Lua Samuele 3:1-39
3 Neʼe fualoa te fetauʼaki ʼa te hologa ʼo Saulo mo te hologa ʼo Tavite. Pea neʼe ʼaʼasili malohi age ia Tavite+ kae neʼe fakaalu ke vaivai te hologa ʼo Saulo.+
2 Lolotoga te temi ʼaia, neʼe tutupu he ʼu foha ʼo Tavite ʼi Hepelone.+ Ko tona ʼuluaki foha neʼe ko Amenone+ ʼae mo Asinoame,+ te fafine mai Siseleele.
3 Ko te lua neʼe ko Kileape ʼae mo Apikaile,+ te fafine ʼae neʼe ʼohoana ʼi muʼa atu mo Napale, te tagata Kalemelo. Ko te tolu neʼe ko Apesalone,+ te tama ʼa Maaka, te ʼofafine ʼo Talamai,+ te hau ʼo Kesuli.
4 Ko te fa neʼe ko Atonisa,+ te tama ʼa Akite, pea ko te nima neʼe ko Sefatia, te tama ʼa Apitale.
5 Ko te ono neʼe ko Siteleame ʼae mo Ekela, te ʼohoana ʼo Tavite. Neʼe tutupu te ʼu foha ʼaia ʼo Tavite ʼi Hepelone.
6 ʼI te hoko atu ʼo te fetauʼaki ʼa te hologa ʼo Saulo mo te hologa ʼo Tavite, neʼe haga fakatuʼu malohi e Apenele+ tona ʼuhiga pule ʼi te hologa ʼo Saulo.
7 Neʼe ʼi ai te fafine ʼa Saulo neʼe higoa ko Lisepa,+ te ʼofafine ʼo Ahia. Neʼe fehuʼi leva e Iseposete+ kia Apenele: “He koʼe neʼe ke momoe mo te fafine ʼo taku tamai?”+
8 Neʼe kovi ʼosi te ita ʼo Apenele ʼi te ʼu palalau ʼaia ʼa Iseposete, ʼo ina ui: “ ʼE ko au koa ko he kuli ʼo Suta? ʼO kaku mai ki te temi nei, neʼe au fakaha toku ʼofa agatonu ki te famili ʼo Saulo tau tamai, mo ʼona tehina, mo ʼona kaumeʼa, pea neʼe mole au lavakiʼi koe ʼo tuku ki te ʼu nima ʼo Tavite. Kae ʼi te ʼaho nei, ʼe ke fakafehuʼi au ʼo ʼuhiga mo he agahala neʼe au fai mo he fafine!
9 Ke tauteaʼi lahi au e te ʼAtua, mo kapau ʼe mole au fakahoko maʼa Tavite te meʼa ʼaeni neʼe fakapapauʼi age e Sehova ki ai:+
10 Ke toʼo te puleʼaga mai te famili ʼo Saulo pea ke fakatuʼu te hekaʼaga fakahau ʼo Tavite ʼi Iselaele mo Suta, mai Tane ki Pele-sepa.”+
11 Neʼe mole ina toe fai age hana tali kia Apenele he neʼe mataku ia ia.+
12 Neʼe fekauʼi atu aipe e Apenele he kau tagata ʼave logo kia Tavite ke natou ui ki ai: “ ʼO ai te fenua?” Neʼe hoko atu: “Ke ke fai he fuakava mo au, pea ʼe au fai anai ia meʼa fuli ʼe au lavaʼi* ke maliu ia Iselaele katoa kia koe.”+
13 Neʼe ina tali age: “Fai ki ai! ʼE au fai anai he fuakava mo koe. Ko te meʼa pe ʼaeni ʼe tahi ʼe au kole atu: Ke ke haʼu mo Mikale,+ te ʼofafine ʼo Saulo. ʼAua naʼa ke faiga ke ke sio ki ʼoku fofoga mo kapau ʼe mole ke haʼu mo ia.”
14 Neʼe fekauʼi leva e Tavite he kau tagata ʼave logo kia Iseposete,+ te foha ʼo Saulo, ke natou ui ki ai: “Foaki mai toku ʼohoana ko Mikale. Koteʼuhi neʼe au matehi he kau Filisitini ʼe toko 100 pea mo ʼaumai he fakamoʼoni,* ke feala haku ʼohoana mo ia.”+
15 Koia, neʼe fakatotonu ai e Iseposete ke kumi mai ia Mikale mai te ʼapi ʼo tona ʼohoana ko Paletiele,+ te foha ʼo Laisi.
16 Kae neʼe alu tona ʼohoana mo ia, pea neʼe tagi ʼi tana muliʼi ia ia ʼo kaku ki Pasulimi.+ Pea neʼe ui e Apenele ki ai: “Toe liliu ki tou ʼapi!” Neʼe toe liliu ai.
17 Lolotoga te temi ʼaia, neʼe fakaha e Apenele te logo ʼaeni ki te kau takitaki ʼo Iselaele: “Neʼe kua fualoa takotou loto ʼae ke liliu ia Tavite ko hokotou hau.
18 Koia, ʼi te temi ʼaeni, kotou fakahoko te meʼa ʼae ʼe kotou loto ki ai, he neʼe ui e Sehova kia Tavite: ‘ ʼAki te nima ʼo taku tagata faifekau ko Tavite,+ ʼe au haofaki anai taku hahaʼi ko Iselaele mai te ʼu nima ʼo te kau Filisitini pea mo te ʼu nima ʼo ʼonatou fili fuli.’ ”
19 Neʼe palalau leva ia Apenele ki te hahaʼi ʼo Pesamino.+ Neʼe toe alu foki ia Apenele ʼo palalau tokotahi mo Tavite ʼi Hepelone, ʼo ina fakaha age te meʼa ʼae kua lotolelei ki ai ia Iselaele pea mo te fale katoa ʼo Pesamino.
20 ʼI te temi ʼae neʼe alu ai ia Apenele kia Tavite ʼi Hepelone mo tana toko 20 tagata, neʼe fai ai e Tavite he kaitahi maʼa Apenele mo te kau tagata ʼae neʼe ʼomai mo ia.
21 Neʼe ui leva e Apenele kia Tavite: “Tuku ke au alu pea ke au fakatahiʼi ia Iselaele katoa ki siʼoku ʼaliki te hau, ke natou fai ai he fuakava mo koe, pea ke ke pule ki te hahaʼi fuli pe ʼae ʼe ke loto ki ai.” Neʼe tuku ai leva e Tavite ia Apenele ke alu ʼi te fimalie.
22 ʼI te temi pe ʼaia, neʼe toe liliu mai te kau tagata faifekau ʼa Tavite pea mo Soape mo ni tuʼuga koloa neʼe natou toʼo ʼi te ʼu kolo ʼae neʼe natou ʼohofi. Neʼe mole kei nofo ia Apenele mo Tavite ʼi Hepelone, he neʼe ina tuku ia ia ke alu ʼi te fimalie.
23 ʼI te temi ʼae neʼe tau mai ai ia Soape+ pea mo te kautau ʼae neʼe fakatahi mo ia, neʼe fakaha age kia Soape te logo ʼaeni: “Neʼe haʼu ia Apenele+ te foha ʼo Nele+ ki te hau, pea neʼe ina tuku ke toe liliu ʼi te fimalie.”
24 Neʼe alu ai ia Soape ki te hau, ʼo ina ui age: “Kotea ʼae neʼe ke fai? Neʼe haʼu ia Apenele kia koe. He koʼe neʼe ke tuku ke toe liliu?
25 ʼE ke iloʼi lelei pe ia Apenele, te foha ʼo Nele. Neʼe haʼu ki heni ke ina kakaʼi koe pea ke ina iloʼi te ʼu meʼa fuli ʼae ʼe ke fai pea mo ʼau fakatuʼutuʼu fuli.”
26 Neʼe mavae leva ia Soape mai ia Tavite kae ina fekauʼi he kau tagata ʼave logo ke natou kumi mai ia Apenele. Neʼe natou maʼu ia ia ʼi te tane vai ʼo Silea, ʼo natou toe liliu ai mo ia. Kae neʼe mole iloʼi e Tavite te faʼahi ʼaia.
27 ʼI te temi ʼae neʼe toe liliu ai ia Apenele ki Hepelone,+ neʼe nā olo mo Soape ki te matapa ʼo te kolo, ke nā palalau ʼateaina ai. Kae neʼe ina hukiʼi tona fatu ʼi te koga meʼa ʼaia, ʼo mate ai.+ Neʼe ina fai te faʼahi ʼaia, he neʼe ina matehi* tona tehina ko Asaele.+
28 Ki muli age, ʼi te iloʼi e Tavite te faʼahi ʼaia, neʼe ina ui: “Ia muʼa ʼo Sehova, ko au ʼo feia mo toku puleʼaga, ʼe matou maʼa ʼo talu ai mai te toto+ ʼo Apenele, te foha ʼo Nele.
29 Ke kai pe e Soape tana agakovi+ ʼo feia mo te loto fale katoa ʼo tana tamai. Ke ʼi ai tuʼumaʼu pe ʼi te famili ʼo Soape he tagata ʼe mahaki,*+ peʼe ko he tagata ʼe kilia,+ peʼe ko he tagata ʼe ina fakaʼaogaʼi te takaiga filo,* peʼe ko he tagata neʼe matehi ʼaki te heleta, peʼe ko he tagata ʼe pakupaku.”+
30 Koia, neʼe matehi e Soape mo tona tehina ko Apisai+ ia Apenele,+ he neʼe ina matehi tonā tehina ko Asaele ʼi te tau+ ʼi Kipeone.
31 Neʼe ui leva e Tavite kia Soape mo te hahaʼi fuli ʼae neʼe fakatahi mo ia: “Kotou hae ʼokotou kofu pea mo tui he ʼu taga,* pea kotou fetagihi kia Apenele.” Neʼe muliʼi tonu e te Hau ko Tavite te fata ʼo te mate.
32 Neʼe natou ʼavaifo ia Apenele ʼi Hepelone. Neʼe tagi leʼo lahi te hau ʼi te fale maka ʼo Apenele pea neʼe toe fetagihi foki mo te hahaʼi fuli.
33 Neʼe hiva leva ia te hau ʼo ʼuhiga mo Apenele:
“Neʼe tonu koa ke mate ia Apenele ohage ko te mate ʼa he tagata vale?
34 Neʼe mole haʼi ʼou nima,Pea neʼe mole seiniʼi ʼou vaʼe.
Neʼe matehi koe ohage ko te matehi ʼo he tahi e ni hahaʼi faifakapo.”*+
Neʼe toe fetagihi fuli ai te hahaʼi kia ia.
35 Ki muli age, neʼe ʼomai te hahaʼi fuli kae kei ʼaho ʼo foaki kia Tavite te pane ʼo te fakafimalie, kae neʼe fakapapau age e Tavite: “Ke tauteaʼi lahi au e te ʼAtua, mo kapau ʼe au kai ki he moʼi pane peʼe ki he tahi age meʼa ʼi muʼa ʼo te to ʼo te laʼa!”+
36 Neʼe tokagaʼi e te hahaʼi fuli te faʼahi ʼaia, pea neʼe natou fiafia ai, ohage pe ko tanatou fiafia ʼi te ʼu meʼa fuli ʼae neʼe fai e te hau.
37 Koia, ʼi te ʼaho ʼaia, neʼe iloʼi fuli ai e te hahaʼi mo Iselaele katoa neʼe mole kau te hau ki te matehi ʼo Apenele, te foha ʼo Nele.+
38 Neʼe ui leva e te hau ki ʼana hahaʼi faifekau: “ ʼE mole kotou iloʼi koa la ʼe ko he ʼaliki pea ʼe ko he tagata maʼuhiga ʼae kua mate ʼi te ʼaho nei ʼi Iselaele?+
39 Pea ʼi te ʼaho nei, ʼe mole kei hoku malohi logo la neʼe fakanofo au ko te hau.+ Kia au, ko te ʼu tagata ʼaia, te ʼu tama ʼa Teselusa,+ ʼe natou agamalohi fau.+ Ke liufaki e Sehova ki te tagata agakovi ʼo mulimuli pe ki tana agakovi.”+
Nota
^ Hep. “pea koʼeni, ʼe nofo mo koe toku nima.”
^ Hep. “he koga ʼo te ʼu koga tapu ʼo te kau Filisitini.”
^ Hep. “ ʼuhi ko te toto ʼo.”
^ ʼI te Fakahepeleo, neʼe fakaʼuhiga ki he tagata neʼe mahaki he neʼe maligi he meʼa mai tona koga tapu.
^ ʼE lagi fakaʼuhiga ki he tagata maʼimoa, neʼe tonu ke ina fai te gaue ʼa te hahaʼi fafine.
^ Vakaʼi Te ʼu Kupu.
^ Hep. “he ʼu foha ʼo te heʼe faitotonu.”
