Taʼaga Lea 29:1-27
29 Ko he tagata ʼe mole fia fakalogo logo la tona fakatonutonuʼi tuʼa lahi,+ʼE tauteaʼi fakafokifa anai ʼo mole feala ke fakamalolo.+
2 Ka kaugamalie te kau faitotonu pea ʼe fakafiafia te hahaʼi,Kae ka pule te tagata agakovi pea ʼe mamahi te hahaʼi.+
3 Ko te tagata ʼae ʼe manako ki te poto ʼe ina fakafiafiaʼi tana tamai,+Kae ko ia ʼae ʼe fakatahi mo ni fafine paomutu ʼe ina maumauʼi ʼona koloa.+
4 Ka faitotonu he hau ʼe tokalelei te fenua,+Kae ʼe haʼele kovi anai moka kumi e he tagata ni meʼa ʼofa ʼe foaki fakakaka.
5 Ko he tagata ʼe ina laupisiʼi tona tatauKo he hele ia ki ʼona vaʼe.+
6 Ka talagataʼa he tagata agakovi ko he hele kia ia,+Kae ʼe kalaga fakafiafia ia ia ʼae ʼe faitotonu.+
7 ʼE tokaga te tagata faitotonu ke fakamauʼi te kau masiva ʼi te faitotonu,+Kae ʼe meʼa noaʼi ia e te tagata agakovi.+
8 ʼE maveuveu he kolo ʼuhi ko te kau fiameʼameʼa,+Kae ʼe malū ifo te ita ʼuhi ko te kau poto.+
9 Ka fihi he tagata poto mo he tagata vale,ʼE ʼi ai ni leʼo lalahi mo ni vava, pea ʼe alu noa te ʼu palalau ʼa te tagata poto.+
10 ʼE fehiʼa te kau faifakapo kia ia ʼae ʼe mole ina fai he meʼa ʼe kovi,+Pea ʼe natou fia matehi te tagata faitotonu.*
11 ʼE mole kei tataʼofi e he tagata vale te ʼu meʼa ʼae ʼe ina logoʼi,+Kae ʼe nofo fakalogologo pe te tagata poto mo lotololomi.+
12 Ka tokagaʼi e he pule ni loi,ʼE agakovi fuli ʼana kaugana.+
13 ʼE tatau te tagata masiva mo te tagata agakovi,
He ʼe fakamu e Sehova te malama kia naua tokolua.*
14 Ka fakamauʼi e he hau te kau masiva ʼi te faitotonu,+ʼE tuʼu malohi tona hekaʼaga fakahau ʼo talu ai.+
15 ʼE maʼu te poto ʼi te kauʼi ʼakau* mo te fakatonutonu,+Kae ka tuku he fanau ke faʼifaʼitaliha ʼe ufiufi ai tana faʼe.
16 Ka kaugamalie te kau agakovi ʼe lahi te talagataʼa,Kae ʼe sisio anai te kau faitotonu ki tanatou fetoki.+
17 Fakatonutonuʼi tou foha he ʼe ke fimalie ai anai,Pea ʼe lahi anai tou manuʼia.+
18 Ka mole takitaki te hahaʼi e te ʼAtua, ʼe natou aga fakavalevale,+Kae ʼe fiafia pe ia natou ʼae ʼe fakaʼapaʼapa ki te lao.+
19 ʼE mole tuku e he kaugana ke fakatonutonuʼi ia ia ʼaki ni palalau,Tatau aipe pe ʼe mahino, ʼe mole pe fakalogo ia.+
20 Neʼe ke sio koa ki he tagata ʼe hoko palalau?+
ʼE lelei age te ka haʼu ʼo he tahi ʼe vale ʼi te tagata ʼaia.+
21 Ka pele fakavale he kaugana talu tana kei tupulaga,ʼE maʼuli galo anai ki ʼamuli.
22 ʼE laga kē he tagata itaita,+Pea ʼe lahi te ʼu agahala ʼa te tagata hoko ita.+
23 ʼE fakamalaloʼi anai he tagata ʼuhi ko tona fialahi,+Kae ʼe fakamaʼuhigaʼi anai ia ia ʼae ʼe agavaivai.+
24 Ko ia ʼae ʼe fakatahi mo he tagata kaihaʼa ʼe fehiʼa pe kia ia totonu.
ʼE logo ki te kumi ʼo he fakamoʼoni, kae ʼe mole ina fakaha he meʼa.+
25 Ko te mataku ki te tagata ko he hele ia,+Kae ʼe puipui anai ia ia ʼae ʼe falala kia Sehova.+
26 ʼE kole e te tokolahi ke felogoi mo he pule,*Kae ʼe maʼu pe e he tagata te faitotonu mai ia Sehova.+
27 ʼE fehiʼa ia ia ʼae ʼe faitotonu kia ia ʼae ʼe mole faitotonu,+Pea ʼe fehiʼa te tagata agakovi kia ia ʼae ʼe agatonu.+
Nota
^ Peʼe lagi “Kae ʼe faigaʼi e te tagata faitotonu ke ina puipui tona maʼuli.”
^ Ko tona fakaʼuhiga, ʼe ina foaki kia naua te maʼuli.
^ Peʼe “akonakiʼi,” peʼe “fakatuʼā.”
^ Peʼe lagi “ke ʼofa age he pule.”
