Tuʼi Fakamau 7:1-25
7 Neʼe ʼala uhuuhu leva ia Selupaale, ʼae ko Seteone,+ ʼo feia mo te ʼu tagata fuli ʼae neʼe fakatahi mo ia, pea neʼe ina fakatuʼu tona nofoʼaga ʼo ovi ki te Matapuna Vai ʼo Halote. Neʼe tuʼu te nofoʼaga ʼo te kau Matiane ʼi te potu noleto, ʼo ovi ki te moʼuga veliveli ʼo Mole, ʼi te potu fenua laulelei.
2 Pea neʼe ui e Sehova kia Seteone: “ ʼE kaugamalie ʼaupito te kau solia ʼae ʼe fakatahi mo koe, ʼo mole feala ai ke au tuku te kau Matiane ki ʼonatou nima.+ ʼE feala anai ke fiameʼameʼa ia Iselaele pea mo ui: ‘Kua matou malo ʼuhi pe ko tomatou malohi.’+
3 Koia fakalelei siʼou loto, ke ke ui ki ʼau tagata: ‘Ko ia ʼae ʼe mataku mo tekelili ke toe liliu kio ia.’ ”+ Neʼe ʼahiʼahiʼi ai ia natou e Seteone ʼi tana fai age te ʼu palalau ʼaia. Pea ko tagata ʼe 22 000 ʼae neʼe toe liliu kio natou, kae nonofo te toko 10 000.
4 Kae neʼe ui e Sehova kia Seteone: “ ʼE kei kaugamalie ʼaupito ʼau tagata. Ke ke alu mo natou ki te kauvai. ʼE au ʼahiʼahiʼi anai ia natou maʼa koe. Ka au ui atu: ‘ ʼE alu anai ia ia ʼaeni mo koe,’ pea ʼe alu anai mo koe. Kae ka au ui atu: ‘ ʼE mole alu anai ia ia ʼaeni mo koe,’ pea ʼe mole alu anai.”
5 Pea neʼe ʼave e Seteone ʼana solia ki te kauvai.
Pea neʼe ui e Sehova kia Seteone: “ ʼE ke vaheʼi kehe anai ia natou ʼae ʼe natou ʼemo te vai ohage ko tona fai e te ʼu kuli mai ia natou ʼae ʼe tuʼutuli ʼo iinu.”
6 Neʼe ko tagata ʼe toko 300 ʼae neʼe natou ohu te vai ʼaki ʼonatou nima ʼo inu. Kae neʼe tuʼutuli te ʼu tagata fuli ʼae ʼo iinu.
7 Pea neʼe ui e Sehova kia Seteone: “ ʼE au haofaki anai koutou ʼaki te ʼu tagata ʼe toko 300 ʼae neʼe natou ohu te vai ʼaki ʼonatou nima ʼo inu. ʼEi, ʼe au tuku anai te kau Matiane ki ʼou nima.+ Koia ke toe liliu te ʼu tagata fuli ʼae kio natou.”
8 Pea neʼe toʼo e te ʼu tagata ʼe toko 300 ia te meʼa kai mo te ʼu fakatagi pupuhi ʼa te tahi kau solia. Neʼe tuku pe e Seteone te ʼu tagata ʼe toko 300 ke nonofo mo ia, kae neʼe ina fekauʼi te kau solia Iselaele fuli ʼae ke natou toe liliu kio natou. Neʼe tuʼu te nofoʼaga ʼo te kau Matiane ʼi lalo, ʼi te potu fenua laulelei.+
9 ʼI te po ʼaia, neʼe ui e Sehova kia Seteone: “Tuʼu ake pea ke ʼohofi te nofoʼaga ʼo ʼou fili, he ʼe kua au tuku atu ki ʼou nima.+
10 Kae kapau ʼe ke mataku ʼi te ʼohofi ʼo natou, pea ke hifo ki te nofoʼaga mo tau tagata faifekau ko Pula.
11 Ke ke fakalogo ki te meʼa ʼae ʼe natou lau ʼi te nofoʼaga, pea ʼe ke lototoʼa anai* ʼi te ʼohofi ʼo te nofoʼaga.” Neʼe hifo ai ia Seteone mo Pula, tana tagata faifekau ʼo kaku ki te ʼu tafaʼaki ʼo te nofoʼaga.
12 Neʼe ʼaofi e te kau Matiane, mo te kau Amaleke pea mo te Hahaʼi fuli ʼo Te Potu Esite+ ia te potu fenua laulelei ohage pe ko he pupuga heʼe. Pea neʼe lahi ʼaupito ʼanatou kamelo+ ohage pe ko te ʼu fisiʼi ʼone ʼo te tai.
13 Neʼe tau atu ia Seteone kae neʼe lolotoga fakamatala e he tagata solia tana moemisi ki hona kaumeʼa. Neʼe ina ui: “Koʼeni taku moemisi: Neʼe au sio ʼe teka mai he foʼi pane olose takafuafua ki te nofoʼaga ʼo te kau Matiane. Neʼe kaku mai tana teka ʼo tuta ki he fale la ʼo holo ai.+ ʼEi, neʼe veuki te fale la mo holo ai ʼuhi ko te foʼi pane.”
14 Pea neʼe tali age e tona kaumeʼa: “ ʼE mahino ia, ʼe ko te heleta ʼa Seteone,+ te foha ʼo Soasi, te tagata mai Iselaele. Kua tuku e te ʼAtua ia te kau Matiane mo te nofoʼaga katoa ki ʼona nima.”+
15 ʼI te logo ʼaia ʼa Seteone ki te fakamatala ʼo te moemisi, ʼo feia mo tona fakamahino,+ neʼe tulolo ai ia muʼa ʼo te ʼAtua. Pea neʼe toe liliu ki te nofoʼaga ʼo Iselaele, ʼo ui: “Kotou tutuʼu ake he ʼe kua tuku atu e Sehova ia te nofoʼaga ʼo te kau Matiane ki ʼokotou nima!”
16 Neʼe ina vae tolu ai te ʼu tagata ʼe toko 300 pea neʼe ina foaki kia natou takitahi he fakatagi pupuhi,+ mo he ipu kele lahi kua ʼago, neʼe tuku ai ʼi loto he taume.
17 Hili ʼaia, neʼe ina ui age kia natou: “ ʼE kotou sisio mai anai kia au pea ʼe kotou faʼifaʼitakiʼi anai te meʼa ʼae ka au fai. Ka au tuʼu anai ʼi te ʼu tafaʼaki ʼo te nofoʼaga, ʼe tonu anai ke kotou fai ohage pe ko au.
18 Ka au pupuhi anai te fakatagi pupuhi, ʼo feia mo te ʼu tagata fuli ʼae ʼe fakatahi mo au, ʼe kotou toe pupuhi anai mo ʼakotou fakatagi pupuhi, ʼi te takafoli ʼo te nofoʼaga pea ʼe kotou kalaga anai: ‘Maʼa Sehova pea mo Seteone!’ ”
19 Neʼe kaku leva ia Seteone pea mo te ʼu tagata solia ʼe toko 100 ʼae neʼe fakatahi mo ia, ki te ʼu tafaʼaki ʼo te nofoʼaga. Neʼe heʼeki maʼupo, pea neʼe hoki fetogi age pe te kau tagata leʼo. Neʼe natou pupuhi te ʼu fakatagi pupuhi+ pea mo foafoaʼi te ʼu ipu kele lalahi ʼae neʼe natou toʼo.+
20 Koia neʼe pupuhi ai e te ʼu tagata fuli ʼae neʼe vae tolu ia te ʼu fakatagi pupuhi pea mo natou foafoaʼi te ʼu ipu kele lalahi. Neʼe natou toʼo te ʼu taume ʼi ʼonatou nima hema pea mo te ʼu fakatagi pupuhi ʼi ʼonatou nima mataʼu ʼo natou pupuhi ai. Pea neʼe natou kalaga: “Te heleta ʼa Sehova pea mo Seteone!”
21 ʼI te temi katoa ʼaia, neʼe natou tahi tutuʼu ʼi te takafoli ʼo te nofoʼaga kae neʼe feholaki mo kalaga ia te kau solia Matiane fuli.+
22 Neʼe hoko atu pe te pupuhi e te ʼu tagata ʼae ʼe toko 300 ʼanatou fakatagi pupuhi. Pea neʼe uga e Sehova ia natou fuli ʼae ʼi te nofoʼaga ke natou fematematehiʼaki ʼaki te heleta.+ Pea neʼe feholaki te kau solia Matiane fuli ʼo kaku ki Pete-sita, mo Selela, pea mo te tafaʼaki ʼo Apele-meola+ ʼae ʼe ovi ki Tapati.
23 Pea neʼe pauʼi ia te kau tagata Iselaele ʼo te ʼu telepi ʼo Nefetali, mo Asele pea mo Manase katoa+ ke natou tuli ia te kau Matiane.
24 Neʼe fekauʼi e Seteone he ʼu tagata ʼave logo ke olo ʼo ui kia natou ʼae neʼe ʼi te potu moʼugaʼia katoa ʼo Efalaimi: “Kotou hifo ʼo tauʼi te kau Matiane pea kotou taʼofi tanatou fakalaka ʼi te ʼu vai tafe ʼo Pete-pala pea mo te Solotane.” Neʼe fakatahitahi ai te ʼu tagata fuli ʼo Efalaimi pea neʼe natou lava taʼofi te fakalaka ʼa te kau Matiane ʼi te ʼu vai tafe ʼo Pete-pala pea mo te Solotane.
25 Neʼe natou toe puke foki ia Olepi pea mo Sepi, te ʼu pule ʼe lua ʼo Matiane. Neʼe natou matehi ia Olepi ʼi te fuʼu maka ʼo Olepi+ pea neʼe natou matehi ia Sepi ʼi te lomiʼaga vite ʼo Sepi. Neʼe hoko atu pe tanatou tuli ia te kau Matiane,+ pea neʼe natou ʼave leva te ʼu foʼi ʼulu ʼo Olepi mo Sepi kia Seteone, ʼae neʼe nofo ovi ki te Solotane.
Nota
^ Hep. “ ʼe malohi anai ʼou nima.”
