ʼUluaki Hau 19:1-21
19 Pea neʼe fakamatala leva e Akapo+ kia Sesapele+ te ʼu meʼa fuli ʼae neʼe fai e Elia pea mo tana matehi te kau polofeta fuli ʼaki te heleta.+
2 Neʼe fekauʼi ai e Sesapele he tagata ʼave logo ke ina ui kia Elia: “Ke tauteaʼi lahi au e te ʼu ʼatua, mo kapau ʼe mole au fai apogipogi kia koe, ʼi te hola pe ʼaeni, te meʼa ʼae neʼe ke fai ki te kau polofeta ʼaia!”
3 Neʼe mataku ai ia Elia, pea neʼe hola ke haofaki tona maʼuli.*+ Neʼe tau leva ki Pele-sepa,+ ʼi Suta,+ pea neʼe ina tuku ʼi ai tana tagata gaue.
4 Neʼe alu ki te toafa pea neʼe haʼele ʼi he ʼaho katoa. Neʼe heka leva ʼi he lalo fuʼu ʼakau pea neʼe ina kole ke mate. Neʼe ina ui: “Kua feʼauga! Sehova e, ʼi te temi nei ke ke toʼo toku maʼuli,*+ he ʼe mole au lelei age au ʼi ʼaku kui.”
5 Neʼe takoto leva ʼi te lalo fuʼu ʼakau ʼaia pea neʼe maʼumoea ai. Kae fokifa pe neʼe fāfā he ʼaselo ki ai+ pea mo ui age ki ai: “Tuʼu ake ʼo kai.”+
6 Neʼe sio ki he foʼi pane takafuafua ʼi he ʼu maka kakaha pea mo he ʼaiʼaga vai neʼe tuku ovi age ki tona ʼulu. Neʼe kai ai mo inu, pea neʼe toe takoto leva.
7 Ki muli age, neʼe toe haʼu te ʼaselo ʼa Sehova, ko tona tuʼa lua ʼaia, ʼo fāfā ki ai pea mo ui age: “Tuʼu ake ʼo kai, he ʼe ke faifagona anai ʼi he ala loaloaga pea ʼe faigataʼa anai kia koe.”
8 Neʼe tuʼu ake ai, ʼo kai mo inu. Pea ʼaki te malohi ʼae neʼe ina maʼu mai te meʼa kai ʼaia, neʼe haʼele lolotoga ʼaho ʼe 40 mo po ʼe 40 ʼo kaku ki Olepe, te moʼuga ʼo te ʼAtua moʼoni.+
9 Neʼe ulu leva ki he ʼana+ pea neʼe nofo ai ʼi te poʼuli. Pea neʼe ui age e Sehova ki ai: “Elia, kotea ʼae ʼe ke fai ʼi heni?”
10 Neʼe ina tali age: “Neʼe au tauhi kia te koe, Sehova, te ʼAtua ʼo te ʼatu kautau ʼaki he toe faʼafai.+ Kae neʼe liʼaki e te hahaʼi ʼo Iselaele tau fuakava,+ neʼe natou maumauʼi ʼou ʼaletale pea neʼe natou matehi ʼau polofeta ʼaki te heleta.+ ʼE ko au tokotahi pe ʼae ʼe kei toe. Pea ʼi te temi nei, ʼe natou kumi ke natou matehi au.”+
11 Kae neʼe Ina ui age: “Alu ki tuʼa ʼo tuʼu ʼi te moʼuga ia muʼa ʼo Sehova.” Pea neʼe fakalaka leva ia Sehova,+ pea neʼe agi malohi he matagi ʼo holo ai te ʼu moʼuga mo maumauʼi ai te ʼu foʼi maka ia muʼa ʼo Sehova,+ kae neʼe mole nofo ia Sehova ʼi te matagi. Hili te agi ʼo te matagi, neʼe to leva he mafuike,+ kae neʼe mole nofo ia Sehova ʼi te mafuike.
12 Hili te mafuike, neʼe to leva he afi,+ kae neʼe mole nofo ia Sehova ʼi te afi. Pea hili te afi, neʼe ʼi ai leva he leʼo veliveli mo malū.+
13 ʼI te logo ʼa Elia ki ai, neʼe ina pulouʼi atu aipe tona fofoga ʼaki tona pulupulu,+ pea neʼe hu ki tuʼa ʼo tuʼu ʼi te huʼaga ʼo te ʼana. Pea neʼe ʼi ai leva he leʼo neʼe ina fehuʼi age ki ai: “Elia, kotea ʼae ʼe ke fai ʼi heni?”
14 Neʼe ina tali age: “Neʼe au tauhi kia te koe, Sehova, te ʼAtua ʼo te ʼatu kautau ʼaki he toe faʼafai. Kae neʼe liʼaki e te hahaʼi ʼo Iselaele tau fuakava,+ neʼe natou maumauʼi ʼou ʼaletale pea neʼe natou matehi ʼau polofeta ʼaki te heleta. ʼE ko au tokotahi pe ʼae ʼe kei toe. Pea ʼi te temi nei, ʼe natou kumi ke natou matehi au.”+
15 Pea neʼe ui age e Sehova ki ai: “Toe liliu, pea ke alu ki te toafa ʼo Tamaso. Ka ke tau atu ki ai, ʼe tonu anai ke ke fakanofo ia Hasaele+ ke hau ki Silia.
16 Pea ʼe tonu anai ke ke fakanofo ia Seu,+ te mokopuna ʼo Nimesi ko te hau ʼo Iselaele, pea ke ke fakanofo ia Eliseo,* te foha ʼo Sapate mai te kolo ko Apele-meola, ko te polofeta ʼae ka ina fetogi koe.+
17 Pea ko he tahi pe ʼe hao mai te heleta ʼa Hasaele,+ ʼe matehi anai ia ia e Seu,+ pea ko he tahi pe ʼe hao mai te heleta ʼa Seu, ʼe matehi anai ia ia e Eliseo.+
18 Pea ʼe kei toe he toko 7 000 hahaʼi ʼi Iselaele+ neʼe mole natou tuʼutuli ia muʼa ʼo Paale+ pea mo ʼuma ki ai.”+
19 Koia, neʼe mavae leva mai ai pea neʼe ina maʼu ia Eliseo, te foha ʼo Sapate neʼe lolotoga fuli kele mo te ʼu hoaʼi vitulo ʼe 12 ʼi ʼona muʼa, pea neʼe ina taki te hoaʼi vitulo fakamuli. Neʼe fakaovi age ia Elia pea neʼe ina li tona pulupulu+ ki ai.
20 Neʼe ina tuku ai te ʼu vitulo kae lele kia Elia pea neʼe ina ui age: “Fakalelei siʼou loto, tuku muʼa ke au alu ʼo tauʼine mo* taku tamai mo taku faʼe. Pea hili leva, ʼe au mulimuli anai ia koe.” Neʼe ina tali age: “Alu, toe liliu kio koe, ʼe mole au taʼofi anai koe.”
21 Neʼe toe liliu ai pea neʼe ina toʼo he hoaʼi vitulo ʼo sakilifisioʼi, pea neʼe ina tutu te ʼu ʼakau toho moʼo fakamoho ʼaki te kanoʼi manu, pea neʼe ina foaki ki te hahaʼi ke natou kai. Hili ʼaia, neʼe tuʼu ake ʼo mulimuli ia Elia pea neʼe liliu ai ko tana tagata faifekau.+
Nota
^ Hep. nèphèsh. Vakaʼi Te ʼu Kupu.
^ Hep. nèphèsh. Vakaʼi Te ʼu Kupu.
^ Ko tona fakaʼuhiga “Ko Sehova Te Haofakiʼaga.”
^ Hep. “ ʼo ʼuma ki.”
