Sosue 2:1-24
-
Neʼe fekauʼi e Sosue ni tagata ʼe lua ke nā olo ʼo vakaʼi fakafufu ia Seliko (1-3)
-
Neʼe fakanono e Laape te ʼu tagata ʼe lua (4-7)
-
Te fakapapau ʼae neʼe fai kia Laape (8-21, ʼuluaki koga)
-
Te maea kula ko he fakailoga (18)
-
-
Te fakamatala ʼae neʼe fai e te ʼu tagata ʼe lua kia Sosue (21, lua koga-24)
2 ʼI Sitime,+ neʼe fekauʼi leva e Sosue, te foha ʼo Nune ni tagata ʼe toko lua ke nā olo ʼo vakaʼi fakafufu ia te fenua. Neʼe ina ui age kia naua: “Kolua olo ʼo vakaʼi ia te fenua, kae tafito ia Seliko.” Neʼe nā olo ai. Pea neʼe nā tau leva ki te ʼapi ʼo te fafine paomutu neʼe higoa ko Laape,+ ʼo nā nonofo ai.
2 Neʼe fakaha ki te hau ʼo Seliko neʼe ʼomai te ʼu tagata Iselaele ʼi te poʼuli ʼo vakaʼi fakafufu te fenua.
3 Pea neʼe fekauʼi e te hau ʼo Seliko he ʼu tagata ke olo ʼo ui age kia Laape: “ ʼAumai ki tuʼa te ʼu tagata ʼae neʼe ʼomai ki heni pea ʼe nonofo ʼi tou ʼapi, he neʼe ʼomai ʼo vakaʼi fakafufu te fenua.”
4 Kae neʼe fakanono e te fafine ia te ʼu tagata ʼaia ʼe toko lua. Neʼe ina tali age: “ ʼE moʼoni, neʼe ʼomai te ʼu tagata kio ʼoku, kae neʼe mole au iloʼi pe la pe neʼe ʼomai maifea.
5 Pea neʼe mavae te ʼu tagata ʼaia ʼi te malu ʼo te afiafi, ʼi te temi ʼae neʼe ʼamanaki pupunu ai te matapa ʼo te kolo, pea ʼe mole au iloʼi pe neʼe olo kifea. Kae kapau ʼe kotou foimo olo nei ʼo tuli ia naua, ʼe kotou maʼu anai.”
6 (Kae neʼe ina ʼave naua ki tona fuga fale pea neʼe ina fakanono naua ʼi ni fuhiga lino neʼe tanaki ai.)
7 Neʼe natou tuli ai ia naua, ʼo olo ki te ʼu faʼahi ʼae ʼe feala ke fakalaka ai te hahaʼi ʼi te Solotane,+ pea neʼe pupunu te matapa ʼo te kolo ʼi tanatou ʼosi hu ki tuʼa.
8 ʼI muʼa ʼo te momoe ʼa te ʼu tagata ʼaia ʼe toko lua, neʼe hake te fafine ki te fuga fale,
9 ʼo ina ui age kia naua: “ ʼE au iloʼi ʼe foaki atu anai e Sehova te fenua+ pea kua matou matataku ia koutou.+ Kua lotovaivai te hahaʼi fuli ʼo te fenua ʼuhi ko koutou,+
10 he neʼe fakamatala mai te fakamamaha e Sehova ia te ʼu vai ʼo te Tai Kula ʼi ʼokotou muʼa, ʼi takotou mavae mai Esipito+ pea mo te ʼu meʼa ʼae neʼe kotou fai ki te ʼu hau ʼe lua ʼo te kau Amole, ia Sihone+ pea mo Oke,+ ʼae neʼe kotou matehi ʼi te tahi faʼahi* ʼo te Solotane.
11 ʼI tamatou logo ki te ʼu fakamatala ʼaia, neʼe matou lotovaivai ai, pea ʼe mole kei lototoʼa he tahi ʼuhi ko koutou, he ʼe ko Sehova tokotou ʼAtua, ʼe ʼAtua ʼi te lagi pea mo te kele.+
12 Koia, fakalelei siʼokolua loto, kolua fakapapau mai ʼi te huafa ʼo Sehova, ʼe kolua fakaha anai tokolua ʼofa agatonu ki te loto fale ʼo taku tamai koteʼuhi neʼe au fakaha atu kia koulua toku ʼofa agatonu. Pea kolua tuku mai he fakamoʼoni ʼe kolua fakahoko anai takolua fakapapau.*
13 ʼE mole tonu anai ke kolua matehi taku tamai, mo taku faʼe, mo ʼoku tokolua pea mo ʼoku tehina, pea mo natou fuli ʼae ʼo ʼonatou loto fale. ʼE tonu anai ke kolua haofaki ia matou.”+
14 Pea neʼe tali age e te ʼu tagata kia ia: “Ke matehi maua mo kapau ʼe mole ma fakahoko te fakapapau ʼaia! Kapau ʼe mole ke fakaha ki he tahi te tupuʼaga ʼo tamā ʼomai, ʼe ma fakaha anai toma ʼofa agatonu kia koe pea ʼe ma fakahoko anai tamā fakapapau, moka foaki mai e Sehova te fenua.”
15 Hili ʼaia, neʼe ina fakahifo naua ʼi te matapa fakamalama ʼaki he maea, he neʼe tuʼu tona ʼapi ʼi he faʼahi ʼo te kaupa ʼo te kolo. ʼEi, neʼe tuʼu tona ʼapi ʼi te kaupa.+
16 Pea neʼe ina ui kia naua: “Kolua olo ki te potu moʼugaʼia ʼo fenonoʼi ai lolotoga ʼaho ʼe tolu, naʼa maʼu koulua e te ʼu tagata ʼae ʼe natou tuli koulua. Pea hoki hoko atu tokolua fagona moka natou toe liliu mai.”
17 Neʼe ui e te ʼu tagata kia ia: “ ʼE ma fakahoko anai te fakapapau ʼae neʼe ma fai atu,+
18 mo kapau ʼe ke fai te faʼahi ʼaeni: ʼe tonu anai ke ke haʼi te maea kula ʼaeni ʼi te matapa fakamalama ʼae ka ke fakahifo ai maua, ʼi te temi ʼae ka matou hu ai ki te fenua. ʼE tonu anai ke ke fakatahiʼi mai ki tou ʼapi tau tamai, mo tau faʼe, mo ʼou tokolua pea mo te famili katoa ʼo tau tamai.+
19 Kae kapau ʼe mavae kehe he tahi ʼi tou ʼapi, pea mate ko tāʼana ia hala, kae ʼe mole ko taʼamāua ia hala. Kae kapau ʼe hoko he meʼa* ki he tahi ʼe nofo ʼi tou ʼapi, pea ʼe ko te hala anai ʼa maua.
20 Kae kapau ʼe ke fakamatala te tupuʼaga ʼo tamā ʼomai,+ ʼe mole maʼua anai ke ma fakahoko te fakapapau ʼae neʼe ma fai atu.”
21 Neʼe ina tali age: “Tou fai pe tatou ki ai.”
Pea neʼe ina tuku ai naua ke olo. Ki muli age, neʼe ina haʼi te maea kula ki tona matapa fakamalama.
22 Neʼe olo ai te ʼu tagata ʼaia ʼe toko lua ki te potu moʼugaʼia, ʼo fenonoʼi ai lolotoga ʼaho ʼe tolu, ʼo kaku ki te toe liliu mai ʼa te ʼu tagata ʼae neʼe natou tuli ia naua. Neʼe natou kumi ia naua ʼi te ʼu ala fuli, kae neʼe mole natou maʼu.
23 Neʼe hihifo leva te ʼu tagata ʼaia ʼe toko lua mai te potu moʼugaʼia, ʼo nā fakalaka ʼi te vai tafe. Pea neʼe nā olo ai kia Sosue, te foha ʼo Nune, ʼo fakamatala age te ʼu meʼa fuli ʼae neʼe hoko.
24 Pea neʼe nā ui kia Sosue: “Kua tuku mai e Sehova te fenua katoa kia tatou,+ koteʼuhi kua lotovaivai te hahaʼi fuli ʼo te fenua ʼuhi ko tatou.”+
Nota
^ ʼE fakaʼuhiga ki te potu esite.
^ Peʼe “he fakailoga ʼe tuha mo te falala.”
^ Peʼe “fāfā he tahi.”
