Kua ʼaho tolu leva ia te kau ʼa Natanaele ki te ʼu ʼuluaki tisipulo ʼa Sesu. Neʼe olo leva Sesu mo ʼihi ʼo ʼana ʼuluaki tisipulo ki te koga fenua ko Kalilea, ʼae neʼe natou tutupu ai. Neʼe natou olo ki Kana, te kolo ʼae neʼe tupu ai ia Natanaele, he neʼe fakaafe natou ki te kaitahi ʼo te faiʼohoana. Neʼe tuʼu ia Kana ʼi te ʼu moʼuga, pea neʼe vaha mamaʼo ʼi ni ʼu kilometa mo Nasaleti, ʼae neʼe lahilahi ake ai ia Sesu.

Neʼe toe kau mo te faʼe ʼa Sesu ʼi te faiʼohoana. Pea ʼuhi ʼae neʼe kaumeʼa ia Malia mo te ʼu famili ʼo te taumatuʼa, neʼe lagi kau ia ia ki te tokaga ʼae ki te kau fakaafe. Pea neʼe ina tokagaʼi ai te faʼahi, ʼo ina ui fenei ai kia Sesu: “ ʼE mole kei ʼi ai hanatou vino.”—Soane 2:3.

ʼI tona fakahagatonu, neʼe ui age e Malia kia Sesu ke ina fai he meʼa he neʼe mole kei ʼi ai he vino. Kaʼe neʼe tali fenei age e Sesu: “Fafine, kotea tona ʼuhiga kia koe pea mo au?” (Soane 2:4) ʼI te Fakakeleka, neʼe ha ʼi te kupusiga palalau ʼaia neʼe fakafeagai ia Sesu ki te ʼu palalau ʼae neʼe fai age. ʼUhi ʼae neʼe fakanofo ia ia e te ʼAtua ko he Hau, koia neʼe tonu ke takitaki te ʼu gaue ʼa Sesu e tana Tamai ʼae ʼi selo, kaʼe mole ko tona famili peʼe ko ʼona kaumeʼa. Koia neʼe maʼu e Malia te manatu fakapotopoto ʼae ke ina tuku ia te aluʼaga ʼaia ki tana tama, ʼo ina ui fenei age ki te kau faifekau: “Kotou fai ia meʼa fuli ʼe ina ui atu.”—Soane 2:5.

Neʼe ʼi ai te ʼu foʼi ʼutuʼaga vai maka ʼe ono, pea neʼe feala ke ʼai lite ʼe 40 ki te ʼutuʼaga vai ʼe tahi. Neʼe fakatotonu fenei age e Sesu ki te kau faifekau: “Kotou fakafonu vai te ʼu ʼutuʼaga vai.” Hili ʼaia, neʼe ui fenei e Sesu: “Kotou ohu pea mo kotou ʼave ki te pule ʼo te kaitahi.”—Soane 2:7, 8.

Neʼe punamaʼuli ia te pule ʼo te kaitahi ki te huʼa lelei ʼo te vino, kaʼe neʼe mole ina iloʼi neʼe ko te milakulo. Neʼe ina pauʼi leva ia te tagata ʼohoana ʼo ina ui fenei: “Ko te tagata fuli pe ʼe ina foaki muʼa te vino ʼae ʼe lelei, pea ka kua konahihia te hahaʼi, ʼe ina foaki leva te vino ʼae ʼe mole huʼa lelei. Kaʼe neʼe ke taupau koe te vino ʼae ʼe lelei ʼo kaku mai ki te temi ʼaeni.”—Soane 2:10.

Neʼe ko te ʼuluaki milakulo ʼaia neʼe fakahoko e Sesu. ʼI te sisio ʼo ʼana tisipulo foʼou ki te milakulo ʼaia, neʼe malohi ai tanatou tui ʼae kia te ia. Pea neʼe olo leva ia Sesu, mo tana faʼe pea mo ʼona tehina ki Kapenaume ʼi te potu noleto uesite ʼo te Tai ʼo Kalilea.