Te Evaselio ʼa Mateo 12:1-50
-
Ko Sesu “te ʼAliki ʼo Te Sapato” (1-8)
-
Te fakamalolo ʼo te tagata ʼe nima palalisia (9-14)
-
Te tagata faifekau ʼofaina ʼa te ʼAtua (15-21)
-
ʼE kapu te kau temonio ʼaki te laumalie maʼoniʼoni (22-30)
-
Te agahala ʼae ʼe mole fakamolemole (31, 32)
-
ʼE iloʼi te fuʼu ʼakau ʼi ʼona fua (33-37)
-
Te fakailoga ʼo Sonasi (38-42)
-
Ka toe liliu mai he laumalie kovi (43-45)
-
Te faʼe ʼa Sesu mo ʼona tehina (46-50)
12 ʼI te temi ʼaia, neʼe fakalaka ia Sesu ʼi te ʼu gaueʼaga fulumeto ʼi te ʼaho ʼo te Sapato.* Neʼe fia kakai ʼana tisipulo pea neʼe natou kamata fusi te fulumeto ʼo kai.+
2 ʼI te sisio ʼa te kau Faliseo ki te faʼahi ʼaia, neʼe natou ui age kia te ia: “Sio, ʼe fai e ʼau tisipulo ia te meʼa ʼae ʼe mole gafua ke fai ʼi te ʼaho ʼo te Sapato.”+
3 Neʼe ina ui age kia natou: “Neʼe mole kotou lau koa la te meʼa ʼae neʼe fai e Tavite ʼi te temi ʼae neʼe fia kai ai, ia ia mo ʼona kaugā fagona?+
4 Neʼe hu ia Tavite ki te fale ʼo te ʼAtua pea neʼe natou kai te ʼu pane ʼae neʼe molagaʼi,+ kae neʼe mole gafua ke natou kai, gata pe ki te kau pelepitelo.+
5 Pe neʼe mole kotou lau koa la ʼi te Lao ʼe mole fakaʼapaʼapaʼi te Sapato e te kau pelepitelo ʼi te fale lotu? Kae ʼe mole natou lakahala ai.+
6 ʼE au tala atu kia koutou, ʼi heni, ʼe ʼi ai he tahi ʼe maʼuhiga age ʼi te fale lotu.+
7 Kae ka na pau la neʼe kotou mahino ki te fakaʼuhiga ʼo te folafola ʼaeni: ‘ ʼE au loto ki te manavaʼofa+ kae mole ki te sakilifisio,’+ ka na ʼaua la ʼe mole kotou tauteaʼi anai ia natou ʼae neʼe mole lakahala.
8 Koteʼuhi ko te Foha ʼo te tagata ʼe ko te ʼAliki ʼo Te Sapato.”+
9 ʼI tana mavae mai ai, neʼe hu ki tonatou sinakoka,
10 pea neʼe ʼi ai te tagata neʼe palalisia tona nima.+ Neʼe fehuʼi age e ʼihi kia Sesu: “ ʼE gafua koa ke fakamalolo he tahi ʼi te ʼaho ʼo te Sapato?” Neʼe natou faiga ai ke natou fakalakahalaʼi ia ia.+
11 Neʼe ina ui age kia natou: “Kapau ʼe maʼu e he tahi ia koutou hana ovi pe ʼe tahi pea ʼe to ki he luo ʼi te ʼaho ʼo te Sapato, ʼe mole alu anai koa la ʼo toʼo ake?+
12 Kae ʼe mahino ia, ʼe maʼuhiga age ia te tagata ʼi he ovi! Koia ʼe gafua ke fai ia te meʼa ʼae ʼe lelei ʼi te ʼaho ʼo te Sapato.”
13 Pea neʼe ina ui leva ki te tagata: “Faoʼi tou nima.” Neʼe ina faoʼi tona nima pea neʼe lelei ai.
14 Kae neʼe mavae atu te kau Faliseo pea natou fonofono ke natou matehi ia ia.
15 ʼI te iloʼi e Sesu ia te faʼahi ʼaia, neʼe mavae mai ai. Neʼe toe mulimuli ia te ia te hahaʼi tokolahi,+ pea neʼe ina fakamalolo ia natou fuli ʼae neʼe mahahaki.
16 Neʼe ina fakatotonu malohi age kia natou ke ʼaua naʼa natou palalau ʼo ʼuhiga mo ia,+
17 ke hoko ai te folafola ʼa te polofeta ko Esaia, ʼi tana ui:
18 “Koʼeni taku tagata faifekau+ ʼae neʼe au filifili, toku ʼofaina ʼae ʼe au fiafia ai!+ ʼE au foaki anai toku laumalie kia ia+ pea ʼe ina fakaha anai ki te ʼatu puleʼaga te ʼuhiga moʼoni ʼo te faitotonu.
19 ʼE mole fakatupu kē anai,+ ʼe mole kalaga anai pea ʼe mole logo anai he tahi ki tona leʼo ʼi te ʼu ala lalahi.
20 ʼE mole ina moloki anai te kaho ʼae kua mapelu, pea ʼe mole ina matehi anai te vavae ʼae ʼe mu veliveli,+ ʼo kaku ki tana fakahoko ia te faitotonu.
21 ʼE falala moʼoni anai te ʼatu puleʼaga ki tona huafa.”+
22 Pea neʼe natou ʼaumai leva kia te ia te tagata kivi mo ʼalelo mate, neʼe ulu sino ai te temonio, pea neʼe ina fakamalolo ia ia. Neʼe toe sio pea mo toe palalau ai te tagata ʼae neʼe ʼalelo mate.
23 Neʼe punamaʼuli ai te hahaʼi kaugamalie pea natou ui: “ ʼE mole koa la ko te Foha ʼaeni ʼo Tavite?”
24 ʼI te logo ʼa te kau Faliseo ki te faʼahi ʼaia, neʼe natou ui: “ ʼE kapu e te tagata ʼaeni te kau temonio ʼaki ia Pelesepu,* te pule ʼo te kau temonio.”+
25 ʼI tana iloʼi ʼanatou manatu, neʼe ina ui age: “ ʼE to anai he puleʼaga mo kapau ʼe fetauʼaki pe tana hahaʼi, pea ʼe mole tuʼu anai he kolo peʼe ko he loto fale mo kapau ʼe fetauʼaki pe tana hahaʼi.
26 ʼO toe feia pe, kapau ʼe kapu e Satana ia Satana, ʼe fakafeagai pe ia kia ia totonu. ʼE lava tuʼu feafeaʼi anai tona puleʼaga?
27 Pea kapau ʼe au kapu te kau temonio ʼaki ia Pelesepu, ʼe kapu e ʼakotou tisipulo* te kau temonio ʼaki ia ai? Koia, ʼe natou liliu anai ko ʼakotou tuʼi fakamau.
28 Kae kapau ʼe au kapu te kau temonio ʼaki te laumalie ʼo te ʼAtua, kua kaku moʼoni atu te Puleʼaga ʼo te ʼAtua.+
29 Pe ʼe lava ulufi feafeaʼi e he tahi te ʼapi ʼo he tagata malohi ʼo kaihaʼa ʼona koloa? ʼE tonu muʼa ke ina haʼihaʼi te tagata malohi ʼaia pea ʼe hoki feala leva ke ina kaihaʼa tona ʼapi.
30 Ko ʼae ʼe mole kau mo au, ʼe fakafeagai ia kia te au, pea ko ʼae ʼe mole ina fakatahiʼi mo au te hahaʼi, ʼe ina fakamavetevete.+
31 “Koia ʼe au tala atu kia koutou, ko te ʼu faʼahiga agahala pea mo laukovi kehekehe ʼae ʼe fai e te tagata, ʼe fakamolemole anai ki ai. Kae ko ʼae ʼe laukovi ki te laumalie ʼo te ʼAtua, ʼe mole fakamolemole anai ki ai.+
32 Ohage la, ko he tahi ʼe palalau kovi ki te Foha ʼo te tagata, ʼe fakamolemole anai ki ai.+ Kae ko ʼae ʼe palalau kovi ki te laumalie maʼoniʼoni, ʼe mole fakamolemole anai ki ai ʼi te malama* ʼaeni pea mo ʼae ka hoko mai.+
33 “Kapau ʼe kotou tokakaga lelei ki te fuʼu ʼakau pea ʼe fua lelei anai, pea kapau ʼe mole kotou tokakaga ki te fuʼu ʼakau pea ʼe fua kovi anai. Koteʼuhi ʼe iloʼi anai pe ʼe lelei peʼe kovi te fuʼu ʼakau ʼi ʼona fua.+
34 Faga ʼuhiʼi gata kafokona,+ ʼe lava feafeaʼi hakotou palalau ki he ʼu meʼa ʼe lelei kae ʼe kotou agakovi? He ʼe haʼu mai te gutu te meʼa ʼae ʼe fonu ʼi te loto.+
35 Ko te tagata ʼae ʼe agalelei, ʼe ina toʼo mai tona koloa ʼae ʼe lelei te ʼu meʼa ʼae ʼe lelei. Kae ko te tagata ʼae ʼe agakovi, ʼe ina toʼo mai tona koloa ʼae ʼe kovi te ʼu meʼa ʼae ʼe kovi.+
36 ʼE au tala atu kia koutou, ʼi te ʼAho ʼo Te Fakamau,* ʼe fakamauʼi anai te hahaʼi+ ʼuhi ko te ʼu palalau vaʼiganoa fuli ʼae ʼe natou fai.
37 Koteʼuhi ʼe fakatonuhia peʼe fakatuʼā anai koe ʼi ʼau palalau.”
38 Neʼe ui age leva e ʼihi ʼi te kau sekelipa pea mo te kau Faliseo: “ ʼAliki, ʼe matou fia sio ki he fakailoga ʼe haʼu mai ia te koe.”+
39 Neʼe ina tali age kia natou: “ ʼE haga kumi pe e te taʼiake agakovi mo heʼe agatonu ʼaeni ia he fakailoga, kae ʼe mole foaki age anai he fakailoga kia natou, gata pe ki te fakailoga ʼo te polofeta ko Sonasi.+
40 Koteʼuhi, ohage pe ko te nofo ʼa Sonasi ʼi te fatu ʼo te toe ika lahi ia ʼaho ʼe tolu mo po ʼe tolu,+ ʼe toe feia pe mo te Foha ʼo te tagata. ʼE tuku anai ki te kele ia ʼaho ʼe tolu mo po ʼe tolu.+
41 ʼE fakatuʼuake anai te hahaʼi ʼo Ninive mo te taʼiake ʼaeni ʼi te fakamau, pea ʼe natou fakatuʼā anai te taʼiake ʼaeni, koteʼuhi neʼe fakahemala te hahaʼi ʼo Ninive ʼi te faifakamafola ʼa Sonasi.+ Kae ʼe nofo ʼi heni he tahi ʼe maʼuhiga age ia Sonasi.+
42 ʼE fakatuʼuake anai te fineʼaliki ʼo te potu saute mo te taʼiake ʼaeni ʼi te fakamau, pea ʼe ina fakatuʼā anai natou, koteʼuhi neʼe haʼu mai te potu taupotu ʼo te kele ʼo fagono ki te poto ʼo Salomone.+ Kae ʼe nofo ʼi heni he tahi ʼe maʼuhiga age ia Salomone.+
43 “Ka mavae he laumalie kovi mai he tagata, ʼe fakalaka ʼi te toafa ʼo kumi hona maloloʼaga kae ʼe mole ina maʼu ia.+
44 ʼE ina ui leva: ‘ ʼE au toe liliu ki te ʼapi ʼae neʼe au mavae mai ai.’ ʼI tana tau atu ki ai, ʼe tuʼu lavaki te ʼapi, kua fakamaʼa pea mo fakamataleleiʼi.
45 ʼE alu ai ʼo toʼo te ʼu laumalie ʼe toko fitu ʼe natou agakovi age ia ia, pea ʼe natou fehufi ki loto ʼo nonofo ai. Pea ko te aluʼaga fakamuli ʼo te tagata ʼaia ʼe kovi age ia ʼi tona kamata.+ Pea ʼe toe feia anai ʼo ʼuhiga mo te taʼiake agakovi ʼaeni.”
46 ʼI tana lolotoga palalau ki te hahaʼi kaugamalie, neʼe tutuʼu ʼi tuʼa tana faʼe pea mo ʼona tehina+ he neʼe natou fia palalau kia te ia.+
47 Pea neʼe ui age e he tahi: “Koʼeni tau faʼe mo ʼou tehina ʼe natou tutuʼu ʼi tuʼa he ʼe natou fia palalau mo koe.”
48 Neʼe tali e Sesu: “Ko ai taku faʼe, pea ko ai ʼoku tehina?”
49 Neʼe ina faoʼi tona nima ki ʼana tisipulo, pea mo ui: “Koʼeni taku faʼe mo ʼoku tehina!+
50 Koteʼuhi ko ʼae ʼe ina fai te finegalo ʼo taku Tamai ʼae ʼe ʼi selo, ʼe ko ia ʼaia toku tehina, mo toku tuagaʼane pea mo taku faʼe.”+
Nota
^ Vakaʼi Te ʼu Kupu.
^ Ko te tahi higoa ʼo Satana.
^ Klka. “ ʼokotou foha.”
^ Peʼe “tuʼu ʼo te ʼu faʼahiga meʼa.” Vakaʼi te kupu “Tuʼu ʼo te ʼu faʼahiga meʼa” ʼi Te ʼu Kupu.
^ Vakaʼi Te ʼu Kupu.
