ʼE ui e te toko lauʼi miliale hahaʼi ʼe natou muliʼi ia Kilisito. Kae ʼe mole tatau te ʼu akonaki ʼe natou tui ki ai ʼo feia pe mo ʼanatou lao. Koia ʼe feafeaʼi hau iloʼi ia te kau Kilisitiano moʼoni?

1. Kotea te fakaʼuhiga ʼo te ui ʼae Kilisitiano?

Ko tona fakaʼuhiga ko he tisipulo ʼa Sesu Kilisito. (Lau ia Gaue 11:26.) ʼE ina fakaha feafeaʼi ko ia ko he tisipulo ʼa Sesu? Neʼe ui fenei e Sesu: “Kapau ʼe kotou nonofo ʼi taku folafola, ko koutou ko ʼaku tisipulo moʼoni.” (Soane 8:31) Kotea tona fakaʼuhiga? Ko tona fakaʼuhiga ʼe fakalogo te kau Kilisitiano moʼoni ki te ʼu akonaki ʼa Sesu. Neʼe fakatafito e Sesu ʼana akonaki ki te Tohi-Tapu. Koia, ʼe tonu ke toe feia mo te kau Kilisitiano moʼoni.—Lau ia Luka 24:27.

2. ʼE tonu ke natou fakaha feafeaʼi te ʼofa?

Neʼe ui fenei e Sesu ki ʼana tisipulo: “Kotou feʼofaʼaki ohage pe ko taku ʼofa ʼae ia koutou.” (Soane 15:12) Neʼe fakaha feafeaʼi e Sesu tona ʼofa ki ʼana tisipulo? Neʼe fakatahi tuʼumaʼu mo natou, mo tokoni pea mo fakalotomalohiʼi natou. Pea neʼe toe mate foki maʼa natou. (1 Soane 3:16) ʼO toe feia pe, ʼe mole tonu pe ke ui e te kau Kilisitiano moʼoni ʼe natou ʼofa. Kae ʼe tonu foki ke ha tanatou feʼofaʼaki ʼi ʼanatou palalau pea mo ʼanatou gaue.

3. Kotea te gaue ʼe natou fai?

Neʼe foaki e Sesu he gaue ki ʼana tisipulo. ‘Neʼe ina fekauʼi natou ke natou olo ʼo fakamafola te Puleʼaga ʼo te ʼAtua.’ (Luka 9:2) Neʼe mole faifakamafola pe te kau ʼuluaki Kilisitiano ʼi te ʼu koga meʼa ʼae ʼe fai ai te tauhi. Kae neʼe natou toe faifakamafola ʼi te ʼu koga meʼa ʼae ʼe hahaʼi pea mo te ʼu ʼapi. (Lau ia Gaue 5:42; 17:17.) ʼE toe feia pe ia ʼaho nei, ʼe fakamafola e te kau Kilisitiano moʼoni te ʼu moʼoni Fakatohi-tapu ia faʼahi fuli pe. ʼE natou fai te faʼahi ʼaia he ʼe natou ʼoʼofa ʼi te hahaʼi. Koia ʼe natou fiafia ʼi te fakaʼaogaʼi tonatou temi mo tonatou malohi moʼo fakaha te ʼamanaki mo te ʼu manatu fakalotofimalie ʼae ʼe tuʼu ʼi te Tohi-Tapu.—Maleko 12:31.

 TA FAKALOLOTO

4. ʼE natou kumi te moʼoni ʼi te Tohi-Tapu

5. ʼE natou fakamafola te ʼu moʼoni Fakatohi-tapu

 6. ʼE natou maʼuliʼi te ʼu meʼa ʼae ʼe natou ako

He koʼe neʼe tui papau ia Tom kua ina maʼu te kau Kilisitiano moʼoni? Vakaʼi te ʼATA VITEO, pea fai te ʼu fehuʼi ʼae ʼe hoa mai.

• Kotea neʼe ina uga ia Tom ke ina liʼaki te lotu?

• He koʼe ʼe tui papau kua ina maʼu te moʼoni?

ʼE malave age ʼatatou aga ʼi ʼatatou palalau. Lau ia Mateo 7:21, pea fai te fehuʼi ʼaeni:

• Kotea la ʼae ʼe maʼuhiga ʼi heni kia Sesu, ko takita ui ʼae ʼe kita tui peʼe ko takita fakaha te tui ʼaki ni gaue?

7. ʼE natou maʼuli feʼofaʼofani

• Neʼe feafeaʼi te aga ʼa te ʼu tisipulo ʼa Sesu (ia te kau Kilisitiano moʼoni) ki te hahaʼi ʼo te tahi ʼu lanu?

• Kotea ʼe natou fai ki te hahaʼi ʼaia moka hoko he tau?

 MANATU TAFITO

ʼE fakalogo ia kau Kilisitiano moʼoni ki te meʼa ʼae ʼe ui ʼi te Tohi-Tapu, mo natou maʼuli feʼofaʼofani pea mo fakamafola te ʼu moʼoni Fakatohi-tapu.

Fehuʼi Fakamanatu

• ʼE fakatafito kitea te ʼu akonaki ʼe tui ki ai ia te kau Kilisitiano moʼoni?

• Ko te kalitate fea ʼe feala ke iloʼi ai ia natou ʼaia?

• Kotea te gaue ʼae ʼe natou kau ki ai?