꞌö te dza uprotsi uburé marĩ watsédé hã duré robdzépada hã. Bíblia na ma tô ropitsutu: ‘[Höimanaꞌuꞌö] te dza duré daꞌatõmo uꞌõ, oto dapẽꞌẽdzé õ uꞌötsi ꞌre dahöimana uꞌötsi dzaꞌra mono da. ꞌRe dadöꞌö dzaꞌra mono õ di dza oto. Duré ꞌre datsiwaꞌõ dzaꞌra mono õ di dza oto. Duré dahödzé, da te ꞌre tsépata dzaꞌra mono õ di dza oto. Uburé ꞌre ĩromhöimana ꞌrata mono dzé hã tsiꞌutõrĩ petse wa oto.’ — Apocalipse 21:3, 4.

Tsõré na duré Salmo 37:10, 11; 46:9 duré Miqueias 4:1-4.

E MARĨ WA Ã HÃ DADZADANHARĨ:

Danhimidzadzedzém norĩ hã ahö na te te dama ꞌre rowahutu dzaꞌra marĩ dza ꞌre ĩhöimana mono na hã dahöiba ꞌremhã dadöꞌö parimhã. Niꞌwam norĩ te nharĩ dzaꞌra adöꞌö norĩ hã te te dama ꞌre ĩrobꞌmanharĩ watsété waihuꞌu petse dzaꞌra mono na duré Höimanaꞌüꞌö ĩwatsété norĩ hã te te ĩtsatõrĩ na unhama roꞌo u te te ꞌre robdzépata uꞌötsi dzaꞌra mono da.

E NIHA BÍBLIA NHMIROWAHUDU:

Niꞌwa döꞌö wamhã, te dza aiꞌutõrĩ petse. ‘Adöꞌö norĩ ma, . . . marĩ tãma waihuꞌu õ dzaꞌra õ di’, Eclesiastes 9:5 te tinha. Adöꞌö norĩ hã marĩ te te waihuꞌu dzaꞌra õ wa, tsimirotsaꞌrata dzaꞌra õ wa duré marĩ te te ꞌmanharĩ dzaꞌra õ wa, te te waihuꞌu dzaꞌra õ di dapawapto — duré dama robꞌmanharĩ watsédé. — Salmo 146:3, 4.

Tsõré na duré Gênesis 3:19 duré Eclesiastes 9:6, 10.

E MARĨ WA Ã HÃ DADZADANHARĨ:

ꞌRe wahöimana dzaꞌra mono dze ti. Wa watsima wẽ dzaꞌra ni wama ꞌre rowẽ dzaꞌra mono da wama ĩtsawi petse norĩ tsiré. Taha wa, wa robꞌruiwapari dzaꞌra ni wama ĩtsawi petse norĩ ĩdöꞌö dzaꞌra hã wa te tsõpẽtẽ dzahu dzaꞌra da.

E NIHA BÍBLIA NHIMIROWAHUDU:

Daꞌahö na ĩdadöꞌö dzaꞌra te dza tahöiwaꞌutu dzaꞌra ni. Jesus ma tô ropitsutu: ‘Niwaptsi te dza ꞌre ĩdadöꞌö dzaꞌra mono hã . . . tahöiwaꞌutu dzaꞌra ni.’ (João 5:28, 29) Höimanaꞌuꞌö te te tsima ĩwẽdzéb dzarina robnaꞌ rata hawimhã, daꞌahö na ĩdahöiwaꞌutu dzaꞌra da hã te dza ꞌre dahöimana dzaꞌra Ro Ĩwẽ ãma Tiꞌai ãma. (Lucas 23:43) Ãne wamhã, ĩpoꞌre petse norĩ hã te dza ꞌre höimana uꞌötsi dzaꞌra dahödzé ãna. Bíblia te tinha: “Ĩwẽ norĩ te hã dza Tiꞌa hã duré ĩwa te dza ꞌre höimana uꞌötsi dzaꞌra.” — Salmo 37:29.

Tsõré na duré Jó 14:14, 15; Lucas 7:11-17 duré Atos 24:15.

E MARĨ WA Ã HÃ DADZADANHARĨ:

Daꞌahö na, danhimidzadze ahö na, te natsi rowaptẽrẽ dzaꞌra ni. Tane nherẽ, ahö na te rotsaꞌrata dzaꞌra Höimanaꞌuꞌö te te ĩwapari dzaꞌra õ na.

E NIHA BÍBLIA NHIMIROWAHUDU:

Jesus te tinha wa te ꞌre rowaptẽrẽ dzaꞌra mono wamhã, ‘taré wamreme na wa te ꞌre tsahu ahö dzaꞌra mono tõ da apöre.’ (Mateus 6:7) Höimanaꞌuꞌö wanhimirowaptẽrẽ te te wapari da, wa dza rowaptẽrẽ dzaꞌra ni te te tsima ĩwẽ dzarina. Taha da, wa te ĩwaihuꞌu dzaꞌra da tsi Höimanaꞌuꞌö te te tsima ĩwẽ duré taha dzarina wa te rowaptẽrẽ dzaꞌra da. 1 João 5:14 te tinha: ‘ꞌRe ĩhöimana uꞌötsi mono te te wama ꞌre ĩꞌawẽ mono dzéb uwaibaba tsi, uburé marĩ na wa te tiwi ꞌre rowaptẽrẽ dzaꞌra mono wamhã, tô tsena te dza wamreme hã te te ꞌre awapari petse, te te wama ãma ꞌre ĩꞌaꞌuwaimrami mono dzéb da hã.’

Tsõré na duré Salmo 65:2; João 14:6, 14 duré 1 João 3:22.

E MARĨ WA Ã HÃ DADZADANHARĨ:

Daꞌahö na te rotsaꞌrata dzaꞌra ni robꞌuipradzé, dawaihuꞌupe duré dawẽ dza te te tãma ĩꞌãwitsi dzaꞌra na robdze hã. Taha wa, taha dzô te ꞌre tsõpré uꞌötsi dzaꞌra — tane nherẽ, te te tsõpẽtẽ dzaꞌra wamhã, tãma robdze dzaꞌra õ di.

E NIHA BÍBLIA NHIMIROWAHUDU:

Jesus ma tô dama waihuꞌu niha robdzedzé da te ꞌre tsõpẽtẽ dzaꞌra mono da te te nharĩ wamhã Höimanaꞌuꞌö dzô tiwi tsô ĩrowaptöꞌö dzaꞌra na te te ꞌre ĩwaihuꞌu dzaꞌra mono norĩ ma dza ꞌre ĩrowẽ dzaꞌra mono na. (Mateus 5:3) Wa dza robdzei uptabi tsõpẽtẽ dzaꞌra ni tô tsena Höimanaꞌuꞌö ãma duré waꞌãma ĩtsimirotsaꞌrada wa te waihuꞌu dzaꞌra waptsi. Ta hã tô tsena Bíblia na te tihöiba. Wa te waihuꞌu dzaꞌra wamhã, wa dza waihuꞌu dzaꞌra ni marĩ norĩ tô tsena ĩpire duré ĩpireꞌõ. Bíblia nhimiroti wa te tsadawa dzamarĩ wamhã, wama robdze dzaꞌra di dza. — Lucas 11:28.

Tsõré na duré Provérbios 3:5, 6, 13-18 duré 1 Timóteo 6:9, 10.

 Ta norĩ hã ĩtsadaꞌöbödzé ĩwapu, Bíblia ꞌre ĩhöimana dzaꞌra 6 dadzadanharĩ da hã. E te atsima ĩwẽ awaihuꞌu da duré. Waihuꞌu wamhã Höimanaꞌuꞌö aiwi tsô ĩrowaptöꞌö na, tô tsena te atsima ĩwẽ. Ãté ma tô atsima ĩrotsaꞌra duré: ‘Höimanaꞌuꞌö ma dadzawi petse nherẽ, e niha bö te te ꞌre tsaꞌréi mono marĩ watsédé hã duré robdzépada hã bötöꞌahö na. E niha família ꞌremhã robdzedzé’. Bíblia ꞌre te dza ĩtsadaꞌöbödzé ĩtsõpẽ taha da duré dadzadanharĩ ĩhöiba amo norĩ da hã.

Tadzahã, daꞌahö na Bíblia da te tsõré dzaꞌra õ di. Tãma pire dzaꞌra di te te waihuꞌu dzaꞌra da. E te atsima ĩwẽ niꞌwa te te aipawaptob da waihuꞌu da. Jeová Watsuꞌuꞌwa norĩ marĩ maparane ĩré dzaꞌra dza te te aipawaptob dzaduré da hã.

Ĩmorĩꞌrada hã ĩtsõrédzé hã Romahörö Wẽ Höimanaꞌuꞌö Hawimhã, ĩꞌmanharĩ dapawaptob da te ꞌre tsõpẽtẽ dzaꞌra mono da Bíblia ꞌre ĩtsadaꞌöbödzé dadzanharĩ ĩpire norĩ da hã. Maparane ãma hã, Bíblia na romnhoré waꞌöbö ãna. Nimahã Jeová Watsuꞌuꞌwa atsõrõwa ꞌrata ĩhöimana te dza atẽme mo, atsima wẽ wamhã, romhuri tsidöpötsi tsyry na te te aima robdzanhamri da Bíblia na. Daꞌahö uptabi na Tiꞌai mono bö ma tô waihuꞌu dzaꞌra ãne. Ahö na ma tô tsima rowẽ dzaꞌra te te waihuꞌu dzaꞌra wamhã roti tô tsena uptabi te te ĩtsõpẽtẽ dzaꞌra na.

Ta hã marĩ hã danhipai u ĩpire tsõpẽtẽ da. Bíblia nhimirowahutu uptabi te dadzani waihuꞌu petse di dadzadawa nhipetse wi, rowahudu ĩꞌuptabiꞌõ wi duré dapahi wi. Ta hã te wapawatob dzaꞌra marĩ ĩwẽ uptabi dzô aptoꞌoré ꞌre wanhimipari dzaꞌra mono da duré wama ꞌre rowẽ dzaꞌra mono da. Jesus te tinha: ‘Tawamhã aima waihuꞌu petse dzaꞌra waꞌaba di dza, Höimanaꞌuꞌö nhimiroti hã. Ta hã tô tsena uptabi. Taha dzarina te dza atsõꞌreptudzé hã atsina ꞌre ĩwaihuꞌu dzaꞌra waꞌaba mo, wadaꞌuri ãna tsiꞌuihö na ꞌre ĩhöimana dzaꞌra mono norĩ ne, rowẽ na ꞌre aihöimana dzaꞌra waꞌaba mono da oto.’ — João 8:32.