Sopo 27:1-23
27 Neʼe hoko atu pe te palalau* ʼa Sopo, ʼo ina ui:
2 “ ʼE au tala moʼoni atu ia muʼa ʼo te ʼAtua maʼuli, ʼae ʼe mole kei au maʼu ai te faitotonu,+ʼEi, ʼe au tala moʼoni atu ia muʼa ʼo te Mafimafi ʼae ʼe maʼuli, ʼae neʼe ina fakalotomamahiʼi au,+
3 ʼI te temi ʼae ʼe kei au maʼuli ai,Pea mo maʼu ai te manava mai te ʼAtua,+
4 ʼE mole heʼe faitotonu anai ʼoku laugutu,Pea ʼe mole kaka tuʼa tahi anai toku ʼalelo!
5 ʼE mole feala ia ke au ui ʼe kotou faitotonu!
ʼO kaku ki taku mate, ʼe mole au fakafisi anai ki* taku agatonu.+
6 ʼE au taupau maʼu anai taku faitotonu, ʼo mole au liʼaki ʼi he temi,+ʼE mole vevele anai toku loto ʼi toku maʼuli katoa.
7 Ke tauteaʼi toku fili ohage ko te tagata agakovi,Pea mo natou ʼae ʼe natou ʼohofi ia au ohage ko te kau heʼe faitotonu.
8 He ʼe kotea te ʼamanaki ʼa te tagata ʼae ʼe mole fakaʼapaʼapa ki te ʼAtua,* moka pulihi ia ia,+Moka toʼo e te ʼAtua tona maʼuli?
9 Ka lotomamahi,ʼE logo anai koa te ʼAtua ki tana kalaga?+
10 ʼE ina maʼu anai koa tona fiafiaʼaga ʼi te Mafimafi?
ʼE tagi mamahi* anai koa ki te ʼAtua ʼi te temi fuli pe?
11 ʼE au akoʼi anai koutou ʼo ʼuhiga mo te mafimafi* ʼo te ʼAtua,Pea ʼe mole au fufu anai he meʼa ʼo ʼuhiga mo te Mafimafi.
12 Kapau neʼe ha ni meʼa kia koutou fuli,He koʼe ʼe vaʼiganoa ʼakotou palalau?
13 Koʼeni te vahe ʼe taʼofi e te ʼAtua ki te kau agakovi,+Te tofiʼa ʼae ʼe maʼu e te kau pule agamalohi mai te Mafimafi:
14 Kapau ʼe kaugamalie ʼona foha, ʼe matehi anai natou ʼaki te heleta,+Pea ʼe mole maʼu feʼauga anai e tona hologa hana meʼa kai.
15 ʼE tanu anai natou ʼae ka hao e te taʼi mahaki fakatupu mate,Pea ʼe mole fetagihi anai ʼonatou ʼohoana.
16 Tatau aipe pe ʼe lahi tana tanaki te siliva ohage ko te efu,Pea mo ni teu matalelei ohage ko te kele,
17 ʼE tatau aipe pe ʼe ina tanaki,Kae ʼe ko te tagata faitotonu ʼae ka ina tui,+Pea ʼe ko natou ʼae neʼe mole natou fai he meʼa ʼe kovi, ka natou maʼu tana siliva.
18 ʼE maumau gafua te ʼapi ʼae ʼe ina laga ohage pe ko te nofoʼaga ʼo he kiʼi manu,Ohage pe ko he pola+ ʼe laga e he tagata leʼo.
19 ʼE koloaʼia ia ia ʼae ʼe takoto, kae ʼe mole anai he fua ʼo ʼona koloa.ʼE avahi ake anai ʼona mata, kae kua puli ʼana meʼa fuli.
20 ʼE hoko fakapunamaʼuli ni meʼa fakamataku ki te kau agakovi, ohage pe ko he lomaki,ʼI te poʼuli, ʼe taʼaki natou e te afā.+
21 ʼE ʼave anai natou e he matagi mai te potu esite, ʼo natou pupuli ai,ʼEi, ʼe ʼave mamaʼo natou mai tonatou nofoʼaga.+
22 ʼE ina ʼohofi anai natou,+Pea ʼe natou faigaʼi anai ke natou feholaki mai tona malohi.+
23 ʼE pasipasi kia natou,Pea ʼe veka+ kia natou mai tona nofoʼaga.*
Nota
^ Peʼe “te ʼu palalau fakatuketuke.” Hep. “taʼaga lea.”
^ Peʼe “ ʼe mole au tuku anai,” peʼe “ ʼe au taupau anai.”
^ Peʼe “tagata aposita.”
^ Hep. “pauʼi.”
^ Peʼe lagi “ ʼaki te malohi.”
^ Peʼe lagi “ ʼE natou pasipasi kia natou, pea ʼe natou veka kia natou mai tonatou nofoʼaga.”
