Te ʼu Gaue ʼa Te Kau Apositolo 25:1-27
25 Neʼe tau age leva ia Feseto+ ki te potu fenua ʼo Sutea pea neʼe kamata kovana ai. Hili ʼaho ʼe tolu, neʼe mavae mai Sesalea ʼo alu ki Selusalemi.
2 Pea neʼe fai age ki ai e te kau pelepitelo pule pea mo te ʼu tagata maʼuhiga ʼo te kau Sutea he ʼu tukugakovi ʼo ʼuhiga mo Paulo.+ Neʼe natou kole mamahi kia Feseto
3 ke agaʼofa ʼo fakatotonu ke ʼaumai ia Paulo ki Selusalemi. Kae neʼe natou fakatuʼutuʼu ke natou ʼohofi ia Paulo ʼi te ala pea mo matehi ia ia.+
4 Kae neʼe ui e Feseto ʼe tonu ke tuku ia Paulo ʼi Sesalea he ʼe ʼamanaki liliu ki ai.
5 Neʼe ina ui: “Ke hifo mo au ʼakotou hahaʼi takitaki pea ke natou tukugakoviʼi ia ia, mo kapau foki neʼe ina fai he meʼa ʼe kovi.”+
6 Neʼe mole nofo pe la ʼi ai ʼaho ʼe valu peʼe hogofulu, pea hifo leva ki Sesalea. ʼI te ʼaho ake, neʼe heka ʼi te fakamauʼaga pea neʼe ina fakatotonu ke ʼaumai ia Paulo.
7 ʼI tana tau mai, ko te kau Sutea ʼae neʼe hihifo mai Selusalemi neʼe natou ʼa takatakai ia ia ʼo natou fai he ʼu tukugakovi mamafa ʼo ʼuhiga mo ia, kae neʼe mole feala ke natou fakamoʼoni ki ai.+
8 Neʼe tali leva e Paulo: “Neʼe mole au agahala ki te Lao ʼa te kau Sutea peʼe ki te fale lotu peʼe kia Sesale.”+
9 ʼI te loto ʼa Feseto ke ʼofainaʼi ia ia e te kau Sutea,+ neʼe ina ui kia Paulo: “ ʼE ke fia alu koa ki Selusalemi ke fakamauʼi ai koe ʼi ʼoku muʼa ʼo ʼuhiga mo te ʼu tukugakovi ʼaia?”
10 Kae neʼe tali e Paulo: “ ʼE au tuʼu nei ia muʼa ʼo te fakamauʼaga ʼo Sesale. ʼE tonu ke fakamauʼi au ʼi heni. Neʼe mole au fai he meʼa ʼe kovi ki te kau Sutea, pea ʼe ke iloʼi lelei pe.
11 Kapau ko au ko he tagata agakovi pea neʼe au fai he meʼa ʼe tuha ai ke matehi au,+ ʼe mole au fakafisi ki te mate. Kae kapau ʼe mole he fakamoʼoni ki te ʼu tukugakovi ʼae ʼe fai e te ʼu tagata ʼaeni ʼo ʼuhiga mo au, pea ʼe mole feala ke tuku au e he tahi kia natou, ʼuhi pe ko hana fia lelei kia natou. ʼE au tagi kia Sesale!”+
12 ʼI te ʼosi felogoi ʼa Feseto mo te fono ʼa te kau faitokoni, neʼe ina ui leva: “Neʼe ke tagi kia Sesale, pea ʼe ke alu anai kia Sesale.”
13 Hili ni ʼaho, neʼe tau age ki Sesalea ia te hau ko Akilipa pea mo Pelenise. Neʼe nā ʼomai kia Feseto ʼo fai he fakaʼapaʼapa.
14 ʼI tanā nonofo fualoa ʼi ai, neʼe fakaha age e Feseto ki te hau ia te aluʼaga ʼo Paulo, ʼo ina ui:
“ ʼE ʼi ai he tagata ʼi heni neʼe pilisoniʼi e Felise,
15 pea ʼi taku ʼi Selusalemi neʼe tukugakoviʼi ia ia e te kau pelepitelo pule mo te kau takitaki Sutea,+ ʼo natou kole ke tauteaʼi ia ia.
16 Kae neʼe au ui age kia natou, ʼe mole ko he faʼahiga fai ʼa te kau Loma te tuku age ʼo he tagata, ʼuhi pe ko he fia lelei ki he tahi. ʼE tonu muʼa ke felaveʼi te tagata ʼaia mo natou ʼae ʼe natou tukugakoviʼi ia ia, pea ke tuku age he faigamalie ke tali kia natou.+
17 Koia ʼi tanatou tau mai ki heni, neʼe mole au fakatuatuai, kae ʼi te ʼaho ake, neʼe au heka ʼi te fakamauʼaga pea mo au fakatotonu ke ʼaumai ia te tagata ʼaia.
18 Neʼe tutuʼu ake ia natou ʼae neʼe natou tukugakoviʼi ia ia, ʼo natou palalau. Kae neʼe mole natou talanoa ki he meʼa ʼe kovi neʼe au manatu neʼe ina fai.+
19 Neʼe natou fihi pe mo ia ʼo ʼuhiga mo tanatou atolasio ki te ʼatua,*+ pea ʼo ʼuhiga mo he tagata neʼe higoa ko Sesu, neʼe mate kae, ʼi te ui ʼa Paulo, kua maʼuli ia.+
20 ʼI taku mole kei iloʼi pe ʼe feafeaʼi te fakatokatoka ʼo te fihi ʼaia, neʼe au fakalavelave age pe ʼe fia alu ki Selusalemi ke fakamauʼi ai ia ia ʼo ʼuhiga mo te ʼu faʼahi ʼaia.+
21 Kae ʼi te kole mai ʼa Paulo ke tuku ia ia ʼi te fale pilisoni ʼo fakatalitali ki te tonu ʼa te Hau ʼo Loma,+ koia neʼe au fakatotonu ai ke leʼoleʼo ia ia ʼo kaku ki tona ʼave kia Sesale.”
22 Neʼe ui leva e Akilipa kia Feseto: “ ʼE au fia fagono mo au ki te tagata ʼaia.”+ Neʼe ina ui age: “ ʼE ke fagono anai ki ai apogipogi.”
23 Koia ʼi te ʼaho ake, neʼe ʼomai ia Akilipa pea mo Pelenise mo ni teu fakaʼaliʼaliki ʼo nā hu ki te fakamauʼaga, fakatahi mo te ʼu kamutoa pea mo te hahaʼi maʼuhiga ʼo te kolo. Pea neʼe fakatotonu leva e Feseto ke ʼaumai ia Paulo.
24 Pea neʼe ui e Feseto: “Hau ko Akilipa pea mo koutou fuli ʼae ʼe fakatahi ʼi heni mo matou, kotou sisio ki te tagata ʼaeni. Neʼe fai mai e te kau Sutea katoa ʼae ʼi Selusalemi pea mo ʼae ʼi heni te kole ʼo ʼuhiga mo te tagata ʼaeni, ʼo natou kalaga ke matehi.+
25 Kae neʼe au mahino leva neʼe mole ina fai he meʼa ʼe tuha mo te mate.+ Koia ʼi te temi ʼae neʼe tagi ai te tagata ʼaeni ki te Hau ʼo Loma, neʼe au fai ai te tonu ʼae ke ʼave ia ia ki ai.
26 Kae ʼe heʼeki au iloʼi papau he meʼa ʼo ʼuhiga mo ia ke au tohi ki toku Hau.* Koia neʼe au ʼaumai ia ia kia muʼa ʼo koutou fuli, kae tafito ki ʼou muʼa, Hau ko Akilipa, koteʼuhi ke au maʼu he meʼa ke au tohi moka ʼosi anai tona fakafehuʼi.
27 Koteʼuhi kia au, ʼe mole fakapotopoto te ʼave ʼo he tagata pilisoni kae mole fakaha foki mo te ʼu tukugakovi ʼae ʼe fai kia ia.”
