Hili tana fakaha te agakovi ʼa te kau Faliseo ʼuhi ko ʼanatou talatisio ʼae neʼe ha ai tanatou manatu pe kia natou, neʼe mavae ia Sesu mo ʼana tisipulo. Neʼe alu ki te ʼu koga fenua ʼo Tile mo Sitoni ʼi Fenisia, ia lauʼi kilometa ʼi te potu noleto uesite.

Neʼe maʼu e Sesu he ʼapi ke nofo ai, pea neʼe mole ina loto ke iloʼi e te hahaʼi. Kaʼe neʼe mole feala ke nofo fakapulipuli ai. Neʼe ʼi ai te fafine Keleka neʼe tupu ʼi te koga meʼa ʼaia, neʼe ina maʼu ia Sesu pea neʼe ina kole fenei age: “ ʼAliki, Foha ʼo Tavite, ʼofa mai kia au. Kua kovi ʼosi taku taʼahine he neʼe ulu sino ai te temonio.”—Mateo 15:22; Maleko 7:26.

Hili ki ai he kiʼi temi, neʼe ui fenei e te ʼu tisipulo kia Sesu: “Fekau ke alu, he ʼe mole tuku tana kalaga mai.” Moʼo tali age kia natou, neʼe fakamahino age e Sesu te tupuʼaga ʼo tana mole tokagaʼi ia ia: “Neʼe fekauʼi mai pe au ki te ʼu ovi ʼae kua hehe ʼo te puleʼaga ʼo Iselaele.” Neʼe mole lotovaivai ai ia te fafine, kaʼe neʼe haʼu ʼo hu kia Sesu, ʼo ina kole mamahi fenei age: “ ʼAliki, tokoni mai kia au!”—Mateo 15:23-25.

Lagi moʼo ʼahiʼahiʼi tana tui, neʼe fai e Sesu he ʼu palalau fakatata moʼo talanoa ki te fakapalatahi ʼa te kau Sutea ki te hahaʼi matapule. Neʼe ina ui fenei: “ ʼE mole lelei ke toʼo te foʼi pane ʼa te ʼu fanau ʼo laku ki te ʼu ʼuhiʼi kuli.” (Mateo 15:26) ʼI tana ui ʼae “ ʼuhiʼi kuli,” neʼe fakaha e Sesu tona ʼofa ki te hahaʼi ʼae ʼe mole Sutea. Neʼe lagi toe ha ʼi tona fofoga pea mo tona leʼo.

Neʼe mole ita te fafine he neʼe mahino ki te talanoa ʼaia ʼa Sesu ki te fakapalatahi ʼa te kau Sutea. Koia ʼaki he agavaivai, neʼe ina ui fenei: “ ʼIo, ʼAliki, kaʼe ʼe kai e te ʼu ʼuhiʼi kuli te ʼu eveʼi pane ʼae ʼe maluku ifo mai te laupapa ʼo ʼonatou pule.” Neʼe fakaha e Sesu te lelei ʼo te loto ʼo te fafine ʼaia, ʼo ina ui fenei: “Fafine, ʼe malohi tau tui. Ke hoko kia koe ʼo mulimuli ki te meʼa ʼae ʼe ke loto ki ai.” (Mateo 15:27, 28) Pea neʼe hoko, logo la te mole ʼi ai ʼa te kiʼi taʼahine. ʼI te liliu ʼa te fafine ki tona ʼapi, neʼe ina maʼu atu tana kiʼi taʼahine ʼe takoto ʼi te palepale, pea kua malolo he neʼe “kua mavae te temonio.”—Maleko 7:30.

Neʼe mavae ia Sesu mo ʼana tisipulo mai te koga fenua ʼo Fenisia pea natou olo ai ki te Vai Tafe ʼo Solotane. Neʼe lagi natou fakalaka ʼi te Solotane ʼi he koga meʼa pe ʼi te potu noleto ʼo te Tai ʼo Kalilea, pea natou olo ki te koga fenua ʼo Tekapole. ʼI ai, neʼe natou hake ki he moʼuga kaʼe neʼe maʼu natou e te hahaʼi kaugā malie. Neʼe ʼaumai e te hahaʼi kia Sesu te kau ketu, mo te kau maʼimoa, mo te kau kivi pea mo te kau ʼalelo mate. Neʼe natou tuku ifo te hahaʼi mahahaki ʼaia ki te ʼu vaʼe ʼo Sesu, pea neʼe ina fakamalolo natou. Neʼe punamaʼuli te hahaʼi pea natou fakakololiaʼi ai te ʼAtua ʼo Iselaele.

Neʼe tokaga tafito leva ia Sesu ki te tagata neʼe tuli mo ʼalelo vale. ʼE feala hau mahino pe neʼe feafeaʼi te tagata ʼaia ʼi te lotolotoiga ʼo he hahaʼi kaugā malie. Neʼe lagi tokagaʼi e Sesu te hoha ʼa te tagata ʼaia, koia neʼe ina toʼo kehe ia ia mai te hahaʼi. ʼI tanā ʼateaina, neʼe fakaha age e Sesu pe kotea ʼae ka ina fai ki ai. Neʼe ina ʼai ʼona kauʼi tuhi ki te ʼu taliga ʼo te tagata, pea ʼi tana ʼosi ʼaʼanu, neʼe fa ki te ʼalelo ʼo te tagata. Pea neʼe hiki ake e Sesu ʼona mata ki te lagi, pea ina ui fenei age ki ai: “Efata,” ko tona fakaʼuhiga, “Ke ke ava.” Neʼe logo ai te tagata pea neʼe palalau lelei ai. Neʼe mole loto e Sesu ke fakahaha te meʼa ʼaia neʼe hoko, he neʼe loto ia ke tui te hahaʼi kia te ia ʼuhi ko te ʼu meʼa ʼae neʼe natou sisio mo logo tonu ki ai.—Maleko 7:32-36.

Neʼe malave ki te hahaʼi tanatou sisio ki te malohi ʼae neʼe maʼu e Sesu moʼo fakamalolo te kau mahahaki, pea “neʼe natou punamaʼuli ʼaupito ai.” Neʼe natou ui fenei: “ ʼE fakaofoofo ʼana gaue fuli. He ʼe kua toe logo te kau tuli mo toe palalau te kau ʼalelo mate.”—Maleko 7:37.