Senesi 33:1-20
33 Neʼe hiki ake leva e Sakopo ʼona mata pea neʼe sio ki te alu age ʼa Esau mo ʼana tagata ʼe toko 400.+ Neʼe ina vaevae ai te ʼu fanau ia Lea, mo Lasele pea mo te ʼu fafine faifekau ʼe lua.+
2 Neʼe ina tuku ki muʼa te ʼu fafine faifekau mo ʼanā fanau,+ pea hoa atu ki ai ia Lea mo ʼana fanau,+ pea neʼe muli atu leva ia Lasele+ pea mo Sosefo.
3 Neʼe alu leva ʼo tuʼu ʼi ʼonatou muʼa pea neʼe tulolo tuʼa fitu ki te kele ʼi tana fakaovi ki tona tehina.
4 Kae neʼe lele ia Esau ʼo fakafelaveʼi kia ia, pea neʼe faʼufua mo ʼuma ki ai, pea neʼe nā fetagihi.
5 ʼI te hiki ake e Esau ʼona mata pea mo sio ki te ʼu fafine mo te fanau, neʼe ina ui: “Ko ai ia natou ʼaeni?” Neʼe tali age e Sakopo: “Ko te ʼu fanau ʼaeni neʼe foaki mai e te ʼAtua kia au ʼaeni ko tau tagata faifekau he neʼe ʼofa ia au.”+
6 Pea neʼe ʼomai te ʼu fafine faifekau mo ʼanā fanau ʼo tulolo ia muʼa ʼo Esau,
7 pea neʼe toe ʼomai mo Lea mo ʼana fanau ʼo tulolo ʼi ʼona muʼa. Pea neʼe ʼomai leva ia Sosefo mo Lasele ʼo tulolo ʼi ʼona muʼa.+
8 Neʼe ui e Esau: “He koʼe neʼe ke fekauʼi he ʼu hahaʼi ke ʼomai mo he ʼu manu ʼo fakafelaveʼi mai kia au?”+ Neʼe ina tali age: “Ke feala ai hau ʼofa ia au, siʼoku ʼaliki.”+
9 Pea neʼe ui e Esau: “Siʼoku tehina, kua lahi ʼaupito ʼoku koloa.+ Koia, ke ke taupau ʼau meʼa.”
10 Kae neʼe ui age e Sakopo: “Fakalelei siʼou loto, kapau ʼe ke ʼofa ia au, ʼe tonu ke ke tali te meʼa ʼofa ʼae ʼe au foaki atu, he neʼe au foaki atu ke feala ai haku sio ki ʼou fofoga. Pea ʼi taku sio ʼae ki ʼou fofoga, neʼe hage pe neʼe au sio ki te fofoga ʼo te ʼAtua, he neʼe ke fakatalitali fakafiafiaʼi au.+
11 Fakalelei siʼou loto, ke ke tali te meʼa ʼofa* ʼae neʼe au ʼaumai kia koe,+ he neʼe ʼofa te ʼAtua kia au pea kua au maʼu te ʼu meʼa fuli ʼae ʼe ʼaoga kia au.”+ Pea ʼi tana faiga malohi age ki ai, neʼe ina tali leva.
12 Ki muli age, neʼe ui e Esau: “Ta olo, pea ʼe au taki anai totā fagona.”
13 Kae neʼe ina tali age: “ ʼE iloʼi lelei e siʼoku ʼaliki ʼe kei liliki te ʼu fanau+ pea ʼe ʼi ai te ʼu ovi fafine mo te ʼu pipi fafine ʼe au tauhi, ʼe kei natou fafaga ʼonatou ʼuhi. Kapau ʼe taki fakavilivili natou ʼi he ʼaho katoa, ʼe mamate anai te faga manu katoa.
14 Siʼoku ʼaliki, fakalelei siʼou loto, kae ke ke muʼamuʼa koe ia au. ʼE au hoko atu anai toku fagona pea ʼe au haʼele mamalie anai ʼo mulimuli pe ki taku faga manu pea mo te ʼu fanau, ʼo kaku ki taku tau atu kio koe, ʼi Seili,+ siʼoku ʼaliki.”
15 Neʼe ui leva e Esau: “Fakalelei siʼou loto, ke nonofo ʼihi ʼo taku hahaʼi mo koe.” Neʼe ina tali age: “ ʼE mole ʼaoga ia. ʼE feʼauga pe kia au tou ʼofa, siʼoku ʼaliki.”
16 ʼI te ʼaho ʼaia, neʼe toe liliu ai ia Esau ki Seili.
17 Pea neʼe alu ia Sakopo ki Sukoti,+ pea neʼe ina laga ʼi ai tona ʼapi pea mo he ʼu fakamalumaluʼaga ʼo tana faga manu. Koia, neʼe ina fakahigoaʼi ai te koga meʼa ʼaia ko Sukoti.*
18 ʼI te ʼosi mavae ʼa Sakopo mai Patane-alame,+ neʼe tau haohaoa leva ki te kolo ko Sekemi,+ ʼi te fenua ʼo Kanaane.+ Pea neʼe ina fakatuʼu tona nofoʼaga ʼo ovi ki te kolo.
19 Pea neʼe ina totogi ki te ʼu foha ʼo Amole, te tamai ʼa Sekemi hona moʼi kele ʼaki ni foʼi piesi ʼe 100. Neʼe ina fakatuʼu ai leva tona fale la.+
20 Pea neʼe ina fakatuʼu ai he ʼaletale ʼo ina fakahigoaʼi ko “ ʼAtua, te ʼAtua ʼo Iselaele.”+
