Neʼe fia uga e Sesu te hahaʼi, ʼaki he ʼu faʼahiga fai ʼe kehekehe, ke natou fakakaukauʼi pe neʼe feafeaʼi tanatou felogoʼi mo te ʼAtua. Neʼe hoko ia he aluʼaga feia hili tana faipalalau mo te hahaʼi ʼae neʼe nonofo ʼi tuʼa ʼi te ʼapi ʼo te Faliseo.

Neʼe fakamatala e niʼihi he tuʼutamaki neʼe hoko. Neʼe natou palalau ʼo ʼuhiga mo “ni kau Kalilea ʼae neʼe matehi e [te Kovana Loma ko Posio] Pilato ʼi te temi ʼae neʼe natou ʼaumai ai ʼanatou sakilifisio.” (Luka 13:1) He koʼe neʼe natou palalau ʼo ʼuhiga mo te faʼahi ʼaia?

Neʼe lagi ko te kau Kalilea ʼaia neʼe matehi ʼi te temi ʼae neʼe fakafeagai ai te toko lauʼi afe kau Sutea kia Pilato, ʼi tana fakaʼaogaʼi te falā mai te koloa ʼo te fale lotu, moʼo laga ia he haliʼaga vai ke ʼaumai ai te vai ki Selusalemi. Neʼe lagi maʼu e Pilato te falā ʼaia ʼaki te tokoni ʼa te kau pule ʼo te fale lotu. Ko natou ʼae neʼe natou fakamatala te tuʼutamaki, neʼe lagi natou manatu neʼe hoko te aluʼaga ʼaia ki te kau Kalilea he neʼe natou fai he ʼu meʼa ʼe kovi. Kaʼe neʼe mole manatu tahi ia Sesu mo natou.

Neʼe ina fehuʼi fenei age kia natou: “ ʼI takotou manatu, neʼe tau koa te kau Kalilea ʼaia mo te ʼu mamahi ʼuhi he neʼe lahi age ʼanatou agahala ʼi te kau Kalilea fuli ʼae?” Pea neʼe ui e Sesu neʼe mole koia ʼaia. Kaʼe neʼe ina fakaʼaogaʼi te faʼahi ʼaia moʼo fai te fakatokaga ʼaeni ki te kau Sutea: “ ʼE fakaʼauha anai mo koutou fuli ohage pe ko natou mo kapau ʼe mole kotou fakahemala.” (Luka 13:2, 3) Pea neʼe talanoa leva ia Sesu ʼo ʼuhiga mo te tahi tuʼutamaki neʼe lagi heʼeki faʼa fualoa tona hoko pea neʼe lagi ʼi ai hona pikipikiga mo te laga ʼo te haliʼaga vai. Neʼe ina fehuʼi fenei:

“Ko te toko 18 ʼae neʼe holo ifo kia natou te tule ʼo Siloame ʼo natou mamate ai, ʼi takotou manatu neʼe lahi age koa tanatou lakahala ʼi te hahaʼi fuli ʼae ʼe maʼuʼuli ʼi Selusalemi?” (Luka 13:4) Neʼe lagi manatu te hahaʼi neʼe mamate ia natou ʼaia ʼuhi he neʼe natou agakovi. Neʼe toe fakaha e Sesu tana mole manatu tahi mo natou. Neʼe ina iloʼi “ko te ʼu temi pea mo te ʼu meʼa fakafokifa” ʼe hoko ki te hahaʼi fuli, pea neʼe ko te faʼahi la ʼaia neʼe hoko ʼi te tuʼutamaki. (Ekelesiasi 9:11, MN) Kaʼe neʼe tonu ke taʼofi e te hahaʼi he ako mai te aluʼaga ʼaia. Neʼe ui fenei e Sesu: “ ʼE fakaʼauha anai mo koutou fuli ohage pe ko natou mo kapau ʼe mole kotou fakahemala.” (Luka 13:5) He koʼe koa neʼe filifili e Sesu te temi ʼaia moʼo fakamaʼuhigaʼi te ako ʼaia?

Koteʼuhi he neʼe ko te temi fakaʼosi ʼaia ʼo tona minisitelio, pea neʼe ina fai ai te lea fakatata ʼaeni: “Neʼe ʼi ai he fuʼu fiku ʼi te gaueʼaga vite ʼa he tagata, pea neʼe haʼu te tagata ʼo kumi he ʼu fua kaʼe neʼe mole hona ʼu fua. Pea neʼe ina ui fenei age ki te tagata gaue vite: ‘Kua taʼu tolu taku haʼu ʼo kumi he ʼu fua ʼo te fuʼu fiku ʼaeni, kaʼe ʼe mole hona ʼu fua. Tuʼusi koe! Kotea te ʼuhiga ʼo tana haga fakakaka te kele?’ Pea neʼe ina tali fenei age kia ia: ‘Pule, tuku ʼi te taʼu katoa ʼaeni ʼo kaku ki taku keli ʼona tafatafa pea mo fakagako te kele. Kapau ʼe fua ʼi te ka haʼu, ʼe ko he meʼa lelei anai, kaʼe kapau ʼe mole fua pea ʼe hoki ke tuʼusi anai.’ ”—Luka 13:6-9.

ʼO laka atu ia taʼu ʼe tolu, neʼe faiga ia Sesu ke maʼu e te kau Sutea ia te tui. Kaʼe neʼe tokosiʼi ia natou ʼae neʼe liliu ko he ʼu tisipulo. Neʼe feala ke ui ʼo ʼuhiga mo natou ʼaia neʼe ko te ʼu fua ʼo tana gaue kinakina. Kaʼe ʼi te taʼu fa leva ʼaeni ʼo tona minisitelio, neʼe lahi age tana gaue. ʼI tana faifakamafola pea mo faiakonaki ʼi Sutea pea mo Pele, neʼe hage pe neʼe ina keli pea ina fakagako te kele ʼae neʼe to ai te fuʼu fiku, ʼae neʼe ina fakata te kau Sutea. Pea neʼe kotea tona fua? Neʼe tokosiʼi te kau Sutea ʼae neʼe natou tali  ia ia. Neʼe mole fia fakahemala ia te puleʼaga ʼo te kau Sutea, koia neʼe tonu ai ke fakaʼauha.

Hili ʼaia, neʼe toe ha lelei te mole tali e te tokolahi ia Sesu, ʼi te meʼa ʼae neʼe hoko ʼi te Sapato. Neʼe faiakonaki ia Sesu ʼi he sinakoka. Neʼe sio ki he fafine neʼe tuʼa piko talu mai taʼu ʼe 18 he neʼe fakamamahiʼi ia ia e he temonio. Neʼe manavaʼofa Sesu ki ai, ʼo ina ui fenei age: “Fafine, kua ke malolo mai tou mahaki.” (Luka 13:12) Neʼe hili e Sesu ʼona nima kia ia, pea neʼe tuʼu tonu ake aipe ʼo kamata fakakololiaʼi te ʼAtua.

Neʼe ita ai te pule ʼo te sinakoka, ʼo ina ui fenei: “ ʼE ʼi ai te ʼu ʼaho ʼe ono ʼe tonu ke gaue ai, koia kotou ʼomai ke fakamalolo koutou ʼi te ʼu ʼaho ʼaia, kaʼe mole ʼi te ʼaho ʼo te Sapato.” (Luka 13:14) Neʼe mole fakafisi te pule ki te maʼu e Sesu te malohi ke ina fakamalolo te kau mahahaki. Kaʼe neʼe ina valoki te hahaʼi he neʼe ʼomai ke fakamalolo natou ʼi te Sapato. Koia, ʼaki he ʼu palalau fakapotopoto, neʼe tali fenei age e Sesu: “Kau malualoi, ʼi te Sapato, ko ai koa ia koutou ʼe mole ina veteki tana vitulo peʼe ko tana asino ʼi te fale manu ʼo taki ʼo fakainu? Kaʼe ko te fafine ʼaeni, ʼae ʼe ko te ʼofafine ʼo Apalahamo, pea neʼe haʼi e Satana lolotoga taʼu ʼe 18, neʼe mole tonu koa la ke veteki ia ia mai ʼona haʼi ʼi te ʼaho ʼo te Sapato?”—Luka 13:15, 16.

Neʼe ufiufi ʼona fili, kaʼe neʼe fakafiafia te hahaʼi tokolahi ʼi tanatou sisio ki te ʼu meʼa taulekaleka ʼae neʼe fai e Sesu. ʼI te nofo leva ʼaia ʼa Sesu ʼi Sutea, neʼe ina toe fai te ʼu lea fakatata ʼe lua ʼo ʼuhiga mo te Puleʼaga, ʼae neʼe ina fai ʼi muʼa atu ʼi tana heka ʼi he vaka ʼi te Tai ʼo Kalilea.—Mateo 13:31-33; Luka 13:18-21.