Lua Samuele 2:1-32
2 Hili ʼaia, neʼe fehuʼi leva e Tavite kia Sehova:+ “ ʼE tonu koa ke au hake ki he kolo ʼi te ʼu kolo ʼo Suta?” Neʼe ui age e Sehova: “Hake.” Neʼe fehuʼi age leva e Tavite: “Ke au hake kifea?” Neʼe ina tali age: “Ki Hepelone.”+
2 Neʼe alu ai ia Tavite mo ʼona ʼohoana ʼae ʼe lua, ia Asinoame+ mai Siseleele, pea mo Apikaile,+ te fafine ʼae neʼe ʼohoana ʼi muʼa atu mo Napale, te tagata Kalemelo.
3 Neʼe toe ʼave foki e Tavite te kau tagata ʼae neʼe fakatahi mo ia,+ natou mo ʼonatou loto fale takitahi, pea neʼe natou nonofo ʼi te ʼu kolo ʼae ʼi te ʼu tafaʼaki ʼo Hepelone.
4 Neʼe ʼomai leva te kau tagata ʼo Suta, ʼo fakanofo ia Tavite ko te hau ʼo te telepi ʼo Suta.+
Neʼe natou ui kia Tavite: “Neʼe ko te kau tagata ʼo Sapesi-kileate ʼae neʼe natou ʼavaifo ia Saulo.”
5 Koia, neʼe fekauʼi ai e Tavite he kau tagata ʼave logo ke olo ʼo ui age ki te kau tagata ʼo Sapesi-kileate: “Ke tapuakiʼi koutou e Sehova, he neʼe kotou fakaha tokotou ʼofa agatonu ki tokotou ʼaliki ko Saulo ʼi takotou ʼavaifo ia ia.+
6 ʼOfa pe ke fakaha atu e Sehova tana agalelei* mo tana agatonu kia koutou. ʼE au toe fakaha atu anai taku agalelei kia koutou ʼuhi ko te meʼa ʼae neʼe kotou fai.+
7 ʼI te lakaga leva ʼaeni, ke kotou lotomalohi mo lototoʼa, he ʼe kua mate ia Saulo tokotou ʼaliki, pea kua fakanofo au e te telepi ʼo Suta ke au hau kia natou.”
8 Ko Apenele,+ te foha ʼo Nele, te pule ʼo te kautau ʼa Saulo, neʼe ina toʼo ia Iseposete,+ te foha ʼo Saulo ʼo ʼave ki Mahanaimi.+
9 Neʼe ina fakanofo ia ia ko te hau ʼo Kileate,+ mo te kau Asule, mo Siseleele,+ mo Efalaimi,+ mo Pesamino pea mo Iselaele katoa.
10 Neʼe taʼu 40 ia Iseposete, te foha ʼo Saulo, ʼi te temi ʼae neʼe fakanofo hau ai ia ia ʼi Iselaele pea neʼe hau lolotoga taʼu ʼe lua. Kae neʼe lagolago te telepi ʼo Suta kia Tavite.+
11 Neʼe pule ia Tavite ki te telepi ʼo Suta, ʼi Hepelone lolotoga taʼu ʼe fitu mo mahina ʼe ono.+
12 Ki muli age, neʼe mavae mai Mahanaimi+ ia Apenele, te foha ʼo Nele mo te kau tagata faifekau ʼa Iseposete, te foha ʼo Saulo, ʼo olo ki Kipeone.+
13 Pea neʼe toe olo ia Soape,+ te tama ʼa Teselusa+ mo te kau tagata faifekau ʼa Tavite ʼo fakafelaveʼi kia natou ʼi te maʼanuʼaga ʼo Kipeone. Neʼe nofo te tahi kutuga ʼi te tahi ia faʼahi ʼo te maʼanuʼaga kae nofo te tahi kutuga ʼi te tahi age ia faʼahi.
14 Neʼe ui age leva e Apenele kia Soape: “Ke tutuʼu ake te kau tagata tupulaga ʼo fetauʼaki* ʼi ʼotā muʼa.” Neʼe tali e Soape: “ ʼIo, ke natou tutuʼu ake.”
15 Neʼe natou tutuʼu ake ai ʼo ʼomai ki loto, pea neʼe tauʼaki tatau tonatou kaugamalie: ko te toko 12 tagata ʼo Pesamino mo Iseposete, te foha ʼo Saulo pea mo te toko 12 ʼo te kau tagata faifekau ʼa Tavite.
16 Neʼe natou tahi puke leva tona fili ʼi tona ʼulu, ʼo hukiʼi tona faʼahi vakavaka ʼaki te heleta, ʼo natou mamate fuli ai. Koia, neʼe higoa leva te koga meʼa ʼaia, ʼae ʼi Kipeone, ko Helekati-hatesulimi.
17 Ko te tau ʼae neʼe hoko ʼi te ʼaho ʼaia neʼe fakamataku ʼaupito, pea neʼe malo te kau tagata faifekau ʼa Tavite ia Apenele mo te kau tagata ʼo Iselaele.
18 Neʼe kau ai te ʼu tama ʼe tolu ʼa Teselusa,+ ia Soape,+ mo Apisai+ pea mo Asaele.+ Neʼe lele vave ia Asaele ohage ko he tia fafine ʼi te vao.
19 Neʼe ina tuli ia Apenele, pea neʼe mole toe afe ki te faʼahi mataʼu peʼe ko te faʼahi hema ʼi tana tuli ʼaia ia Apenele.
20 Neʼe sio ia Apenele ki muli pea neʼe ina fehuʼi age: “Asaele, ʼe ko koe koa?” pea neʼe ina tali age: “ ʼEi, ko au.”
21 Neʼe ui e Apenele ki ai: “Alu ki tou faʼahi mataʼu peʼe ki tou faʼahi hema, pea ke puke he tahi ʼi te ʼu tagata tupulaga, ʼo ke toʼo ia ia he meʼa pe ʼe ke loto ki ai.” Kae neʼe mole fia tuku e Asaele tana tuli ia ia.
22 Neʼe toe ui age e Apenele kia Asaele: “Tuku tau tuli au. He koʼe ʼe tonu ke au matehi koe? Pea ʼe feafeaʼi anai haku toe sio ki tou tehina ko Soape?”
23 Kae neʼe mole ina fia tuku tana tuli ia ia. Koia, neʼe hokaʼi e Apenele ia ia ʼi tona fatu ʼaki tana muliʼi tao+ pea neʼe ulu ai te tao ʼo ha ʼi tona tuʼa. Neʼe toka ia Asaele ʼo mate ai. Ko natou fuli ʼae neʼe tau atu ki te faʼahi ʼae neʼe toka ai ia Asaele ʼo mate, neʼe natou tutuʼu ai.
24 Neʼe tuli leva e Soape mo Apisai ia Apenele. ʼI te to ʼo te laʼa, neʼe nā tau atu leva ki te kiʼi moʼuga ʼo Ama, ʼae ʼe haga ki Kiase ʼi te ala ʼo te toafa ʼo Kipeone.
25 Neʼe fakatahitahi mai te kau Pesamino kia Apenele, pea neʼe natou faʼufaʼu he foʼi solia ʼe tahi ʼo natou tutuʼu ai ʼi te tumutumu ʼo he kiʼi moʼuga.
26 Neʼe kalaga leva ia Apenele kia Soape: “ ʼE hoko atu anai koa tatatou fetamateʼiʼaki ʼo talu ai? ʼE mole ke iloʼi koa la ʼe iku pe anai ki te mamahi? ʼE ko ʼafea koa ʼae ka ke fakatotonu ai ki tau hahaʼi ke tuku la tanatou tuli ʼonatou tehina?”
27 Neʼe tali age e Soape: “ ʼE au fakapapau atu ia muʼa ʼo te ʼAtua moʼoni mo maʼuli, ka na neʼe mole ke palalau mai la, ʼe hoko atu pe anai te tuli e taku hahaʼi ʼonatou tehina ʼo kaku ki apogipogi uhu.”
28 Pea neʼe pupuhi e Soape te fakatagi pupuhi. Neʼe tuku ai te tuli ʼo Iselaele e tana kau tagata, pea neʼe gata ai te tau.
29 Neʼe haʼele leva ia Apenele mo tana kau tagata ʼi te Alapa+ ʼi te po katoa ʼaia. Neʼe natou fakalaka ʼi te Solotane pea natou hake ai ʼi te liuʼa* ʼo natou tau leva ki Mahanaimi.+
30 ʼI te ʼosi tuku e Soape tana tuli ia Apenele, neʼe ina fakatahiʼi leva te hahaʼi katoa. ʼI te kau tagata faifekau ʼa Tavite, neʼe pupuli te toko 19, pea mo Asaele.
31 Kae neʼe malo te kau tagata faifekau ʼa Tavite ʼi te kau Pesamino mo te kau tagata ʼa Apenele. Neʼe natou matehi ai te toko 360.
32 Neʼe natou toʼo leva te sino ʼo Asaele+ ʼo tuku ki te fale maka ʼo tana tamai, ʼae ʼi Petelehemi.+ Neʼe haʼele ia Soape mo tana kau tagata ʼi te po katoa, pea neʼe natou tau leva ki Hepelone+ ʼi te mafoata.
Nota
^ Peʼe “tona ʼofa agatonu.”
^ Peʼe “fefakataupiepieʼaki.”
^ Peʼe lagi “ ʼi te fenua katoa ʼo Piteloni.”
