KAPITE 47

Kua Ke Tokalelei Koa Ki Te Papitema?

LAU

ʼI tau ako te Tohi-Tapu, neʼe lahi te ʼu faʼahi neʼe ke iloʼi ʼo ʼuhiga mo Sehova. Pea lagi neʼe ke fai he ʼu fetogi ke ke maʼuliʼi te ʼu faʼahi ʼaia neʼe ke ako. Kae ʼe lagi kei ʼi ai he meʼa ʼe ina taʼofi ai koe ke ke foaki tou maʼuli kia Sehova pea mo papitema. ʼE talanoa te kapite ʼaeni ki he ʼu fihifihia neʼe tau mo te tokolahi ʼi muʼa ʼo tanatou papitema. Pea ʼe fakamahino ai pe ʼe feafeaʼi hau tauʼi te ʼu aluʼaga ʼaia.

1. ʼE tonu koa ke ke iloʼi te ʼu meʼa fuli ʼi te Tohi-Tapu?

Kapau ʼe ke fia papitema, ʼe tonu ke ke maʼu “te ʼatamai malama totonu ʼo te moʼoni.” (1 Timoteo 2:4) ʼE mole fakaʼuhiga leva ʼe tonu ke ke lava tali ki te ʼu fehuʼi fuli ʼo ʼuhiga mo te Tohi-Tapu ʼi muʼa ʼo tau papitema. ʼE kei hoko atu pe la ia e natou ʼae kua fualoa tanatou papitema tanatou ako te Tohi-Tapu. (Kolose 1:9, 10) Kae ʼe tonu ke ke mahino ki te ʼu akonaki tafito ʼo te Tohi-Tapu. Kapau ʼe ke fakafuafua ʼe heʼeki ke maʼu he ʼatamai malama feʼauga, ʼe tokoni atu anai te kau tagata ʼafeā.

2. Kotea ʼihi aluʼaga ʼe tonu ke ke fai ʼi muʼa ʼo tau papitema?

ʼE tonu ke ke ‘fakahemala pea mo maliu mai.’ (Lau ia Gaue 3:19.) Ko tona fakaʼuhiga ʼe tonu ke ke fakahemala moʼoni ki te ʼu agahala neʼe ke fai ʼi muʼa atu pea mo kole te fakamolemole ʼa Sehova. ʼE tonu ke ke fakatotonu ke ke liʼaki te ʼu aga kovi fuli pea mo ke fai te ʼu meʼa ʼae ʼe leleiʼia e Sehova. Pea tahi, ʼe feala tau kau ki te ʼu fono pea mo faifakamafola fakatahi mo te kokelekasio.

3. He koʼe ʼe mole tonu ke ke mataku?

Ko ʼihi ʼe natou matataku naʼa mole natou lava fakahoko tanatou fakapapau kia Sehova. ʼE moʼoni, ʼi ʼihi temi ʼe feala ai ke ke fai ni hala. Kae ʼe mole ko koe pe. Neʼe toe fai feia pe la mo te ʼu tagata pea mo fafine agatonu ʼae ʼe talanoa ki ai te Tohi-Tapu. ʼE mole kole mai ia e Sehova ke haohaoa ʼana kaugana. (Lau ia Pesalemo 103:13, 14.) Ko te faʼahi ʼae ʼe maʼuhiga kia te ia ke ke fai te meʼa ʼae ʼe ke lavaʼi. Pea ʼe tokoni atu anai. ʼE ui mai e Sehova ʼe mole he meʼa “e feala anai ke ina fakamavae tatou mai [tona] ʼofa.”—Lau ia Loma 8:38, 39.

TA FAKALOLOTO

Tā vakaʼi pe ʼe feafeaʼi hau tauʼi te ʼu fihifihia ke ke kaku ki te papitema ʼaki hau ako ke ke iloʼi ia Sehova pea mo tali tana tokoni.

4. Ako ke ke iloʼi lelei age ia Sehova

ʼE tonu ke lahi feafeaʼi tau iloʼi ia Sehova ʼi muʼa ʼo tau papitema? ʼE tonu ke ke iloʼi lelei ia ia ke feala ai hau ʼofa pea mo fakafiafiaʼi ia ia. Vakaʼi te ʼATA VITEO pe neʼe fai feafeaʼi e te kau ako ʼae ʼi te malamanei katoa te faʼahi ʼaia. Pea fai te fehuʼi ʼae ʼe hoa mai.

ʼATA VITEO: Te ʼAla Ki Te Papitema (3:56)

Kotea ʼae neʼe fai e ʼihi tehina mo tuagaʼane ke feala ai hanatou papitema?

Lau ia Loma 12:2, pea fai te ʼu fehuʼi ʼaeni:

ʼE ke lotolotolua koa ʼo ʼuhiga mo te meʼa ʼae ʼe ui ʼi te Tohi-Tapu? Peʼe ke feuiʼaki pe ʼe akoʼi koa e te kau Fakamoʼoni ʼa Sehova ia te moʼoni?
Kapau koia, kotea ʼe feala ke ke fai?

5. Tauʼi te ʼu fihifihia

Ka tou fakatuʼutuʼu ke tou foaki totatou maʼuli kia Sehova pea mo papitema, ʼe tou tau mo ni fihifihia. ʼE ʼi ai te faʼifaʼitaki, vakaʼi te ʼATA VITEO pea fai te ʼu fehuʼi ʼae ʼe hoa mai.

ʼATA VITEO: ʼAki Te ʼOfa ʼa Sehova ʼe Au Lava Tauʼi Te ʼu Fihifihia (5:22)

Kotea te ʼu fihifihia neʼe tauʼi e Narangerel ke feala hana tauhi kia Sehova?
Neʼe tokoni feafeaʼi ki ai tona ʼofa kia Sehova ke ina lava tauʼi te ʼu fihifihia ʼaia?

Lau ia Taʼaga Lea 29:25 mo 2 Timoteo 1:7, pea fai te fehuʼi ʼaeni:

He koʼe ʼe tou lava tauʼi te ʼu fihifihia?

6. Falala ki te tokoni ʼa Sehova

ʼE tokoni atu anai ia Sehova ke ke fai te meʼa ʼae ʼe ina leleiʼia. Vakaʼi te ʼATA VITEO, pea fai te ʼu fehuʼi ʼae ʼe hoa mai.

ʼATA VITEO: ʼE Tokoni Anai Ia Sehova Kia Koe (2:50)

Kotea te faʼahi ʼae neʼe ina tataʼofi ia ia ʼae ʼe ako ke mole papitema?
Kotea ʼae neʼe tokoni ki ai ke ina fakamalohiʼi tana falala kia Sehova?

Lau ia Esaia 41:10, 13, pea fai te fehuʼi ʼaeni:

He koʼe ʼe ke falala ʼe ke lava taupau anai tau fakapapau moka ke papitema?

7. Ke ke lotofakafetaʼi lahi ki te ʼofa ʼo Sehova

Ka ke fakakaukauʼi te ʼofa ʼo Sehova kia koe, pea ʼe toe lahi age anai tau lotofakafetaʼi mo tau fia tauhi kia te ia ʼo talu ai. Lau ia Pesalemo 40:5, pea fai te fehuʼi ʼaeni:

Kotea te ʼu tapuakina ʼa Sehova ʼe ke leleiʼia age?

Neʼe ʼofa te polofeta ko Selemia ia Sehova pea mo tana folafola. Pea neʼe lotofakafetaʼi ʼaupito ki te pilivilesio neʼe ina maʼu ko te fua ʼo te huafa ʼo Sehova. Neʼe ina ui fenei: “ʼE fiafia toku loto ʼuhi ko tau folafola, koteʼuhi ʼe au fua tou huafa Sehova ʼAtua e.” (Selemia 15:16) Fai te ʼu fehuʼi ʼaeni:

He koʼe ʼe ko he pilivilesio takita liliu ko he Fakamoʼoni ʼa Sehova?
ʼE ke fia papitema koa ke ke liliu ko he Fakamoʼoni ʼa Sehova?
ʼE ʼi ai koa he meʼa ʼe ina taʼofi ai koe?
Kia koe la, kotea te meʼa ʼe tonu ke ke fai ke ke kaku ki te papitema?

ʼE UI E ʼIHI: “Ko te papitema ʼe ko he fakapapau maʼuhiga ia. Kae ʼe au mataku naʼa mole au lava fakahoko.”

ʼE ke toe logoʼi koa mo koe te faʼahi ʼaia?

MANATU TAFITO

ʼE feala ke ke tauʼi te ʼu fihifihia fuli ke ke kaku ki te papitema, ʼaki pe te tokoni ʼa Sehova.

Fehuʼi Fakamanatu

ʼE tonu koa ke ke iloʼi te ʼu meʼa fuli ʼi te Tohi-Tapu ʼi muʼa ʼo tau papitema?
Kotea te ʼu fetogi ʼe lagi tonu ke ke fai ʼi muʼa ʼo tau papitema?
He koʼe ʼe mole tonu ke ke mataku?

ʼAho neʼe fakaʼosi ai te Koga 3:

Taku Fakatuʼutuʼu

ʼE au vakaʼi te ʼu ʼa takai “Kua Au Tokalelei Koa Ke Au Faifakamafola Mo Te Kokelekasio?” pea “Kua Au Tokalelei Koa Ki Te Papitema?” ʼi te fakaʼosi ʼo te Koga 4.

Te tahi fakatuʼutuʼu:

Your other goal