KAPITE 35

ʼE Feafeaʼi Hau Toʼo Ni Tonu ʼe Lelei?

LAU

ʼE tou toʼo fuli ni tonu. Ohage la, ʼe filifili e ʼihi pe ko ai ka natou ʼohoanaʼi, pe kotea tanatou gaue peʼe nofoʼaga. Koia, ʼe feala ki te ʼu tonu ʼae ʼe natou fai ke ʼi ai hona ʼu fua ki tonatou maʼuli. Pea ʼe toe feala foki ki te ʼu tonu ʼae ʼe tou toʼo ke tou fakaovi ai kia Sehova peʼe kailoa. Kapau ʼe tou toʼo ni tonu ʼe lelei, ʼe tou fiafia anai ʼo feia mo Sehova.

1. ʼE tokoni feafeaʼi atu te Tohi-Tapu?

ʼI muʼa ʼo hau toʼo he tonu, kole kia Sehova ke ina takitaki koe, pea mo fakaʼaogaʼi te Tohi-Tapu ke ke iloʼi ai tana faʼahiga manatu. (Lau ia Taʼaga Lea 2:3-6.) ʼI ʼihi temi, ʼe ke maʼu anai he lao neʼe fakatuʼu ai e te ʼAtua. Pea ʼe lelei age ke ke fakalogo ki ai.

Kae ʼe feafeaʼi moka mole fakaha fakahagatonu mai ʼi te Tohi-Tapu te meʼa ʼae ʼe tonu ke kita fai? ʼE takitaki pe anai koe e Sehova ‘ʼi te ala ʼae ʼe tonu ke ke haʼele ai.’ (Esaia 48:17) ʼE ke maʼu ʼi te Tohi-Tapu he ʼu pelesepeto ʼe tokoni atu anai. Ko te ʼu pelesepeto ʼe ko he ʼu moʼoni tafito ʼi te Tohi-Tapu pea ʼe ha ai te manatu ʼa te ʼAtua peʼe ko te meʼa ʼae ʼe ina logoʼi. Ka ke lau he fakamatala ʼi te Tohi-Tapu, ʼe ke mahino ai ki tana faʼahiga manatu ʼo ʼuhiga mo he aluʼaga. Pea ka ke iloʼi tana manatu, ʼe ke toʼo anai ni tonu ʼe fiafia ai.

2. Kotea ʼae ʼe tonu ke ke fakakaukau ki ai?

ʼE ui ʼi te Tohi-Tapu ‘ʼe tokaga te tagata poto ki tana haʼele.’ (Taʼaga Lea 14:15) Ko tona fakaʼuhiga ʼe tonu ke kita fakakaukau ʼi muʼa ʼo takita toʼo he tonu. Ka tonu ke ke fai he tonu, fai te ʼu fehuʼi ʼaeni: “Kotea te ʼu pelesepeto ʼe feala ke tokoni mai? Kapau ʼe au toʼo te tonu ʼaeni, ʼe fimalie anai koa taku fakakaukau? ʼE malave feafeaʼi anai ki ʼihi te tonu ʼe au fai? ʼE au fakafiafiaʼi ai koa te loto ʼo Sehova?”—Tetelonome 32:29.

ʼE tou iloʼi ko Sehova pe ʼae ʼe tonu ke ina fakaha mai te meʼa ʼae ʼe lelei mo ʼae ʼe kovi. Kapau ʼe ke ako ke ke iloʼi ʼana lao mo ʼana pelesepeto pea mo fakaʼapaʼapa ki ai, ʼe ke akoʼi ai tou leʼo ʼo loto. Ko te leʼo ʼo loto ʼe ko he meʼa ʼe kita logoʼi ia kita ʼe ina ui mai pe ʼe lelei peʼe kovi he meʼa. (Loma 2:14, 15) Koia, ka ke akoʼi lelei tou leʼo ʼo loto, ʼe tokoni atu anai ke ke toʼo ni tonu ʼe lelei.

TA FAKALOLOTO

Ta vakaʼi te maʼuhiga ʼo te ʼu pelesepeto Fakatohi-tapu pea mo te leʼo ʼo loto moka kita toʼo he tonu.

3. Tuku ke takitaki koe e te Tohi-Tapu

ʼE tokoni feafeaʼi mai te ʼu pelesepeto ke tou toʼo ni tonu ʼe lelei? Vakaʼi te ʼATA VITEO, pea fai te ʼu fehuʼi ʼae ʼe hoa mai.

ʼATA VITEO: Tuku Ke Takitaki Koe e Te Tohi-Tapu (5:54)

Kotea ia te loto faʼitaliha?
He koʼe neʼe foaki mai e Sehova te loto faʼitaliha?
Kotea ʼae neʼe foaki mai e Sehova ke tou fakaʼaogaʼi lelei ai totatou loto faʼitaliha?

Lau ia Efeso 5:15, 16. ʼE tuʼu ʼi te ʼu vaega ʼaia te pelesepeto ʼaeni: “Kotou fakaʼaogaʼi lelei tokotou temi.” ʼE feafeaʼi hau maʼuliʼi te pelesepeto ʼaia moka tonu ke ke . . .

lau tuʼumaʼu te Tohi-Tapu?
toʼo he temi ke ke fakatahi ai mo tou hoa, peʼe fanau, peʼe ko ʼau matuʼā?
kau ki te ʼu fono?

4. Akoʼi tou leʼo ʼo loto

ʼI te agamahani, ʼe faigafua te fai ʼo he tonu ʼe lelei moka fakaha fakahagatonu mai ʼi te Tohi-Tapu te meʼa ʼe tonu ke kita fai. Kae ʼe feafeaʼi moka ʼe mole fakaha fakahagatonu mai? Vakaʼi te ʼATA VITEO pea fai te ʼu fehuʼi ʼae ʼe hoa mai.

ʼATA VITEO: “Kotou Taupau He Leʼo ʼo Loto ʼe Lelei” (5:13)

Kotea ʼae neʼe fai e Emma moʼo akoʼi tona leʼo ʼo loto pea ke ina toʼo ai he tonu ʼe fiafia ai Sehova?

He koʼe ʼe mole tonu ke tou fehuʼi ki ʼihi pe ko te tonu fea ʼae ʼe tonu ke tou toʼo? Lau ia Hepeleo 5:14 pea fai te ʼu fehuʼi ʼaeni:

Kotea ia te fealagia ʼe tou maʼu fuli?
Kotea te ʼu meʼa gaue ʼe tokoni mai ke tou akoʼi totatou leʼo ʼo loto ke tou toʼo ai ni tonu ʼe lelei?

ʼE hage pe totatou leʼo ʼo loto ko he mape ʼe tokoni mai ke tou toʼo ni tonu ʼe lelei

5. Ke ke tokagaʼi te leʼo ʼo loto ʼo ʼihi

ʼE mole tatau te ʼu tonu ʼae ʼe tou toʼo. ʼE ke fakaha feafeaʼi ʼe ke tokagaʼi te leʼo ʼo loto ʼo ʼihi? Ta vakaʼi faʼifaʼitaki ʼe lua:

Aluʼaga 1: ʼE leleiʼia e he tuagaʼane tana fai vavaʼe loloa moka ina fai ʼana gaue peʼe moka fakatahi mo ʼona kaumeʼa. Kae ʼe mole leleiʼia e te ʼu tuagaʼane ʼo tana kokelekasio tana faʼahiga teuteu ʼaia.

Lau ia Loma 15:1 mo 1 Kolonito 10:23, 24, pea fai te ʼu fehuʼi ʼaeni:

Kotea anai ka fai e te tuagaʼane ʼo mulimuli ki te ʼu vaega? Kapau ʼe ʼi ai he tahi ʼe manatu ʼe mole lelei te fai ʼo he meʼa kae ʼe mole hoha tou ia leʼo ʼo loto, kotea ʼe ke fai anai?

Aluʼaga 2: Logo la ʼe mole tapuʼi mai ʼi te Tohi-Tapu te inu kava, kae ʼe filifili e he tehina ke mole ina inu. ʼE fakaafe ia ia ki he kiʼi meʼa kai pea ʼe sio ʼe inu e ʼihi tehina mo tuagaʼane tanatou moʼi kava.

Lau ia Ekelesiasi 7:16 mo Loma 14:1, 10, pea fai te ʼu fehuʼi ʼaeni:

Kotea te tonu ʼe feala ke fai e te tehina ʼo mulimuli ki te ʼu vaega? Kapau ʼe ke sio ʼe fai e he tahi he meʼa ʼe tauteaʼi koe e tou leʼo ʼo loto, kotea ʼe ke fai anai?

Kotea ʼe tokoni atu ke ke toʼo ni tonu ʼe lelei?

1. Kole kia Sehova ke ina takitaki koe.—Sakopo 1:5.

2. Fai ni fekumi ʼi te Tohi-Tapu mo ʼatatou tohi ke ke maʼu te ʼu pelesepeto ʼe alu tahi mo tou aluʼaga. ʼE feala hau toe kole te tokoni ʼa ni tehina mo tuagaʼane kua fakapotopoto.