1, 2. Ko ai koa ʼaē ʼe fiafia mokā hoko he ʼu papitema?

KAPAU kua fualoa takotou tauhi ʼaē kiā Sehova, ʼe mahino ia kua kotou logo ki he ʼu tuʼuga akonaki ʼo ʼuhiga mo te papitema ʼi tatatou ʼu fakatahi lalahi. Kae tatau aipē peʼe kua tuʼa lahi ia takotou kau ʼaē ki te ʼu taʼi fakatahi ʼaia, kae ʼe kei malave tuʼumaʼu aipē kiā koutou takotou sisio ʼaē kiā nātou ʼaē ʼe heheka ʼi muʼa, ia tanatou tutuʼu ake ʼi muʼa ʼo te kaugamālie moʼo fakahā ia tanatou fia papitema. ʼI te lakaga ʼaia, ʼe tou logoʼi ʼi te nofoʼaki ia te fiafia ʼa te ʼu tehina mo tuagaʼane pea hoa mai kiai te ʼu pasipasi. ʼE lagi kotou tagi ʼi takotou sio ʼaē ʼe kei ʼi aipē te hahaʼi maʼuhiga ʼe natou lagolago kiā Sehova. ʼI toe fiafia lahi leva ʼe tou logoʼi ʼi te ʼu taʼi lakaga ʼaia!

² ʼI te taʼu kātoa, ʼe lagi mole lahi te ʼu lakaga ʼaē ʼe tou sio ai ki te ʼu papitema ʼi totatou fenua, kae ko te kau ʼāselo ʼe natou maʼu ia te pilivilēsio ʼaē ke natou mamata tuʼumaʼu ki te ʼu papitema ʼaē ʼe fai. Kotou fakakaukauʼi age muʼa ia te toe “fiafia ʼi selō” ʼi tanatou sisio ifo ʼi te vāhaʼa fuli ki te ʼu toko lauʼi afe hahaʼi ʼi te mālamanei ʼe hilifaki mai ki te kautahi ʼa Sehova ʼi te kele! (Luka 15:7, 10) ʼE mahino ia, ʼe fiafia ia te kau ʼāselo ʼi tanatou sisio ifo ki te tuputupu ʼaia!—Asea 2:7.

3. He koʼē ʼe feʼaluʼaki ia Satana “ohagē ko he laione ʼe gugulu,” pea koteā ʼaē ʼe loto kiai?

³ Kae ʼi te tahi age faʼahi, ʼe ʼi ai te ʼu laumālie ʼe natou sisio ifo ki te ʼu papitema ʼaia ʼe fai ʼaki he toe ʼita lahi. ʼE ʼiʼita ʼaupitō ia Satana pea mo te kau temonio ʼi tanatou sisio ifo ʼaē ki te ʼu toko lauʼi afe hahaʼi ʼe natou situʼa ki te mālamanei aga fakahehema. Neʼe lau e Satana ʼe mole ʼi ai anai he tahi ʼe tauhi kiā Sehova ʼaki he ʼofa  moʼoni pea ʼe mole nofo agatonu anai he tahi mokā ʼe ʼahiʼahiʼi. (Sopo 2:4, 5) Kā fakatuʼutuʼu e he tahi ke ina foaki tona maʼuli kiā Sehova, pea ʼi te temi ʼaia ʼe ina foaki he fakamoʼoni ko Satana ʼe gutuloi. ʼE hagē pē ʼi te vāhaʼa fuli ʼo te taʼu, ʼe fakalainoaʼi Satana e te ʼu toko lauʼi afe hahaʼi. ʼE mole tou punamaʼuli ai ʼi tana “feʼaluʼaki ohagē ko he laione ʼe gugulu, ʼo ina kumi ke ina kai he tahi”! (1 Petelo 5:8) ʼE loto e te “laione” ʼaia ke ina kai ia tātou ʼi te faʼahi fakalaumālie, ʼo ina uga tātou ke tou tuʼutāmakiʼia peʼe ke puli ia tatatou ʼu felōgoi lelei ʼaē mo te ʼAtua.—Pesalemo 7:1, 2; 2 Timoteo 3:12.

4, 5. (a) Koteā te ʼu fakatuʼutuʼu maʼuhiga e lua ʼaē neʼe fai e Sehova moʼo fakatuʼakoi ia te ʼu fakahala ʼa Satana? (b) Koteā ʼaē ʼe feala ke tui papau kiai ia he Kilisitiano moʼoni?

⁴ Logolā tatatou tauʼi ia he fili ʼe aga fekai, kae ʼe mole tonu ke tou mātataku ki ai. Koteā tona tupuʼaga? He neʼe fai e Sehova ia fakatuʼutuʼu e lua moʼo fakatuʼakoi te ʼu fakahala ʼa ‘te laione ʼaia ʼe gugulu.’ Koteā te ʼu fakatuʼutuʼu ʼaia? ʼUluaki fakatuʼutuʼu ʼaē ʼe maʼuhiga  tāfito, ko Sehova neʼe ina fakakikite ko “te toe hahaʼi tokolahi” ʼo te kau Kilisitiano moʼoni ʼe natou hao anai ʼi “te mamahi lahi” ʼaē kā hoko mai. (Fakahā 7:9, 14) ʼE hoko tuʼumaʼu pē ia te ʼu lea fakapolofetā ʼa te ʼAtua. Koia māʼiapē lā mo Satana ʼe ina ʼiloʼi ʼe mole feala ke ina molehi kātoa ia te hahaʼi ʼa te ʼAtua.

⁵ ʼE tou mahino ki te lua fakatuʼutuʼu ʼaē ʼe fakatuʼakoi ai te mālohi ʼo Satana, ʼi te ʼu palalau ʼaē neʼe fai e te tahi tagata agatonu ʼa te ʼAtua ʼo te temi muʼa. Neʼe ʼui fēnei e te polofetā ko Asalia ki te Hau ko Asa: “Ko Sehova ʼe nofo fualoa mo koutou mo kapau ʼe kotou nonofo mo ia.” (2 Fakamatala 15:2; 1 Kolonito 10:13) ʼE lahi te ʼu faʼifaʼitaki ʼi te temi muʼa ʼe hā mai ai neʼe mole lavaʼi e Satana ke ina fakahalaʼi ia te ʼu kaugana ʼa te ʼAtua ʼaē neʼe nonofo ovi ki te ʼAtua. (Hepeleo 11:4-40) Iā ʼaho nei, ko he Kilisitiano ʼe haga nofo ovi ki te ʼAtua ʼe feala anai ke fakafeagai ki te Tēvolo pea mo mālo iā ia. ʼI tona fakahagatonu, ʼe tou tui papau ki te ʼu palalau ʼaenī ʼi te Folafola ʼa te ʼAtua: “Kotou fakafeagai ki te Tēvolo, pea ʼe hola mamaʼo anai iā koutou.”—Sake 4:7.

6. ʼE tauʼi feafeaʼi e Satana ia te kau Kilisitiano takitokotahi?

⁶ ʼE mole feala ke mālo ia Satana ʼi te tau, kae ko te faʼahi ʼaē ʼe feala ke mālo ai, heʼe ina lava fakahalaʼi ia tātou takitokotahi mo kapau ʼe mole tou nonofo tōkakaga. ʼE ʼiloʼi e Satana ʼe feala hana kai tātou mo kapau ʼe ina lava maumauʼi tatatou ʼu felōgoi ʼaē mo Sehova. ʼE fakahoko feafeaʼi e Satana ia te faʼahi ʼaia? ʼAki hana tauʼi fakamālohi ʼo tātou takitokotahi, pea ʼi hona ʼaluʼaga fakakākā. Tou vakaʼi age muʼa ia te ʼu puleʼaki kākā tāfito ʼaia ʼe fai e Satana.

7. He koʼē kua fakamālohiʼi age e Satana ia tana ʼohofiʼi ʼaē ia te hahaʼi ʼa Sehova?

⁷ Te ʼu ʼohofi fakamataku. Neʼe ʼui fēnei e te ʼapositolo ko Soane: “Ko te mālamanei kātoa ʼe takoto ia ʼi te mālohi ʼo te agakovi.” (1 Soane 5:19) ʼI te ʼu palalau ʼaia ʼe maʼu ai he fakatokaga ki te kau Kilisitiano moʼoni fuli. Mai tona ʼaluʼaga ʼaē kua puleʼi e Satana ia te mālamanei kātoa agakovi, kua feala ʼi te temi nei ke haga tāfito ia ki te hahaʼi ʼa Sehova ʼaē ʼe mole heʼeki ina puleʼi, pea mo ina fakamālohiʼi age tana ʼu ʼohofi ʼaē ʼe ina fai kiā nātou ʼaia. (Mikea 4:1; Soane 15:19; Fakahā 12:12, 17) ʼE lahi ʼaupitō tona ʼita heʼe ina ʼiloʼi kua nounou tona temi. Koia ʼaē ʼe ina fakaʼāʼāsili ai tana ʼu fakahala.  Iā ʼaho nei, ʼe tou tau mo tana ʼu puleʼaki fakakākā fakaʼosi ʼaē moʼo fakaʼauha ʼo tātou. Koia, ʼi te temi nei kua maʼuhiga tāfito age ia ke tou “ ʼiloʼi te ʼu temi ke [tou] mahino ai ki te meʼa ʼaē ʼe tonu ke [tou] fai.”—1 Fakamatala 12:32.

8. Koteā te fakaʼuhiga ʼo te ʼu palalau ʼa te ʼapositolo ko Paulo ʼi tana ʼui ʼaē ʼe tou kau ki he “tau” ʼe fakafeagai ki te ʼu laumālie agakovi?

⁸ Te tau ʼaē ʼe tou kau takitokotahi kiai. Neʼe fakatokaga fēnei e te ʼapositolo ko Paulo ki te kau Kilisitiano: “Ko tatatou tau . . . ʼe fakafeagai ki te ʼu mālohi fakalaumālie agakovi ʼaē ʼe nonofo ʼi te ʼu potu ʼo te lagi.” (Efesi 6:12) Ko te kupu Fakakeleka ʼaē neʼe fakaliliu ʼaki te kupu “tau” ʼe fakaʼuhiga ki te “fehōkosi” ʼa he toko lua. Koia ʼi te fakaʼaogaʼi ʼaē e Paulo ʼo te kupu ʼaia, neʼe ina fia fakahā lelei ko tātou takitokotahi ʼe tou kau ki te tau ʼe fai ki te ʼu laumālie agakovi. Peʼe tou māʼuʼuli ʼi he fenua ʼe fakatui ia te hahaʼi ki te ʼu laumālie agakovi peʼe kailoa, kae ʼe mole tonu ke galo kiā tātou, ʼi te temi ʼaē ʼe tou foaki ai totatou maʼuli kiā Sehova, kua feala pē ke ʼui kua tou kamata kau ki te tau ʼaia. Talu mai te temi ʼaē neʼe foaki ai e te kau Kilisitiano takitokotahi ia tonatou maʼuli ki te ʼAtua, kua natou kau ki te tau ʼaia. Koia, ʼe tou mahino ai ki te fakalotomālohiʼi e Paulo tuʼa tolu ia te kau Kilisitiano ʼo Efesi ke natou “tutuʼu mālohi”!—Efesi 6:11, 13, 14.

9. (a) He koʼē ʼe fakaʼaogaʼi e Satana pea mo te kau temonio ia te ʼu faʼahiga “agakākā” kehekehe? (b) He koʼē ʼe faigaʼi e Satana ke ina ʼulihi tatatou ʼu manatu, pea ʼe tou lava tauʼi feafeaʼi tana ʼu faiga ʼaia? (Vakaʼi ʼi te ʼu  pāsina 192 ki te 193, ia te fakamatala ʼaē ʼe ʼātakai.) (c) Ko te agakākā fea ʼaē kā tou vakaʼi ʼi te temi nei?

⁹ Te ʼu faʼahiga fakatuʼutuʼu kākā. ʼE tokoniʼi e Paulo ia te kau Kilisitiano ke natou tutuʼu mālohi ʼo fakafeagai ki “te ʼu agakākā” ʼa Satana. (Efesi 6:11, kiʼi nota ʼi te lalo pāsina) Kotou tokagaʼi, neʼe talanoa Paulo ki te ʼu agakākā ʼe lahi kae mole ko he agakākā pē e tahi. ʼE mole fakaʼaogaʼi e te ʼu laumālie agakovi he kākā e tahi kae ko he ʼu faʼahiga kākā kehekehe, pea ʼe ʼi ai tona tupuʼaga. ʼAki te temi, ko ʼihi Kilisitiano ʼaē neʼe natou nonofo agatonu ʼi he ʼahiʼahi neʼe hoko kiā nātou, neʼe natou higa leva ʼi he tahi age ʼahiʼahi. Koia, ko te Tēvolo pea mo te kau temonio ʼe natou sivisivi fakalelei ia tatatou aga takitokotahi ke feala ai hanatou ʼiloʼi ia totatou ʼu vaivaiʼaga. Pea ʼe natou fakaʼaogaʼi leva totatou ʼu vaivaiʼaga ʼaia moʼo maumauʼi ai totatou maʼuli fakalaumālie. Kae meʼa lelei, heʼe feala ke tou ʼiloʼi ia te ʼu faʼahiga fakatuʼutuʼu ʼa te Tēvolo, heʼe fakahā lelei  mai ʼi te Tohi-Tapu. (2 Kolonito 2:11) ʼI te kamataʼaga ʼo te tohi ʼaenī, neʼe tou palalau ki te ʼu faʼahiga fakatuʼutuʼu ʼaia ʼa te Tēvolo, ohagē lā ko te hele ʼo ʼuhiga mo te ʼu koloa, te ʼu fakakaumeʼa ʼaē ʼe kovi, pea mo te aga heʼeʼaoga. Tou toe vakaʼi ʼi te temi nei te tahi agakākā ʼa Satana, ʼaē ko te gaohi meʼa fakatemonio.

10. (a) Koteā ia te fakaʼuhiga ʼo te gaohi meʼa fakatemonio? (b) Koteā te manatu ʼa Sehova ʼo ʼuhiga mo te gaohi meʼa fakatemonio, pea ʼe tonu ke feafeaʼi kiā koutou?

¹⁰ Ko he tahi ʼe gaohi meʼa fakatemonio ʼe felōgoi ia mo te ʼu laumālie agakovi. Ko te tivināsio, te ʼu meʼa fakatemonio, te faitutuku, pea mo te fai fehuʼi ki te kau mate ʼe ko he ʼu agaaga ʼo te gaohi meʼa fakatemonio. Kua tou ʼiloʼi lelei pē ko te gaohi meʼa fakatemonio ʼe ko he “meʼa fakalialia ia” kiā Sehova. (Teutalonome 18:10-12; Fakahā 21:8) ʼUhi ʼaē heʼe tou ‘fehiʼa mo tātou ki te meʼa ʼaē ʼe kovi,’ ʼe mole feala ia ke tou fia gaohi meʼa fakatahi mo te ʼu mālohi fakalaumālie agakovi. (Loma 12:9) ʼE ko he toe aga fakakākā fakalialia ʼaia kā tou fai anai kiā Sehova, tatatou Tamai ʼaē ʼe ʼi selō!

11. He koʼē ʼe ko he toe mālo lahi ʼa Satana mo kapau ʼe ina lavaʼi ke tou gaohi meʼa fakatemonio? Kotou tuku mai he faʼifaʼitaki.

¹¹ Kae mai tona ʼaluʼaga ʼaē ko te gaohi meʼa fakatemonio ʼe ko he aga fakakākā fakalialia ʼaia kiā Sehova, koia lā ʼaē ʼe faiga mālohi ai ia Satana ke fai e ʼihi iā tātou ia te aga ʼaia. ʼI te temi ʼaē ʼe lavaʼi ai e Satana ke gaohi meʼa fakatemonio ia he Kilisitiano, ʼe ko hana toe mālo lahi ʼaia. Koteā tona tupuʼaga? Kotou fakakaukauʼi age muʼa ia te fakatā ʼaenī: Kapau ʼe fakalotoʼi he tagata sōlia ke ina liʼaki pea mo kākāʼi tana foʼi kautau, kae ʼalu ia ʼo kau ki te foʼi kautau ʼaē ʼe fakafeagai mai, ʼe fiafia anai ia te kamutoa ʼo te foʼi kautau ʼaia. ʼE feala pē ki te kamutoa ʼaia ke ina fakahāhā ia te tagata sōlia ʼaia neʼe aga fakakākā ohagē ko hona fakapale moʼo fakalainoaʼi ia te kamutoa ʼo te foʼi kautau ʼaē neʼe kau ʼāfea kiai ia te tagata sōlia. ʼO toe fēia pē mo he Kilisitiano, kapau ʼe gaohi meʼa fakatemonio, pea ʼe situʼa anai ia kiā Sehova ʼi tona loto faʼifaʼitaliha pea mo liliu ʼi te temi ʼaia ʼo fakalogo ki te pule ʼa Satana. Kotou fakakaukauʼi age muʼa ia te toe fiafia lahi ʼa Satana ʼi tana fia fakahāhā ia ia ʼaē neʼe mavae ohagē ko hona fakapale ʼi te tau! ʼE ʼi ai koa he tahi iā tātou ʼe ina fia foaki ia he fakapale fēia ki te Tēvolo? Kailoa ia. ʼE mole tou fia lavakiʼi ia Sehova.

12. Koteā te hele ʼaē ʼe fakaʼaogaʼi e Satana ke feala ai hana fetogi tatatou manatu ʼo ʼuhiga mo te gaohi meʼa fakatemonio?

¹² Kapau ʼe tou fēhihiʼa tuʼumaʼu ki te gaohi meʼa fakatemonio, pea ʼe mole mālo anai Satana iā tātou ʼi tana fakaʼaogaʼi ia te hele ʼaia. Kae ʼe ina ʼiloʼi ʼe feala ke ina fetogi ia tatatou manatu. ʼO feafeaʼi? ʼE ina kumi he ʼu puleʼaki ke tupu ʼaki ai he manatu ʼa ʼihi Kilisitiano “ko te meʼa ʼaē ʼe lelei ʼe kovi pea ko te meʼa ʼaē ʼe kovi ʼe lelei.” (Isaia 5:20) Moʼo fakahoko ia te faʼahi ʼaia, ʼi te agamāhani ʼe fakaʼaogaʼi e Satana ia te hele ʼe fua tuʼumaʼu: ʼE ina lagaʼi ia he ʼu fehuʼi moʼo fakatupu ʼi te ʼatamai ʼo te hahaʼi ia te lotolotolua.

13. Neʼe fakaʼaogaʼi feafeaʼi e Satana te hele ʼaē ʼo te ʼu fehuʼi moʼo fakatupu ia he ʼu lotolotolua?

¹³ Kotou fakatokagaʼi pe neʼe fakaʼaogaʼi feafeaʼi e Satana te hele ʼaia ʼi te temi muʼa. ʼI Eteni, neʼe ina fehuʼi fēnei age kiā Eva: “ ʼE moʼoni koa lā neʼe ʼui atu e te ʼAtua ke ʼaua naʼa kolua kai ki te ʼakau fuli pē ʼaē ʼi te ʼōloto?” ʼI te temi ʼo Sopo, ʼi te lolotoga ʼo te fono ʼa te kau ʼāselo ʼi selō, neʼe lagaʼi ai e Satana ia te fehuʼi ʼaenī: “ ʼE mole ʼi ai koa lā he tupuʼaga ʼo te manavasiʼi ʼa Sopo ki te ʼAtua?” Pea ʼi te kamata ʼo te minisitelio ʼa Sesu ʼi te kele, neʼe ʼahiʼahiʼi e Satana ia Kilisito ʼo ina fehuʼi fēnei age: “Kapau ko te ʼalo koe ʼo te ʼAtua, fekau ki te ʼu maka ʼaenī ke liliu ko he ʼu pane.” Kotou fakakaukauʼi age muʼa, ʼi tana ʼahiʼahiʼi ʼaia ia Sesu, neʼe moamoagaʼi e Satana ia te ʼu folafola ʼaē neʼe fai e Sehova totonu iā vāhaʼa e ono ki muʼa atu, ʼi tana ʼui fēnei: “Ko ia nei ko toku ʼAlo, ia te ʼofaina, ʼaenī kua au fiafia ʼaupitō iā te ia.”—Senesi 3:1; Sopo 1:9; Mateo 3:17; 4:3.

14. (a) ʼE fakaʼaogaʼi feafeaʼi e Satana tana hele moʼo fakatupu ia he ʼu lotolotolua ʼo ʼuhiga mo te gaohi meʼa fakatemonio? (b) Koteā ʼaē kā tou vakaʼi anai ʼi te temi nei?

¹⁴ Iā ʼaho nei, ʼe fakaʼaogaʼi e te Tēvolo ia te hele fēia moʼo fakatupu ia he ʼu lotolotolua ʼo ʼuhiga mo te gaohi meʼa fakatemonio peʼe kovi. Meʼa fakaʼofaʼofa foki, he neʼe ina fakatupu ʼi te ʼatamai ʼo ʼihi tehina mo tuagaʼane ia te lotolotolua. Neʼe natou kamata feʼekeʼaki peʼe kovi moʼoni koa ʼihi faʼahiga gaohi meʼa fakatemonio? Neʼe natou manatu fēnei: ‘ ʼE moʼoni koa?’ (2 Kolonito 11:3) ʼE tou lava tokoni feafeaʼi kiā nātou ʼaia ke toe fetogi tanatou manatu? ʼE tou lava ʼiloʼi feafeaʼi ko te hele ʼaia ʼa Satana ʼe mole ʼi ai anai hona fua kiā tātou? Moʼo tali kiai, tou vakaʼi te ʼu faʼahi e lua ʼo totatou maʼuli neʼe ʼulihi māmālie e Satana ʼaki he ʼu meʼa fakatemonio. Ko te ʼu faʼahi ʼo te ʼu fakafiafia pea mo te kumi faitoʼo.

15. (a) ʼE feafeaʼi te manatu ʼa te hahaʼi tokolahi ʼi te ʼu fenua ʼo te Potu ʼUesitē ʼo ʼuhiga mo te gaohi meʼa fakatemonio? (b) Neʼe malave feafeaʼi ki te kau Kilisitiano ia te manatu ʼaē ʼe maʼu e te hahaʼi ʼo te mālamanei ʼo ʼuhiga mo te gaohi meʼa fakatemonio?

¹⁵ Tāfito lā ʼi te ʼu fenua ʼo te Potu ʼUesitē, ko te fai fakalauʼakau, mo te ʼu faʼahiga meʼa ʼaē moʼo fakamatakuʼi ʼo te hahaʼi, pea mo te tahi age ʼu meʼa fakatemonio ʼe mole kei fakaʼuhiga ia ohagē ko he ʼu meʼa ʼe kovi ki te maʼuli ʼo te hahaʼi. ʼI te ʼu ʼata, mo te ʼu tohi, mo te ʼu polokalama televisio pea mo te ʼu gaoʼi viteo, ʼe fakahāhā ʼaupitō ai te ʼu meʼa fakatemonio ohagē ko he meʼa fakakata, ʼe matalelei, pea ʼe mole fakatupu kovi ia ki he tahi. Ko ʼihi ʼata pea mo ʼihi tohi ʼaē ʼe fakahāhā ai pea mo fakamatala tāfito ai te ʼu meʼa fai fakalauʼakau, kua liliu ia ʼo leleiʼia e te hahaʼi tokolahi, ʼo natou fakatuʼu ai he ʼu kautahi ʼe lagolago ki te ʼu meʼa ʼaia. ʼE hā lelei mai, neʼe lava ia te ʼu kākā ʼaē ʼa te kau temonio, ke manatu ia te hahaʼi ʼe mole kovi ia te ʼu meʼa fakamanamana. Kua malave koa ki te kau Kilisitiano ia te faʼahiga manatu ʼaia ʼo ʼuhiga mo te gaohi meʼa fakatemonio? Neʼe malave ia te ʼu meʼa fakatemonio ʼaia ki te fakakaukau ʼa ʼihi Kilisitiano. ʼO feafeaʼi? Koʼenī te meʼa neʼe hoko, ʼi te ʼosi sioʼi e te Kilisitiano ia te ʼata neʼe talanoa tāfito ai ki te ʼu meʼa fakamanamana, neʼe ina ʼui fēnei: “Neʼe au sio ki te ʼata, kae neʼe mole au fai he ʼu meʼa fakatemonio.” He koʼē ʼe fakatupu tuʼutāmaki ia te taʼi manatu ʼaia?

16. He koʼē ʼe fakatupu tuʼutāmaki ia te filifili ʼo te ʼu fakafiafia ʼaē ʼe hā tāfito ai te ʼu meʼa fakamanamana?

¹⁶ Logolā te kehekehe ʼaē ʼo te gaohi meʼa fakatemonio pea mo tona sioʼi mokā ʼe fai e niʼihi, kae ʼe mole fakaʼuhiga anai ia ʼe mole fakatupu tuʼutāmaki ia te sioʼi ʼo te ʼu aga ʼaia. Koteā tona tupuʼaga? Kotou fakatokagaʼi ia te faʼahi ʼaenī: ʼE fakahā ʼi te Folafola ʼa te ʼAtua ʼe mole feala kiā Satana pea mo tana kau temonio ke natou ʼiloʼi tatatou ʼu manatu. * Kae ohagē ko tatatou ʼui ʼi te kamata ʼo te kāpite  ʼaenī, ke ʼiloʼi e te ʼu laumālie agakovi pe koteā tatatou ʼu manatu pea mo ʼiloʼi totatou ʼu vaivaiʼaga fakalaumālie, ʼe natou sivisivi ifo mai te lagi ia tatatou ʼu aga, ʼo fēia ki te ʼu fakafiafia ʼaē ʼe tou filifili. Kapau ʼe hā ʼi te aga ʼa he Kilisitiano ʼe ina leleiʼia ia he ʼu ʼata peʼe ko he ʼu tohi ʼe talanoa tāfito ai ki ni hahaʼi ʼe felōgoi mo he kau temonio, mo he ʼu meʼa fakamanamana, mo te gāue ʼa te hahaʼi ʼaē ʼe ʼulusino ai he temonio, peʼe ko he tahi age faʼahiga meʼa ʼe talanoa ai ki he ʼu meʼa fakatemonio, ʼe mahino ia ʼi te temi ʼaia, ʼe fakahā e te Kilisitiano ʼaia ki te kau temonio ia tona vaivaiʼaga. Pea ʼi te fakatokagaʼi ifo e te kau temonio ia te faʼahi ʼaia, ʼe feala ai leva ke natou fakaʼāʼāsili age tanatou fehōkosi mo te Kilisitiano ʼaia moʼo fakaʼaogaʼi ia tona vaivaiʼaga ʼaia ʼo aʼu ki tanatou mālo iā ia. ʼI tona fakahagatonu, neʼe tupu ia te fia ʼiloʼi ʼa ʼihi ia te ʼu meʼa fakatemonio he neʼe kamata ʼi te ʼu fakafiafia ʼaē neʼe natou mamata ai ki te ʼu meʼa fakamanamana, ʼo tupu moʼoni ai leva ia tanatou fia gaohi meʼa fakatemonio.—Kalate 6:7.

17. Koteā te agakākā ʼaē ʼe feala ke fakaʼaogaʼi e Satana moʼo kākāʼi ʼaki ia nātou ʼaē ʼe māhahaki?

¹⁷ ʼE faigaʼi e Satana ke ina fakaʼaogaʼi kovi totatou holi ʼaē ke tou fakafiafia pea mo tatatou fia maʼuli mālōlō. ʼO feafeaʼi? Ko he Kilisitiano logolā te ʼu faiga ʼaē ke ina maʼu hona faitoʼo kae ʼe mahamahaki pē ia, ʼe feala ke liliu ʼo lotovaivai. (Maleko 5:25, 26) ʼE ko he faigamālie ʼaia kiā Satana pea mo te kau temonio ke natou fakaʼaogaʼi tona vaivaiʼaga ʼaia moʼo kākāʼi ia ia. ʼE natou ʼiloʼi lelei pē ia te fakatokaga ʼaē ʼi te Folafola ʼa te ʼAtua, ke ʼaua naʼa kumi ‘tokoni kiā nātou ʼaē ʼe natou fai ia te meʼa ʼaē ʼe kovi.’ (Isaia 31:2) ʼE fai anai e te kau temonio ia he meʼa ke tupu ai he talagataʼa ʼa he Kilisitiano ki te fakatokaga ʼaia, koia ʼe lagi natou fakaneke anai ia ia ʼaē ʼe mahaki pea kua lotovaivai ke kumi tokoni ki he ʼu faitoʼo faifakalauʼakau ʼe fakaʼaogaʼi ai “te ʼu mālohi fakamanamana” peʼe gaohi meʼa fakatemonio ʼaē ʼe ko he meʼa ʼe fakatupu tuʼutāmaki ʼaupitō. Kapau ʼe iku te agakākā ʼaia ʼa te kau temonio, pea ʼe feala ke fakatupu kovi ki te ʼu felōgoi ʼo ia ʼaē ʼe mahaki pea mo te ʼAtua. ʼO feafeaʼi?

18. Ko te ʼu faʼahiga faitoʼo fea ʼaē ʼe fakafisi anai kiai ia he Kilisitiano, pea koteā tona tupuʼaga?

¹⁸ Neʼe fakatokaga fēnei ia Sehova ki te kau Iselaele ʼaē neʼe natou kumi tokoni ki “te ʼu mālohi fakamanamana”: “Kā kotou folahi  ʼokotou ʼalofiʼi nima, pea ʼe au fufū ʼoku mata ʼi ʼokotou muʼa. Logo aipē te lahi ʼo te ʼu kole ʼaē ʼe kotou fai, mole au fakalogo.” (Isaia 1:13, 15) ʼE moʼoni, ʼe tou loto tuʼumaʼu ke ʼaua naʼa tou fai he meʼa ʼe ina tāʼofi anai tatatou ʼu faikole ʼaē kiā Sehova pea mo tupu ai ʼo tana mole kei tokoni mai kiā tātou, kae tāfito age lā ia te ʼu temi ʼaē ʼe tou māhahaki ai. (Pesalemo 41:3) Koia, kapau ʼi te ʼu faitoʼo ʼaē ʼe fai mai kiā tātou, ʼe tou fakatokagaʼi ʼe ʼi ai hona pikipikiga mo he ʼu meʼa fakatemonio ke ʼiloʼi ai te mahaki ʼaē ʼe tou maʼu peʼe ko te faitoʼo ʼaē ke fai mai kiā tātou, pea ʼe tonu anai ki te Kilisitiano moʼoni ke fakafisi kiai. * (Mateo 6:13) ʼI tana fakafisi ʼaia, ʼe ina ʼiloʼi papau anai ʼe tokoni tuʼumaʼu pē anai ia Sehova kiā ia.—Vakaʼi ʼi te  pāsina 194, ia te fakamatala ʼaē ʼe ʼātakai ko tona kupu tāfito “ ʼE Ko He ʼu Meʼa Fakatemonio Moʼoni Koa?”

19. (a) Koteā ʼaē neʼe kākāʼi ʼaki e te Tēvolo ia te hahaʼi tokolahi ke natou tui ki ai ʼo ʼuhiga mo tona mālohi? (b) Ko te ʼu hisitolia fea ʼaē ʼe tonu ke mole fakamatala e te kau Kilisitiano moʼoni?

¹⁹ Tokolahi te hahaʼi ʼi te ʼu fenua ʼo te Potu ʼUesitē ʼe natou meʼa noaʼi ia te ʼu fua kovi ʼo te mālohi ʼo Satana, kae ko ʼihi age fenua ʼe mole natou meʼa noaʼi te faʼahi ʼaia. Pea ʼi te ʼu fenua ʼaia ʼo te potu ʼuesitē, neʼe kākāʼi e te Tēvolo ia te hahaʼi tokolahi ke natou tui ʼe mole  he tuʼakoi ʼo tona mālohi, kae ko te loi ia. Ko ʼihi hahaʼi ʼe natou fai tanatou ʼu gāue ʼaki te mataku fakavale ʼaē ki te ʼu laumālie agakovi. ʼE lahi ia te ʼu fakamatala ʼo ʼuhiga mo te ʼu gāue mālohi ʼaē ʼe fai e te kau temonio. ʼI te agamāhani, ʼe fakamatala fakafiafia te ʼu taʼi hisitolia ʼaia; pea ko te hahaʼi ʼe natou leleiʼia te ʼu fakamatala ʼaia. ʼE tonu koa ke tou lagolago ki te ʼu hisitolia ʼaia, ʼo tou toe hoko atu ia tona fakamatala ki niʼihi age? Kailoa ia, ʼe mole tonu ki te ʼu kaugana ʼa te ʼAtua moʼoni ke natou fai ia te faʼahi ʼaia ʼuhi ko tupuʼaga tāfito e lua.

20. ʼE feafeaʼi ki he tahi hana fakamafola ia te ʼu manatu hala ʼa Satana kae ʼe lagi mole ina ʼiloʼi ʼe ina lolotoga fakahoko ia te kākā ʼa Satana?

²⁰ ʼUluaki, kā fakamatala e he tahi he ʼu gāue lalahi neʼe fai e te kau temonio, pea ʼe lagolago ia kiā Satana ki te fakamafola ʼaē ʼo tana ʼu loi. ʼO feafeaʼi? ʼE tala ʼi te Folafola ʼa te ʼAtua, ko Satana ʼe feala ke ina fai he ʼu gāue fakaofoofo, kae ʼe toe fakatokagaʼi mai tātou ʼi te Tohi-Tapu ko Satana ʼe ina fakaʼaogaʼi ia “te ʼu fakaʼiloga loi” pea mo “te ʼu kākā.” (2 Tesalonika 2:9, 10) ʼUhi ʼaē ko Satana ʼe faiva ʼi te kākā, pea ʼe poto lelei ia ʼi te fetogi ʼo te manatu ʼo nātou  ʼaē ʼe natou leleiʼia ia te ʼu meʼa fakatemonio pea mo fai he ʼu meʼa ke natou tui kiai. ʼE lagi ko nātou ʼaia ʼe natou tui moʼoni ki te ʼu meʼa neʼe natou sisio kiai pea mo logo ki he ʼu meʼa, pea ʼe lagi natou fakamatala fakamālotoloto te ʼu meʼa ʼaia neʼe hoko kiā nātou. ʼAki te temi, ʼi te kua lahi fau ʼo te fakamatala liuliuga ʼo te ʼu meʼa ʼaē neʼe hoko, ʼe mole kei natou fakahā ia te moʼoni. Kapau ʼe kau ia he Kilisitiano ki te fakamafola ʼo te ʼu hisitolia ʼaia, pea ʼi tona fakahagatonu, ʼe ina fakahoko ia te kākā ʼa te Tēvolo, “te tamai ʼo te loi.” ʼE kau ia ki te fakamafola ʼo te ʼu manatu hala ʼa Satana.—Soane 8:44; 2 Timoteo 2:16.

21. ʼE tou fia fai palalau tāfito anai kiteā?

²¹ Lua, tatau aipē mokā neʼe hoko moʼoni he ʼu meʼa fakatemonio ki he Kilisitiano mo te ʼu laumālie agakovi ʼi muʼa atu, kae ʼe mole ina fakamatala liuliuga anai ia te ʼu hisitolia ʼaia ki tona ʼu tehina. Koteā tona tupuʼaga? Neʼe fakatotonu fēnei mai kiā tātou: “Tou sioʼi tuʼumaʼu ia Sesu, te Fakafofoga tāfito pea mo Haohaoa ʼo tatatou tui.” (Hepeleo 12:2) ʼEī, ʼe tonu ke tou tōkakaga tāfito kiā Kilisito, kae mole ko Satana. Koia ʼe tou fakatokagaʼi ai, ʼi te maʼuli ʼaē ʼa Sesu ʼi te kele, neʼe mole ina fai he ʼu fakamatala ki tana ʼu tisipulo ʼo ʼuhiga mo he ʼu laumālie agakovi moʼo fakamāholo tanatou nonofo, logolā te lahi ʼaē ʼo te ʼu fakamatala neʼe feala ke ina fai ʼo ʼuhiga mo te ʼu meʼa ʼaē neʼe fai e Satana pea mo ʼaē neʼe mole ina lava fai. Kae neʼe tokaga tāfito pē ia Sesu ki te fakamafola ʼo te logo ʼo te Puleʼaga. Koia, ʼe tou faʼifaʼitakiʼi anai ia Sesu pea mo te kau ʼapositolo, ʼo tou faiga ke tou fakatafito pē tatatou ʼu fai palalau ki “te ʼu meʼa taulekaleka ʼa te ʼAtua.”—Gāue 2:11; Luka 8:1; Loma 1:11, 12.

22. Koteā ʼaē ʼe feala ke tou fai ke tupu ai he “fiafia [tuʼumaʼu] ʼi selō”?

²² ʼE fakaʼaogaʼi tāfito e Satana ia te ʼu agakākā kehekehe, ʼo kau ai te gaohi meʼa fakatemonio, ʼi tana faiga ʼaē ke ina maumauʼi tatatou ʼu felōgoi mo Sehova. Kae ʼaki tatatou fehiʼa ki te meʼa ʼaē ʼe kovi pea mo pipiki ki te meʼa ʼaē ʼe lelei, ʼe mole tou foaki anai ki te Tēvolo ia he faigamālie ke ina fakavaivaiʼi tatatou fakatotonu ʼaē ke tou fakafisi ki te ʼu faʼahi fuli ʼo te ʼu meʼa fakatemonio. (Efesi 4:27) Kotou fakakaukauʼi age muʼa ia te toe “fiafia [lahi anai] ʼi selō” mo kapau ʼe tou haga “tutuʼu mālohi ʼo fakafeagai ki [te ʼu agakākā] ʼa te Tēvolo” ʼo aʼu ki tona fakaʼauha!—Efesi 6:11, kiʼi nota ʼi te lalo pāsina.