Senesi 37:1-36
37 Pea neʼe hoko atu pe te nofo ʼa Sakopo ʼi te fenua ʼo Kanaane, ʼae neʼe maʼuli ai tana tamai ohage ko he matapule.+
2 Koʼeni te hisitolia ʼo Sakopo.
ʼI te taʼu 17 ʼo Sosefo,+ neʼe ina tauhi te faga ovi+ mo te ʼu tama ʼa Pila+ pea mo te ʼu tama ʼa Silipa,+ te ʼu ʼohoana ʼo tana tamai. Pea neʼe fakaha e Sosefo ki tana tamai te ʼu meʼa kovi ʼae neʼe fai e ʼona tehina.
3 Neʼe ʼofa ia Iselaele ia Sosefo ʼo lahi age ʼi ʼona foha fuli+ he neʼe ina maʼu tona foha ʼaia kae kua matuʼa. Pea neʼe ina foaki age ki ai he kofu loa mo matalelei.
4 ʼI te sio ʼo ʼona tehina neʼe ʼofa tanatou tamai ia ia ʼo lahi age ia natou, neʼe natou fehihiʼa ai ki ai, pea neʼe mole kei feala hanatou palalau lelei kia ia.
5 Ki muli age, neʼe fai e Sosefo tana moemisi pea neʼe ina fakamatala ki ʼona tehina.+ Neʼe toe ʼaʼasili age ai tanatou fehihiʼa ki ai.
6 Neʼe ina ui age kia natou: “Fakalelei siʼokotou loto, kae kotou fakalogo mai muʼa ki te moemisi ʼaeni neʼe au fai:
7 Neʼe tou lolotoga haʼi fakafuhiga te fulumeto ʼi te gaueʼaga, pea koʼeni neʼe malaga ake taku fuhiga fulumeto ʼo tuʼu tonu, pea neʼe ʼa takai e ʼakotou fuhiga fulumeto taku fuhiga fulumeto pea mo natou tulolo ki ai.”+
8 Neʼe tali age e ʼona tehina kia ia: “ ʼE ke liliu anai koa ko homatou hau pea mo pule ia matou?”+ Koia, neʼe toe ʼaʼasili age ai tanatou fehihiʼa ki ai ʼuhi ko tana moemisi pea mo ʼana palalau.
9 Ki muli age, neʼe ina fai tana tahi moemisi pea neʼe ina fakamatala ki ʼona tehina, ʼo ina ui age: “Neʼe au fai taku tahi moemisi. Neʼe au sio ki te laʼa, mo te mahina pea mo te ʼu fetuʼu ʼe 11 neʼe tulolo ʼi ʼoku muʼa.”+
10 Neʼe ina fakamatala age ki tana tamai kae nonofo ai ʼona tehina. Pea neʼe munaʼi ia ia e tana tamai, ʼo ina ui age: “Kotea koa te fakaʼuhiga ʼo tau moemisi ʼaia? ʼE matou ʼomai anai koa ʼo tulolo ki te kele ʼi ʼou muʼa, ia au, mo tau faʼe pea mo ʼou tehina?”
11 Neʼe maheheka ai ʼona tehina ki ai,+ kae neʼe manatuʼi tuʼumaʼu pe e tana tamai ʼana palalau.
12 Pea neʼe ʼave leva e ʼona tehina te faga ovi ʼo tanatou tamai ki he koga meʼa lunaʼia ʼe ovi ki Sekemi.+
13 Neʼe ui leva e Iselaele kia Sosefo: “ ʼE lolotoga tauhi e ʼou tehina te faga ovi ʼo ovi ki Sekemi. Ke ke alu kia natou.” Neʼe ina tali age: “ ʼEi, fai ki ai siʼaku tamai!”
14 Neʼe ui age e tana tamai: “Fakalelei siʼou loto, alu ʼo vakaʼi pe ʼe lelei pe ʼou tehina, ʼo feia mo te faga ovi pea ke toe liliu mai ʼo fakaha mai haku logo.” Neʼe mavae ai mai te potu fenua laulelei ʼo Hepelone+ ʼo alu ki Sekemi.
15 Ki muli age, neʼe felaveʼi he tagata mo ia ʼi tana haʼele ʼi he gaueʼaga. Neʼe ina fehuʼi age ki ai: “Kotea ʼae ʼe ke kumi?”
16 Neʼe ina tali age: “ ʼE au kumi ʼoku tehina. Koia, fakalelei siʼou loto, ke ke fakaha mai pe ʼe natou tauhi ʼifea te faga ovi.”
17 Neʼe ui age e te tagata: “Kua natou mavae ʼi heni, he neʼe au logo ki tanatou ui: ‘Tou olo ki Totane.’ ” Pea neʼe alu leva ia Sosefo ʼo kumi ʼona tehina pea neʼe ina maʼu atu ia natou ʼi Totane.
18 Neʼe natou sisio mai kia ia mai mamaʼo. Kae ʼi muʼa ʼo tana tau age, neʼe natou fonofono ke natou matehi ia ia.
19 Neʼe natou feuiʼaki: “Sio, koʼeni te tagata faimoemisi ʼe haʼu.+
20 Koia, tou matehi ia ia mo li ki te vai keli, pea ʼe tou ui anai neʼe kai ia ia e he manu fekai. Pea ʼe tou sisio anai pe ʼe hoko moʼoni ʼana moemisi.”
21 ʼI te logo ʼa Lupeni+ ki ai, neʼe faiga ke ina haofaki ia ia. Koia neʼe ina ui ai: “ ʼE mole tonu ke tou matehi ia ia.”+
22 Neʼe toe ui e Lupeni kia natou: “ ʼAua naʼa kotou fai he ligi toto.+ Kotou li ia ia ki te vai keli ʼaeni ʼi te toafa, kae ʼaua naʼa kotou fai he meʼa ʼe kovi* ki ai.”+ Neʼe ina fai te fakatuʼutuʼu ʼaia ke ina haofaki ia ia pea ke toe liliu ki tana tamai.
23 ʼI te tau atu pe ʼa Sosefo ki te koga meʼa ʼae neʼe nonofo ai ʼona tehina, neʼe natou huʼi tona kofu matalelei ʼae neʼe ina tui.+
24 Pea neʼe natou li ia ia ki te vai keli. ʼI te temi ʼaia, neʼe mole ʼi ai he vai.
25 Neʼe natou nonofo leva ki lalo ʼo kakai. ʼI tanatou hiki ake ʼonatou mata, neʼe natou sio ki he fagona ʼo he kau Isemaele+ neʼe ʼomai mai Kileate. Neʼe hili ʼi ʼanatou kamelo te puluʼi ʼakau magoni ʼae ko te latanume, mo te ʼu lolo magoni pea mo te ʼu kiliʼi ʼakau.+ Neʼe natou olo ki Esipito.
26 Pea neʼe ui e Suta ki ʼona tehina: “Kotea anai te meʼa ʼe tou maʼu moka tou matehi totatou tehina pea mo fufu te meʼa ʼae neʼe tou fai?+
27 Koia, tou fakatau ia ia+ ki te kau Isemaele, kae ʼe mole tonu ke tou fai he meʼa ʼe kovi ki ai, he ʼe ko totatou tehina, ʼe tou kakano tahi.” Neʼe natou fakalogo ai ki tonatou tehina.
28 Pea ʼi te fakalaka ovi age ʼa te kau faikoloa Matiane+ kia natou, neʼe natou toho ake ia Sosefo mai te vai keli. Pea neʼe natou fakatau ia ia ki te kau Isemaele kia piesi siliva ʼe 20.+ Neʼe ʼave ai e te ʼu tagata ʼaia ia Sosefo ki Esipito.
29 Ki muli age, ʼi te liliu mai ʼa Lupeni ki te vai keli pea mo sio neʼe mole kei nofo ai ia Sosefo, neʼe ina hae ʼona kofu.
30 Neʼe alu ki ʼona tehina pea neʼe ina ui: “Kua puli te tama! Kotea ʼae ka au fai?”
31 Neʼe natou toʼo leva te kofu ʼo Sosefo pea neʼe natou matehi he tao tagata ʼo natou fufuʼi te kofu ki te toto ʼo te manu.
32 Hili ʼaia, neʼe natou fekauʼi he tahi ke alu ʼo fakaha ki tanatou tamai te kofu ʼaia pea ke ina ui age ki ai: “Koʼeni te meʼa ʼae neʼe matou maʼu. Fakalelei siʼou loto, ke ke vakavakaʼi pe ʼe ko te kofu ʼaeni ʼo tou foha peʼe kailoa.”+
33 Neʼe ina vakavakaʼi ai pea mo ui: “ ʼE ko te kofu ʼo toku foha! ʼE mahino ia, neʼe hae liki ia Sosefo pea mo kai e he manu fekai!”
34 Neʼe hae e Sakopo ʼona kofu, mo haʼi tona koga loto ʼaki he taga.* Pea neʼe putu lolotoga ni ʼaho ʼi te mate ʼo tona foha.
35 Pea neʼe faiga e ʼona foha fuli mo ʼona ʼofafine fuli ke natou fakafimalieʼi ia ia. Kae neʼe mole ina loto ke fakafimalieʼi ia ia, he neʼe ina ui: “ ʼE au tagiʼi anai te mate ʼo toku foha ʼo kaku ki taku hifo ki te Faitoka!”*+ Pea neʼe hoko atu pe tona tagi’i e tana tamai.
36 ʼI Esipito, neʼe fakatau ai ia ia e te kau Matiane kia Potifale, te tagata ʼae neʼe gaue ʼi te fale hau ʼo Falaone+ pea neʼe pule ki te kau leʼo.+
