Neʼe maʼumaʼua ia Sesu mo ʼana tisipulo ʼe toko fa ʼi tanatou nonofo ʼaho katoa ʼi Kapenaume. ʼI te afiafi, neʼe ʼaumai e te hahaʼi ʼo Kapenaume ʼonatou hahaʼi ʼae neʼe mahahaki ke fakamalolo natou. Pea neʼe mole maʼu e Sesu he temi ke nofo tokotahi ai.

ʼI te uhu ake, kei hegihegi, pea kei fakapoʼuli, neʼe tuʼu ake leva ia Sesu ʼo alu tokotahi. Neʼe alu ki he koga meʼa lavaki ʼe feala ke faikole ʼateaina ai ki tana Tamai. Kaʼe neʼe mole fualoa ia te nofo tokotahi ʼa Sesu. ʼI te tokagaʼi ʼae e “Simone pea mo natou ʼae neʼe fakatahi mo ia” ʼe puli ia Sesu, neʼe natou olo ai ʼo kumi. Neʼe lagi taki natou e Petelo koteʼuhi neʼe nofo ia Sesu io ia.—Maleko 1:36; Luka 4:38.

ʼI tanatou maʼu ia Sesu, neʼe ui fenei age e Petelo: “ ʼE kumi koe e te hahaʼi fuli.” (Maleko 1:37) ʼE mahino ia, neʼe loto e te hahaʼi ʼo Kapenaume ke nofo ia Sesu mo natou. Neʼe natou leleiʼia ʼaupito te ʼu meʼa ʼae neʼe ina fai, koia neʼe natou “faigaʼi ke natou taʼofi ia ia.” (Luka 4:42) Kaʼe neʼe haʼu tafito koa ia Sesu ki te kele moʼo fai he ʼu fakamalolo fakamilakulo? Pea neʼe tonu pe koa ke fai ia tana gaue ʼi te kolo ʼaia? Kotea ʼae neʼe ina ui ʼo ʼuhiga mo te faʼahi ʼaia?

Neʼe tali fenei age e Sesu ki ʼana tisipulo: “Tou olo ki he tahi age koga meʼa, ki he ʼu kolo ʼe ovi mai, ke au toe faifakamafola ʼi ai, he ʼe ko te tupuʼaga ʼaia ʼo taku haʼu.” ’I tona fakahagatonu, neʼe ui age e Sesu ki te hahaʼi ʼae neʼe natou loto ke nofo mo natou: “ ʼE tonu foki ke au tala te logo lelei ʼo te Puleʼaga ʼo te ʼAtua ki te ʼu kolo ʼae, ko te tupuʼaga ʼaia ʼo toku fekauʼi mai.”—Maleko 1:38; Luka 4:43.

ʼEi, ko te tahi tupuʼaga tafito ʼo te haʼu ʼa Sesu ki te kele ʼe ko te fakamafola ʼo te Puleʼaga ʼo te ʼAtua. Ko te Puleʼaga ʼaia ʼe ina fakatapuha anai ia te huafa ʼo tana Tamai pea ʼe ina fakatokatoka anai ʼo talu ai te ʼu fihifihia fuli ʼo te tagata. Neʼe foaki e Sesu ia he ʼu fakamoʼoni neʼe fekauʼi mai ia ia e te ʼAtua ʼaki tana fakahoko te ʼu fakamalolo fakamilakulo. ʼO toe feia pe, ʼi he ʼu taʼu ʼe lauʼi teau ki muʼa atu, neʼe fai e Moisese ia he ʼu gaue fakaofoofo moʼo fakamoʼoni ʼaki neʼe fekauʼi ia ia e te ʼAtua.—Ekesote 4:1-9, 30, 31.

Neʼe mavae leva ia Sesu ʼi Kapenaume ʼo alu ʼo faifakamafola ʼi te tahi ʼu kolo pea mo ʼana tisipulo ʼe toko fa. Ko te toko fa ʼaia neʼe ko Petelo mo tona tehina ko Atelea, ʼo toe feia mo Soane mo tona tehina ko Sakopo. ʼI te vahaʼa ki muʼa atu, neʼe fakaafe natou e Sesu ke natou liliu ko ʼana ʼuluaki kaugā gaue mo kaugā fagona.

Ko te faifakamafola ʼa Sesu ʼi Kalilea mo ʼana tisipulo ʼe toko fa neʼe fua lelei. ’I tona fakahagatonu, neʼe mafola ia te logo ʼo ʼuhiga mo Sesu he “neʼe palalauʼi ia ia ʼi Silia katoa,” mo te potu fenua ʼo te ʼu kolo ʼe hogofulu ʼae neʼe toe fakahigoaʼi ko te Tekapole pea mo te tahi kauvai ʼo te Vai Tafe ʼo Solotane. (Mateo 4:24, 25) Neʼe tokolahi leva te hahaʼi mai te ʼu potu fenua ʼaia, ʼo toe feia mai Sutea neʼe natou mulimuli ia Sesu mo ʼana tisipulo. Tokolahi neʼe natou ʼaumai ia natou ʼae neʼe ʼaoga ke fakamalolo. Neʼe fai e Sesu ia te ʼu meʼa ʼae neʼe natou fakaʼamu ki ai: Neʼe ina fakamalolo te kau mahahaki mo kapu te ʼu temonio ʼae neʼe ulu sino ʼi te hahaʼi.