ʼE feala pe ke tou ui ko te Tohi-Tapu katoa ʼe ko he logo mai te ʼAtua. Neʼe foaki mai e tatatou Tamai ʼae ʼi selo moʼo akoʼi ʼo tatou. Kaʼe tou vakaʼi muʼa te ʼu logo makehe ʼe lua neʼe fakaha kua hili ki ai taʼu ʼe 2 000 tupu. Neʼe fakaha e te ʼaselo ʼe higoa ko Kapeliele, ʼae ʼe “tuʼu ia muʼa ʼo te ʼAtua.” (Luka 1:19) Neʼe feafeaʼi te aluʼaga ʼo natou ʼae neʼe fakaha age ki ai te ʼu logo maʼuhiga ʼaia?

Neʼe lagi ko te taʼu 3 I.M.T.S. a Neʼe fakaha ʼifea e Kapeliele ia te ʼuluaki logo? ʼI te ʼu moʼuga ʼo Sutea, lagi mole vaha mamaʼo mo Selusalemi. Neʼe maʼuli ai te pelepitelo ʼa Sehova neʼe higoa ko Sakalia. Ko ia mo tona ʼohoana, ia Elisapeta, neʼe kua nā matutuʼa pea neʼe mole hanā fanau. Neʼe hoko mai leva te temi ʼae ke fakahoko ai e Sakalia tana gaue fakapelepitelo, ʼi te fale lotu ʼa te ʼAtua ʼi Selusalemi. ʼI te nofo ʼa Sakalia ʼi te fale lotu, neʼe ha fakafokifa age ia Kapeliele ʼi te vaʼe ʼaletale ʼo te iseso.

ʼE mahino ia, neʼe mataku ia Sakalia. Kaʼe neʼe fakafimalieʼi e te ʼaselo te loto ʼo Sakalia, ʼo ina ui fenei age: “ ʼAua naʼa ke mataku, Sakalia, koteʼuhi neʼe tali lelei tau kole mamahi, pea ko tou ʼohoana ia Elisapeta ʼe ina fanauʼi anai hou foha, pea ʼe ke fakahigoaʼi anai ko Soane.” Neʼe hoko atu e Kapeliele, ʼo ina ui ko Soane “ ʼe maʼuhiga anai kia mata ʼo Sehova” pea ʼe ina “teuteuʼi [anai] he hahaʼi maʼa Sehova.”—Luka 1:13-17.

Neʼe faigataʼa kia Sakalia tana tui ki ai. Kotea tona tupuʼaga? He neʼe kua nā matutuʼa. Koia neʼe ui fenei ai age e Kapeliele: “ ʼE ke nofo fakalogologo anai pea ʼe mole ke lava palalau anai ʼo kaku ki te ʼaho ʼae ka hoko ai te ʼu meʼa ʼaia, he neʼe mole ke tui ki ʼaku folafola.”—Luka 1:20.

Ko te hahaʼi ʼae neʼe nonofo ʼi tuʼa, neʼe natou feʼekeʼaki pe koʼe ʼe nofo fualoa feia ia Sakalia ʼi loto. Neʼe hu mai leva ki tuʼa, kaʼe neʼe mole kei feala hana palalau. Neʼe palalau fakatuli pe ia. Neʼe natou mahino ai, neʼe lagi sio ki he meʼa fakaofoofo ʼi te fale lotu.

ʼI te ʼosi fakahoko e Sakalia tana gaue ʼi te fale lotu, neʼe toe liliu ki tona ʼapi. Mole fualoa, pea faitama ia Elisapeta. Lolotoga mahina ʼe nima, neʼe nofo ia Elisapeta ʼi tona ʼapi ʼo mamaʼo mai te hahaʼi, ʼo kaku ki tana fanau.

Pea neʼe toe ha ia Kapeliele, ko tona tuʼa lua ʼaia. Kia ai? Ki te taʼahine neʼe heʼeki ʼohoana neʼe higoa ko Malia, neʼe maʼuli ʼi te kolo ko Nasaleti, ʼae ʼe tuʼu ʼi te koga fenua ko Kalilea. Pea kotea ʼae neʼe ui age e te ʼaselo? Neʼe ina ui fenei age: “Kua ke maʼu te ʼofa ʼo te ʼAtua.” Neʼe ina hoko atu fenei: “ ʼE ke faitama anai, pea ʼe ke fanauʼi anai he tama, ʼo ke fakahigoaʼi anai ia ia ko Sesu.” Pea neʼe ina ui fenei ʼo ʼuhiga mo Sesu: “ ʼE maʼuhiga anai pea ʼe fakahigoa anai ko te ʼAlo ʼo te Maʼoluga . . . pea ʼe hau anai ia ki te ʼapi ʼo Sakopo ʼo talu ai, pea ʼe mole he gataʼaga anai ʼo tona Puleʼaga.”—Luka 1:30-33.

ʼE mahino ia neʼe fiafia ia Kapeliele ʼi tana maʼu te pilivilesio ʼae ke ina fakaha te ʼu logo ʼaia ʼe lua. ʼI tatatou lau te ʼu hisitolia ʼo ʼuhiga mo Soane pea mo Sesu, ʼe tou mahino lelei anai pe koʼe neʼe maʼuhiga ʼaupito te ʼu logo ʼaia neʼe haʼu mai selo.