ʼUluaki Hau 22:1-53
22 Pea lolotoga taʼu ʼe tolu neʼe mole fetauʼaki ia Silia mo Iselaele.
2 ʼI te tolu taʼu, neʼe alu leva ia Sosafate, te Hau+ ʼo Suta ki te hau ʼo Iselaele.+
3 Pea neʼe ui e te hau ʼo Iselaele ki ʼana hahaʼi faifekau: “ ʼE kotou iloʼi koa la ʼe ʼa tatou te kolo ko Lamoti-kileate?+ Kae ʼe tou tuʼania ʼi tona toe toʼo mai te hau ʼo Silia.”
4 Neʼe ina ui leva kia Sosafate: “ ʼE ke haʼu anai koa mo au ki te tau ʼi Lamoti-kileate?” Neʼe tali age e Sosafate ki te hau ʼo Iselaele: “ ʼE au hage pe ko koe. ʼE hage pe taku hahaʼi ko tau hahaʼi pea ʼe hage pe ʼaku hosi ko ʼau hosi.”+
5 Kae neʼe ui e Sosafate ki te hau ʼo Iselaele: “Fakalelei siʼou loto, kae ke ke fakafehuʼi muʼa+ ia Sehova ʼo ʼuhiga mo te faʼahi ʼaia.”+
6 Neʼe fakatahiʼi ai e te hau ʼo Iselaele te kau polofeta, ʼae neʼe ko tagata ʼe teitei toko 400, pea neʼe ina ui age kia natou: “ ʼE tonu koa ke au alu ʼo tauʼi ia Lamoti-kileate peʼe kailoa?” Neʼe natou tali age: “Alu pea ʼe tuku anai e Sehova te kolo ki ʼou nima.”
7 Neʼe ui leva e Sosafate: “ ʼE mole ʼi ai koa la he polofeta ʼa Sehova ʼi heni? Ta toe fakafehuʼi te ʼAtua ʼaki ia ia.”+
8 Pea neʼe ui e te hau ʼo Iselaele kia Sosafate: “ ʼE kei ʼi ai pe te tagata ʼe feala ke ta fakafehuʼi ia Sehova ʼaki ia ia.+ Kae ʼe au fehiʼa ia ia+ he ʼe mole he temi ʼe ina fakakikite ai he ʼu meʼa ʼe lelei ʼo ʼuhiga mo au, gata pe ki he ʼu meʼa ʼe kovi.+ ʼE ko Mikaia, te foha ʼo Simila.” Kae neʼe ui e Sosafate: “ ʼE mole tonu ke palalau feia te hau.”
9 Koia, neʼe pauʼi ai e te hau ʼo Iselaele he tagata ʼe gaue ʼi tona fale hau ʼo ina ui age: “Foimo ʼaumai ia Mikaia, te foha ʼo Simila.”+
10 Neʼe tahi heka leva te hau ʼo Iselaele pea mo Sosafate, te hau ʼo Suta ki tona hekaʼaga fakahau, mo ʼonā teu fakahau, ʼi te hahaʼaga fulumeto ʼae ʼi te huʼaga ʼo te matapa ʼo Samalia. Pea neʼe faifakakikite te kau polofeta fuli ʼi ʼonā muʼa.+
11 Pea neʼe faʼu e Setesiasi, te foha ʼo Kenaana he ʼu tala ukamea pea neʼe ina ui: “Koʼeni te folafola ʼa Sehova: ‘ ʼE ke hukiʼi* anai te kau Silia ʼaki te ʼu tala ʼaeni, ʼo kaku ki tau pulihi katoa natou.’ ”
12 Neʼe toe faifakakikite feia pe te tahi ʼu polofeta, ʼo natou ui: “Alu ki Lamoti-kileate pea ʼe ke malo anai. ʼE tuku anai e Sehova te kolo ki te ʼu nima ʼo te hau.”
13 Pea ko te tagata ʼave logo ʼae neʼe alu ʼo kumi mai ia Mikaia, neʼe ina ui ki ai: “ ʼE fakakikite e te kau polofeta fuli he ʼu meʼa ʼe lelei ʼo ʼuhiga mo te hau. Koia, fakalelei siʼou loto, ke ke toe fai feia mo koe, ke ke fakakikite he ʼu meʼa ʼe lelei.”+
14 Kae neʼe ui age e Mikaia: “ ʼE au tala moʼoni atu ia muʼa ʼo Sehova, te ʼAtua maʼuli, ko te meʼa pe ʼae ʼe ui mai e Sehova, ʼe ko te meʼa pe ʼaia ka au fakaha.”
15 Pea neʼe haʼu leva kia muʼa ʼo te hau, pea neʼe fehuʼi age e te hau: “Mikaia, ʼe tonu koa ke matou olo ʼo tauʼi ia Lamoti-kileate peʼe kailoa?” Neʼe ina tali atu aipe: “Alu pea ʼe ke malo anai. ʼE tuku anai e Sehova te kolo ki ʼou nima.”
16 Pea neʼe ui age e te hau ki ai: “ ʼE au kole atu ke ke fakapapauʼi mai ʼe ke fakaha mai anai te moʼoni ʼi te huafa ʼo Sehova. ʼE tonu koa ke au kole tuʼa fia atu?”
17 Koia, neʼe ui leva e Mikaia: “ ʼE au sio ki te mavetevete ʼa te kau Iselaele fuli ʼi te ʼu moʼuga,+ ohage ko ni ovi ʼe mole honatou tagata tauhi ovi. Neʼe ui e Sehova: ‘ ʼE mole honatou pule. Ke tahi liliu ki tona ʼapi ʼi te tokalelei.’ ”
18 Neʼe ui leva e te hau ʼo Iselaele kia Sosafate: “Neʼe mole au ui atu koa la ʼe mole ina fakakikite anai he ʼu meʼa ʼe lelei ʼo ʼuhiga mo au, gata pe ki he ʼu meʼa ʼe kovi?”+
19 Neʼe ui leva e Mikaia: “Koia, ke ke fagono ki te folafola ʼaeni ʼa Sehova: Neʼe au sio kia Sehova ʼe ʼafio ʼi tona hekaʼaga fakahau+ pea mo te tutuʼu ʼi ʼona tafa ʼo te foʼi kautau katoa ʼo te ʼatu lagi, ʼi tona toʼomataʼu mo tona toʼohema.+
20 Neʼe ui leva e Sehova: ‘Ko ai ʼae ka ina kakaʼi anai ia Akapo, ke alu ki Lamoti-kileate pea ke mate ai?’ Pea neʼe tali e he ʼaselo te tahi meʼa kae ui e te tahi age ʼaselo te tahi meʼa.
21 Pea neʼe haʼu leva he ʼaselo*+ ʼo tuʼu ia muʼa ʼo Sehova pea neʼe ina ui age: ‘ ʼE au kakaʼi anai ia ia.’ Neʼe fehuʼi age e Sehova: ‘ ʼO feafeaʼi?’
22 Neʼe ina tali age: ‘ ʼE au alu anai ʼo uga ʼana polofeta fuli ke natou tala ni loi.’+ Pea neʼe ina ui age: ‘ ʼE ke kakaʼi anai ia ia, pea ʼe ke fakahoko anai. Alu pea ke fai te meʼa ʼaia.’
23 Koia, neʼe fakagafua ai e Sehova ke uga e he ʼaselo tau kau polofeta fuli ʼaeni ke natou tala ni loi,+ kae kua ʼosi fakatuʼutuʼu e Sehova ke ina fakahoko kia koe he malaʼia.”+
24 Neʼe fakaovi age leva ia Setesiasi, te foha ʼo Kenaana kia Mikaia, ʼo pāki ia ia pea mo ui age: “ ʼE ke ui koa neʼe mavae te laumalie ʼo Sehova ia au pea neʼe alu atu ʼo palalau kia koe?”+
25 Neʼe tali age e Mikaia: “ ʼE hoki ke mahino pe anai ʼi te ʼaho ʼae ka ke alu ai ʼo nono ʼi te koga fale taupotu.”
26 Neʼe ui leva e te hau ʼo Iselaele: “Kotou toʼo ia Mikaia ʼo ʼave kia Amone, te pule ʼo te kolo pea mo Soasi, te foha ʼo te hau.
27 Pea kotou ui kia naua: ‘Koʼeni te meʼa ʼae ʼe ui e te hau: “Kolua tuku te tagata ʼaeni ki te fale pilisoni+ pea kolua fafaga ia ia ʼaki he kiʼi moʼi pane pea mo he moʼi vai ʼo kaku ki taku toe liliu mai ʼi te tokalelei.” ’ ”
28 Kae neʼe ui e Mikaia: “Kapau ʼe ke toe liliu mai ʼi te tokalelei, pea neʼe mole palalau ia Sehova mo au.”+ Neʼe ina toe ui: “ ʼU hahaʼi, ke kotou logo fuli ki ai.”
29 Pea neʼe olo ai leva te hau ʼo Iselaele mo Sosafate, te hau ʼo Suta ki Lamoti-kileate.+
30 Neʼe ui leva e te hau ʼo Iselaele kia Sosafate: “ ʼE au tui anai he tahi age ʼu teu ke mole iloʼi au e he tahi pea ʼe au alu anai ki te tau, kae ko koe ʼe ke tui anai ʼou teu fakahau.” Koia, neʼe tui ai e te hau ʼo Iselaele he tahi age ʼu teu+ pea neʼe alu leva ki te tau.
31 Pea neʼe fakatotonu e te hau ʼo Silia ki ʼana tagata pule saliote tau ʼe toko 32:+ “ ʼAua naʼa kotou tauʼi ʼanatou tagata solia peʼe ko ʼonatou pule, kae ke kotou tauʼi pe te hau ʼo Iselaele.”
32 Pea ʼi te temi pe ʼae neʼe sisio ai ia te kau tagata pule saliote tau kia Sosafate, neʼe natou manatu: “ ʼE mahino papau ia ʼe ko te hau ʼaeni ʼo Iselaele.” Neʼe natou olo ai ʼo tauʼi ia ia. Pea neʼe kalaga leva ia Sosafate ke tokoni age he tahi.
33 Kae ʼi te sisio leva ʼa te kau tagata pule saliote tau neʼe mole ko te hau ʼo Iselaele, neʼe natou tuku atu aipe tanatou tuli ia ia.
34 Kae neʼe hoko fanahi feia pe e he tagata he kauʼi nahau, ʼo lavea ai te hau ʼo Iselaele. Neʼe tau te kauʼi nahau ʼi te vaha ʼo he ʼu faʼahi ʼe lua ʼo tona teu tau. Pea neʼe ui e te hau ki te tagata ʼae neʼe ina taki tana saliote: “Maliu he ʼe tonu ke au mavae ʼi te tau, he ʼe kua au lavea kovi.”+
35 Neʼe malohi ʼosi te tau ʼi te ʼaho katoa ʼaia, pea neʼe puke e ʼihi ia te hau ke tuʼu maʼu ʼi tana saliote tau, ʼo haga ki te kau Silia. Neʼe hali te toto ʼo tona lavea ʼi te loto saliote tau, pea neʼe mate leva ʼi te afiafi.+
36 ʼI te to ʼo te laʼa, neʼe kalaga ʼi te nofoʼaga solia: “Ke tahi liliu ki tona kolo! Ke tahi liliu ki tona fenua!”+
37 Neʼe mate ai te hau pea neʼe ʼave leva ki Samalia ʼo ʼavaifo ai.
38 ʼI tanatou fufulu tana saliote tau ʼi te maʼanuʼaga ʼo Samalia, neʼe ʼomai te ʼu kuli ʼo ʼemo tona toto pea neʼe maʼanu te hahaʼi paomutu ʼi ai,* ohage pe ko tona fakaha e Sehova.+
39 Pea ko te toe ʼo te hisitolia ʼo Akapo, te ʼu meʼa fuli ʼae neʼe ina fai, mo te fale hau ivuale*+ ʼae neʼe ina laga pea mo te ʼu kolo fuli ʼae neʼe ina laga, ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele?
40 Neʼe mate leva ia Akapo*+ pea neʼe hau leva tona foha ko Akasia+ ʼo fetogi ia ia.
41 Neʼe liliu ia Sosafate,+ te foha ʼo Asa ko te hau ʼo Suta ʼi te fa taʼu ʼo te pule ʼa Akapo, te Hau ʼo Iselaele.
42 Neʼe taʼu 35 ia Sosafate ʼi te temi ʼae neʼe liliu ai ko he hau, pea neʼe pule lolotoga taʼu ʼe 25 ʼi Selusalemi. Neʼe higoa tana faʼe ko Asupea, neʼe ko te ʼofafine ʼo Silesi.
43 Neʼe ina faʼifaʼitakiʼi pe te ʼu aga fuli ʼa Asa,+ tana tamai. Neʼe mole maliu kehe mai ai, pea neʼe ina fai te meʼa ʼae ʼe lelei kia mata ʼo Sehova.+ Kae neʼe mole ina pulihi te ʼu faʼahi maʼoluga, pea neʼe kei fai pe e te hahaʼi ni sakilifisio mo tutu ke kohu ni sakilifisio ʼi te ʼu faʼahi maʼoluga.+
44 Neʼe tokalelei pe ia Sosafate mo te hau ʼo Iselaele.+
45 Pea ko te toe ʼo te hisitolia ʼo Sosafate, ʼana malo ʼi te tau pea mo ʼana tau, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta?
46 Neʼe ina toe pulihi foki ʼi te fenua te hahaʼi paomutu* ʼae neʼe kei toe ʼo te fale lotu+ he neʼe mole kapu e tana tamai ko Asa.+
47 Neʼe mole he hau ʼi Etome,+ kae neʼe ko te kovana pe ia.+
48 Neʼe toe faʼu foki e Sosafate ni vaka ʼo Talesisi* ke olo ki Ofile ʼo fetuku mai te aulo,+ kae neʼe mole olo he neʼe mou te ʼu vaka ʼi Esioni-kepele.+
49 ʼI te temi ʼaia, neʼe ui e te foha ʼo Akapo ko Akasia kia Sosafate: “Tuku ke olo ʼaku hahaʼi faifekau mo ʼau hahaʼi faifekau ʼi te ʼu vaka,” kae neʼe mole tali e Sosafate.
50 Neʼe mate leva ia Sosafate* pea neʼe ʼavaifo ohage ko ʼana kui+ ʼi te Kolo ʼo Tavite, tana kui. Pea neʼe hau leva ia Solame, tona foha+ ʼo fetogi ia ia.
51 Neʼe liliu leva ia Akasia,+ te foha ʼo Akapo ko te hau ʼo Iselaele ʼi Samalia ʼi te 17 taʼu ʼo te pule ʼa Sosafate, te Hau ʼo Suta. Neʼe pule ki Iselaele lolotoga taʼu ʼe lua.
52 Neʼe ina haga fai pe te meʼa ʼae ʼe kovi kia mata ʼo Sehova pea mo faʼifaʼitakiʼi te aga ʼa tana tamai+ mo tana faʼe+ pea mo te aga ʼa Selopoamo, te foha ʼo Nepate, ʼae neʼe ina uga ia Iselaele ke agahala.+
53 Neʼe haga atolasio kia Paale,+ mo tulolo ʼi ʼona muʼa pea mo haga fakatupu te hauhau ʼo Sehova, te ʼAtua ʼo Iselaele,+ ohage pe ko tana tamai.
Nota
^ Peʼe “leʼei.”
^ Hep. “laumalie.”
^ Peʼe lagi “ ʼae neʼe maʼanu ai te hahaʼi paomutu, neʼe ʼomai te ʼu kuli ʼo ʼemo tona toto.”
^ ʼE ko he meʼa maʼuhiga ʼe lanu hina pea ʼe haʼu mai te ʼu nifoʼi alefani pea mo ʼihi manu.
^ Hep. “Neʼe ʼave leva ia Akapo ke takoto fakatahi mo ʼana kui.”
^ Vakaʼi Te ʼu Kupu.
^ Vakaʼi Te ʼu Kupu.
^ Hep. “Neʼe ʼave leva ia Sosafate ke takoto fakatahi mo ʼana kui.”
