Tuʼi Fakamau 2:1-23
2 Pea neʼe mavae te ʼaselo ʼa Sehova+ mai Kilekale+ ʼo alu ki Pokimi, pea neʼe ina ui: “Neʼe au fakamavae koutou mai Esipito ke au fakahu koutou ki te fenua ʼae neʼe au fakapapau ki ʼakotou kui, ʼo au fai he fuakava mo natou.+ Tahi ʼae meʼa, neʼe au ui: ‘ ʼE mole au maumauʼi anai ʼi he temi te fuakava ʼae neʼe au fai mo koutou.+
2 Pea ko koutou, ʼe mole tonu ke kotou fai he fuakava mo te hahaʼi ʼo te fenua ʼaia,+ kae ʼe kotou maumauʼi anai ʼonatou ʼaletale.’+ Kae neʼe mole kotou fakalogo mai.+ He koe neʼe kotou fai te meʼa ʼaia?
3 Ko te tupuʼaga la ʼaia ʼo taku toe ui atu: ‘ ʼE mole au kapu anai te hahaʼi ʼo te fenua ʼi ʼokotou muʼa.+ ʼE natou liliu anai ko he hele kia koutou,+ pea ʼe fakahalaʼi anai koutou ke kotou tauhi ki ʼonatou ʼatua.’ ”+
4 ʼI te ʼosi fai e te ʼaselo ʼa Sehova te ʼu palalau ʼaia ki te kau Iselaele fuli, neʼe fetagihi leʼo lahi leva te hahaʼi.
5 Koia, neʼe natou fakahigoaʼi ai te koga meʼa ʼaia ko Pokimi,* pea neʼe natou momoli ʼi ai ni sakilifisio kia Sehova.
6 ʼI te tuku e Sosue ke mavae ia te hahaʼi, neʼe tahi liliu ai te Iselaele ki te kele ʼae neʼe foaki age ko hona tofiʼa, ʼo ina puleʼi.+
7 Neʼe hoko atu pe te tauhi ʼa te hahaʼi kia Sehova ʼi te temi maʼuli ʼo Sosue pea mo te kau tagata takitaki, ʼae neʼe kei maʼuʼuli ʼi te ʼosi mate ʼa Sosue. Neʼe sisio te kau tagata takitaki ʼaia ki te ʼu gaue fakaofoofo fuli ʼae neʼe fai e Sehova maʼa Iselaele.+
8 Pea neʼe mate leva ia Sosue, te foha ʼo Nune, te tagata faifekau ʼa Sehova, ʼi tona taʼu 110.+
9 Pea neʼe ʼavaifo ia ia ʼi te fenua ʼae neʼe ko tona tofiʼa, ʼi Timinati-elesi,+ ʼi te potu moʼugaʼia ʼo Efalaimi, ʼi te potu noleto ʼo te Moʼuga ʼo Kaasi.+
10 Neʼe mamate leva te taʼiake katoa ʼaia. Pea neʼe mole iloʼi e te taʼiake ʼae neʼe hoa mai ia Sehova, ʼo feia mo te ʼu gaue ʼae neʼe ina fai maʼa Iselaele.
11 Neʼe fai leva e te kau Iselaele te meʼa ʼae ʼe kovi kia mata ʼo Sehova pea neʼe natou tauhi* ki te ʼu Paale.+
12 Neʼe natou liʼaki ai ia Sehova, te ʼAtua ʼo ʼanatou kui, ʼae neʼe ina fakamavae natou mai Esipito.+ Neʼe natou fakalogo ki he tahi age ʼu ʼatua, ia te ʼu ʼatua ʼo te hahaʼi ʼae neʼe nonofo ʼi ʼonatou tafaʼaki.+ Neʼe natou tulolo ʼi ʼonatou muʼa pea neʼe natou fakatupu ai te hauhau ʼo Sehova.+
13 Neʼe natou liʼaki ia Sehova ʼo natou tauhi kia Paale pea mo te ʼu fakatata ʼo Asetolete.+
14 Pea neʼe kovi ʼosi leva te ita ʼo Sehova ki Iselaele. Neʼe ina tuku ai natou ki te ʼu nima ʼo ni hahaʼi kaihaʼa koloa.+ Neʼe ina tuku* natou ki te ʼu nima ʼo ʼonatou fili ʼae neʼe nonofo ʼi ʼonatou tafaʼaki,+ pea neʼe mole kei lava tauʼi e te kau Iselaele ʼonatou fili.+
15 Neʼe fakafeagai ia Sehova kia natou pea neʼe ina fakahoko he malaʼia kia natou,+ ʼi he potu pe neʼe natou olo ki ai, ohage pe ko tona ui age e Sehova pea mo tona fakapapauʼi age e Sehova kia natou.+ Pea neʼe natou tau ai mo ni mamahi lahi.+
16 Pea neʼe filifili leva e Sehova he ʼu tuʼi fakamau ke natou haofaki ia natou mai te ʼu nima ʼo ʼonatou fili.+
17 Kae neʼe mole natou fia fakalogo ki te ʼu tuʼi fakamau, pea neʼe natou tauhi ki* he tahi age ʼu ʼatua, pea mo tulolo ʼi ʼonatou muʼa. Neʼe vave pe tanatou maliu kehe mai te faʼifaʼitaki lelei ʼo ʼanatou kui. Neʼe mole natou hage ko ʼanatou kui, ʼae neʼe fakalogo ki te ʼu fakatotonu ʼa Sehova.+
18 Ka filifili pe e Sehova he tuʼi fakamau ke ina takitaki natou,+ neʼe nofo ia Sehova mo te tuʼi fakamau ʼaia. Pea neʼe ina haofaki natou mai te ʼu nima ʼo ʼonatou fili, ʼi te temi maʼuli ʼo te tuʼi fakamau ʼaia. Koteʼuhi neʼe lotomanavaʼofa ia Sehova+ ʼi tana logo ki tanatou lauga ʼuhi ko natou ʼae neʼe natou fakamamahiʼi+ pea mo gaohi koviʼi natou.
19 Kae ʼi te ʼosi mate ʼa te tuʼi fakamau, neʼe natou toe fai pe te meʼa ʼae ʼe kovi, ʼo kovi ʼosi age ia ʼi ʼanatou kui. Neʼe natou fakalogo ki he tahi age ʼu ʼatua, mo tauhi kia natou pea mo tulolo ʼi ʼonatou muʼa.+ Pea neʼe mole natou liʼaki ʼanatou aga ʼaia, ʼo feia mo tanatou agatuʼu.
20 Pea neʼe to leva te hauhau ʼo Sehova ki Iselaele+ pea neʼe ina ui: “Neʼe maumauʼi e te puleʼaga ʼaeni te fuakava+ ʼae neʼe au fakatotonu ki ʼanatou kui ke natou taupau, pea neʼe toe talagataʼa foki te puleʼaga ʼaeni kia te au.+
21 Koia, ʼe mole au kapu anai ʼi te fenua ia te ʼu puleʼaga ʼae neʼe heʼeki maʼu e Sosue ʼi muʼa ʼo tona mate, ʼei, ʼe mole au kapu anai he puleʼaga ʼe tahi.+
22 ʼE au fai anai te faʼahi ʼaia ke au ʼahiʼahiʼi ai te kau Iselaele pe ʼe natou haga haʼele anai ohage ko ʼanatou kui ʼi te ala ʼae neʼe au fakaha age, ia au ʼaeni ko Sehova.”+
23 Koia, neʼe tuku ai e Sehova ke nonofo te ʼu puleʼaga ʼaia ʼi ai. Neʼe mole ina kapu fakavilivili ia natou pea neʼe mole ina tuku natou ki te ʼu nima ʼo Sosue.
Nota
^ Ko tona fakaʼuhiga “Hahaʼi ʼe Faifetagihi.”
^ Peʼe “atolasio.”
^ Hep. “fakatau.”
^ Hep. “fai he ʼu aga heʼe ʼaoga mo.”
