Selemia 42:1-22
42 Neʼe ʼomai leva te ʼu pule solia fuli, mo Seonane+ foha ʼo Kalease, mo Sesania foha ʼo Hosaia pea mo te hahaʼi katoa, mai ia ia ʼae ʼe malalo kia ia ʼae ʼe maʼuhiga,
2 ʼo ui ki te polofeta ko Selemia: “Fakalelei siʼou loto, fakalogo mai ki tamatou tagi mo ke faikole kia Sehova tou ʼAtua ke tokoni mai, kia natou fuli ʼae neʼe hao koteʼuhi ʼe ke sio pe kua matou tokosiʼi, ʼe mole kei matou kaugamalie.+
3 Kole kia Sehova, tou ʼAtua ke ina fakaha mai te ala ʼae ʼe tonu ke matou olo ai mo te meʼa ʼae ʼe tonu ke matou fai.”
4 Neʼe tali age e te polofeta ko Selemia kia natou: “Fai ki ai. ʼE au faikole anai kia Sehova, tokotou ʼAtua ohage pe ko takotou kole mai. Pea ʼe au fakaha katoa atu anai ia te tali ʼa Sehova. ʼE mole au fufu anai he meʼa kia koutou.”
5 Neʼe natou tali leva kia Selemia: “Ke liliu ia Sehova ko he fakamoʼoni agatonu mo moʼoni pea ke ina tauteaʼi matou mo kapau ʼe mole matou fakahoko katoa te fakatotonu ʼa Sehova tou ʼAtua, ʼae ka ke fakaha mai.
6 Pe ʼe matou leleiʼia tana tali peʼe kailoa, kae ʼe matou fakalogo anai kia Sehova, tomatou ʼAtua, ʼae ʼe matou kole atu ke ke fakafehuʼi. Pea ʼe fua lelei pe anai kia matou koteʼuhi ʼe matou fakalogo anai kia Sehova tomatou ʼAtua.”
7 ʼI te hili ki ai ʼaho ʼe hogofulu, neʼe palalau leva ia Sehova kia Selemia.
8 Koia neʼe pauʼi ai e Selemia ia Seonane, foha ʼo Kalease mo te ʼu pule solia fuli ʼae neʼe nonofo mo ia, ʼo feia mo te hahaʼi katoa, mai ia ia ʼae ʼe malalo kia ia ʼae ʼe maʼuhiga.+
9 Neʼe ina ui kia natou: “Koʼeni te folafola ʼa Sehova, te ʼAtua ʼo Iselaele ʼae neʼe kotou loto ke au tagi mamahi ki ai ke tokoni atu:
10 ‘Kapau ʼe kotou fakatotonu ke kotou nonofo ʼi te fenua ʼaeni, ʼe au faʼu anai koutou kae ʼe mole au maumauʼi anai koutou, ʼei, ʼe au to anai koutou kae ʼe mole au taʼaki anai koutou. ʼE au fakahemala* anai ʼo ʼuhiga mo te malaʼia ʼae neʼe au fakahoko kia koutou.+
11 ʼAua takotou matataku ki te hau ʼo Papiloni ʼae ʼe kotou tuʼania ki ai.’+
“ ‘ ʼAua takotou matataku ki ai he ʼe au nofo mo koutou moʼo haofaki pea mo fakaʼateainaʼi koutou mai tona nima,’ ko te ui ʼaia ʼa Sehova.
12 ‘Pea ʼe au manavaʼofa anai kia koutou,+ pea ʼe toe manavaʼofa anai kia koutou, ʼo ina fakaliliu mai koutou ki tokotou fenua.
13 “ ‘Kae kapau ʼe kotou ui: “Kailoa, ʼe mole matou nonofo anai ʼi te fenua ʼaeni,” pea kapau ʼe mole kotou fakalogo kia Sehova, tokotou ʼAtua,
14 ʼo kotou ui: “Kailoa ia, ʼe matou olo anai matou ki Esipito.+ ʼE mole matou sisio ai anai ki he tau, mo logo ki te pupuhi ʼo te fakatagi pupuhi pea ʼe mole matou hala anai mo moʼi pane, pea ʼe matou nonofo ai anai,”
15 koʼeni leva te folafola ʼa Sehova kia koutou, hahaʼi ʼae neʼe nonofo ʼi Suta. Koʼeni te folafola ʼa Sehova ʼo te ʼatu kautau, te ʼAtua ʼo Iselaele: “Kapau ʼe kotou fakatotonu pe ke kotou olo ki Esipito ʼo maʼuʼuli* ai,
16 ʼe kaku atu pe anai kia koutou te tau ʼi Esipito ʼae neʼe kotou matataku ki ai pea ʼe toe to pe anai kia koutou te hoge ʼi Esipito ʼae neʼe kotou tuʼania ki ai, ʼei, ʼe kotou mamate ai anai.+
17 Ko te hahaʼi tagata fuli pe ʼae ʼe natou fakatotonu ke olo ʼo maʼuʼuli ʼi Esipito, ʼe natou mamate anai ʼi te tau, ʼi te hoge peʼe ʼi te ʼu taʼi mahaki.* ʼE mole maʼuli anai he tahi ia natou peʼe hao mai te malaʼia ʼae ka au fakahoko kia natou.” ’
18 “Koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘Ohage pe ko te to ʼo toku hauhau ki te hahaʼi ʼo Selusalemi,+ ʼe toe to feia pe anai toku hauhau kia koutou mo kapau ʼe kotou olo ki Esipito. ʼE talanoaʼi anai koutou e te hahaʼi ʼi ʼanatou faitutuku pea ʼe kotou liliu anai ko he meʼa fakalialia. ʼE fakamalaʼia anai koutou mo fakalainoaʼi+ pea ʼe mole kotou toe sisio anai ʼi he temi ki te koga meʼa ʼaeni.’
19 “Neʼe fakatonutonuʼi koutou e Sehova, hahaʼi ʼae neʼe nonofo ʼi Suta. ʼAua naʼa kotou olo ki Esipito. Ke kotou mahino lelei ki te faʼahi ʼaeni: neʼe au fakatokaga atu kia koutou ʼi te ʼaho nei,
20 ʼe kotou mamate anai mo kapau ʼe kotou toʼo he tonu ʼe kovi. Neʼe kotou kole mai ke au fakafehuʼi ia Sehova tokotou ʼAtua. Neʼe kotou ui mai: ‘Faikole kia Sehova, tomatou ʼAtua ke tokoni mai. Pea ke fakaha katoa mai ia te tali ʼa Sehova, tomatou ʼAtua pea ʼe matou fakahoko anai.’+
21 Pea neʼe au haʼu mo te tali kia koutou ʼi te ʼaho nei. Kae ʼe mole kotou fakalogo anai kia Sehova, tokotou ʼAtua pea ʼe mole kotou fai anai te meʼa ʼae neʼe ina ui mai ke au fakaha atu.+
22 Koia ke kotou mahino lelei: ʼi te fenua ʼae ʼe kotou fia olo ʼo maʼuʼuli ai ʼe kotou mamate anai ʼi te tau, ʼi te hoge peʼe ʼi te ʼu taʼi mahaki.”+
