Sosue 7:1-26
7 Kae neʼe mole nonofo agatonu te kau Iselaele he neʼe natou kaihaʼa te meʼa ʼae neʼe tonu ke pulihi. Neʼe toʼo e Akane,+ te foha ʼo Kalemi, foha ʼo Sapeti, foha ʼo Sela, mai te telepi ʼo Suta, ia te koga ʼo te meʼa ʼae neʼe tonu ke pulihi.+ Pea neʼe to leva te hauhau ʼo Sehova ki te kau Iselaele.+
2 Neʼe fekauʼi leva e Sosue ni tagata mai Seliko ke natou olo ki te kolo ko Ai,+ ʼae ʼe tuʼu ovi ki Pete-aveni, ʼi te potu esite ʼo Petele.+ Neʼe ina ui age kia natou: “Kotou olo ʼo vakaʼi fakafufu te fenua.” Neʼe olo ai te ʼu tagata ʼaia ʼo vakaʼi fakafufu ia te kolo ko Ai.
3 ʼI tanatou toe liliu mai kia Sosue, neʼe natou ui ki ai: “ ʼE mole ʼaoga ke olo te foʼi kautau katoa. ʼE feʼauga pe mo he toko lua afe peʼe tolu afe ke natou tauʼi mo maʼu te kolo ko Ai. ʼAua naʼa ke fekauʼi te kau solia fuli ke olo ki ai, naʼa natou gaʼegagaʼe noa, koteʼuhi ʼe mole kaugamalie te hahaʼi ʼo te kolo ʼaia.”
4 Koia, neʼe fekauʼi ke olo ia teitei tagata ʼe toko 3 000, kae neʼe natou feholaki ia muʼa ʼo te ʼu tagata ʼo Ai.+
5 Neʼe matehi e te ʼu tagata ʼo Ai te toko 36, pea neʼe natou tuli te tahi ʼu tagata mai te matapa ʼo te kolo ʼo kaku ki Sepalimi* pea neʼe natou toe matehi ʼihi ʼi te mahifo. Neʼe lotovaivai ai te hahaʼi, pea neʼe mole kei lototoʼa he tahi.
6 Pea neʼe hae leva e Sosue ʼona kofu pea neʼe tuʼutuli ifo mo tulolo ki te kele ia muʼa ʼo te Aleka ʼo Sehova, ʼo feia mo te kau takitaki ʼo Iselaele. Neʼe natou nonofo ai ʼo kaku ki te afiafi, pea neʼe natou laku te efu ki ʼonatou ʼulu.
7 Neʼe ui e Sosue: “Oie, Tuʼi ʼAliki ko Sehova, he koʼe neʼe ke fakagafua ke fakalaka te hahaʼi ʼaeni ʼi te Solotane pea ke tuku leva matou ki te ʼu nima ʼo te kau Amole, ke natou matehi matou? Ka na neʼe matou haga nonofo pe la ʼi te tahi faʼahi* ʼo te Solotane!
8 Sehova e, fakalelei mai, kae kotea ʼae ʼe feala ke au ui ʼi te lakaga nei? Kua feholaki ia Iselaele ia muʼa ʼo ʼona fili.
9 Ka iloʼi e te kau Kanaane pea mo te hahaʼi fuli ʼo te fenua te meʼa ʼaia neʼe hoko, ʼe natou ʼa takai anai matou pea mo pulihi matou ʼi te fuga ʼo te kele, ʼo feia mo tomatou higoa. Pea kotea anai ka ke fai moʼo haofaki tou huafa lahi?”+
10 Neʼe tali e Sehova kia Sosue: “Tuʼu ki ʼoluga! He koʼe ʼe ke haga tulolo ki te kele?
11 Neʼe agahala ia Iselaele. Neʼe natou maumauʼi te fuakava+ ʼae neʼe au fakatotonu age ke natou mulimuli ki ai. Neʼe natou toʼo te koga ʼo te meʼa ʼae neʼe tonu ke pulihi.+ Neʼe natou kaihaʼa+ te ʼu meʼa ʼaia ʼo fufu ʼi ʼanatou meʼa.+
12 Koia, ʼe mole feala anai ke malo te kau Iselaele ʼi ʼonatou fili. ʼE natou feholaki anai ia muʼa ʼo ʼonatou fili, he ʼe kua natou liliu ko he meʼa ʼe tonu ke pulihi. Ka mole kotou toʼo ʼi te lotolotoiga ʼo koutou te meʼa ʼae ʼe tonu ke pulihi pea ʼe mole au nofo anai mo koutou.+
13 Tuʼu ki ʼoluga pea ke fakamaʼa te hahaʼi.+ Ke ke ui kia natou: ‘Ke kotou fakamaʼa ia koutou ki apogipogi, he ʼe koʼeni te meʼa ʼae ʼe ui e Sehova, te ʼAtua ʼo Iselaele: “Hahaʼi ʼo Iselaele, ʼe tuku ʼi te lotolotoiga ʼo koutou te meʼa ʼae neʼe tonu ke pulihi! ʼE mole feala anai ke kotou malo ʼi ʼokotou fili mo kapau ʼe mole kotou toʼo ʼi te lotolotoiga ʼo koutou te meʼa ʼae ʼe tonu ke pulihi.
14 Apogipogi uhu, ʼe tahi haʼu anai te telepi. Pea ʼe fakaovi mai anai te telepi ʼae ka taʼofi e Sehova.+ Hili ʼaia, ʼe tahi haʼu anai te famili ʼo te telepi ʼaia, pea ʼe fakaovi mai te famili ʼae ka taʼofi e Sehova. ʼE tahi haʼu anai te loto fale ʼo te famili ʼaia, pea ʼe fakaovi mai anai te loto fale ʼae ka taʼofi e Sehova. ʼE tahi haʼu anai te tagata ʼo te loto fale ʼaia.
15 Pea ko te tagata ʼae ʼe maʼu io ia te meʼa ʼae ʼe tonu ke pulihi, ʼe tutu anai,+ ʼo feia mo ʼana meʼa fuli, koteʼuhi neʼe ina maumauʼi te fuakava+ ʼa Sehova pea neʼe ina fai he meʼa fakaufiufi ʼi Iselaele.” ’ ”
16 Koia, ʼi te ʼala uhuuhu ake ʼa Sosue, neʼe ina fakatahiʼi ia Iselaele. Neʼe tahi haʼu leva te telepi, pea neʼe ko te telepi ʼo Suta ʼae neʼe taʼofi.
17 Pea neʼe tahi haʼu te famili ʼo te telepi ʼo Suta, pea neʼe ko te kau Sela+ ʼae neʼe taʼofi. Hili ʼaia, neʼe tahi haʼu te tagata Sela, pea neʼe ko Sapeti ʼae neʼe taʼofi.
18 Ki muli age, neʼe tahi haʼu leva te tagata ʼo te loto fale ʼo Sapeti, pea neʼe ko Akane, te foha ʼo Kalemi, foha ʼo Sapeti, foha ʼo Sela, mai te telepi ʼo Suta ʼae neʼe taʼofi.+
19 Pea neʼe ui e Sosue kia Akane: “Siʼoku foha, fakalelei siʼou loto, ke ke fakaʼapaʼapa kia Sehova, te ʼAtua ʼo Iselaele pea ke ke vete tau agahala kia te ia. Fakalelei siʼou loto, fakamatala mai te meʼa ʼae neʼe ke fai. ʼAua naʼa ke fufu mai he meʼa.”
20 Neʼe tali e Akane kia Sosue: “ ʼEi, ko au ʼae neʼe agahala kia Sehova, te ʼAtua ʼo Iselaele. Koʼeni te meʼa ʼae neʼe au fai:
21 Neʼe au sio ʼi te ʼu koloa ki he pulupulu matalelei mai Sinea,+ mo he ʼu sikele* siliva ʼe 200 pea mo he potu aulo ko tona mamafa ko sikele ʼe 50. Neʼe au manumanū ki te ʼu meʼa ʼaia, pea neʼe au toʼo leva. Neʼe au tanu te ʼu meʼa ʼaia ʼi toku fale la, pea neʼe au fakatafa ki lalo te siliva mo te aulo.”
22 Neʼe fekauʼi atu aipe e Sosue ni tagata ke natou feleleʼi ki te fale la. Neʼe fufu te pulupulu ʼi te fale la, pea neʼe fakatafa ki lalo te siliva mo te aulo.
23 Neʼe natou toʼo ai te ʼu meʼa ʼaia neʼe fufu ʼi te fale la ʼo ʼave kia Sosue pea mo te kau Iselaele fuli, pea neʼe natou tuku te ʼu meʼa ʼaia ia muʼa ʼo Sehova.
24 Neʼe toʼo e Sosue pea mo Iselaele katoa ia Akane,+ te foha ʼo Sela, mo te siliva, mo te pulupulu pea mo te potu aulo,+ ʼo feia mo ʼona foha, mo ʼona ʼofafine, mo ʼana vitulo, mo ʼana asino, mo tana faga ovi, mo tona fale la pea mo te ʼu meʼa fuli ʼae neʼe ina maʼu, ʼo natou ʼave ki te Potu Fenua Laulelei ʼo Akole.+
25 Pea neʼe ui e Sosue: “He koʼe neʼe ke fakatupu tomatou malaʼia?*+ ʼI te ʼaho nei, ʼe fakatupu anai e Sehova tou malaʼia.” Neʼe tuki makaʼi leva ia natou e Iselaele katoa ʼo kaku ki tanatou mamate,+ pea neʼe natou tutu ai ia natou.+ ʼEi, neʼe natou tuki makaʼi ia natou fuli.
26 Pea neʼe natou fakatuʼuga ai ni maka ʼi te sino ʼo Akane, pea ʼe kei tuʼu pe ʼo kaku mai ki te ʼaho nei. Neʼe malū ifo ai te hauhau ʼo Sehova.+ Koia, ʼe fakahigoaʼi te koga meʼa ʼaia ko te Potu Fenua Laulelei ʼo Akole* ʼo kaku mai ki te ʼaho nei.
Nota
^ Ko tona fakaʼuhiga “Te ʼu Koga Meʼa ʼAe ʼe Keli Ai Te Maka.”
^ ʼE fakaʼuhiga ki te potu esite.
^ Ko te mamafa ʼo he sikele ʼe tahi, neʼe ko kalame ʼe 11,4. Vakaʼi Te ʼu Fakamahino 2.14.
^ Peʼe “liʼakina.”
^ Ko tona fakaʼuhiga “Malaʼia.”
