ʼUluaki Samuele 6:1-21
-
ʼE fakaliliu e te kau Filisitini ia te Aleka ki Iselaele (1-21)
6 Neʼe nofo te Aleka+ ʼo Sehova ʼi te fenua ʼo te kau Filisitini lolotoga mahina ʼe fitu.
2 Neʼe pauʼi leva e te kau Filisitini ia te kau pelepitelo mo te kau faifakakikite,+ pea neʼe natou fehuʼi age: “Kotea ʼae ʼe tonu ke matou fai ki te Aleka ʼo Sehova? Fakaha mai pe ʼe tonu ke fakaliliu feafeaʼi ki tona nofoʼaga.”
3 Neʼe natou tali age: “Kapau ʼe kotou fakaliliu te aleka ʼo te fuakava ʼa Sehova te ʼAtua ʼo Iselaele, ʼaua naʼa kotou fakaliliu ʼatea. ʼE tonu ke kotou fakaliliu kia te ia mo he sakilifisio fakatokatoka.+ Kapau ʼe kotou fai feia, ʼe kotou malolo anai pea ʼe kotou iloʼi anai pe koʼe neʼe ina tauteaʼi koutou.”
4 Pea neʼe natou fehuʼi age: “Kotea te sakilifisio fakatokatoka ʼae ʼe tonu ke matou ʼave kia te ia?” Neʼe natou tali: “Kotou ʼave ni fakatata aulo ʼe nima ʼo ʼokotou fufula* pea mo ni kuma aulo ʼe nima, ʼo mulimuli ki te lahi ʼo te kau ʼaliki ʼo te kau Filisitini+ he neʼe tatau te tautea ʼae neʼe hoko kia koutou takitahi pea mo takotou kau ʼaliki.
5 ʼE tonu ke kotou fai he ʼu fakatata ʼo ʼokotou fufula pea mo ʼakotou kuma+ ʼae ʼe natou maumauʼi ia te fenua, pea ʼe tonu ke kotou fakamaʼuhigaʼi te ʼAtua ʼo Iselaele. ʼE lagi ina pulihi anai te tautea ia koutou, mo tokotou ʼatua pea mo tokotou fenua.+
6 He koʼe koa ʼe kotou fakafefeka ʼokotou loto ohage ko te fakafefeka e te kau Esipito pea mo Falaone ʼonatou loto?+ ʼI Tana tauteaʼi lahi natou,+ neʼe tonu ai ke natou fakamavae ia Iselaele, pea neʼe olo ai te kau Iselaele.+
7 ʼI te lakaga leva ʼaeni, kotou teuteuʼi he saliote foʼou, mo he ʼu pipi fafine ʼe lua ʼe kei nā fafaga ʼonā ʼuhi, neʼe heʼeki hili kia naua he ʼakau ʼamo. Pea kotou haʼi leva te ʼu pipi ki te saliote, kae kotou fakaliliu ʼonā ʼuhi ke mamaʼo mai ia naua.
8 Pea kotou toʼo te Aleka ʼo Sehova ʼo hili ki te saliote, mo tuku ki ʼona tafa he kiʼi puha neʼe kotou ʼai ki ai te ʼu fakatata aulo ʼae ka kotou ʼave kia te ia ohage ko he sakilifisio fakatokatoka.+ Kotou tuku leva te saliote ke alu
9 pea kotou sioʼi: Kapau ʼe alu ʼi te ala ʼo Pete-semesi,+ ki tona fenua totonu, pea ʼe ko te ʼAtua ʼae neʼe ina fai te toe meʼa kovi ʼaia kia tatou. Kae kapau ʼe mole alu ai, ʼe tou iloʼi ai anai neʼe mole ko ia ʼae neʼe ina tauteaʼi tatou, kae neʼe hoko feia pe ia.”
10 Neʼe mulimuli ki ai te hahaʼi. Neʼe natou toʼo te ʼu pipi fafine ʼe lua ʼe kei nā fafaga ʼonā ʼuhi pea neʼe natou haʼi ki te saliote, kae neʼe natou ʼave te ʼu ʼuhi ki te lotoʼa manu.
11 Neʼe natou hili leva te Aleka ʼo Sehova ki te saliote, ʼo feia mo te kiʼi puha ʼae neʼe tuku ai te ʼu kuma aulo pea mo te ʼu fakatata ʼo ʼonatou fufula.
12 Pea neʼe olo fakahagatonu te ʼu pipi ʼi te ala ʼae ki Pete-semesi.+ Neʼe nā olo aipe ʼi te ala lahi mo tagi, pea neʼe mole nā olo ki te faʼahi mataʼu peʼe ki te faʼahi hema. Lolotoga te temi ʼaia, neʼe muliʼi naua e te kau ʼaliki ʼo te kau Filisitini ʼo kaku ki te tuʼakoi ʼo Pete-semesi.
13 Neʼe lolotoga utu e te hahaʼi ʼo Pete-semesi te fulumeto ʼi te potu fenua laulelei. ʼI tanatou hiki ake ʼonatou mata ʼo sisio ki te Aleka, neʼe natou fiafia ʼaupito ai.
14 Neʼe alu te saliote ki te gaueʼaga ʼa Sosue, te tagata Pete-semesi pea neʼe tuʼu ovi leva ki he foʼi maka lahi. Neʼe natou toʼo te ʼu ʼakau ʼo te saliote ʼo fahi, pea neʼe natou momoli te ʼu pipi+ ohage ko he ʼu holokoseta* kia Sehova.
15 Neʼe fakahifo leva e te kau Levite+ te Aleka ʼo Sehova mo te kiʼi puha ʼae neʼe tuku ai te ʼu fakatata aulo, ʼo natou hili ki te foʼi maka lahi. Neʼe momoli e te hahaʼi ʼo Pete-semesi+ te ʼu holokoseta pea mo he ʼu sakilifisio ʼi te ʼaho ʼaia kia Sehova.
16 ʼI te sisio ʼa te kau ʼaliki ʼe toko nima ʼo te kau Filisitini ki te faʼahi ʼaia, neʼe natou toe liliu leva ki Ekelone ʼi te ʼaho pe ʼaia.
17 Pea koʼeni te ʼu fakatata aulo ʼo ʼonatou fufula ʼae neʼe ʼave e te kau Filisitini kia Sehova ohage ko he sakilifisio fakatokatoka:+ ko te tahi maʼa Asoti,+ mo te tahi maʼa Kasa, mo te tahi maʼa Asekaloni, mo te tahi maʼa Kiete+ pea mo te tahi maʼa Ekelone.+
18 Pea ko te lahi ʼo te ʼu kuma aulo neʼe mulimuli ki te lahi ʼo te ʼu kolo fuli ʼa te kau Filisitini ʼae neʼe puleʼi e te kau ʼaliki ʼe toko nima, ia te ʼu kolo tau mo te ʼu kolo liliki.
Pea ko te foʼi maka lahi ʼae neʼe hili ki ai te Aleka ʼo Sehova ʼe ko he fakamoʼoni ʼi te gaueʼaga ʼa Sosue, te tagata Pete-semesi ʼo kaku mai ki te ʼaho nei.
19 Kae neʼe matehi e te ʼAtua te hahaʼi ʼo Pete-semesi, he neʼe natou sioʼi te Aleka ʼo Sehova. Neʼe ina matehi te toko 50 070 hahaʼi,* pea neʼe lauga leva te hahaʼi he neʼe kaugamalie ia natou ʼae neʼe matehi e Sehova.+
20 Koia neʼe fehuʼi e te hahaʼi ʼo Pete-semesi: “Ko ai ka lava tuʼu ia muʼa ʼo Sehova, te ʼAtua maʼoniʼoni ʼaia?+ Pea ka mavae ia tatou ʼe alu kia ai?”+
21 Neʼe natou fekauʼi leva he ʼu tagata ʼave logo ki te hahaʼi ʼo Kiliate-sealimi,+ ke natou ui age: “Kua fakaliliu mai e te kau Filisitini ia te Aleka ʼo Sehova. Kotou ʼomai ʼo ʼave.”+
Nota
^ ʼE fakaʼuhiga ki te ʼu fufula ʼae ʼe tupu mai te mahaki ʼae ko te mulito.
^ Vakaʼi Te ʼu Kupu.
^ Hep. “tagata ʼe toko 70, tagata ʼe toko 50 000.”
