ʼUluaki Koloniko 16:1-43
16 Neʼe natou fakahu ai te Aleka ʼo te ʼAtua moʼoni pea mo tuku ki te fale la ʼae neʼe fakatuʼu e Tavite ke tuku ki ai.+ Pea neʼe natou momoli he ʼu holokoseta mo he ʼu sakilifisio ʼo te tokalelei* ia muʼa ʼo te ʼAtua moʼoni.+
2 ʼI te ʼosi momoli e Tavite te ʼu holokoseta+ pea mo te ʼu sakilifisio ʼo te tokalelei,+ neʼe ina tapuakiʼi te hahaʼi ʼi te huafa ʼo Sehova.
3 Neʼe ina toe tufa foki ki te kau Iselaele fuli, tagata mo fafine, ia he foʼi pane takafuafua, mo he foʼi keke neʼe fai ʼaki te fuaʼi palema mo he foʼi keke vite.
4 Neʼe ina fakanofo leva he kau Levite ke natou gaue ʼi te muʼa Aleka ʼo Sehova,+ mo fakaʼapaʼapa kia* Sehova, te ʼAtua ʼo Iselaele, mo fakafetaʼi pea mo fakavikiviki kia te ia.
5 Neʼe ko Asafe+ te pule, pea neʼe hoa mai ki ai ia Sakalia. Pea ko Seiele, mo Semilamote, mo Sehiele, mo Matitia, mo Eliape, mo Penaia, mo Opeto-etome pea mo Seiele,+ neʼe natou ta alepa+ pea mo he tahi age ʼu meʼa faimaholo. Neʼe ta e Asafe he ʼu simepale.+
6 Kae ko te ʼu pelepitelo ʼae ko Penaia mo Sakasiele neʼe nā pupuhi tuʼumaʼu pe he ʼu fakatagi pupuhi ia muʼa ʼo te aleka ʼo te fuakava ʼo te ʼAtua moʼoni.
7 Neʼe ko te ʼaho ʼaia ʼae neʼe tohi ai e Tavite tana ʼuluaki hiva fakafetaʼi kia Sehova, pea neʼe ina fakatotonu age kia Asafe+ mo ʼona tehina ke natou hiva te hiva ʼaia:
8 “Kotou fakafetaʼi kia Sehova,+ kotou vikiʼi* tona huafa,Kotou fakaha ʼana gaue fakaofoofo ki te hahaʼi!+
9 Kotou hiva kia te ia, kotou hiva ni fakavikiviki* kia te ia,+Kotou metitasio ki* ʼana gaue fakaofoofo fuli.+
10 Kotou fiameʼameʼa ʼo ʼuhiga mo tona huafa taputapu.+
Ke fiafia te loto ʼo natou ʼae ʼe natou kumi ia Sehova.+
11 Kotou kumi ia Sehova+ pea mo tona malohi.
Kotou haga tuʼumaʼu pe kia te ia.+
12 Kotou manatuʼi te ʼu gaue fakaofoofo ʼae neʼe ina fai,+Mo ʼana milakulo pea mo te ʼu fakamau ʼae neʼe ina fai,
13 Ia koutou, ʼae ko te hologa ʼo Iselaele tana tagata faifekau,+Ia koutou, ko te ʼu foha ʼo Sakopo, ʼae neʼe ina filifili.+
14 ʼE ko Sehova, totatou ʼAtua.+
ʼE ina fakamauʼi te kele katoa.+
15 Kotou manatuʼi tana fuakava ki te heʼe gata,Tana fakapapau* ʼi te ʼu taʼi tupu ʼe afe,+
16 Te fuakava ʼae neʼe ina fai mo Apalahamo,+Pea mo te fakapapau ʼae neʼe ina fai kia Isaake.+
17 Neʼe ina fakamoʼoni te fakapapau ʼaia kia Sakopo ʼaki tana fai he lao+Pea mo he fuakava mo Iselaele ʼo talu ai,
18 Neʼe ina ui: ‘ ʼE au foaki atu anai te fenua ʼo Kanaane+Ko hokotou tofiʼa ʼaia.’+
19 Neʼe hoko te faʼahi ʼaia ʼi te temi ʼae neʼe kei kotou tokosiʼi ai,ʼEi, tokosiʼi pe, mo matapule ʼi te fenua.+
20 Neʼe natou feoloʼaki mai ʼae fenua ki ʼae fenua,Mai ʼae puleʼaga ki ʼae puleʼaga.+
21 Neʼe mole ina tuku ke gaohi koviʼi natou e he tahi,+Kae neʼe ina fakatonutonuʼi ni hau ʼuhi ko natou,+
22 Neʼe ina ui: ‘ ʼAua naʼa kotou fāfā ki ʼaku fakanofo,Pea ʼaua naʼa kotou fai he meʼa ʼe kovi ki ʼaku polofeta.’+
23 Kotou hiva kia Sehova, hahaʼi fuli ʼo te kele!
Kotou tala tana haofaki ʼi te ʼaho fuli!+
24 Kotou tala tona kololia ʼi te ʼu puleʼaga,Mo ʼana gaue fakaofoofo ʼi te lotolotoiga ʼo te hahaʼi fuli.
25 Koteʼuhi ʼe lahi ia Sehova pea ʼe tuha mo ia te ʼu fakavikiviki fuli.
ʼE fakamanavahe ia ʼo lahi age ʼi te ʼu ʼatua fuli ʼae.+
26 Ko te ʼu ʼatua fuli ʼo te hahaʼi ʼe vaʼiganoa,+Kae ʼe ko Sehova ʼae neʼe ina fakatupu te lagi.+
27 ʼE ʼa takai ia ia e te ʼalikisia pea mo te taulekaleka.+ʼE maʼu te malohi pea mo te fiafia ʼi te faʼahi ʼae ʼe nofo ai.+
28 Kotou fakaʼapaʼapa kia Sehova, ʼu famili ʼo te hahaʼi fuli,Kotou fakaʼapaʼapa kia Sehova ʼuhi ko tona kololia pea mo tona malohi.+
29 Kotou foaki kia Sehova te kololia ʼae ʼe tuha mo tona huafa.+Kotou ʼaumai he meʼa ʼofa ki ʼona muʼa.+
Kotou tulolo ia muʼa ʼo* Sehova mo ʼokotou teu taputapu.*+
30 Kotou tekelili ʼi ʼona muʼa, hahaʼi fuli ʼo te kele!
Kua fakatuʼu malohi ia te kele, ʼe mole feala ke toe fakagaugaueʼi.*+
31 Ke fakafiafia te lagi, pea ke fakafiafia te kele.+Kotou tala ʼi te ʼu puleʼaga: ‘Kua Hau ia Sehova!’+
32 Ke ʼuʼulu te tai mo te ʼu meʼa fuli ʼae ʼe maʼuʼuli ʼi ai.Ke fakafiafia te ʼu potu fenua laulelei mo te ʼu meʼa fuli ʼae ʼi ai.
33 Ke toe kalaga fakafiafia mo te ʼu fuʼu ʼakau ʼo te vao matuʼa ia muʼa ʼo Sehova,He ʼe* haʼu ʼo fakamauʼi te kele.
34 Kotou fakafetaʼi kia Sehova he ʼe agalelei,+Pea ʼe ina fakaha tona ʼofa agatonu ʼo talu ai.+
35 Ke kotou ui: ‘ ʼAtua e, tomatou haofakiʼaga, haofaki matou,+Mo fakatahiʼi matou mo fakaʼateainaʼi matou mai te ʼu puleʼaga,Ke feala hamatou fakakololiaʼi tou huafa taputapu+Pea mo vikiʼi fakafiafia ia koe.+
36 Ke vikiʼi ia Sehova, te ʼAtua ʼo IselaeleʼO heʼe gata.’ ”*
Neʼe ui leva e te hahaʼi fuli: “Ameni!”* pea neʼe natou vikiʼi ai ia Sehova.
37 Neʼe tuku ai leva e Tavite ia Asafe+ mo ʼona tehina ʼi te muʼa aleka ʼo te fuakava ʼa Sehova, ke hoko atu pe tanatou gaue ʼi te muʼa Aleka,+ ʼo mulimuli pe ki te gaue ʼae neʼe tonu ke fai ʼi te ʼaho takitahi.+
38 Ko Opeto-etome mo te toko 68 ʼo ʼona tehina, mo Opeto-etome te foha ʼo Setutune pea mo Hosa, neʼe ko te ʼu tagata leʼo matapa.
39 Pea neʼe ina tuku ia Satoke+ te pelepitelo pea mo te kau pelepitelo ʼae neʼe gaue mo ia, ʼi te muʼa tapenakulo ʼo Sehova ʼi te faʼahi maʼoluga ʼae ʼi Kipeone.+
40 Neʼe natou momoli tuʼumaʼu ai te ʼu holokoseta kia Sehova ʼi te ʼaletale ʼo te holokoseta, ʼi te uhu mo te afiafi, pea mo fai te ʼu meʼa fuli ʼae neʼe tohi ʼi te Lao ʼa Sehova, ʼae neʼe ina fakatotonu ki Iselaele.+
41 Neʼe fakatahi mo natou ia Emani, mo Setutune+ pea mo te toe ʼo te ʼu tagata ʼae neʼe filifili mo hinoʼi ke natou fakafetaʼi kia Sehova,+ he ʼe “ina fakaha tona ʼofa agatonu ʼo talu ai.”+
42 Neʼe fakatahi mo natou ia Emani+ mo Setutune, ke natou pupuhi te ʼu fakatagi pupuhi, mo ta te ʼu simepale pea mo te ʼu meʼa faimaholo ʼae neʼe fakaʼaogaʼi moʼo vikiʼi ia* te ʼAtua moʼoni. Neʼe leʼo e te ʼu foha ʼo Setutune+ te matapa.
43 Neʼe toe liliu leva te hahaʼi fuli ki ʼonatou ʼapi, pea neʼe alu ia Tavite ʼo tapuakiʼi tona loto fale.
Nota
^ Vakaʼi Te ʼu Kupu.
^ Hep. “manatuʼi ia.”
^ Hep. “fetapa ki.”
^ Peʼe “ta he fasi.”
^ Peʼe lagi “palalau ʼo ʼuhiga mo.”
^ Hep. “Te folafola ʼae neʼe ina fakatotonu.”
^ Peʼe lagi “ ʼuhi ko te taulekaleka ʼo tona maʼoniʼoni.”
^ Peʼe “atolasio kia.”
^ Peʼe “luluʼi,” peʼe “ueʼi.”
^ Peʼe “He ʼe kua.”
^ Peʼe “Mai te heʼe gata ki te heʼe gata.”
^ Peʼe “Fai pe ki ai.”
^ Peʼe “te ʼu meʼa faimaholo ʼo te hiva ʼo.”
