Pesalemo 144:1-15
Pesalemo ʼa Tavite.
144 Ke vikiʼi ia Sehova toku ʼUtu,+ʼAe ʼe ina akoʼi au ki te tauPea mo teuteuʼi au ke au tauʼi ʼoku fili.+
2 ʼE ko toku ʼofa agatonu mo toku kolo tau,Toku nonoʼaga moʼoni mo toku haofakiʼaga,Toku meʼa tali tau pea mo ia ʼae ʼe au nono ki ai,+Ia Ia ʼae ʼe ina fakamaʼua ki ni hahaʼi ke natou fakalogo mai kia au.+
3 Sehova e, kotea te ʼuhiga ʼo te tagata ke ke iloʼi ia ia,Mo te foha ʼo te tagata ke ke tokaga ki ai?+
4 ʼE hage te tagata ko he ʼaele,+Pea ʼe hage ʼona ʼaho ko he malumalu ʼe puli.+
5 Sehova e, tuku ifo ki lalo te lagi pea ke hifo mai,+Ke ke kapa ki te ʼu moʼuga pea ke natou kohu.+
6 Fakatapa te hila mo fakamavete te ʼu fili,+Fana ʼau kauʼi nahau ke natou feholaki.+
7 Folahi ʼou nima mai ʼoluga,Tokoni mo haofaki au mai te ʼu peau lalahi,Mai te nima* ʼo te kau matapule,+
8 ʼAe ʼe gutuloiMo hiki ʼonatou nima mataʼu ʼo fai ni fakapapau kaka.
9 ʼAtua e, ʼe au fia hiva atu he katiko foʼou.+
ʼE au fia hiva atu ni fakavikiviki ʼaki he meʼa faimaholo ʼe kauʼi uka hogofulu,
10 Kia koe ʼae ʼe ke foaki te malo ki te ʼu hau,+Kia koe ʼae ʼe ke haofaki tau kaugana ko Tavite mai te heleta.+
11 Tokoni mo haofaki au mai te nima ʼo te kau matapule,ʼAe ʼe gutuloiMo hiki ʼonatou nima mataʼu ʼo fai ni fakapapau kaka.
12 ʼE hage anai ʼomatou foha ko ni huli ʼe homo vave,Pea ʼe hage anai ʼomatou ʼofafine ko ni pou tuliki neʼe togi ki he fale hau.
13 ʼE mahu anai ʼomatou fale tanakiʼaga koloa ʼi ni faʼahiga meʼa kai kehekehe,Pea ʼe tuputupu anai ʼi te tuʼa kolo ʼamatou faga manu ʼo lauʼi afe, ʼei, ʼo lauʼi hogofulu afe.
14 ʼE fananau lelei anai ʼamatou pipi fafine, ʼe mole natou tuʼutamakiʼia anai peʼe mamate ʼonatou ʼuhi.ʼE mole logo anai ni tagi mamahi ʼi ʼamatou malaʼe lalahi.
15 Manuʼia te hahaʼi ʼae ʼe hoko ki ai te ʼu aluʼaga ʼaia!
Manuʼia te hahaʼi ʼae ko Sehova tonatou ʼAtua!+
Nota
^ Peʼe “pule.”
