Lua Samuele 14:1-33
14 Neʼe iloʼi leva e Soape, te tama ʼa Teselusa,+ te fakaʼamu ʼa te hau ʼae ke toe sio kia Apesalone.+
2 Koia neʼe pauʼi ai e Soape he fafine poto mai Tekoa.+ Pea neʼe ina ui age ki ai: “Fakalelei siʼou loto, fai ohage ʼe ke putu, pea mo ke tui he ʼu teu putu, pea ʼaua naʼa ke vali he moʼi lolo.+ Ke ke fai ohage ko he fafine ʼe putu talu mai fualoa.
3 Pea ke alu ʼo ui ki te hau.” Neʼe fakaha age leva e Soape te ʼu palalau ʼae neʼe tonu ke ina fai.*
4 Neʼe alu ai te fafine Tekoa ki te hau, ʼo tulolo ki te kele pea mo punou, ʼo ina ui age: “Siʼoku hau, tokoni mai!”
5 Neʼe ui age e te hau: “Kotea ʼae kua hoko kia koe?” Neʼe ina tali age: “Ko au ko he fafine vitua. Kua mate toku ʼohoana.
6 Pea ko au ʼaeni ko tau fafine faifekau, ʼe au maʼu ʼaku tama ʼe lua, pea neʼe nā fuhu ʼi te gaueʼaga. Neʼe mole he tahi neʼe faipukepuke ia naua, koia neʼe matehi ai leva e taku tahi tama tona tehina.
7 Pea neʼe tutuʼu ake toku famili katoa ʼo fakafeagai mai kia au ʼaeni ko tau fafine faifekau, ʼo natou ui mai: ‘Tuku mai ia ia ʼae neʼe ina fakapogi tona tehina, ke matou matehi ia ia ʼuhi ko te maʼuli* ʼo tona tehina ʼae neʼe ina matehi,+ tatau aipe pe ʼe mole toe ʼi ai anai he tahi ka ina maʼu te tofiʼa!’ ʼE natou fia tamateʼi te kiʼi moʼi mamala ʼae kei kakaha ia au* pea mo pulihi ʼi te kele te higoa ʼo toku ʼohoana mo tona hakoga.”
8 Neʼe ui age leva e te hau ki te fafine: “Alu ki tou ʼapi, pea ʼe au tuku anai he ʼu fakatotonu ʼo ʼuhiga mo koe.”
9 Neʼe ui e te fafine Tekoa ki te hau: “Siʼoku ʼaliki hau, ke tuku te hala kia au mo te famili ʼo taku tamai, kae ke hao te hau mo tona hekaʼaga fakahau ʼi te faʼahi ʼaia.”
10 Pea neʼe ui e te hau ki ai: “Kapau ʼe palalau atu he tahi ki te faʼahi ʼaia, ʼaumai ia ia kia au, pea ʼe mole toe fakahohaʼa atu anai.”
11 Kae neʼe ui age e te fafine: “Siʼoku hau, fakalelei siʼou loto, faikole kia Sehova tou ʼAtua, ke ʼaua naʼa haʼu te tagata lagavaka*+ ʼo fakatupu mamahi pea mo matehi taku tama.” Neʼe ui e te hau: “ ʼE au fakapapau atu ia muʼa ʼo Sehova, te ʼAtua maʼuli,+ ʼe mole to anai ki te kele he fuluʼi ʼulu ʼe tahi ʼo tau tama.”
12 Neʼe ui leva e te fafine: “Siʼoku ʼaliki te hau, fakalelei siʼou loto, kae tuku muʼa ke au palalau atu.” Neʼe ina ui age: “Palalau mai!”
13 Neʼe ui e te fafine: “He koʼe koa neʼe ke manatu ke ke fai he meʼa feia ki te hahaʼi ʼa te ʼAtua?+ ʼE ke lakahala ai ʼi te ʼu palalau ʼae neʼe ke fai, koteʼuhi neʼe mole ke fakaliliu mai tou foha totonu ʼae neʼe ke kapu.+
14 ʼE moʼoni, ʼe tou mamate anai pea ʼe tou hage ko te vai ʼae ʼe huaʼi ki te kele, ʼae ʼe mole feala ke toe tanaki. Kae ʼe mole toʼo e te ʼAtua te maʼuli* ʼo he tahi, pea ʼe ina fakakaukauʼi he ʼu tupuʼaga ke toe fakaliliu mai ia ia ʼae neʼe kapu.
15 Siʼoku ʼaliki te hau, neʼe au haʼu ʼo fai te ʼu palalau ʼaia kia koe he neʼe fakamatakuʼi au e te hahaʼi. Koia neʼe au ui ai ʼi toku loto: ‘ ʼE au palalau anai ki te hau, pea ʼe lagi tali anai e te hau taku kole.
16 ʼE lagi fagono anai te hau pea ʼe ina haofaki anai au mai te tagata ʼae ʼe ina fia toʼo fuli mai ia au mo taku kiʼi tama ʼae kei maʼuli, te tofiʼa ʼae neʼe foaki mai e te ʼAtua.’+
17 Pea neʼe au ui leva: ‘ ʼOfa pe ke fakalotofimalieʼi au e te folafola ʼo siʼoku ʼaliki te hau,’ koteʼuhi siʼoku ʼaliki te hau, ʼe ke hage ko he ʼaselo ʼa te ʼAtua moʼoni ʼi tana fakakehekeheʼi te meʼa ʼae ʼe lelei mo te meʼa ʼae ʼe kovi. ʼOfa pe ke nofo ia Sehova tou ʼAtua mo koe.”
18 Neʼe ui age leva e te hau ki te fafine: “Fakalelei siʼou loto, ke ke tali mai, ʼaua naʼa ke fufu mai he meʼa.” Neʼe ui age e te fafine: “Siʼoku ʼaliki te hau, palalau mai.”
19 Neʼe fehuʼi leva e te hau: “Neʼe ko Soape koa ʼae neʼe ina uga koe ke ke haʼu ʼo fakamatala mai te ʼu meʼa fuli ʼaia?”+ Neʼe tali age e te fafine: “Siʼoku ʼaliki te hau, ʼe au tala moʼoni atu, ʼe hage pe ko tau ui.* Neʼe ko tau tagata faifekau ko Soape ʼae neʼe ina ui mai ke au fai te faʼahi ʼaia pea mo fakaha mai te ʼu palalau fuli ʼae neʼe tonu ke au fai.
20 Neʼe fai e tau tagata faifekau ko Soape te faʼahi ʼaia ke kehe age tau sio ki te aluʼaga ʼae neʼe hoko, kae siʼoku ʼaliki, ʼe hage tou poto ko te ʼaselo ʼa te ʼAtua moʼoni pea ʼe ke iloʼi ia meʼa fuli ʼae ʼe hoko ʼi te fenua.”
21 Neʼe ui leva e te hau kia Soape: “ ʼE ke tonu, pea ʼe au fai anai te faʼahi ʼaia.+ Alu pea ke toe liliu mai mo te tama ko Apesalone.”+
22 Neʼe tulolo ai ia Soape ki te kele mo punou, pea mo ina vikiʼi te hau. Neʼe ui e Soape: “Siʼoku ʼaliki te hau, ʼi te ʼaho nei kua au iloʼi ʼe ke leleiʼia au, he neʼe ke tali taku kole.”
23 Neʼe tuʼu ake ai ia Soape ʼo alu ki Kesuli+ pea neʼe ina ʼaumai ia Apesalone ki Selusalemi.
24 Kae neʼe ui e te hau: “Ke toe liliu ki tona fale, kae ʼe mole feala anai ke sio ki ʼoku fofoga.” Koia neʼe toe liliu ai Apesalone ki tona fale, kae neʼe mole sio ki te hau.
25 Pea neʼe mole he tahi age tagata ʼi Iselaele katoa neʼe lahi ʼaupito tona vikiʼi ohage ko Apesalone he neʼe talavou. Mai ʼona ʼalofi vaʼe ki tona foʼi ʼulu, neʼe mole pe maʼu he kiʼi mele ʼe tahi.
26 ʼI te fakaʼosi taʼu fuli, neʼe tonu ke ina kosi tona ʼulu he neʼe mamafa fau tona lauʼulu. Ko te mamafa ʼo tona lauʼulu neʼe ko sikele fakahau ʼe 200.*
27 Neʼe maʼu e Apesalone ʼona foha ʼe tolu+ pea mo tona ʼofafine ʼe tahi neʼe higoa ko Tamale. Neʼe finemui ʼaupito.
28 Pea neʼe maʼuli ia Apesalone ʼi Selusalemi lolotoga taʼu katoa ʼe lua, kae neʼe mole sio ia ki te hau.+
29 Neʼe pauʼi leva e Apesalone ia Soape, he neʼe ina loto ke alu ki te hau, kae neʼe mole fia haʼu ia Soape. Neʼe toe pauʼi ia ia e Apesalone, ko tona tuʼa lua ʼaia, kae neʼe fakafisi aipe ia.
30 Neʼe ina ui leva ki ʼana hahaʼi faifekau: “ ʼE tuʼu te gaueʼaga ʼa Soape ia tafa ʼo taku gaueʼaga. Neʼe ina to ai te olose. Kotou olo ʼo tutu.” Neʼe olo ai te hahaʼi faifekau ʼa Apesalone ʼo tutu te gaueʼaga.
31 Pea neʼe haʼu ia Soape ki te fale ʼo Apesalone ʼo ina ui age ki ai: “He koʼe neʼe tutu e tau hahaʼi faifekau taku gaueʼaga?”
32 Neʼe tali age e Apesalone kia Soape: “Koʼeni neʼe au poapoaki atu ke ke haʼu he neʼe au loto ke ke alu ki te hau ʼo fehuʼi age: ‘Kotea te tupuʼaga ʼo taku mavae ʼae mai Kesuli?+ Neʼe lelei age ke au nofo ʼi ai. Koia, fakagafua mai ke au sio ki te hau, pea kapau ʼe ʼi ai haku lakahala, ke ina matehi au.’ ”
33 Neʼe alu ai ia Soape ki te hau ʼo palalau ki ai. Neʼe ina pauʼi leva ia Apesalone. Neʼe haʼu ai ʼo punou mo tulolo ki te kele ia muʼa ʼo te hau. Neʼe ʼuma leva te hau kia Apesalone.+
Nota
^ Hep. “Neʼe ʼai leva e Soape te ʼu palalau ki tona gutu.” ʼE toe tatau mo te vaega 19.
^ Hep. nèphèsh. Vakaʼi Te ʼu Kupu.
^ ʼE fakaʼuhiga ki tona fealagia ʼaia ʼe tahi ke ina maʼu he hakoga.
^ Hep. “te tagata lagavaka ʼo te toto.”
^ Hep. nèphèsh. Vakaʼi Te ʼu Kupu.
^ Peʼe “ ʼi te ʼu meʼa fuli ʼae ʼe ke ui ʼe mole feala ke alu he tahi ki te faʼahi hema peʼe ki te faʼahi mataʼu.”
^ Ko teitei kilo ʼe 2,3. Vakaʼi Te ʼu Fakamahino 2.14. ʼI te Fakahepeleo, “sikele ʼe 200 ʼo mulimuli ki te maka fua mamafa ʼa te hau.” Neʼe lagi ko te fua ʼae neʼe taupau ʼi te fale hau peʼe ko he sikele “fakahau” neʼe kehe age ʼi te sikele mahani.
