Te ʼu Gaue ʼa Te Kau Apositolo 8:1-40
8 Neʼe lagolago ia Saulo ki te fakapogi ʼo Setefano.+
Pea ʼo kamata mai te ʼaho ʼaia, neʼe lahi te fakatagaʼi ʼo te kokelekasio ʼae neʼe tuʼu ʼi Selusalemi. Neʼe natou mavetevete fuli ʼi te ʼu potu fenua ʼo Sutea pea mo Samalia,+ gata pe ki te kau apositolo.
2 Kae ko ʼihi tagata neʼe manavasiʼi ki te ʼAtua neʼe natou ʼavaifo ia Setefano pea natou fetagihi ʼuhi ko tona mate.
3 Kae neʼe gaohi koviʼi ʼaupito leva e Saulo ia te kokelekasio. Neʼe ina ulufi te ʼu ʼapi, ʼo toho mai ki tuʼa te hahaʼi tagata mo fafine pea ina ʼave natou ʼo pilisoniʼi.+
4 Kae ko natou ʼae neʼe mavetevete, neʼe natou fakalaka ʼi te fenua katoa ʼo natou tala te logo lelei ʼo te folafola.+
5 Neʼe hifo leva ia Filipo ki te kolo ko* Samalia+ pea kamata faifakamafola kia natou ʼo ʼuhiga mo Kilisito.*
6 Neʼe tokagaʼi fakalelei e te hahaʼi kaugamalie te ʼu meʼa ʼae neʼe ui e Filipo, ʼi tanatou fagono mo sisio ki te ʼu milakulo ʼae neʼe ina fakahoko.
7 Tokolahi neʼe ulu sino ai te ʼu laumalie kovi, pea neʼe natou kalaga ʼi tanatou mavae ʼi te hahaʼi ʼaia.+ Neʼe fakamalolo te tokolahi ʼae neʼe palalisia pea mo maʼimoa.*
8 Koia neʼe hoko ai te toe fiafia lahi ʼi te kolo ʼaia.
9 Neʼe ʼi ai te tagata ʼi te kolo neʼe higoa ko Simone. ʼI te temi muʼa, neʼe gaohi meʼa fakamanamana pea neʼe punamaʼuli ai te hahaʼi ʼo Samalia, ʼo ina ui ʼe ko ia ko he tagata maʼuhiga.
10 Ko natou fuli, mai ia ia ʼae ʼe malalo kia ia ʼae ʼe maʼuhiga, neʼe natou fagono ki ai pea mo ui: “ ʼE maʼu e te tagata ʼaeni te malohi lahi mai te ʼAtua.”
11 Koia, neʼe natou fagono ki ai koteʼuhi neʼe ina fai te ʼu gaue fakamanamana talu mai fualoa ʼo natou punamaʼuli ai.
12 Kae ʼi te temi ʼae neʼe natou tui ai kia Filipo, ʼae neʼe ina tala te logo lelei ʼo ʼuhiga mo te Puleʼaga ʼo te ʼAtua+ pea mo te huafa ʼo Sesu Kilisito, neʼe natou papitema ai, tagata mo fafine.+
13 Neʼe toe tui mo Simone, pea hili tana papitema, neʼe fakatahi tuʼumaʼu mo Filipo.+ Neʼe punamaʼuli ʼi tana sio ki te ʼu milakulo pea mo te ʼu gaue fakaofoofo ʼae neʼe hoko.
14 ʼI te logo ʼa te kau apositolo ʼae ʼi Selusalemi kua tali ʼi Samalia ia te folafola ʼa te ʼAtua,+ neʼe natou fekauʼi ki ai ia Petelo mo Soane.
15 ʼI tanā tau ki ai, neʼe nā faikole ke maʼu e te ʼu tisipulo foʼou ia te laumalie maʼoniʼoni,+
16 koteʼuhi neʼe heʼeki maʼu e he tahi ia natou. Neʼe papitemaʼi pe natou ʼi te huafa ʼo te ʼAliki ko Sesu.+
17 Neʼe nā hili leva ʼonā nima kia natou+ pea neʼe natou maʼu ai te laumalie maʼoniʼoni.
18 ʼI te sio ʼa Simone ki te foaki ʼo te laumalie moka hili e te ʼu apositolo ʼonā nima ki te hahaʼi, neʼe ina fia foaki age kia naua he paʼaga,
19 ʼo ina ui: “Kolua foaki mai te malohi ʼaia, ke maʼu ia te laumalie maʼoniʼoni e ia ʼae ka au hili ki ai ʼoku nima.”
20 Kae neʼe ui e Petelo ki ai: “Ke puli tau paʼaga mo koe, koteʼuhi neʼe ke manatu ʼe feala ke ke maʼu ʼaki te paʼaga ia te meʼa ʼofa ʼae ʼe foaki noa e te ʼAtua.+
21 ʼE mole hou vahe pea ʼe mole ke kau koe ki te faʼahi ʼaeni, koteʼuhi ʼe mole moʼoni tou loto ia muʼa ʼo te ʼAtua.
22 Koia fakahemala ki tau agakovi pea kole mamahi ke fakamolemole e Sehova* tau fakatuʼutuʼu kovi, mo kapau ʼe feala.
23 Koteʼuhi ʼe au sio ʼe ke hage ko he meʼa kafokona* pea mo he kaugana ʼo te heʼe faitotonu.”
24 Neʼe ui e Simone kia naua: “Kolua hufakiʼi au kia Sehova,* ke ʼaua naʼa hoko mai he meʼa ʼi te ʼu meʼa ʼae kua kolua palalau ki ai.”
25 Koia, ʼi tanā ʼosi foaki he fakamoʼoni katoa pea mo tala te folafola ʼa Sehova,* neʼe nā toe liliu leva ki Selusalemi. ʼI tanā olo ʼaia, neʼe nā tala te logo lelei ki te ʼatu kolo liliki ʼo te kau Samalitana.+
26 Kae neʼe palalau ia te ʼaselo ʼa Sehova*+ kia Filipo, ʼo ina ui: “Tuʼu ake pea ke alu ki te potu saute, ki te ala ʼae ʼe hifo mai Selusalemi ki Kasa.” ʼE ko te ala ʼi te toafa.
27 Neʼe tuʼu ake ai ʼo alu, pea neʼe felaveʼi mo te tagata Etiopea, neʼe ko te enuke.* Neʼe ko te tagata maʼu tuʼulaga ʼa te fineʼaliki ʼo te kau Etiopea ko Kanetase pea neʼe tokaga ki ʼona koloa fuli. Neʼe alu ʼo tauhi ʼi Selusalemi,+
28 pea ʼi tana toe liliu mai ai, neʼe heka ʼi tana saliote ʼo lau leʼo lahi ia te tohi ʼa te polofeta ko Esaia.
29 Koia neʼe ui e te laumalie maʼoniʼoni kia Filipo: “Fakaovi ki te saliote ʼaena.”
30 Neʼe lele ia Filipo ia tafa ʼo te saliote, pea neʼe logo ki tana lau leʼo lahi ia te tohi ʼa te polofeta ko Esaia. Neʼe ina fehuʼi ki ai: “ ʼE ke mahino koa ki te meʼa ʼae ʼe ke lau?”
31 Neʼe ina tali age: “Ke au mahino feafeaʼi la mo kapau ʼe mole he tahi ʼe ina akoʼi au?” Koia, neʼe ina kole fakamalotoloto kia Filipo ke kake ake ʼo heka mo ia.
32 Neʼe ko te koga tohi ʼaeni ʼo te ʼu Tohi Taputapu neʼe ina lolotoga lau: “Neʼe ʼave ia ohage ko he ovi ke tamateʼi, pea ohage ko he akeno ʼe nofo fakalogologo ia muʼa ʼo te tagata faikosi, mole pe la fai hana palalau.+
33 Lolotoga tona fakalainoaʼi, neʼe mole fakamauʼi ʼi te faitotonu.+ Ko ai ʼae ka ina fakamatalatala tona taʼiake? Koteʼuhi ʼe fakagata anai tona maʼuli ʼi te kele.”+
34 Neʼe fehuʼi leva e te enuke kia Filipo: “Fakalelei age siʼou loto, ko ai ʼae ʼe palalau ki ai ia te polofeta? ʼE ko ia totonu koa peʼe ko he tahi age tagata?”
35 Neʼe palalau leva ia Filipo, pea ʼo kamata ʼaki te koga tohi ʼaia, neʼe ina tala ki ai te logo lelei ʼo ʼuhiga mo Sesu.
36 ʼI tanā olo ʼaia ʼi te ala, neʼe nā kaku ai ki he nofogā vai, pea neʼe ui e te enuke: “Koʼeni te vai, kotea ʼae ʼe ina taʼofi toku papitemaʼi?”
37 * ——
38 Koia, neʼe ina fakatotonu ai ke fakatuʼu te saliote. Neʼe hifo leva ia Filipo mo te enuke ki te vai, pea neʼe ina papitemaʼi ia ia.
39 ʼI tanā hake ake mai te vai, neʼe taki fakavilivili e te laumalie ʼo Sehova* ia Filipo ki he tahi koga meʼa, pea neʼe mole toe sio te enuke ki ai, kae neʼe hoko atu tona fagona ʼi te fiafia.
40 Kae neʼe alu ia Filipo ki Asoti, pea neʼe fealuʼaki ʼi te telituale ʼo tala te logo lelei ki te ʼu kolo fuli ʼo kaku ki tana tau atu ki Sesalea.+
Nota
^ Peʼe lagi “he kolo ʼo.”
^ Vakaʼi Te ʼu Kupu.
^ Peʼe “ketu.”
^ Vakaʼi Te ʼu Fakamahino 1.5.
^ Klka. “he ʼahu kona.”
^ Vakaʼi Te ʼu Fakamahino 1.5.
^ Vakaʼi Te ʼu Fakamahino 1.5.
^ Vakaʼi Te ʼu Fakamahino 1.5.
^ Peʼe “te tagata faifekau maʼuhiga ʼo te fale hau.”
^ Vakaʼi Te ʼu Fakamahino 1.3.
^ Vakaʼi Te ʼu Fakamahino 1.5.
