Senesi 8:1-22
8 Kae neʼe manatuʼi leva e te ʼAtua ia Noe mo te ʼu manu fuli ʼo te vao pea mo te ʼu manu lalata fuli ʼae neʼe nonofo mo ia ʼi te aleka.+ Neʼe fakaagi leva e te ʼAtua he matagi ki te kele ʼo kamata hifo ai te vai.
2 Neʼe gata ai te to ʼo te ʼu vai ʼo te lagi pea neʼe pupunu ai te ʼu matapa ʼo te lagi, koia neʼe gata* ai te ʼua.+
3 Pea neʼe kamata hifo mamalie ai te vai ʼi te kele. Koia ʼi te ʼosi ʼo te ʼu ʼaho ʼe 150, neʼe kua hifo te vai.
4 ʼI te 17 ʼaho ʼo te fitu mahina, neʼe tau ai te aleka ki te ʼu moʼuga ʼo Alalate.
5 Neʼe hoko atu pe te hifo ʼo te vai ʼo aʼu ki te hogofulu mahina. Pea ʼi te ʼuluaki ʼaho ʼo te hogofulu mahina, neʼe ha leva te tumutumu ʼo te ʼu moʼuga.+
6 Pea ʼi te ʼosi ʼo te ʼu ʼaho ʼaia ʼe 40, neʼe avahi leva e Noe te matapa fakamalama+ ʼae neʼe ina fai ʼi te aleka
7 pea neʼe ina tuku he kolopo* ke alu. Neʼe alu pea toe haʼu, neʼe fai feia ʼo aʼu ki te moamoa ʼo te kele.
8 Ki muli age neʼe ina tuku leva he lupe ke alu, ke iloʼi ai pe ʼe kua hifo te vai ʼi te fuga kele.
9 Neʼe mole maʼu e te lupe he koga meʼa ke tuʼu ai, koia ʼae neʼe toe liliu mai ai kia ia ʼi te aleka he neʼe kei ʼaofi pe e te vai te fuga kele katoa.+ Koia neʼe ina faoʼi ai tona nima pea mo ina ʼaumai te lupe ʼo fakaulu ki te aleka.
10 Neʼe toe talitali ʼaho ʼe fitu, pea neʼe ina toe tuku te lupe ke alu.
11 ʼI te toe liliu mai ʼa te lupe kia ia ʼi te afiafi, neʼe sio ai ki he lau oliveto ʼi tona gutu neʼe hoki fakiʼi pe. Pea neʼe iloʼi ai e Noe kua mamaha te vai.+
12 Neʼe toe talitali ʼaho ʼe fitu. Pea neʼe ina toe tuku te lupe ke alu, kae neʼe mole toe liliu mai leva kia ia.
13 ʼI te ʼuluaki ʼaho ʼo te ʼuluaki mahina ʼo te 601 taʼu ʼo Noe,+ neʼe kua mamaha te vai. Pea neʼe toʼo ai e Noe he koga ʼo te ʼato ʼo te aleka ʼo sio ai kua kamata moamoa te fuga kele.
14 ʼI te 27 ʼaho ʼo te lua mahina, neʼe kua moamoa leva te kele.
15 Pea neʼe ui ai leva e te ʼAtua kia Noe:
16 “Haʼu ki tuʼa mai te aleka, ia koe, mo tou ʼohoana, mo ʼou foha, pea mo te ʼu ʼohoana ʼo ʼou foha.+
17 ʼAumai ki tuʼa te ʼu faʼahiga meʼa maʼuli fuli ʼae neʼe nonofo mo koe,+ ia te ʼu manulele, mo te ʼu manu lalata, mo te ʼu manu ʼo te vao, pea mo te ʼu manu totolo fuli ʼo te kele, ke natou fanaunau pea mo liliu ai ʼo kaugamalie ʼi te kele.”+
18 Koia neʼe haʼu ai ki tuʼa ia Noe, mo tona ʼohoana, mo ʼona foha,+ pea mo te ʼu ʼohoana ʼo ʼona foha.
19 Neʼe ʼomai ki tuʼa mai te aleka te ʼu meʼa maʼuli fuli, mo te ʼu manu totolo fuli, mo te ʼu manulele fuli, pea mo te ʼu manu fuli ʼae ʼe maʼuʼuli ʼi te kele, ʼo mulimuli pe ki ʼonatou faʼahiga.+
20 Pea neʼe laga leva e Noe he ʼaletale+ maʼa Sehova. Pea neʼe ina toʼo ʼihi manu ʼi te ʼu manu maʼa fuli pea mo te ʼu manulele maʼa fuli+ pea neʼe ina momoli ohage ko he ʼu holokoseta* ʼi te ʼaletale.+
21 Pea neʼe kamata manava ia Sehova ki he ʼaele lelei. Koia neʼe ui ai e Sehova ʼi tona loto: “ ʼE mole au toe fakamalaʼia anai te kele+ ʼuhi ko te tagata, he ʼe kovi te manatu ʼa te tagata talu mai tana kei veliveli,+ pea ʼe mole au toe pulihi anai ia te ʼu meʼa maʼuli fuli ohage ko te meʼa ʼaeni neʼe au fai.+
22 ʼI te temi leva ʼaeni, ʼe mole gata anai ʼi he temi ʼi te kele te temi nunusi ʼo te pulapula mo tona temi utu, mo te temi momoko mo te temi mafana, pea mo te ʼaho mo te poʼuli.”+
Nota
^ Peʼe “taʼofi.”
^ Ko te manulele ʼe lanu ʼuli ʼe ina kai te ʼu sino mate.
^ Vakaʼi Te ʼu Kupu.
