Te ʼu Gaue ʼa Te Kau Apositolo 9:1-43
-
ʼE fagona ia Saulo ki Tamaso (1-9)
-
ʼE fekauʼi e te ʼAliki ia Ananiasi ke tokoni kia Saulo (10-19, ʼuluaki koga)
-
ʼE faifakamafola ia Saulo ʼo ʼuhiga mo Sesu ʼi Tamaso (19, lua koga-25)
-
ʼE fealuʼaki ia Saulo ʼi Selusalemi (26-31)
-
ʼE fakamalolo e Petelo ia Eneo (32-35)
-
Te fakatuʼuake ʼo Tolokasi, te fafine lotofoaki (36-43)
9 Kae neʼe kei hoko atu pe te fakamatakuʼi e Saulo ia te ʼu tisipulo ʼa te ʼAliki pea mo tana fia matehi natou.+ Koia, neʼe alu ai ki te pelepitelo lahi
2 ʼo ina kole age he ʼu tohi ke ina ʼave ki te ʼu sinakoka ʼi Tamaso, ke feala hana ʼaumai haʼihaʼi ki Selusalemi ia natou ʼae ʼe ina maʼu atu ʼe kau ʼi Te Ala,*+ tagata mo fafine.
3 ʼI tana fagona pea mo fakaovi ki Tamaso, fokifa pe kua mu ki ai te malama mai te lagi,+
4 pea neʼe to ifo ki te kele mo logo ki he leʼo ʼe ina ui ki ai: “Saulo, Saulo, he koʼe ʼe ke fakatagaʼi au?”
5 Neʼe ina fehuʼi: “Ko ai ia koe ʼAliki?” Neʼe tali e te leʼo: “Ko au ia Sesu,+ ʼae ʼe ke fakatagaʼi.+
6 Tuʼu ake ʼo hu ki te kolo, pea ʼe fakaha atu anai te meʼa ʼae ʼe tonu ke ke fai.”
7 Pea ko te ʼu tagata ʼae neʼe kaugā fagona mo Saulo, neʼe mole kei natou lava palalau ʼi tanatou punamaʼuli. Neʼe natou logo ki te leʼo, kae neʼe mole natou sisio ki he tahi.+
8 Neʼe tuʼu ake leva ia Saulo, pea logo la neʼe ava ʼona mata kae neʼe mole lava sio ki he meʼa. Koia neʼe natou takitaki ʼo ʼave ki Tamaso.
9 Pea lolotoga ʼaho ʼe tolu, neʼe mole sio ia ki he meʼa,+ pea neʼe mole kai mo inu.
10 ʼI Tamaso, neʼe ʼi ai te tisipulo neʼe higoa ko Ananiasi.+ Pea ʼi te meʼa ʼae neʼe ha age ki ai, neʼe pauʼi e te ʼAliki: “Ananiasi.” Neʼe ina tali: “Ko au, ʼAliki.”
11 Neʼe ui e te ʼAliki ki ai: “Tuʼu ake pea ke alu ki te ala ʼae ʼe higoa ko Hagatonu, ʼo kumi ʼi te ʼapi ʼo Sutasi te tagata ʼe higoa ko Saulo mai Talesi.+ He ʼe lolotoga faikole na,
12 pea ʼi te meʼa ʼae neʼe ha ki ai, neʼe sio ki he tagata ʼe higoa ko Ananiasi ʼe hu age pea ina hili ʼona nima ki ai, ʼo toe sio ai.”+
13 Kae neʼe tali e Ananiasi: “ ʼAliki, neʼe au logo mai he tokolahi ki te ’u meʼa kovi fuli neʼe fai e te tagata ʼaia ki ʼau maʼoniʼoni ʼi Selusalemi.
14 Pea ʼe ina maʼu ʼi heni te fakagafua mai te ʼu pelepitelo pule ke ina puke* ia natou fuli ʼae ʼe fetapa ki tou huafa.”+
15 Kae neʼe ui e te ʼAliki ki ai: “Alu, koteʼuhi ʼe ko te tagata ʼaia neʼe au filifili+ ke ina ʼave toku huafa ki te ʼu puleʼaga,+ mo te ʼu hau+ pea mo te ʼu foha ʼo Iselaele.
16 Pea ʼe au fakaha fakalelei anai ki ai te ʼu mamahi fuli ʼe tonu ke tau mo ia ʼuhi ko toku huafa.”+
17 Neʼe alu leva ia Ananiasi ʼo hu ki te loto fale, pea neʼe ina hili ʼona nima ki ai ʼo ina ui: “Saulo, toku tehina, ko te ʼAliki ko Sesu, ʼae neʼe ha atu ʼi te ala ʼae neʼe ke haʼu ai, neʼe ina fekauʼi mai au ke ke toe sio pea mo fonu ʼi te laumalie maʼoniʼoni.”+
18 ʼI te temi pe ʼaia, neʼe maluku ifo mai ʼona mata te ʼu meʼa neʼe hage ko he ʼu ʼuno, pea neʼe toe sio ai. Neʼe tuʼu ake leva pea neʼe papitema.
19 Neʼe kai leva pea neʼe toe malohi ai.
Neʼe nofo lolotoga ni ʼaho mo te kau tisipulo ʼi Tamaso,+
20 pea neʼe faifakamafola atu aipe ʼi te ʼu sinakoka, ʼo ina tala ʼe ko Sesu te ʼAlo ʼo te ʼAtua.
21 Neʼe punamaʼuli ia natou fuli ʼae neʼe fagono ki ai pea mo ui: “ ʼE mole ko te tagata koa la ʼaeni neʼe ina gaohi koviʼi ʼaupito ia natou ʼae ʼe fetapa ki te huafa ʼo Sesu ʼi Selusalemi?+ Neʼe mole haʼu koa la ke ina puke pea mo taki natou* ki te ʼu pelepitelo pule?”+
22 Kae neʼe ʼaʼasili malohi age ia Saulo ʼi te faifakamafola, pea ʼi tana fakamoʼoni fakalelei ʼae ʼe ko Sesu ia Kilisito,*+ neʼe mole feala ki te kau Sutea ʼae ʼe nonofo ʼi Tamaso ke natou fakafeagai ki ai.
23 Hili ki ai he temi, neʼe fonofono te kau Sutea ke natou matehi ia ia.+
24 Kae neʼe iloʼi leva e Saulo tanatou fonofono ʼaia. Neʼe natou leʼoleʼo fakalelei foki mo te ʼu matapa ʼo te kolo ʼi te ʼaho mo te po, ke natou matehi ia ia.
25 Koia, ʼi he poʼuli neʼe toʼo ia ia e ʼana tisipulo pea natou fakahifo ʼi he foʼi kato ʼi te matapa fakamalama ʼo te kaupa ʼo te kolo.+
26 ʼI tana tau ki Selusalemi,+ neʼe faiga ia ke fakatahi mo te kau tisipulo, kae neʼe natou matataku fuli ia ia, koteʼuhi neʼe mole natou tui kua liliu ko he tisipulo.
27 Koia neʼe tokoni ia Palenapa+ ki ai pea neʼe ina ʼave ki te kau apositolo. Neʼe fakamatalatala age e Palenapa kia natou, neʼe sio ia Saulo ki te ʼAliki ʼi te ala+ pea neʼe palalau age te ʼAliki ki ai. Pea neʼe fakaha age e Palenapa neʼe palalau ia Saulo ʼaki he lototoʼa ʼi te huafa ʼo Sesu ʼi Tamaso.+
28 Neʼe nofo leva ia Saulo mo natou, ʼo fealuʼaki faʼifaʼitaliha ʼi Selusalemi, pea mo palalau ʼaki he lototoʼa ʼi te huafa ʼo te ʼAliki.
29 Neʼe faipalalau mo te kau Sutea ʼae neʼe palalau Fakakeleka ke ina fakalotoʼi natou, kae neʼe natou kumi ke natou matehi ia ia.+
30 ʼI te iloʼi e te ʼu tehina te faʼahi ʼaia, neʼe natou ʼave ai ki Sesalea pea fekau leva ke alu ki Talesi.+
31 Ko te ʼu kokelekasio fuli ʼae ʼi Sutea, mo Kalilea, mo Samalia+ neʼe natou maʼuʼuli leva ʼi te tokalelei, pea mo natou ʼaʼasili malohi ʼi te tui. Neʼe natou haga tuputupu he neʼe natou manavasiʼi kia Sehova* pea mo maʼuʼuli ʼi te fakafimalie ʼo te laumalie maʼoniʼoni.+
32 Neʼe fealuʼaki ia Petelo ʼi te fenua katoa, pea neʼe toe alu foki ki te kau maʼoniʼoni ʼae neʼe maʼuʼuli ʼi Lita.+
33 Neʼe ina maʼu ai te tagata neʼe higoa ko Eneo, neʼe kua taʼu valu tana takoto ʼi tona palepale he neʼe palalisia.
34 Neʼe ui e Petelo ki ai: “Eneo, ʼe fakamalolo koe e Sesu Kilisito.+ Tuʼu ake ʼo fakatoka tou palepale.”+ Neʼe tuʼu atu aipe.
35 ʼI te sisio ki ai ʼa natou fuli ʼae ʼe maʼuʼuli ʼi Lita pea mo te potu fenua ʼo Salona, neʼe natou tafoki ai ki te ʼAliki.
36 ʼI Sope, neʼe ʼi ai te fafine, neʼe ko he tisipulo pea neʼe higoa ko Tapita, ʼi te Fakakeleka ko “Tolokasi.”* Neʼe lahi ʼana gaue lelei pea neʼe ina fai he ʼu tuʼuga meʼa ʼofa ki te kau masiva.
37 Kae neʼe mahaki leva ʼi te ʼu ʼaho ʼaia pea neʼe mate. Neʼe natou fakamaʼa ia ia pea natou fakatakoto ʼi te koga fale fata.
38 Neʼe tuʼu ovi ia Lita ki Sope. Koia, ʼi te iloʼi e te ʼu tisipulo ʼe nofo ia Petelo ʼi te kolo ʼaia, neʼe natou fekauʼi te ʼu tagata ʼe toko lua ke nā olo ʼo kole mamahi ki ai: “Fakalelei siʼou loto, kae ke foimo haʼu mo maua.”
39 Neʼe tuʼu atu aipe ia Petelo ʼo alu mo naua. Pea ʼi tana tau atu ki ai, neʼe nā taki ki te koga fale fata. Neʼe ʼomai fetagihi te ʼu fafine vitua fuli, pea natou fakaha age ki ai te ʼu kofu mo te ʼu pulupulu ʼae neʼe fai e Tolokasi ʼi tona temi maʼuli.
40 Neʼe fakahu leva ki tuʼa e Petelo ia natou fuli,+ pea neʼe tuʼutuli ifo ʼo faikole. Neʼe haga leva ki te sino ʼo ui: “Tapita, tuʼu ake!” Neʼe ava ʼona mata pea ʼi tana sio ʼae kia Petelo, neʼe mafuta ake.+
41 Neʼe puke e Petelo tona nima ʼo fakatuʼu ake, pea neʼe ina pauʼi te kau maʼoniʼoni mo te kau vitua ʼo ina fakaha age kua maʼuli.+
42 Neʼe iloʼi te faʼahi ʼaia ʼi Sope katoa, pea tokolahi neʼe natou tui ki te ʼAliki.+
43 Neʼe nofo ia Petelo ʼi ni kiʼi ʼaho ʼi Sope ʼi te ʼapi ʼo Simone, te tagata fai kiliʼi manu.+
Nota
^ Vakaʼi Te ʼu Kupu.
^ Klka. “haʼihaʼi.”
^ Klka. “ke ina ʼave haʼihaʼi natou.”
^ Vakaʼi Te ʼu Kupu.
^ Vakaʼi Te ʼu Fakamahino 1.5.
^ Ko te higoa Fakakeleka Tolokasi pea mo te higoa Fakaalamea Tapita ʼe nā fakaʼuhiga ki he faʼahiga tia fafine.
