ʼE mole tatau tatatou manatu ʼo ʼuhiga mo te kava. ʼI ʼihi temi, ʼe fiafia ʼihi ʼi tanatou inu kava fakatahi mo ʼonatou kaumeʼa. Ko ʼihi ʼe natou fakatotonu ke mole natou inu ki he moʼi kava. Pea ko ʼihi leva ia ʼe natou inu ʼo kaku ki tanatou konahihia. Kae kotea ʼe ui ʼi te Tohi-Tapu ʼo ʼuhiga mo te kava?

1. ʼE kovi koa te inu ʼo he moʼi kava?

ʼE mole tapuʼi mai ʼi te Tohi-Tapu te inu ʼo he moʼi kava. Kae, ʼe ui ai ʼe kau “te vino ke fiafia ai te tagata” ki te ʼu meʼa ʼofa ʼae neʼe foaki e te ʼAtua ki te tagata. (Pesalemo 104:14, 15) Pea ʼe toe talanoa ai ki ʼihi kaugana agatonu ʼa te ʼAtua neʼe natou inu tanatou moʼi kava.—1 Timoteo 5:23.

2. Kotea ʼe ui ʼi te Tohi-Tapu ʼo ʼuhiga mo natou ʼe inu hanatou moʼi kava?

ʼE fehiʼa ia Sehova ki te inu kava fakavalevale pea mo te konahia. (Kalate 5:21) ʼE ui fenei ʼi Tana Folafola: “ʼAua naʼa ke fakatahi mo natou ʼae ʼe natou inu fakavale te vino.” (Taʼaga Lea 23:20) Koia, kapau ʼe tou fakatuʼutuʼu ke tou inu he moʼi kava, ʼe mole tou inu anai ke pulinoa ʼosi te fakakaukau, peʼe ke mole kei tou lava lolomi ʼatatou palalau mo ʼatatou aga peʼe ke fakatupu kovi ki totatou maʼuli malolo. ʼE tatau pe mo kapau ʼe tou inu mo ʼihi peʼe tokotahi. Kapau ʼe mole tou lava inu fakapotopoto pea ʼe lelei age pe tona tuku fakalelei.

3. Kotea ʼe tonu ke tou fai moka ʼe kehe ʼatatou tonu mo ʼae ʼa ʼihi?

ʼE ʼa tatou takitokotahi te filifili pe ʼe tou inu he moʼi kava peʼe kailoa. Kapau ʼe inu fakapotopoto he tahi, ʼe tonu ke tou fakaʼapaʼapa ki ai. Kae kapau ʼe mole inu e he tahi hana moʼi kava, ʼe mole tonu ke tou fakakinauʼi ia ia ke inu. (Loma 14:10) Pea kapau ʼe feala ke tukia ʼi tana sio mai ʼae ʼe tou inu, pea ʼe mole tou inu anai. (Lau ia Loma 14:21.) ʼE ‘mole tou kumi anai te meʼa ʼae ʼe lelei kia tatou kae te meʼa ʼae ʼe lelei ki he tahi.’—Lau ia 1 Kolonito 10:23, 24.

 TA FAKALOLOTO

4. Filifili pe ʼe ke inu peʼe kailoa

Kotea te manatu ʼa Sesu ʼo ʼuhiga mo te kava? Kapau ʼe tou fia mahino, tou talanoa ki te ʼuluaki milakulo ʼae neʼe ina fai. Lau ia Soane 2:1-11, pea fai te ʼu fehuʼi ʼaeni:

• Kotea ʼe tou ako mai te milakulo ʼaeni ʼo ʼuhiga mo te faʼahiga sio ʼa Sesu ki te kava pea mo natou ʼae ʼe natou fakaʼaogaʼi?

• Kapau ʼe mole tapuʼi e Sesu takita inu, kotea te manatu ʼe maʼu e he Kilisitiano moka inu he tahi?

Koia, ʼe fakagafua ʼi te Tohi-Tapu ke inu e he Kilisitiano hana moʼi kava. Kae ʼi te tahi ʼu aluʼaga, ʼe lagi lelei age takita mole inu. Lau ia Taʼaga Lea 22:3, pea vakaʼi te faʼahiga maʼuliʼi ʼo te pelesepeto ʼaia ʼi te ʼu aluʼaga ʼaeni:

• ʼE ke taki he motoka peʼe ke fakaʼaogaʼi he masini.

• ʼE ke faitama.

• Neʼe fakatotonu atu e te toketa ke ʼaua tau inu.

• ʼE faigataʼa tau tataʼofi tau inu kava.

• ʼE mole fakagafua atu ʼi te lao ke ke inu kava.

• ʼE ke fakatahi mo he tahi neʼe ina filifili ke mole inu he neʼe ko tona fihifihia ko te kava ʼi te temi muʼa.

ʼE tonu koa ke ke fakaʼaogaʼi te kava ʼi he fakafiafia peʼe ko he ʼohoana? ʼI muʼa tau tali ki te fehuʼi ʼaia, vakaʼi te ʼATA VITEO.

Lau ia Loma 13:13 mo 1 Kolonito 10:31, 32. Hili te lau ʼo te ʼu vaega takitahi, pea fai te fehuʼi ʼaeni:

• ʼE tokoni feafeaʼi atu te pelesepeto ʼaeni ke ke toʼo he tonu ʼe lelei pea ke fiafia ai ia Sehova?

 5. Fakafuafua te moʼi kava ka ke inu

Kapau ʼe ke fakatuʼutuʼu ke ke inu, manatuʼi te faʼahi ʼaeni: Logo la ʼe fakagafua mai e Sehova ke tou inu he moʼi kava kae ʼe ina tapuʼi te inu kava fakavale. Kotea tona tupuʼaga? Lau ia Oseo 4:11, 18, pea fai te fehuʼi ʼaeni:

• Kotea ʼe feala ke hoko moka inu kava fakavale he tahi?

Kotea ʼae ʼe tokoni mai ke ʼaua naʼa tou inu kava fakavale? ʼE tonu ke tou fia malalo ʼo tou mahino ki ʼotatou tuʼakoi. Lau ia Taʼaga Lea 11:2, pea fai te fehuʼi ʼaeni:

• He koʼe ʼe lelei ke tou fakafuafua te moʼi kava ʼae ka kita inu?

6. Kotea ʼe tokoni mai ke tou tuku te inu kava fakavale?

 MANATU TAFITO

ʼE loto e Sehova ke tou fiafia moka tou inu he moʼi kava, kae ʼe ina tapuʼi te inu kava fakavale pea mo te popula ki te kava.

Fehuʼi Fakamanatu

• Kotea ʼe ui ʼi te Tohi-Tapu ʼo ʼuhiga mo te kava?

• Kotea te ʼu fua kovi moka tou inu kava fakavale?

• Kotea te manatu ʼe tonu ke tou maʼu ʼo ʼuhiga mo te ʼu tonu ʼe fai e ʼihi ki te kava?