Esekiele 32:1-32
32 Neʼe toe palalau mai ia Sehova ʼi te 12 taʼu, ʼi te ʼuluaki ʼaho ʼo te mahina 12, ʼo ina ui:
2 “Foha ʼo te tagata, hiva he hiva mate ʼo ʼuhiga mo Falaone te hau ʼo Esipito, ʼo ke ui age:‘Neʼe ke hage ko he laione mui mo malohi ʼo te ʼu puleʼaga,Kae neʼe ke fakalogologo.
Neʼe ke hage ko he manu lahi ʼo te tai,+ neʼe ke tapalutu ʼi ʼou vai tafe,Neʼe ke fakaʼepu te vai ʼaki ʼou vaʼe pea neʼe ke ʼulihi te ʼu vai tafe.’
3 Koʼeni te folafola ʼa te Tuʼi ʼAliki ko Sehova:
‘ ʼE au ʼaʼau anai kia koe toku kupega ʼaki te kaugamalie ʼo te ʼu puleʼaga ʼae neʼe fakatahitahi.Pea ko natou ʼae ka natou toho ake koe ’i toku kupega.
4 ʼE au liʼaki anai koe ’i te kele,ʼEi, ki te vao.
ʼE au fakahifo anai kia koe te ʼu manulele fuli ʼo te lagi,Pea ʼe au foaki anai koe ko he meʼa kai ki te ʼu manu fekai ʼo te kele katoa ke natou makokona ai.+
5 ʼE au siʼaki anai tou kakano ki te ʼu moʼuga,ʼE au fakafonu anai te ʼu potu fenua laulelei ʼaki te ʼu toega ʼo tou sino.+
6 ʼE au palapalaʼi anai te fenua ʼo kaku ki te ʼu tumutumu ʼo te ʼu moʼuga ʼaki te toto ʼae ka hali anai mai ia koe,Pea ʼe fonu anai te ʼu liuʼa ʼi tou toto.’
7 ‘ ʼE au ʼaofi anai te lagi moka ke mate, ʼe au fakapoʼuliʼi anai te ʼu fetuʼu.
ʼE au ʼaofi anai te laʼa ʼaki ni ʼao,Pea ʼe mole toe huhulu anai te mahina.+
8 ʼE au fakapoʼuliʼi anai te ʼu fetuʼu gigila fuli ʼo te lagi ʼuhi ko koe,Pea ʼe au toe fakapoʼuliʼi anai tou fenua,’ ko te ui ʼaia ʼa te Tuʼi ʼAliki ko Sehova.
9 ‘ ʼE au fakamamahiʼi anai te loto ʼo he hahaʼi kaugamalie moka au ʼave ʼau kau pilisoni ki he tahi ʼu puleʼaga,Ki ni fenua neʼe mole ke iloʼi.+
10 ʼE punamaʼuli anai te hahaʼi tokolahi,Pea ʼe matataku anai ʼonatou hau ʼuhi ko koe, moka au faoʼi taku heleta ʼi ʼonatou muʼa.
ʼE natou tekelili anai, koteʼuhi ʼe natou matataku naʼa natou mamateʼI te ʼaho ʼae ka ke to ai.’
11 Koʼeni te folafola ʼa te Tuʼi ʼAliki ko Sehova:
‘ ʼE taʼi anai koe e te heleta ʼo te hau ʼo Papiloni.+
12 ʼE au uga anai ni tagata tau toʼa ke natou matehi ʼau solia ʼaki te heleta,Ko ni tagata agamalohi fuli, ʼae ʼe ʼomai mai te ʼu puleʼaga.+
ʼE natou fakalainoaʼi anai te fiameʼalahi ʼo Esipito, pea ʼe tamateʼi anai ʼana kau solia fuli.+
13 ʼE au matehi anai tana faga manu fuli ʼae ʼe ovi ʼi ni vai lalahi.+ʼE mole toe fakaʼepu anai ʼi he temi e te ʼu vaʼe ʼo te tagata peʼe ʼo te ʼu manu.’+
14 ‘ ʼI te temi ʼaia, ʼe au fakatasilo anai ʼonatou vai,ʼE au fakatafe anai ʼonatou vai tafe ohage ko he lolo,’ ko te ui ʼaia ʼa te Tuʼi ʼAliki ko Sehova.
15 ‘ ʼE natou iloʼi moʼoni anai ko au ia Sehova,Moka au pulihi anai ia meʼa fuli ʼae ʼe maʼu ʼi Esipito, mo fakaliliu te fenua ko he toafa,+Moka au tamateʼi ʼana hahaʼi fuli.+
16 Ko te hiva mate ʼaeni, pea ʼe lotomamahi moʼoni anai te hahaʼi ʼi tanatou hivaʼi.ʼE hivaʼi anai e te ʼu taʼahine ʼo te ʼu puleʼaga.
ʼE natou hivaʼi anai ʼo manatuʼi ia Esipito pea mo ʼana kau solia fuli,’ ko te ui ʼaia ʼa te Tuʼi ʼAliki ko Sehova.”
17 Neʼe toe palalau mai ia Sehova ʼi te 12 taʼu, ʼi te ʼaho 15 ʼo te mahina,* ʼo ina ui:
18 “Foha ʼo te tagata, lauga ʼo ʼuhiga mo te kau solia ʼo Esipito mo fakahifo ia natou ki te fenua ʼae ʼi te lalo kele, ia ia pea mo te ʼu taʼahine ʼo te ʼu puleʼaga malolohi mo natou ʼae kua hihifo ki te luo.*
19 “ ‘ ʼE ke ui koa koe ʼe ke matalelei age ia natou ʼae? Hifo pea ke takoto mo natou ʼae neʼe mole silikosisioʼi!’
20 “ ‘ ʼE matehi anai natou ʼi te hahaʼi ʼae kua matehi ʼaki te heleta.+ Neʼe mate ia ʼi te heleta. ʼAve mamaʼo ia ia, mo ʼana kau solia fuli.
21 “ ‘Mai te Faitoka,* ʼe palalau anai te kau tau malolohi kia Falaone pea mo natou ʼae neʼe lagolago ki ai. ʼE natou hihifo moʼoni anai mo takokoto ohage pe ko natou ʼae neʼe mole silikosisioʼi, ʼae neʼe matehi ʼaki te heleta.
22 ʼE toe takokoto ai mo te kau Asilia pea mo ʼana kau solia fuli. ʼE ʼa takai ia ia* e ʼonatou fale maka, neʼe matehi ia natou fuli ʼaki te heleta.+
23 ʼE maʼu ʼona fale maka ʼi te luo,* pea ʼe ʼa takai tona fale maka e ʼana kau solia. Neʼe matehi ia natou fuli ʼaki te heleta koteʼuhi neʼe natou fakamatakuʼi te fenua ʼo te kau maʼuli.
24 “ ‘ ʼE takoto ai mo Elame+ pea ʼe ʼa takai tona fale maka e ʼana kau tau fuli, neʼe matehi ia natou fuli ʼaki te heleta. Kua hihifo ia natou ʼae neʼe mole silikosisioʼi ki te fenua ʼae ʼi te lalo kele, ia natou ʼae neʼe natou fakamatakuʼi te fenua ʼo te kau maʼuli. Koia ʼe fakalainoaʼi anai natou mo natou ʼae kua hihifo ki te luo.*
25 Neʼe fai hona moeʼaga ia natou ʼae neʼe matehi pea neʼe ʼa takai ʼona fale maka e ʼana kau solia fuli. Ko te kau heʼe silikosisio fuli neʼe matehi ʼaki te heleta koteʼuhi neʼe natou fakamatakuʼi te fenua ʼo te kau maʼuli. Pea ʼe fakalainoaʼi anai ia natou mo natou ʼae kua hihifo ki te luo.* Neʼe tuku ia ia mo te kau mate.
26 “ ‘ ʼE toe takokoto ai mo Meseke mo Tupale,+ ʼo toe feia pe mo ʼanā kau solia fuli. ʼE ʼa takai ia ia* e ʼonatou fale maka. Ko te kau heʼe silikosisio fuli neʼe matehi ʼaki te heleta koteʼuhi neʼe natou fakamatakuʼi te fenua ʼo te kau maʼuli.
27 ʼE mole takokoto anai koa te kau tau malolohi ʼaia neʼe mole silikosisioʼi pea neʼe mamate, ʼae kua hihifo ki te Faitoka* mo ʼanatou mahafu tau? ʼE tuku anai ʼanatou heleta ki ʼonatou lalo ʼulu* pea ʼe hili anai ʼanatou agahala ki ʼonatou hui, koteʼuhi neʼe fakamatakuʼi e te kau tau malolohi ʼaia te fenua ʼo te kau maʼuli.
28 Kae ʼe tataʼo anai koe mo natou ʼae neʼe mole silikosisio pea ʼe ke takoto anai mo natou ʼae neʼe matehi ʼaki te heleta.
29 “ ‘Neʼe toe takokoto ai mo Etome+ mo ʼana hau pea mo ʼana kau pule fuli. Neʼe natou takokoto ʼi te hahaʼi ʼae neʼe matehi ʼaki te heleta logope la tonatou malolohi. ʼE natou toe takokoto anai mo natou ʼae neʼe mole silikosisioʼi+ pea mo natou ʼae kua hihifo ki te luo.*
30 “ ‘ ʼE toe takokoto ai mo te ʼu tama ʼaliki* fuli ʼo te potu noleto, ʼo toe feia pe mo te kau Sitoni fuli.+ Neʼe natou hihifo lainoa kia natou ʼae neʼe matehi logope la tonatou malohi fakamataku. ʼE takokoto anai te kau heʼe silikosisio ʼaia, mo natou ʼae neʼe matehi ʼaki te heleta, pea ʼe fakalainoaʼi anai natou mo natou ʼae kua hihifo ki te luo.*
31 “ ‘ ʼE sio anai ia Falaone kia natou fuli, pea ʼe fimalie anai ia ia ʼo ʼuhiga mo meʼa fuli ʼae neʼe hoko ki ʼana kau solia.+ ʼE matehi anai ia Falaone mo tana kautau fuli ʼaki te heleta,’ ko te ui ʼaia ʼa te Tuʼi ʼAliki ko Sehova.
32 “ ‘ ʼE tanu anai ia Falaone mo ʼana kau solia fuli, mo te hahaʼi ʼae neʼe mole silikosisioʼi, ia natou ʼae neʼe matehi ʼaki te heleta koteʼuhi neʼe ina fakamatakuʼi te fenua ʼo te kau maʼuli,’ ko te ui ʼaia ʼa te Tuʼi ʼAliki ko Sehova.”
Nota
^ ʼE lagi fakaʼuhiga ki te mahina 12. Vakaʼi te vaega 1.
^ Peʼe “fale maka.”
^ Vakaʼi Te ʼu Kupu.
^ ʼE lagi fakaʼuhiga ki te hau ʼo Asilia.
^ Peʼe “faitoka.”
^ Peʼe “fale maka.”
^ Peʼe “fale maka.”
^ ʼE lagi fakaʼuhiga ki te hau ʼo Meseke mo Tupale.
^ Vakaʼi Te ʼu Kupu.
^ ʼE lagi fakaʼuhiga neʼe tanu natou mo tanatou heleta mo te ʼu fakaʼapaʼapa fakasolia.
^ Peʼe “fale maka.”
^ Peʼe “pule.”
^ Peʼe “fale maka.”
