Selemia 50:1-46
50 Koʼeni te folafola ʼa Sehova ki te polofeta ko Selemia ʼo ʼuhiga mo Papiloni,+ te fenua ʼo te kau Kaletea:
2 “Kotou fakaha te logo ʼi te ʼu puleʼaga, ʼei, kotou tala.
Kotou fakatuʼu he pou fakailoga mo tala te logo.
ʼAua naʼa kotou fufu he meʼa.
Kotou ui: ‘Kua maʼu ia Papiloni.+
Kua fakalainoaʼi ia Pele.+
Kua fakamatakuʼi ia Melotake.
Kua fakalainoaʼi te ʼu fakatata ʼo Papiloni.
Kua fakamatakuʼi ʼana fakatata fakalialia.’*
3 ʼE haʼu he puleʼaga mai te potu noleto moʼona tauʼi.+
ʼE ina fakaliliu te fenua ʼaia ko he meʼa fakalialia.ʼE mole kei nofoʼi e he tahi.
Kua feholaki te hahaʼi ʼo feia pe mo te ʼu manu.Kua natou olo.”
4 ʼE ui e Sehova: “ ʼI te temi ʼaia, ʼe ʼomai fakatahi anai te hahaʼi ʼo Iselaele mo te hahaʼi ʼo Suta.+ ʼE natou haʼele faifetagihi anai,+ pea ʼe natou kumi fakatahi anai ia Sehova, tonatou ʼAtua.+
5 ʼE natou fehuʼi anai pe kofea te ala ʼae ki Sione. ʼE haga anai ʼonatou mata ki te potu ʼaia,+ pea ʼe natou ui anai: ‘Kotou ʼomai ke tou fakatahi kia Sehova ʼo tou fai mo ia he fuakava heʼe gata ʼe mole galoʼi anai ʼi he temi.’+
6 Kua liliu taku hahaʼi ko he faga ovi ʼe kua hehe.+ Neʼe fakaheʼi natou e ʼonatou tauhi ovi.+ Neʼe natou ʼave natou ki te ʼu moʼuga pea mo feʼaveʼaki ʼi te ʼu moʼuga mo te ʼu kiʼi moʼuga. Neʼe natou galoʼi tonatou maloloʼaga.
7 Neʼe kai natou e natou fuli ʼae neʼe natou maʼu+ pea neʼe ui e ʼonatou fili: ‘ ʼE mole matou lakahala koteʼuhi neʼe natou agahala kia Sehova, ia te matapuna ʼo te faitotonu, ʼei, ia Sehova, te ʼamanakiʼaga ʼo ʼanatou kui.’ ”
8 “Kotou feholaki ʼi Papiloni,Kotou mavae ʼi te fenua ʼo te kau Kaletea!+Kotou hage ko te ʼu manu ʼae ʼe haʼele ʼi muʼa ʼo te faga manu.
9 ʼE au fakatahiʼi anai ni puleʼaga lalahi mai te fenua ʼo te potu noleto+Ke natou tauʼi ia Papiloni.
ʼE natou fakaʼatu anai moʼona tauʼi,Pea ʼe maʼu anai ia ia.
ʼE hage ʼanatou kauʼi nahau ko ʼae ʼa he tagata tauʼE mamate ai te ʼu fanau.+ʼE mole hala he tahi moka fana ʼaki ʼana kauʼi nahau.
10 ʼE liliu anai te fenua ko Kaletea ko he koloa ʼe maʼu ʼi te tau,+
Pea ʼe fiafia anai ia natou fuli ʼae ka natou kaihaʼa ia ia,”+ ko te ui ʼaia ʼa Sehova.
11 “Neʼe kotou fiafia,+ ʼei, neʼe lahi tokotou fiafiaʼI takotou kaihaʼa toku tofiʼa.+
Neʼe kotou hopohopo ohage ko he pipi fafine kei mui ʼi te luna,Pea neʼe kotou tagi ohage ko ni hosi.
12 Neʼe lahi te ufiufi ʼo takotou faʼe.+
Neʼe lotovaivai ia ia ʼae neʼe ina fanauʼi koutou.
Koʼeni, ʼe mole maʼuhiga ia ʼi te ʼu puleʼaga,Ko he toafa, ko he kele magemage.+
13 ʼE mole toe nofoʼi anai ʼuhi ko te hauhau ʼo Sehova.+ʼE tuʼu lavaki ʼosi anai.+
Ko natou fuli ʼae ka fakalaka ovi ki Papiloni, ʼe natou sisio anai ʼaki he fakalialia,Pea ʼe natou vaʼi* anai ʼuhi ko te ʼu malaʼia fuli ʼae neʼe hoko ki ai.+
14 Kotou fakaʼatu ke kotou tauʼi ia Papiloni ʼi te ʼu faʼahi fuli,Ia koutou fuli ʼae ʼe toʼo nahau.
Kotou fana fuli ki ai ʼakotou kauʼi nahau!+Neʼe agahala ia kia Sehova.+
15 Kotou fai he kalaga tau kia ia ʼi te ʼu faʼahi fuli.
Kua to ia ia.
Kua fetokaʼi ʼona pou, kua holo ʼona kaupa,+He ʼe ko Sehova ʼae ʼe lagavaka.+
Kotou lagavaka kia ia.
Kotou fai kia ia ohage pe ko te meʼa ʼae neʼe ina fai.+
16 Kotou pulihi ia te tagata nunusi pulapula ʼi PapiloniPea mo ia ʼae ʼe ina fakaʼaogaʼi te hele piko ʼi te temi ʼo te taʼukai.+
ʼUhi ko te heleta fakahoko mate, ʼe tahi liliu anai ki tana hahaʼiPea mo tahi hola anai ki tona fenua.+
17 “Ko te kau Iselaele ʼe ko ni ovi kua mavetevete.+ Neʼe fakamavetevete natou e ni laione.+ Neʼe kai muʼa natou e te hau ʼo Asilia.+ Pea neʼe gugu leva ʼonatou hui e te Hau ʼo Papiloni ko Nepukanesa.+
18 Koʼeni leva te meʼa ʼae ʼe ui e Sehova ʼo te ʼatu kautau, te ʼAtua ʼo Iselaele: ‘ ʼE au tauteaʼi anai te hau ʼo Papiloni pea mo tona fenua ohage pe ko taku tauteaʼi ia te hau ʼo Asilia.+
19 Pea ʼe au toe ʼaumai anai ia Iselaele ki tona koga meʼa lunaʼia.+ ʼE kai anai ʼi Kalemelo mo Pasani,+ pea ʼe makona anai ʼi te ʼu moʼuga ʼo Efalaimi+ mo Kileate.’ ”+
20 ʼE ui e Sehova: “ ʼI te temi ʼaia,ʼE kumi anai te hala ʼa Iselaele,Kae kua puli ia,Pea ʼe mole toe maʼu anai te ʼu agahala ʼa Suta,He ʼe au fakamolemole anai kia natou ʼae neʼe au tuku ke maʼuʼuli.”+
21 “Alu ʼo tauʼi te fenua ʼo Melataime pea mo te hahaʼi ʼo Pikoti.+
Matematehi ia natou pea mo ke pulihi katoa ia natou!” ko te ui ʼaia ʼa Sehova.
“Fai ia meʼa fuli ʼae neʼe au fakatotonu atu.
22 ʼE logo ki te logoaʼa ʼo he tau ʼi te fenua,Ko he maumau fakamataku.
23 Koʼeni, kua fasi, kua maumau ia te hamale ʼae neʼe ina laliki ia te ʼu puleʼaga fuli ʼo te kele!+
Kua liliu ia Papiloni ko he meʼa fakalialia ʼi te ʼu puleʼaga!+
24 Neʼe au fakatuʼu he hele kia koe, Papiloni, pea neʼe ke to ki ai,Kae neʼe mole ke iloʼi pe la.
Kua maʼu pea kua puke koe,+He neʼe ke fakafeagai kia Sehova.
25 Neʼe avahi e Sehova tana tanakiʼaga mahafuʼO ina toʼo mai ai te ʼu mahafu ʼo tona hauhau.+
ʼE ʼi ai te gaue ʼa te Tuʼi ʼAliki ko Sehova ʼo te ʼatu kautauʼE tonu ke ina fakahoko ʼi te fenua ʼo te kau Kaletea.
26 Kotou ʼomai mai te ʼu potu mamaʼo ʼo tauʼi ia ia!+
Kotou avahi ʼona fale tanakiʼaga fulumeto.+
Kotou tanaki ʼona koloa ohage ko ni tuʼuga fulumeto.
Pea kotou maumauʼi katoa.+
Ke mole hao he tahi.
27 Kotou matematehi ʼana vitulo mui fuli.+Ke ʼave natou ʼo tamateʼi!
Malaʼia kia natou he ʼe kua hoko mai tonatou ʼaho,Te temi ʼae ke fakamauʼi ai natou.
28 ʼE logo ki te logoaʼa ʼa natou ʼae ʼe feholaki,ʼA natou ʼae ʼe feholaki mai te fenua ʼo Papiloni,Moʼo tala ʼi Sione ʼe lagavaka ia Sehova, totatou ʼAtua,ʼE lagavaka ʼo ʼuhiga mo tona fale lotu.+
29 Kotou pauʼi te kau fainahau,Ia natou fuli ʼae ʼe natou fakaʼaogaʼi te nahau+
Ke natou ʼohofi ia Papiloni.
Kotou ʼa takai ia ia. Ke mole hao he tahi.
Kotou tauteaʼi ia ia ʼo mulimuli ki ʼana gaue.+
Kotou fai ki ai ohage pe ko te meʼa ʼae neʼe ina fai,+He neʼe fiatuʼu kia Sehova,
Te Maʼoniʼoni ʼo Iselaele.+
30 Koia ʼe matehi anai ʼona kau tupulaga ʼi te ʼu malaʼe lalahi ʼo te kolo,+Pea ʼe mamate anai ʼona kau solia fuli ʼi te ʼaho ʼaia,” ko te ui ʼaia ʼa Sehova.
31 “Koʼeni ʼe au fakafeagai kia koe+ ʼae ʼe agatuʼu,”+ ko te ui ʼaia ʼa te Tuʼi ʼAliki ko Sehova ʼo te ʼatu kautau,“Koteʼuhi ʼe hoko moʼoni mai anai tou ʼaho, te temi ʼae ka au fakamauʼi ai koe.
32 Ia koe ʼae ʼe agatuʼu, ʼe ke tukia anai pea mo toka,ʼE mole fakatuʼu ake anai ia koe e he tahi.+
ʼE au tutu anai ʼou koloPea ʼe vela anai ia meʼa fuli ʼae ʼi ʼou tafaʼaki.”
33 Koʼeni te folafola ʼa Sehova ʼo te ʼatu kautau:
“ ʼE gaohi koviʼi te hahaʼi ʼo Iselaele mo te hahaʼi ʼo Suta,Pea ʼe taʼofi e natou fuli ʼae neʼe natou pilisoniʼi ia natou.+
ʼE mole natou fia tuku age ia natou ke olo.+
34 Kae ʼe malohi ia Ia ʼae neʼe ina totogi natou.+
Ko tona huafa ko Sehova ʼo te ʼatu kautau.+
ʼE ina fakafofoga anai natou ʼi te faifakamau+Ke maʼuli fimalie ai te fenua,+Kae ke tuʼania te hahaʼi ʼo Papiloni.”+
35 “ ʼE tauteaʼi anai te kau Kaletea ʼaki te heleta,” ko te ui ʼaia ʼa Sehova.“ ʼE hiki anai te heleta ki te hahaʼi ʼo Papiloni, mo ʼona tama ʼaliki pea mo ʼona kau popoto.+
36 ʼE tauteaʼi anai te ʼu polofeta loi pea ʼe natou agavale anai.
ʼE tauteaʼi anai ʼana tagata tau ʼaki te heleta pea ʼe natou matataku anai.+
37 ʼE hiki anai te heleta ki ʼanatou hosi mo ʼanatou saliote tau.ʼE tauteaʼi anai te kau matapule fuli ʼae ʼe maʼuʼuli ʼi te kolo ʼaki te heleta,Pea ʼe natou liliu anai ohage ko ni fafine.+
ʼE hiki anai te heleta ki ʼona koloa pea ʼe kaihaʼa anai.+
38 Malaʼia ki ʼona vai, ʼe mamaha anai.+
Ko he fenua ʼe fonu ai te ʼu fakatata,+Pea ʼuhi ko te ʼu meʼa fakamataku ʼae ʼe ha kia natou, ʼe hoko atu pe ia tanatou agavale.
39 Koia la ʼae ʼe maʼuli fakatahi anai te ʼu manu ʼo te toafa mo te ʼu manu logoaʼa,Pea ʼe nonofo anai te ʼu otulusi ʼi te kolo.+
ʼE mole toe nofoʼi anai,ʼEi, ʼe mole toe maʼuli ai anai he tahi mai he taʼiake ki he tahi taʼiake.”+
40 “ ʼE hage anai ko te maumauʼi e te ʼAtua ia Sotoma mo Komola+ pea mo te ʼu kolo ʼae ʼi ʼonā tafaʼaki.+ ʼE mole toe maʼuli ai anai he tahi, ʼei, ʼe mole toe nofoʼi anai,”+ ko te ui ʼaia ʼa Sehova.
41 “Koʼeni, ʼe ʼomai he hahaʼi mai te potu noleto.ʼE malaga anai mai te ʼu potu mamaʼo ʼo te kele+Ia he puleʼaga malohi pea mo ni hau ʼe malolohi.+
42 ʼE natou toʼo nahau pea mo te savelo.+
ʼE natou agafekai pea ʼe mole natou ʼoʼofa tuʼa tahi anai.+
ʼE hage te logoaʼa ʼa te ʼu tagata heka hosiKo te gugulu ʼo te tai.+
ʼE natou fakaʼatu ki te tau ohage ko he foʼi tokotahi moʼo tauʼi ʼo koe, taʼahine ʼo Papiloni.+
43 Kua maʼu logo te hau ʼo Papiloni ʼo ʼuhiga mo natou+Pea ʼe lotovaivai.+
ʼE lotohohaMo mamahi ohage ko he fafine ʼe fanau.
44 “Koʼeni, ʼe haʼu anai he tahi ʼo tauʼi te ʼu koga meʼa lunaʼia ʼae ʼe maʼuli fimalie ai te faga ovi ohage ko he laione ʼe haʼu mai te vao ʼakau ʼae ʼe maʼuli ʼi te vaʼe Solotane. Kae ʼi he kiʼi temi pe, ʼe au kapu anai ia natou* ʼi tonatou fenua. ʼE au fakanofo anai ia ia ʼae neʼe filifili ke pule kia natou.+ Ko ai ʼae ʼe hage ko au? Ko ai ʼae ʼe lava fakafeagai mai kia au? Ko ai te tauhi ovi ʼae ʼe ina lava tauʼi au?+
45 Koia, kotou fakalogo ki te tonu ʼae neʼe toʼo e Sehova ʼo ʼuhiga mo Papiloni+ pea mo te fakatuʼutuʼu ʼae neʼe ina fakakaukauʼi ʼo ʼuhiga mo te fenua ʼo te kau Kaletea:
ʼE taki anai ki mamaʼo te ʼu ʼuhi ʼo te faga ovi.
ʼE maumauʼi anai ʼonatou koga meʼa lunaʼia ʼuhi ko tanatou aga.+
46 ʼE galulu anai te kele ʼi te logoaʼa ʼo te to ʼa Papiloni,Pea ʼe logo anai he kalaga ʼi te ʼu puleʼaga.”+
Nota
^ ʼI te Fakahepeleo, ʼe lagi haʼu mai he tahi kupu ʼe fakaʼuhiga ki te ʼu faifekau manu. ʼE fakaʼaogaʼi moʼo fakaha te fehiʼa.
^ Hep. “vekaʼi.”
^ ʼE mahino ia, ko te hahaʼi ʼo Papiloni.
